24
(Marküh 13.1-2; Lükah 21.5-6)
1 Booi Jeishüh hjok khah im nua kkhyüh lut lolü ah seh k'um üng akläke ah veeia lo-ulü “Büka, angvaaio, hjok khah im nu hin ngtou kti lung kdo üng ah nih shak u ni” ah nih ti u.
2 Booi Jeishüh noh ta “Hjok khah im nu jah ngtou kti lung kdoe nah nih jah hmuk ktie, am ni bä. Ngngaai ua, kei kah pyen ma kkhai. Mhnüüp mat mat üng ta lung mata kkhaan mat käh ngtaih ti onga sim pyak päih kkhai ni” tilü ah pyen.
(Marküh 13.3-13; Lükah 21.7-19)
3 Booi Jeishüh Kshi Dung msuunga ah pät däk ah ngshut k'um üng akläke ah veeia lo-ulü “Angvaaio, asun bange i tüh-a thoon lok kkhaie ni. Nah lo be hnüh vaia mhnüüp jah akpäih naaka ksüün apha lo vai sun i hok kba ngshing ngte lok kkhai ni. Jah mtheh-a” ah nih ti u.
4 Booi Jeishüh noh “U noh phi lam käh ah ning jah hmü shak vaia mseei ei ubä.
5 I athoon lüni ti ta ‘Kei Khrito ni’ tilü keia ngming ngming nalü kho hah pou lok kkhaie ni. Asune noh kkhyaang kho hah pa lam jah hmü shak kkhaie ni.
6 Ngshun ulü üng-phou ulü nah nih ngjaak üng käh sääi ubä. Asun bange thoon loma yah kkhaie ni. Lüphi akpäih naaka mhnüüp ta ahunata am phalo ham.
7 Kkhyaang mjü mat jah mat ngtuk kkhai xooi. Teng pe mat jah mat ngshun kkhai xooi ni. Tui khyong naküta kho jo kkhai, ngkhyü ngshüün kkhai ni.
8 Lüphi ahine hin nghnu mi mat na hmi lohlü lü ah kkhon noh ah mshoh ei lo ksük üng ni atäng ta.
9 Kona kkhyaange noh ning jah mkhuh mhlih ulü ning jah man ulü ning jah hnim kkhaie. Kah hmaaia phäh kkhyaang mjü naküt noh ning sok ei kkhaie ni.
10 Asuna ksüün üng kkhyaang kho hah jum ei naak üng nglat be kkhaie. Mat jah mat ng'ap ei kkhaie. Mat jah mat ah nih püi sok ei kkhaie.
11 Shahma ngsiima hana som kti kkhyaang kho hah pou lolü kkhyaang aknung lam jah hmü shak kkhaie.
12 Kkhyaange shili shan tak lobok kkhaie. Mat noh mat am mhlä kphya na-ti u.
13 Lüphi akpäih naak säpa kkhyü shing üng vek kti ta kuum kyan naak yah kkhai ni.
14 Pangsiima pea mong thang kdo kkya hin kho mdek naküta kpyaü hü kkhaie. Asun hin kkhyaang mjü naküta phäh shak shia thoon kkhai ni. Kona akpäih naaka ksüün phalo hnüh kkhai.
(Marküh 13.14-23; Lükah 21.20-24)
15 Shahma ngsiim Daneil noh Sangsiim üng ah yuk hüta kba mtuih mleh kti akkyüh kshe sun ngsiim ngsaih ktia hnün üng ah ve nah nih hmuh üng Sangsiim bük kti noh ta ngja-kya she.
16 Asun üng Jüdah hne üng vek ktie msuung da sen u-she.
17 Asun üng ksha-a vek kti noh im k'uma lut lü i käh lou ei vaai ti she.
18 Loua khüüi kti phi ksoonga sit lü jih käh lou ei vaai ti she.
19 Asuna mhnüüp üng ayünga am vek ktie jah sa na üng sih tu kti nghnu mie hin mpyeen ei she pi pi kkhaie.
20 Nah nih sen ei ua mhnüüp hin kho kshik sho am ani üng Pangsiim ngam püi mhnüüp üng käh angbüh vaia tä sham ubä.
21 Asuna mhnüüp üng kkhyaange noh khui kha naak hmu pi pi kkhaie ni. Aksük shääia Pangsiim noh kho mdek ah mhnün msenga kkhyüh asun kba khui kha naak am thoon khoi ham. Malama itüh-a phi am thoon ti.
22 Asuna khui kha naaka ksüün Pangsiim noh am ah tooi shak ta u phi am lät khoh. Lüphi ah xü kse-ea phäh-a Pangsiim noh asuna ksüün mtooi kkhai ni.
23 Asuna ksüün üng mat mat noh ‘Büka, ahia ni Khrito ah ve.’ Am ani üng mat mat noh ‘Sa-a ni Khrito ah ve’ ah nih ti ta käh jum ei ubä.
24 Khrito hana som ktie jah shahma ngsiima hana som ktie pou lo-ulü ngshing ngte naak jah mün sam kshe poh tuhan kkhaie. Ah nih khyaih khoh-a ta Pangsiima jah xü kse-e lam jah hmü shak kkhaie kyo.
25 Asuna thoon lü mseei ei ksang ubä. Kah ning jah mtheh päih pääng u ni.
26 Asuna thoon lü ‘Büka, mkyaanga Khrito vek kti ni’ ah nih ti u ta käh sit ubä. ‘Büka, im k'uma Khrito vek kti ni’ ah nih ti ta käh jum ei ubä.
27 Kho mlaih noh nghngi lo da kkhyüh kho kyaak säpa aksäih hü päih-a kba kei, Kkhyaang Sa, kah kyum lo be üng thoon kkhai ni.
