21
(Marküh 11.1-11; Lükah 19.28-40; Johaan 12.12-19)
1 Booi Jeishüh jah akläke Jeirüh Shalem mlüh üng säh lo-ulü Kshi Dung msuung peia vek kti Pet Phakei ngnama ah nih pha lo u üng Booi Jeishüh noh akläk nghngih ah jah natüih ma.
2 Akläk xooia joon hlaana Jeishüh noh ah nih xooi üng “Nah nih ma-a ngnama sit nih-a. Asuna ngnama nah nih vaan jah ta ngkhun ei kti ngshe la jah ah sa nah nih jah hmuvaai kkhai ni. Asun jah shuut lü ahia jah lo püi nih bä.
3 Mat mat noh ‘A i nah nih poh kti ni’ tilü ah ning jah kthäh ta ‘Booi Pa noh hlü ei kti ni. Kah nih ning tha lo be hnaam kkhai ni’ ti nih bä” tilü ah jah sük.
4 Shahma ngsiima malam pyen aküm seei vaia asun kba thoon vek kti ni.
5 Shahma ngsiima malam pyen ta “Shion mlüh üng hin kba mtheh-a. Büka, nah shang phuhlang nah veeia lo ve. Hnip hnooi lü ngshe la jah ah sa ngsum ei kti ni” tilü vek kti.
6 Akläk xooi sit nih lü Booi Jeishüh-a pyena kba kuunga ah nih poh.
7 Ngshe la jah ah sa sun Booi Jeishüh-a vei ah nih jah kpha lo. Ngshe la jah ah sa-a mting lua ah nih jih phah nih lü Booi Jeishüh ngsum kti.
8 Kkhyaang pä nu noh Booi Jeishüh-a lo naaka lam üng ah nih jih ah nih jah phah u. Akhäke noh ta moa nghleeng hnah la-vaai ulü ah nih phah peet u.
9 Kkhyaang pä nu noh ah hnu ma-a sit ulü “Hoshana, Davita tu kpa nih mküüi mtou vai u. Booi Pa-a ngming üng lok kti hin do kya naak vek kti ni. Kkhaan khoa vek kti Pangsiim jou taai mah she” tilü ngpyaang ktie.
10 Jeishüh Jeirüh Shalem mlüh-a ah vaan lo üng mlüh-a ka kkhyaang abäng ah nih mlung tot hloh lok ktie. “Ahina kkhyaang u ni” tilü ngthäh ktie.
11 Kkhyaang pä nue noh “Ahin Kalile hne Nasaret mlüh-a ka shahma ngsiim Jeishüh ni” ah nih ti be u.
(Marküh 11.15-19; Lükah 19.45-48; Johaan 2.13-22)
12 Booi Jeishüh sun hjok khah im nu ngvoonga lut kti. Asua jooi ktie jah kkhyäi ktie sun kho kpunga ah jah mshot. Ngui hlai ktiea ngui mphään naak phi ah jah buh mhlat mhlat. Müüm jooi ktiea ngshut naak phi ah jah buh mhlat mhlat.
13 Booi Jeishüh noh “Sangsiim üng ng'yuk kti ta ‘Kah im hin hjok khah naaka im nu ni tilü shui kkhaie ni’ tia vek kti. Nang nih-e noh ta mpyuk ei khuuia nah nih poh ei u” tilü ah jah mtheh.
14 Amik mü jah akho kthie hjok khah im nu ngvoonga k'uma Booi Jeishüh-a veei lok ktie. Booi Jeishüh noh ah jah mdo be.
15 Lüphi khotu ngsiim kdäme jah Sangsiim ktheeme noh Booi Jeishüh-a poh mshah mün sam kshe hmu-ulü hjok khah im nua k'uma hnashene noh “Hoshana, Davita tu kpao” ti-ulü ah nih ngpyaan sun ngja-ulüta thüi shei lopyei ktie.
16 Ah nih-e noh “Ahina hnashenea ngpyaan sun nah ngjaak bä” ti-ulü Jeishüh ah nih kthäh u. Jeishüh noh “Ä, kah ngjaak ni. Sangsiim üng ng'yuk kti ta ‘Hnashene jah athoie noh nang Booi Pa ning mküüi mtou kkhaie ni’ ati sun ahun hngoh phi am nah nih hmuh khoi ubä” tilü ah jah kthäh be.
