8
(Mate 15.32-39)
1-2 Asun üng kkhyaange mkyaang ksaih-a ngkhääm lobe tü ktie. Kkhyaange sun ah nih ei vai am vengtu. Asun üng Booi Jeishüh noh akläke jah khü lü “Kkhyaang päe kah jah mpyeen ei ni. Kah hlonga mhnüüp kthum vehnüh ktie ni. Ah nih ei vai i phi am ve ti.
3 Ei noh jah kkhyoot ei ei ktia ah nih ima kah jah tüih be ta lama hit saai pah kkhaie ni. Akhäke ta akthuuk nu üng kae ni” tilü Jeishüh noh ah jah mtheh.
4 Akläke noh ta “Ahina mkyaang ksaih-a ahi kän kkhyaang päe üng i hok kba jah mbei khoh vai ni” tilü ah nih pyen be u.
5 Booi Jeishüh noh ta “Nah nih veeia kkhaai kpeh ikän vek kti ja” tilü ah jah kthäh. Akläke noh “Beei kkhyüh” ah nih ti u.
6 Kkhyaang pä mdeka kkhaana ah nih ngshut vaia Jeishüh noh ah jah mtheh. Jeishüh noh kkhaai kpeh beei kkhyüh dou lü Pangsiim ah je ei. Kkhyaange üng ah nih jah yet vaia kkhaai kpeh kphyüt lü akläke üng Jeishüh noh ah jah peet. Akläke noh kkhyaange üng ah nih jah yet u.
7 Akläkea veei nga hmi kkeih api sa phi vek kti. Jeishüh noh asuna nga hmi api sa-a phäh phi Pangsiim je ei ma lü nga phi kkhyaang päe üng ah nih jah yet vaia Jeishüh noh ah jah mtheh.
8 Kkhyaange noh ei ulü phü ktie. Ngphyüt ngshek kti ak'hleei lo akläke noh sä abea kkhyüh ah nih mkhääm yah u.
9-10 Ei kti kkhyaang ta thoong kphyü bang lok ktie. Kkhyaange jah tüih be ma lü Jeishüh akläke mah mah mhlüüi üng kaai lü Damah Nuta khyong da sit ktie.
(Mate 16.1-4)
11 Pharishe-e Jeishüh-a veei lo-ulü ah nih nghleet naaka ah nih shi hlo püi u. Jeishüh ah nih saam naaka “Pangsiima sa-a aksanga nah thoon ta kkhaan khoa ka ngshing ngte naak poh-a” tilü ah nih tong tuhan u.
12 Jeishüh noh ngxüshe pyei lü “Ahi banga kkhyaange noh kah ngshing ngte naaka, a i a mün sam kshe nah tong ktie ni. Ngngaai ua, kei kah pyen ma kkhai. Ahi banga kkhyaange noh ngshing ngte naak mün sam kshe am hmuh yah u” tilü ah pyen.
13 Jeishüh noh Pharishe-e jah ta-hüt lü mhlüüia kkhaana kaai be tü lü Kalile tui li sayea da sit kti.
(Mate 16.5-12)
14-16 Booi Jeishüh noh ta akläke üng “Pharishe-e jah shang phuhlang Herota kkhaai phoom ta kyüh kshe ni. Mseei u bä” tilü ah jah mtheh. Akläke noh ta kkhaai kpeh ah nih lo püi vaia ah nih mhnih u. Kkhaai kpeh suun mat däk ni mhlüüia kkhaana ah nih lo püi u. Asun üng ta “Nih veei ua kkhaai kpeh am velü asun kba ah pyen ni” tilü mat jah mat ngthäh ngkhyah ktie.
17 Jeishüh noh ta asun shim lolü “‘Nih veei ua kkhaai kpeh am velü asun kba ah pyen ni’ tilü a i a nah nih ngthäh ngkhyah ktie ni. Am nah nih hmuh ham uo. Am nah nih ngjaak kya ham uo. Nah nih mlunga am nah nih jum ei ksang ham ktio” tilü ah jah mtheh.
18 “Nah nih mik vek kti ta am nah nih hmuk ktieo. Nah nih nghnga vek kti ta am nah nih ngja-kya ktieo. Am nah nih shüüm ktieo.
19 Kkhyaang thoong mhma-a phäh-a kkhaai suun mhma kah jah kphyüt peet üng kkhaai angphyüt ngshek nah nih mkhääm u sä abea ikän lok kti ni” tilü Jeishüh noh ah jah kthäh. Akläke noh “Sä xalei nghngih” ah nih ti u.