28 Akthi kkyua ve naaka laang tah ngkhääm lok kkhaie ni.
(Marküh 13.24-27; Lükah 21.25-28)
29 Asuna khui kha kshe nu angpääng jah ta jiin mü lok kkhai ni. Mah khya am vaai loti. Kkhaan khoa kkhyüh aai shi kyalok kkhai ni. Kkhaan kho ngshüün lolü khye shoh lopäih kkhaie ni.
30 Kona kei, Kkhyaang Sa-a ngshing ngte naak kkhaan khoa pou lok kkhai. Kho mdeka kkhyaang mjü kse-e naküt phi mbooi kyap kkhaie. Kei, Kkhyaang Sa kah hiit jah däm duh kti jou taai naak üng kho ngmei üng kah lo sun nah nih hmuk kkhaie.
31 Pangsiim noh ah kkhaan kho ngshäe sun kpuung tum kthai kdäm nu üng kho mdek akhüt naak säpa jah tüüi lok kkhai. Kho mdek kphyuta kkhyüh lü kho mdek jah kkhaan kho abäng üng ka Pangsiima jah xü kse-e sun jah mkhääm hü kkhaie” tilü ah jah mtheh.
(Marküh 13.28-31; Lükah 21.29-33)
32 Asun üng Booi Jeishüh noh “Kthei dung üng mseei ei ua. Ah ngbaane üng angpyü sa jah ah hnah hlip sa ah luh lo nah nih hmuh üng ta kho khye lo hnüh kkhai ni tilü nah nih kshing ktie ni.
33 Asun kba ni, tuh-a kei noh kah pyene hin athoon ve lo nah nih hmuh lo üng ta akpäih naaka ksüün säh lolü phalo hnüh kkhai atia nah nih kshing khoh ktie ni.
34 Ngngaai ua, kei kah pyen ma kkhai. Asune naküta thoon ve hlaana tuh-a kha üng kkhyaange hin am khyük laang u.
35 Kkhaan kho jah kho mdek khyük nih lüphi kah kkhyü am khyük laang.
(Marküh 13.32-37; Lükah 17.26-30, 34-36)
36 Asun kba athoon vaia mhnüüp jah ksüün sun kkhyaang noh phi am kshing. Kkhaan kho ngshäe hngoh noh phi am kshing u. Pangsiima nah Sa kei hngoh noh phi am kshing ngü. Pa Pangsiim däk noh ni ah kshing kom.
37 Noah-a kha üng kkhyaange ah nih ve soh ua kba ni, kei Kkhyaang Sa kah kyum lo be üng kkhyaange ah nih ve kom u.
38 Noah-a kha üng mlik pi tuia phu lo hlaana Noah ah mhlüüi kdäm k'uma ah luh vei säpa kkhyaange ei ok ktie. Ah nih kkhyu lou ei ktie. Ah nih sa phi jah pe ei ktie.
39 Mlik pi tui phu lü tui üng ah nih khyüh leih hlaan u su i a thoon lok kkhai atia am kshing ei u. Kei, Kkhyaang Sa, kah kyum lo be üng phi ahin kba kuunga vek kkhai ni.
40 Kpa mi nghngih noh lou poh kkhai xooi. Kah kkhaan kho ngshäe noh mat kaai püi lü mat ta ta-hüt kkhaie.
41 Nghnu mi nghngih noh kkhaai deeng yüm kti xooi. Kkhaan kho ngshäe noh mat kaai püi lü mat ta ta-hüt kkhaie.
42 Asuna thoon lü mseei lü mtät ua. I a thoon lüni ti ta nah nih Booi Pa i a mhnüüp üng phalobe kkhai ati sun am kshing u kti.
43 Mthana i a ksüün üng mpyuk ei lok kkhai ati sun im mah noh kshing lü ah mtäh ta mpyuk ei im k'uma lut lü mpyu ei khoh kkhai am ni ati sun nah nih kshing ktie ni.
44 Asuna ng'yüia anghläia mtät lü ngshääm kyet ua. I lüni ti ta am nah nih su ngngaih-a ksüün üng, kei Kkhyaang Sa kah phalobe kkhai ni.
45 Üm naak ngkäih vai jah theem ngvaai kti xüh shoh ta u ni. Ah mah pa noh ahina xüh shoh hin ah im kkyoong up kkhaia ah msoon. Ahina xüh shoh noh xüh shoh ah püie üng aksüün ah pha lo tä lü ei ook vai ah jah peet.
46 Ah mah pa ah pha lo be üng ahin kba ah poh sun ah hmuh lo be üng asuna xüh shoh-a phäh do kya naaka thoon kkhai.
47 Ngngaai ua, kei kah pyen ma kkhai. Ah mah pa noh asuna xüh shoh sun üng ah im lou jah ah külak naküt up kkhaia msoon kkhai ni.
48 Lüphi xüh shoh sun üm naak vaia am ah looi ngkäih ta ‘Kah mah pa-a pha lo be vai kho vei hlü ham kti ni’ tilü ah pät noh ah pät pyen kkhai.
49 Xüh shoh noh ah xüh shoh püie jah te lü ktaai ktume jah ei ook püi kkhai.
50 Asuna thoon lü xüh shoh noh am ah kshing, am ah su ngngaih-a ksüün üng ah mah pa phalobe kkhai ni.
51 Ah mah pa noh asuna xüh shoh sun jah kpaai shak kkhüt kkhai. Do ktia hana som kti kkhyaangea dä tak kkhai. Asua mbooi kyap lü ah ha kkhyüüt ei kkhai.