PHILIPIH-E
Polüh noh Philipih mlüh shaang üng ah kbia sa
1
1 Booi Jeishüh Khritoa xüh ei Polüh jah Timotih noh Philipih mlüh-a ka Pangsiim jum ei lü Booi Jeishüh Khrito üng shääng ei ktie, shaang khonge, shaang üng jah kpüi ktie veeia sa kah nih yuk lo ni.
2 Nih Pa Pangsiim jah Booi Jeishüh Khrito noh bä naak jah diim deih naak ning jah peshe.
3 Kah ning jah shüüm tä lü nah nih phäh-a Pangsiim kah je ei kti.
4 Nah nih bängea phäh kah tä sham tä lü je kyai naak üng kah tä sham kti.
5 I lüni ti ta nah nih jum ei lo ksüka kkhyüh tuh vei säpa thang kdo kkya kah kpyaü naak üng nah nih ngpüi ktie ni.
6 Pangsiim noh nang nih üng do ktia khuut sut ei lü ah poh sun Booi Jeishüh ah lo be veia ngsäng onga poh lä kkhai atia Pangsiim kah üm nak kti.
7 Kah mlung k'uma nah nih vekyet ktiea thoon lü kei noh asun kba ning jah ngngaih peet phyak kti ni. I lüni ti ta tuh-a khup kkyuma kba kah ve ni, ahlaan üng seh naak hlü da sit lü thang kdo kkya kpyaü kkhaia kah ktha naak üng ni, Pangsiim noh ah nah peeta bä naak üng nah nih ngpüi ktie ni.
8 Booi Jeishüh-a jah peeta mhlä kphya naak üng kah ning jah hmuhlü tong kti atia Pangsiim noh kshing kti ni.
9 Nah nih kphya naak sha lü adäm lo vaia, aksang nah nih hmat lo thei däm vaia a i üng phi nah nih yü khya lo thei vaia kah tä sham kti ni.
10 Asun üng akdo bok nah nih xü lo thei kkhaie. Booi Jeishüh Khrito ah kyum lo be üng mkhye naak üng ngsiim ngsaih lü kbäü ei naak üng nah nih lät kkhaie ni.
11 Nah nih shak hin ve soh ngnei shak kdo üng be baang kkhai. Asun Booi Jeishüh ah pät däk noh ni ah ning jah piit pyaang khoh kom. Asun üng va kkhyaange noh Pangsiima hlüng taai mküüi mtou lok kkhaie.
12 Kah be naeo, kah shoong toh naküt hina phäh-a thang kdo kkya ngjak kti kkhyaang nung lobok ktie ati sun kah ning jah kshing hlüshak kti ni.
13 I hok kba ni ti ta shang phuhlanga booi im mtät kti ngtuk kpoh abänge jah akse noh phi Booi Jeishüh-a xüh shoh-a kah thoona phäh üng khup kkyuma kba kah vek kti atia kshing lok ktie ni.
14 Khupa kah vea phäh üng kah be na akhäk sun Booi Jeishüh jum ei naak da sha lü ngkhääng lok ktie. Xe nalü käh kyüh ei laang lü Pangsiima kkhyü kpyaü hü dat ktie.
15 Akhäk noh ta ngkeei ngku lü ngnüt hei püi ktia mlung üng Khritoa mong kpyaü hü ktie. Akhäk noh ta do ktia mlung üng kpyaü hü ktie.
16 Asune noh ta Pangsiim noh kei hin thang kdo kkya kpyaü kkhaia ah nah xüh atia kshing ulü mhlä kphya naak üng khuut poh ktie.
17 Akhäk noh ta Khritoa mong kpyaü hü tuhan ktie kyo. Ah nih nglou ngthang naak vaia ah nih päta sääng taai naak vaia poh ktie ni. Khupa kah ve um üng sha lü kah khui kha vaia mtun ei ktie.
18 I a thoon lüphi ngpyuun ktia mlung üng phi nishe, am ngpyuun ktia mlung üng phi nishe, Khritoa mong ah nih kpyaüa phäh kah je kyai kti. Sha lüphi kah je ham kkhai.
19 I lüni ti ta nah nih tä shama phäh ni, Booi Jeishüh Khritoa Mkhyangsiima kpüi kpak naak üng ni kah lät lobe kkhai atia kah kshing ei kti.
20 Kah khuut ma-a phäh bäü naak käh ave vai hlü ei ngüshe kah ääp ei kti. Anghläi kuunga, tuh hia phi käh kyüh kyook ngke kkhyak ei laang lü thi ngüshe phi xüng ngüshe phi Khritoa büng ngminga nglou ngthang naak vai kah hlü ei kti ni.
21 Keia xün naak ta Khritoa jou taai ngshing ngte naak vai ni. Kah thih ta keia phäh-a sha lü do kkhai.
22 Lüphi kah xün ham ta khuut kdo kah poh yah bok kkhai. Asuna thoon lü hon xü ei vai laang am kshing ngü.
23 Kah mlung lot la kti ni. Kah nghngi siim shak hin shot talü Khritoa hlonga kah ve-ei hlük kti. Asun do bok kti.
24 Lüphi nah nih phäh-a kah ve ham vai hlü bok kti.
25 Asun jum lü kah ve mhläi ma kkhai atia kah hmat ni. Nah nih jum ei naaka däm lo vai jah nah nih je kyai naak vaia nah nih hlonga kah veham kkhai ni.
26 Asuna thoon lü nah nih veeia kah pha lo be üng nang nih-e noh keia phäh Khrito nah nih mküüi mtou naak vai kho hah pa velok kkhai ni.
27 Lüphi aktung boka ta nah nih ve soh ngnei shak Khritoa thang kdo kkya üng angkäk vai hlü kkhai ni. Nah nih veeia lobe ngüshe phi käh lobe lü athuuk naaka ve ngüshe phi ngkhääng ktia mlung mat üng thang kdo kkya jum ei naaka phäh nah nih mtun ei yüm vai kah ngja-hlük kti.
28 Nah nih ye käh jah kyüh ua. Am nah nih kyüh ei laang u ta ngnääng u kti lü ah nih nih-e shuum ktie atia ah nih phäh-a ngshing ngte naaka thoon kkhai. I lüni ti ta Pangsiim noh ngnääng naak ning jah pek ktie ni.
29 Khritoa xüh shoh-a thoon u kti lü nah nih jum ei däk käh nik ktia ah phäh-a khui kha khaam ei naak hin Pangsiima bä naak ni.
30 Tuh ta kei üng ngpüi lü jum ei naak ngshun üng nah nih vaang lok ktie ni. Ahlaana ngshun üng kah shoong toh phi nah nih hmukhoi ktie. Nah nih ngjaaka kba asuna jum ei naak ngshun üng kah ve-ei ham kti ni.