17 Asune jah ta-hüt lü mlüh-a kkhyüh shot lü Pet Tanih ngnama mthan mat kkhin ei vaai kti.
(Marküh 11.12-14, 20-24)
18 Angooi üng ngooi lam nua Booi Jeishüh Jeirüh Shalem mlüh-a ah seh be lama ei noh kkhyoot ei kti.
19 Lam peia kthei dung hmulü kthei dunga kuung da sit kti. Lüphi kthei dung sun ah hnah hluup nu däk hmulü ah ktheih ta am ve ngtu. Asun üng Booi Jeishüh noh “Kthei dungo, nang hin itüh-a phi nah ngthei ti kkhai am ni” tilü ah she sham. Ahunata kthei dung sun ng'jaai-in lok kti.
20 Akläke noh asun ah nih hmuh u üng mün sam tong ktie. “Ahina kthei dung ta ahunata i lü ng'jaai-in lok kti ni” tilü ah nih kthäh u.
21 Jeishüh noh “Ngngaai ua, kei kah pyen ma kkhai ni. Nang nih-e noh up lat naaka mlung käh vek ktia nah nih jum ei ta kei noh ahina kthei dung üng kah poh-a kthaka däm duh ktia nah nih poh khoh kkhaie. Asuna kho msuung üng ‘Sita, nah pät mlik tuia kya-in vaaia’ tilü nah nih pyen khoh kkhaie ni. Asun kba kuunga thoon vek kkhai ni.
22 Jum ei lü nah nih tä sham ta nah nih tong naküt Pangsiim noh ning jah poh peet kkhaie” tilü ah pyen.
(Marküh 11.27-33; Lükah 20.1-8)
23 Booi Jeishüh hjok khah im nua vaang be lü kkhyaange jah msuuk mtheh kti. Asun k'um üng khotu ngsiim kdäme jah Jüdah khong mange ah veeia lo-ulü “U a mkhyah üng ahin kba nah poh ni. Ahina hiit u noh ah ning peet ni” tilü ah nih kthäh u.
24 Booi Jeishüh noh “Kei noh phi i mä kah ning jah kthäh be ma kkhaie. Nah nih nah mshak be u ta ahin u a hiit üng kah jah poh mshah ati sun kah ning jah mtheh be kkhaie ni.
25 Johaan sän patiso jah pek kkhaia Pangsiima tüih lo mä, kkhyaanga tüih lo mä” tilü ah jah kthäh. Mat jah mat ngthäh ngkhyah ulü “‘Pangsiima tüih lo ni’ nih ti u ta ‘Asun kba ani ta a i a am nah nih jum ei ktie ni’ tihlü kba.
26 ‘Kkhyaanga tüih lo ni’ nih ti u ta kkhyaange jah kyüh phya kba. I a thoon lüni ti ta Johaan sun shahma ngsiim ksang ni atia abäng noh jum ei ktie” tilü ngsi ngjaang ktie.
27 Asun üng ta “Am kshing u ngü” tilü Booi Jeishüh ah nih mshak be u. Booi Jeishüh noh “Asun kba ani ta ahine hin u a hiit üng kah jah poh ati sun kei noh phi am ning jah mtheh u ngü” tilü ah jah mshak be.
28 Booi Jeishüh noh “Ngngaai ua, kkhyaang mata sa kpa nghngih vek kti. Ah sa kpa akdäma veeia sit lü ‘Tuh ngooi ngbom ktheih ngvoonga khuut poh vaaia’ ah ti.
29 Ah sa kpa noh ‘Am yü ngü’ ah ti be. Lüphi hnua ah mlung nglat lobe lü ngbom ktheih ngvoonga khuut poh kkhaia sit kti.
30 Ah nih pa sun ah sa kpa akdiika veei sit be tü lü asun kba ah xüh vaai be tü. Ah sa kpa akdiik noh ‘Kah khüüi vaai kkhai ni’ ah ti be. Lüphi am sit ngtu.
31 Asuna ah sa xooi noh u noh ni ah nih pa-a hlü ei ah poh” tilü ah jah kthäh. “Akdäm ni” ah nih ti be u. Booi Jeishüh noh ah nih-e üng “Ngngaai ua, kei kah pyen ma kkhai. Khoon to k'hlooke jah boh bah kti nghnu mie hin nang nih-e ning jah khe ulü Pangsiima pea vaang ma kkhaie ni.