20 “Kkhyaang thoong kphyüa phäh-a kkhaai suun kkhyüh kah jah kphyüh peet üng kkhaai angphyüt ngshek nah nih mkhääm u sä abea ikän lok kti ni” tilü Jeishüh noh ah jah kthäh be tü. Akläke noh “Sä kkhyüh” tilü ah nih pyen be.
21 Booi Jeishüh noh ta akläke üng “A i ja am nah nih ngja-kya ham u ni” tilü ah pyen.
22 Jeishüh jah akläke Pet Shai Ta ngnama mhlüüi üng phavaai ktie. Kkhyaang akhäk noh ah mik mü mat lo püi ulü Jeishüh noh ah mik mü ah hneh vaia ah nih nghui naak u.
23 Jeishüh noh ta ah mik müa kut man lü ngnam thea ah seh püi. Ah mik vaai be kkhaia ah mik müa mik üng ah msi mshoh lü ah mik mü üng ah kut mtaang lü “I a nah hmuh khü” tilü ah kthäh.
24 Ah mik mü mdei hü lü “Kkhyaange kah jah hmuh kyo. Thing mshooie sit-in hü ktiea mäia ni kah jah hmuh” tilü ah pyen.
25 Kona ah mik müa mika kkhaana Jeishüh noh ah kut ah mtaan be tü. Ah mik mü noh angshing ngtea a i phi ah hmuh.
26 “Nah ima sit bea. Ahina ngnama käh vaan pah bä” tilü Jeishüh noh ah mik mü khoi üng mtheh lü ah tüih be.
(Mate 16.13-20; Lükah 9.18-21)
27 Jeishüh akläke mah mah Kesha Reh Philipi mlüh-a pi peia ka ngnam da sit kti. Ah nih seh shoa lama Jeishüh noh akläke üng “Kkhyaange noh keia mong ah nih pyen u üng i ah nih ti u ja” tilü ah jah kthäk.
28 Akläke noh Jeishüh üng “Akhäke noh ‘Patiso Johaan ni’ ah nih ti u. Akhäke noh ‘Eilijah ni’ ah nih ti u. Akhäke noh ‘Shahma ngsiime üng ka mat ni’ ah ni ti u” tilü ah nih pyen be u.
29 Booi Jeishüh noh “Nang nih-e noh ta kei u a nah nih nah hmuh u ni” tilü akläke ah jah kthäk. Peta noh “Nang Khrito ni” tilü ah pyen be.
30 “Asun keia mong sun u üng phi käh mtheh bing bing u bä” tilü Jeishüh noh akläke ah jah mtheh.
(Mate 16.21-28; Lükah 9.22-27)
31 Booi Jeishüh noh “Kei, Kkhyaang Sa noh khui kha kshe nu kah khaam ei yah kkhai ni. Akdäme, khotu ngsiim kdäme jah Sangsiim ktheeme noh nah kpet mjak kkhaie ni. Nah hnim kkhaie ni. Asun kona amhnüüp kthum üng kah thou be kkhai ni” tilü Jeishüh noh akläke üng aksüka ah jah msuuk mtheh.
32 Jeishüh noh asun angshing ngte kuunga ah pyen. Peta noh ta Jeishüh da ngkeeng lü “Ahin kba käh pyena” tilü ah him.
33 Booi Jeishüh noh ta nglat lü akläke jah bük lü Peta üng “Nah seh ta-a. Nang Shatan yaai pa-a püi ni. Pangsiima su ngngaih-a kba am su ngngaai kti. Kkhyaanga su ngngaih-a kba nah su ngngaih ni” tilü Peta ah him.
34 Jeishüh noh kkhyaang päe jah akläke jah khü ma lü “Mat mat noh kei ah nah läk hlü ta ah mlunga ti tia käh läk lü keia khui kha-a kba ah khui kha vai phi ngshääm lü keia thih-a kba ah thih vai hngoh-a phi ngshääm lü nah läk she.
35 Ah shak am shum hlü lü ah pät noh ah pät ah shak yung ei kti ta ah shak shum nak kkhai. Keia phäh jah thang kdo kkya-a phäh ah shak shum kti noh ta aksanga ah shak yung ei kti.
36 Kkhyaang mat hin noh kho mdek üng ka naküt ka na-päih lüphi shak ngshääi ah shum naak ta i a phi am kyah.
37 Kkhyaang hin noh shak ngshääi i üng phi am thoong ei be khoh laang kuung.
38 Tuh-a ksüün üng kkhyaange hin Pangsiim kpet mjak ulü shexu pi pi ktie. Asun kba mkhye kti kkhyaangea ma-a keia phäh jah kah msuh mtheh-a phäh ngke ei kti ta Pangsiima jou taai, jou taai nalü kkhaan kho ngshäe noh nah ksung ngvoong ktiea kah lo be üng asuna kkhyaang kah ngke ei na-be kkhai ni.