1 Nang nih nghnu mie noh phi nah nih khong pa-a pyen ksang na-ua. Asun kba nah nih thoon ta kpa mi akhäk noh thang kdo kkya am ngja-hlü ulü phi ah nih kkhyuea ve soh ngnei shak hmu-ulü pyen vai käh hlü xa ktia jum ei lok kkhaie ni. 2 Nang nih-e noh Pangsiim nah nih lei shong ta ngsiim ngsaih ktia nah nih ve soh hmulo-ulü jum ei lo to kkhaie ni. 3 Kkhyaangea hmuh yah ngpiit ngpyaang aktung boka käh ta-ubä. Nah nih lu ksuuia phäh phi xüi lu shun lu keh käh shum ei ubä. Nah nih nu pa jah nah nih kpa mi noh am ah kkhyäih khoh shui shak käh shui sha hlü ubä. 4 Kkhyaange noh am ah nih hmuh yah nah nih mlung kkyoong ngnei shak hin käh sim pyak khoh ktia looi ngkäih ngtou ngtaai kkhaia mtun ei ua. Nang nih-e hin hnip hnooi lü lit lita nah nih ve ei ta Pangsiima ngngaih-a phu mah bok kti ni. 5 Ahlaan üng Pangsiim lei shong lü Pangsiim ääp ei kti nghnu mie noh asun kba ngtou ngtaai vai mtun ei ktie ni. Asue noh ah nih kpa miea pyen ksang nak ktie. 6 Asun kba Sarah noh Apyahama pyen ksang nalü ah nih üng “Kah Booi Pa” ah ti. Nang nih-e hin akdoa velü kyüh ei naak am ave ta Sarah-a sa nghnua nah nih thoon ktie ni.

7 Nang nih kpa mie noh phi nah nih nghnu mie sun ah nih ngjung ktha ngseek bok kti atia kshing lü jah su ngngaih peet ua. Nghnu mie phi nang nih-ea kba Pangsiima bä naak üng shak ngshääi yah lü khoh kshäänga phi thoon ktie atia shüüm lü jah lei shong ua. Asun kba nah nih ve ta nah nih tä sham sun ning jah shung khaam kti käh velü Pangsiim noh ning jah ngngaai kkhai ni.

8 Akpäih naaka kah pyen hlü ta nah nih bänge mlung ng'yäp lü hnuun mata kba mat noh mat kphya na-ua. Nah nih püi mpyeen ei lü hnip hnooi ktia mlung mhneem lü ve-ua. 9 Nah nih kkhaana mkhye kti ave ta käh thung ei be ubä. Ning jah she sham kti ave üng phi käh she sham be ubä. Thung ei bea kthaka Pangsiim noh do kya naak ah peet vaia tä sham peet u bä. I lüni ti ta do kya naak nah nih yah vaia Pangsiim noh ning jah xü kti ni. 10 I lüni ti ta Sangsiim üng ng'yuk kti ta “Kkhyaang mat hin je kyai naak üng velü phyong tääm mya shat lü ah ve hlü ta am do ktia kkhyü käh ah pyen vaia ah mpyong mbüüp yah kkhai ni. Käh hleei hlak käh sok sek lü ve yah kkhai ni. 11 Ah mkhye mshoh naak khoia kkhyüh nglat lobelü do ktia khuut poh yah kkhai ni. Kkhyaange üng ng'ye lü ve vai mtun ei yah kkhai ni. 12 I lüni ti ta Pangsiim noh pyuun ktia kkhyaang sun hmuk kti ni. Ah nih-a tä sham sun anghläia ksang nak kti ni. Lüphi mkhye mshoh ktia kkhyaang ta Pangsiim noh thüi shei ktia mik hmaai üng bük kkhai ni” tilü vek kti.

13 Nang nih-e hin do kti khuut nah nih poh hlü ta u noh ning jah mkhuh mhlih hlük kkhai ja. 14 Lüphi nah nih pyuuna phäh üng khui kha naak nah nih shoong ta Pangsiim noh do kya naak ning jah pek kkhai ni. U phi käh kyüh lü käh pyaang ma ua. 15 Asuna kthaka Khrito sun ngsiim ngsaih kti nah nih Booi Pa-a ngngaai ei kyet lü lei shong ua. Mat mat noh “Khrito i lü nah jum ei kti ni” tilü ah ning ngthäh ta nah nih Khritjaan ääp ei naaka mong akdo boka mtheh-a. 16 Hnip hnooi ktia mlung mhneem lü mshak bea. Nah nih ngnei shak ve soh hin nah nih mlung noh käh ah kbäü ei vaia mtun ei ua. Asun üng va kkhyaange noh ah ning jah thang msheet üng ning jah pyen ei hü ktie sun noh nang nih-e Khrito üng nglooi ei lü nah nih ve soh ngnei shak kdo hmulo-ulü ngke ei lok kkhaie ni. 17 I lüni ti ta Pangsiima hlü eia ani ta akdo poh-a phäh khui kha khaam ei hin do bok kti ni. Nah mkhyea phäh khui kha nah khaam ta alapa thoon kti. 18 I lüni ti ta Khrito kuung noh nih nih-ea mkhyea phäh üng thih naak ahunata khaam ei kti ni. Ah nih noh nih nih am pyuun ktie sun Pangsiima veei ah jah kpha be vaia phäh ah nih pyuun kyo lüphi ah puum sha thih naak khaam ei kti ni. Lüphi Pangsiim noh Mkhyangsiim üng ah xün shak be ni. 19 Kona mulai pea khup üng kyum ktiea veeia sit lü ngmüi mkhyae üng thang kdo kkya jah kpyaü vaai kti. 20 Asun sun ahlaan üng Pangsiima pyen käh ksang nak ktie kkhyaangea ngmüi mkhyae ni. Noah-a kha üng mhlüüi nu ah shak üng Pangsiim noh ah mlung mshaaü lü kkhyaange ah nih vuuk be vaia jah yüng kti ni. Lüphi kkhyaang kkhyet sa däk däk va tuia kkhyüh lät ktie. 21 Asun sun patiso üng mshuui msäp naak ni. Patiso hin puum sha le looi kti mthih kpyo naak am ni. Patiso ti nak kti ta mlung kkyoong üng ve soh ngnei shak käh kbäü ei lü Pangsiim üng kkhyü taam ei naak ni. Booi Jeishüh Khrito thih naaka kkhyüh ah thoh lobea phäh üng nang nih-e hin patiso üng kuum kyan naak nah nih yah ktie. 22 Booi Jeishüh Khrito kkhaan khoa kaai lü Pangsiima kkheet lama vek kti. Ah nih sun kkhaan kho ngshäe, kho yaaie jah shang phuhlangea phun kam abäng sun Booi Jeishüh-a mkha kkea vepäih ktie.