32 I lüni ti ta Patiso Johaan hin nang nih-ea veei lolü Pangsiima hlü eia i hok kba ve soh vai sun ning jah mhnüh kti. Nang nih-e noh ta asun am jum u kti. Lüphi khoon to k'hlooke jah boh bah kti nghnu mie noh ta ah sun jum ei ktie ni. Ahin hmukyo u kti lüphi nang nih-e ta am vuuk be u kti. Johaan sun am jum ei u kti” ah ti.
(Marküh 12.1-12; Lükah 20.9-19)
33 Booi Jeishüh noh “Pum msäp mat ngngaai be tü ua. Mdek mah noh ngbom dung nglin lü ah ngvoon mbüüp. Ngbom tui shuui naak vai mdek sou lü ah pyaan. Kyäng mat ah shak. Kona ngbom ngvoong sun kkhyaange üng jah kkhah hüt lü pe ksea sit kti.
34 Ahmin lo ksüüna ta ngvoong mah noh ah jah kkhah-ea veei ah xüh shoh-e jah tüüi lü ngbom ktheih akhäk ah jah laak vaai shak.
35 Lüphi ah jah kkhah-e sun noh ah xüh shoh eie sun jah man ulü mat ta ah nih te u, mat ta ah nih hnim u, mat ta lung üng ah nih khoong tong.
36 Kona ngvoong mah noh xüh shoh akse ah jah tüih be tü. Tuh-a ah jah tüih ta nung bok ktie. Lüphi ah jah kkhah-e sun noh aksüka ah jah tüih-a kba ah nih jah poh be tü u.
37 Akpäih naaka ta ngvoong mah noh ah sa kpa sun ah nih veeia ah tüih ‘Ahina kkhyaang ta lei shong kkhaie ni’ tilü ah pät noh ah pät ah pyen.
38 Lüphi ah jah kkhah-e noh ah sa kpa sun ah nih hmuh üng ‘Ahin ta ngvoong ka nak kkhai khoh kbi ni. Ngpyaih xat ua. Nih hnim vai u. Asun üng ah khoh nih yah ei kkhaie ni’ tilü ngthäh ngkhyah ktie.
39 Asun üng ta ngvoong mah-a sa sun ngvoong thea kaih lü ah nih hnim u.
40 Asun üng ngvoong mah ah lo üng ta ah jah kkhah-e sun i hok kba jah poh kkhai ni” tilü Booi Jeishüh noh asune ah jah kthäh.
41 Ah nih-e noh “Ngvoong mah noh ahina kkhyaang kshe-e ta aksanga jah hnim hlü ve. Ahmin lo ksüün üng looi ngkäih ktia ngbom ktheih pek kkhaia kkhyaang kdoe üng jah kkhah be kkhai ni” tilü ah nih mshak be u.
42 Booi Jeishüh noh “Sangsiim üng i hok kba ng'yuk kti ati sun am nah nih hmukhoi ktie mä. ‘Ut im kshae noh käh hlü ei lü ah nih hoih ma-a lung sän akpäih naaka ta im ngkhääng na-bok kti lunga thoon lobe kti ni. Ahin Pangsiima poh mshah ni. Nih nih-ea phäh ta mün sam kshe ni’ tilü vek kti.
43 Kah ning jah mtheh kkhai. Pangsiim noh ah pe sun nang nih-ea kkhyüh la-be lü Pangsiima hlü eia kba poh mshah kkhai kkhyaang mjüe üng jah pek kkhai ni.
44 Asuna lung üng ngshuk ei kti ta lunga kkhaana kyulü bät hnget ei kkhai ni. Asuna lung sun mat mata kkhaana ah kyaak ta asuna kkhyaang byen-in kkhai” tilü ah jah mtheh.
45 Khotu ngsiim kdäme jah Pharishe-e noh pum ah jah msäp sun ah nih ngjaak u üng Booi Jeishüh noh ah nih mong ah pyen ati sun ah nih kshing lo u.
46 Booi Jeishüh man vai mkot shui hjap ktie. Lüphi kkhyaang päe ah nih jah kyüh u. I a thoon lüni ti ta Jeishüh hin shahma ngsiim ni tia kkhyaange noh ngngaai ktie.