MATE
Matea yuk Thang Kdo Kkya
1
(Lükah 3.23-38)
1 Ahin Jeishüh Khritoa kshoon täh naaka kyak kti ni. Ah nih hin Davita tu kpa-a thoon lü Davit ta Apyahama tu kpa ni.
2 Apyahama sa Isak, Isaka sa Jakop, Jakopa sa ta Jüdah jah ah be nae ni.
3 Jüdah-a sa ta Pereh jah Shera. Ah nih nu ta Tama ni. Pereh-a sa Heshe Rong, Heshe Ronga sa Ramah.
4 Ramah sa Aming Nadap, Aming Nadapa sa Nashoon, Nashoona sa Sala Mong.
5 Sala Monga sa Poah. Ah nu ta Rahap ni. Poah-a sa Opet, ah nu ta Ruta ni. Opeta sa Jeishe.
6 Jeishea sa ta shang phuhlang Davit ni. Davita sa Sholoh Mong, ah nu ta Ulijah-a nghnu mi khoi Pet Sheipah.
7 Sholoh Monga sa Rehop Poham, Rehop Pohama sa Apya, Apya-a sa Asa.
8 Asa-a sa Jeho Shapa. Jeho Shapa-a sa Joram, Jorama sa Usiah.
9 Usiah-a sa Jo Thang, Jo Thanga sa Ahat, Ahata sa Heshei Kijah.
10 Heshei Kijah-a sa Mah Nashe, Mah Nashea sa Among. Amonga sa Joshiah.
11 Joshiah-a sa Jeikhonih jah ah be nae. Asuna kha üng Isare kkhyaange jah man ulü Papu Lung pea ah nih jah seh ei u.
12 Isare kkhyaange Papu Lung pea ah nih jah seh ei kona Jeikhonih-a sa ta Selatih, Selatih-a sa Sheruh Pape.
13 Sheruh Papea sa Apjut, Apjuta sa Eili Akim. Eili Akima sa Ashoh.
14 Ashoh-a sa Shatok. Shatok-a sa Akim. Akima sa Eili Jüh.
15 Eili Jüh-a sa Ele Asa. Ele Asa-a sa Mathang, Mathanga sa Jakop, Jakopa sa ta Joshep ni.
16 Joshep ta Marih-a kpa mi ni. Marih ta Jeishüh-a nu ni. Jeishüh sun Khritoa phi ah nih shui u.
17 Apyahama kkhyüh Davit säpa kshoon xalei kphyü lok kti. Davita kha-a kkhyüh Isare kkhyaange Papu Lung pea ah nih jah seh ei säpa kshoon xalei kphyü lok kti. Asuna kha-a kkhyüh Khritoa hmi lo säpa kshoon xalei kphyü lok kti.
(Lükah 2.1-7)
18 Jeishüh Khrito ahin kba hmi lok kti. Ah nu Marih hin Joshepa ah nih shui u kpa mi sa-a kkhyu vai ah nih pyen ei pääng u ni. Lüphi ah nih ngkhääp hlaana Marih Mkhyangsiim üng puum mah lok kti tia ah nih kshing lo.
19 Ah kpa mi Joshep ta kkhyaang kdoa thoon lü kkhyaangea hmaai ma-a Marih sun am lu thuui hmaai sheet hlü shak. Asuna thoon lü ampyu sa-a ah hoih be vaia ah mhnüt.
20 Asun ah su ngngaih k'um üng ah lu ngmang üng Booi Pa-a kkhaan kho ngshä pou lolü “Joshepo, nang hin Davita ning tu kpa ni. Marih nah kkhyu naak vai hin käh kyüh eia. Ah nih ah puum mah hin Mkhyangsiim üng thoon lok kti ni.
21 Ah nih noh sa ngpyang sa na-lok kkhai. Ah ngming Jeishüh-a nah shui vai ni. I a thoon lüni ti ta ah kkhyaangea mkhye mshoh naak üng jah thoong khyah kkhai ni” tilü ah pyen.
22 Booi Pa noh shahma ngsiim üng ah pyen shaka kkhyü aküm seei lo vaia ahin kba thoon velok kti ni.
23 Pangsiima kkhyü ta “Bük ngngaai ua, kpa mi üng am ip om khoi kti noh sa ngpyang sa nak kkhai ni. Ah nih sun Emanui Lah shui kkhaie ni. Ti hlü ta ‘Pangsiim nih hlonga vek kti’” tilü ni.
24 Joshep ah ih naaka kkhyüh let lolü thou lolü Booi Pa-a kkhaan kho ngshäa pyena kba Marih ah kkhyu naak ni.
25 Lüphi Marih noh sa ah sa naak säpa ngkhyu ngla thuuma am ve soh ni. Joshep noh hnashen sun Jeishüh-a ah ngming ah shui.