16
(Marküh 8.11-13; Lükah 12.54-56)
1 Pharishe-e jah Satüke-e akhäk Booi Jeishüh-a veei lok ktie. Jeishüh sun ah nih saam naaka “Angvaaio kkhaan khoa ka ngshing ngte naak poh lü jah mhnüh-a” ah nih ti-tuhan u.
2 Booi Jeishüh noh “Nang nih-e noh ‘Kho mpyet shen ve, kho ngooi ta kho sheen hlü ve’ tilü nah nih pyen khoi ktie.
3 Ngooi lam da kho ngmei shen lü kho nghngi lam ah tana kyaak üng ‘Tuh ngooi kho khi lü kho aah hlü ve’ nah nih ti khoi ktie. Nang nih-e noh khoa ve soh bük u kti lü i hok kba thoon vek kkhai ati sun nah nih kshing ktie ni. Lüphi ksüüna ngshing ngte naake jah bük lü tuh-a ksüün hin i a ksüün ati am nah nih kshing ktieo.
4 Tuh-a ksüün üng ka kkhyaange hin shexu ulü Pangsiim kpet mjak ktie ni. Ah nih-e hin mün sam kshe jah ngshing ngte naak hmuhlü kyo u lüphi am hmu-yah u. Shahma ngsiim Jonah-a ngshing ngte naaka mjü ni ah nih hmuh yah kom u” tilü ah jah mtheh. Kona Jeishüh noh jah ta-hüt lü aksea sit kti.
(Marküh 8.14-21)
5 Jeishüh jah akläke Kalile tui li sa ye da ah nih seh k'um üng akläke noh kkhaai kpeh ah nih lo püi vai ah nih mhnih u.
6 Booi Jeishüh noh akläke üng “Pharishe-e jah Satüke-ea kkhaai phoom ta kyüh kshe ni. Mseei ei ubä” tilü ah jah mtheh.
7 Asun üng ta “Kkhaai kpeh am nih lo püi ua phäh asun kba ah pyen ni” tilü mat jah mat ngthäh ngkhyah ktie.
8 Jeishüh noh asun kshing lolü “Nah nih mlunga am nah nih jum ei ksang ham uo. ‘Nih veei ua kkhaai kpeh am velü’ tilü a i nah nih ngthäh ngkhyah ktie ni.
9 Am nah nih ngja-kya ham ktieo. Beei mhma üng kkhyaang thoong mhma kah jah mbei sän am nah nih shüüm ham ktie bä. Ak'hleei lo nah nih mkhääm phi sä i kän lok kti ja.
10 Beei kkhyüh üng kkhyaang thoong kphyü kah jah mbei phi nah nih mhnih-in uo. Asun üng nah nih mkhääm sä abea i kän lok kti ni.
11 Kkhaai kpeh-a mong kah pyen kti am ni ati sun i lü am nah nih ngjaak kya u ni. Lüphi Pharishe-e jah Satüke-ea kkhaai phoom ta mseei ei ubä” tilü ah jah mtheh.
12 Asun üng ta kkhaai kpeh poh naak vai kkhaai phoom mseei vai am ni. Pharishe-e jah Satüke-ea jah msuh mtheh naak sun mseei vai Booi Jeishüh noh ah pyen sun akläke noh ah nih ngjaak lo kya u.
(Marküh 8.27-30; Lükah 9.18-21)
13 Kesha Reh Philipih mlüh peia ah nih pha lo u üng Booi Jeishüh noh “Kkhyaange noh kei, Kkhyaang Sa hin u atia pyen ktie ni” tilü akläke ah jah kthäh.
14 Akläke noh “Akhäke noh ‘Patiso Johaan’, akhäk noh ta ‘Eilijah ni’, akhäk noh ‘Shahma ngsiim Jeireh Mih. Am ani üng ahlaan üng ka shahma ngsiim mat mat ni’ tia pyen ktie ni” tilü ah nih mshak be u.
15 Booi Jeishüh noh “Nang nih-e noh ta kei hin ua nah nih nah hmuh u ni” tilü ah jah kthäh.
16 Shimon Peta noh “Nang hin Khrito ni. Xüng shei kti Pangsiima ning sa kpa ni” ah ti be.
17 Booi Jeishüh noh “Jonah-a sa Shimono, Pangsiim noh do kya naak ah ning peet ni. I lüni ti ta kkhyaangea msuh mtheh naak üng ahin nah kshing lok kti am ni. Kkhaan khoa vek kti kah Pa Pangsiim kuung noh ah ning kshing shak ni.
18 Kah ning mtheh kkhai. Nang hin Peta ni. Ahina lung nua kkhaana kah shaang ngsiim kah shak kkhai. Thih naaka hiit noh kah shaang ngsiim am ksim kpyak khoh.
19 Pangsiima upa pe nah nghmon jah nah khyaih naak khoh-a toh kah ning pek kkhai. Kho mdek kkhaana poh vaia am ngkäih tia nah mkhyah sun kkhaan khoa phi mkhyah ei kkhai ni. Kho mdeka poh ngkäih vaia nah mkhyah sun kkhaan khoa phi poh vaia mkhyah ei kkhai ni” tilü ah pyen.
20 Kona Jeishüh noh “Kei hin Pangsiima nah tüih lo Khritoa kah thoon sun u üng phi käh mtheh bing bing u bä” tilü ah jah ngya kyet.
(Marküh 8.31-9.1; Lükah 9.22-27)
21 Asuna ksüüna kkhyüh sut ei lü Booi Jeishüh noh akläke üng “Kei hin Jeirüh Shalem mlüh-a kah sit yah kkhai. Akdäme, khotu ngsiim kdäme, Sangsiim ktheeme noh nah mkhuh mhlih kkhaie. Nah hnim kkhaie. Asun kona amhnüüp kthum üng kah thou be kkhai ni” tilü ah jah mtheh.
22 Peta noh ta ah veei da kaih ma lü “Angvaaio, asun kba käh su ngngaai laanga. Asun kba nang üng am thoon yah shoom” tilü ah him.
23 Jeishüh noh va nglat lü Peta üng “Nah seh ta-a. Nang hin Shatan yaai pa-a mäi ni. Nang hin kah ngshuk ngvän naaka nah thoon kti. Pangsiima su ngngaih-a kba am su ngngaai kti. Kkhyaanga su ngngaih-a kba ni nah su ngngaih” tilü Jeishüh noh Peta ah him.
24 Kona Jeishüh noh akläke üng “Mat mat noh kei ah nah läk hlü ta ah mlung hlü käh läk lü keia khui kha-a kba ah khui kha hnga vai jah keia thih-a kba ah thih hnga vai hngoh phi ngshääm lü nah läk she.
25 Ah päta shak yung ei hlü kti noh ah shak shum nak kkhai. Keia phäh ah shak shum nak kti noh ta aksanga ah shak yung ei kti ni.
26 Kkhyaang mat hin noh kho mdek üng ka abäng ka na-kyo lüphi shak ngshääi ah shum naak ta i a phi am kyah. Am ani üng shak ngshääi yah vaia i üng kkhyäih ei khoh vai ja.
27 Kei, Kkhyaang Sa hin Pangsiima jou taai, jou taai nalü kkhaan kho ngshäe noh nah ksung ngvoong ktiea kah lo be üng kkhyaang naküt ah poh mshah-a kba kheen kah pek kkhai.
28 Ngngaai ua, kei kah pyen ma kkhai ni. Ahin üng vek kti kkhyaang akhäk noh kei Kkhyaang Sa noh Pangsiima pe kah up ah nih hmuh veia xüng ham kkhaie ni” tilü ah pyen.