4
(Marküh 1.12-13; Lükah 4.1-13)
1 Shatan yaai pa noh ah hlo hleep vaia Mkhyangsiim noh Jeishüh mkyaanga ah seh shak.
2 Kho mhnüüp kphyü kip ei jeih lü Booi Jeishüh ei noh kkhyoot ei lok kti.
3 Asun üng Shatan yaai pa lolü “Nang hin Pangsiima ning sa ksanga nah thoon ta hina lung hin kkhaai kpeh-a thoon lo kkhaia pyen tua” ah ti.
4 Asun üng Booi Jeishüh noh “Sangsiim üng ng'yuk kti ta ‘Ei ook hin kkhyaanga xün naak vai aktung bok am ni. Pangsiima pyen kkhyü nglung abäng aktung bok ni’ tilü vek kti” ah ti be.
5 Kona Shatan yaai pa noh Jeirüh Shalema mlüh ngsiima lai püi lü hjok khah im nua mkhyuunga ah ngdüih shak.
6 Shatan yaai pa noh “Nang hin Pangsiima ning sa ksanga nah thoon ta ahina kkhyüh juksou-ina. I lüni ti ta Sangsiim üng ng'yuk kti ta ‘Pangsiim noh kkhaan kho ngshäe nang ah nih ning mseei kyet vaia ah jah sük ni. Nah kho lung üng käh nah mshuk mhleem ei vaia ah nih kut üng ning jäk shoon kkhaie’ tilü vek kti” ah ti be tü.
7 Booi Jeishüh noh ta “Lüphi Sangsiim üng hin kba phi ng'yuk kti ni. ‘Nah Booi Pa Pangsiim käh nah kook saam vai’ tilü vek kti ni” ah ti be.
8 Kona Shatan yaai pa noh Booi Jeishüh sun msuung k'hlüng nua khü lü ahina kho mdek üng vek kti teng pe naküt jah ah nih nih-ea hlüng taai booi maang naake ah jah mhnüh.
9 Shatan yaai pa noh “Kah ma-a mkhuuk üng ngdääng lü nah nah hjok khah ta hina teng pe jah ah nih hlüng taai booi maang naak abäng kah ning pek kkhai ni” ah ti be tü.
10 Asun üng Booi Jeishüh noh Shatan yaai pa üng “Sita! Sangsiim üng ng'yuk kti ta ‘Nah Booi Pa Pangsiim däk va nah lei shong hjok khah yah kkhai. Ah khuut nah poh yah kkhai’ tilü vek kti ni” ah ti be.
11 Kona Shatan yaai pa shot be lü kkhaan kho ngshäe noh lo-ulü Jeishüh ah nih mshüüm mseei lo u.
(Marküh 1.14-15; Lükah 4.14-15)
12 Patiso Johaan khup üng ah nih khyum u sun Jeishüh noh ngja-lüta Kalile hnea sit be kti.
13 Lüphi Nasaret mlüh-a ta am ve vaai. Kalile tui li nua peia vek kti Kapanom mlüh-a ve ei vaai kti. Asun hin Sheipu Lung mjü jah Natalih mjüa ve naaka tui khyonga kyak kti.
14 Asun hin shahma ngsiim Hei Shajah-a malam pyena kba thoon lok kti.
15-16 Ah nih-a pyen ta “Seiphu Lung jah Natalih-a tui khyong hin Jotan mlik tuia ye da vek kti xooi ni. Mpang lai tui da säh vaai kti xooi. Ahina Kalile tui khyong üng Pangsiim am kshing kti nung ve u. Lüphi anghmüp naaka vek ktie noh akvaai nu hmuk kkhaie ni. Thih naak kho mthan üng vek ktiea phäh xün naak kho kthaai lok kkhai ni” tilü ah pyen.
17 Asuna ksüün üng sut ei lü Booi Jeishüh noh “Nah mkhye üng vuuk bea. Pangsiima up naak phalo hnüh kti ni” tilü kpyaü hü kti.
(Marküh 1.16-20; Lükah 5.1-11)
18 Kalile tui li peia ah seh hü k'um üng nga kshui ngbe ngna xooi Shimon jah Antere ah jah hmuh. Ngbe ngna xooi sun noh tui li sua ngvaai vooi ei kti xooi.
19 Booi Jeishüh noh “Kei nah läk nih-a. Nga nah nih shuia kba kkhyaang nah nih shui vaia kah ning jah msuuk mtheh kkhai ni” ah ti.
20 Jeishüh noh ah pyen jah ta ah nih ngvaai jah hoih hüt lü ah nih läk.
21 Sit be tü lü Jakop jah Johaan ngbe ngna xooi ah jah hmuh be tü. Ah nih pa mah mah mhlüüia k'uma ngvaai phyüüi ei ktie. Booi Jeishüh noh ah jah khü.
22 Ahunata mhlüüi jah ah nih pa jah hoih hüt lü Jeishüh-a hnu ah nih läk.
(Lükah 6.17-19)
23 Booi Jeishüh noh Kalile hne abäng ngleng hü lü Sangsiim ngthei naak kyonga Pangsiima kkhyü jah msuuk mtheh kti. Pangsiima pea mong thang kdo kkya kpyaü kti. Amjü mjüa am shi khyaih ktie ah jah mdo be.
24 Asun üng ta Booi Jeishüh-a thang Shürih hne abäng üng ngpyaü hü päih kti. Asuna thoon lü kkhyaange noh am khyaih kti abäng, amjü mjüa mneh mah ktie, mhnat ei ktie, kho yaaia vaan naake, ksiina poh-e, ah kut kho kthie ah veeia ah nih jah lo püi u. Booi Jeishüh noh abäng ah jah mdo be.
25 Asun üng ta Kalile hne üng ka Teka Polih hne üng ka Jeirüh Shalem mlüh üng ka, Jüdah hne üng ka jah Jotan mlik tui saye da ka kkhyaang pä nu noh Booi Jeishüh ah nih läk u.