5
(Mate 8.28-34; Lükah 8.26-39)
1 Asun üng ta Kalile tui li saye da phak ktie. Asun Kera Shene khyonga ah nih shui u.
2 Jeishüh mhlüüi üng ah kyum lo jah ta lung khuui msüm mhnüna kkhyüh lok kti kho yaaia vaan naak kkhyaang mat noh Jeishüh ah dou lo.
3 Asuna kkhyaang sun lung khuui msüm hnüna vek kti. Asuna kkhyaang sun u noh phi mthi yüüi hngoh üng am khun khoh.
4 Ah kho üng anghläia lak khit üng ah nih khih kyo. Ah kut üng anghläia mthi yüüi üng phi ah nih khun kyo. Mthi yüüi phi phyüt shek-in lü lak khit phi amsot msäma nghong ei kkhaia ah phyüt shek-in. U noh phi asuna kkhyaang nep onga am shääm khoh.
5 Msuung khoa vek kti lung khuui msüm hnün su amhnüüp mthan hläia um lü anghläia vu ngpyaang lü lung mshäüe üng ah pät noh ah pät mshuk mhleem ei lü thoon kti.
6-7 Ah dou lo sun üng kho shanga Jeishüh ah hmuh naaka kkhyüh dong lolü “Ak'hlüng bok Pangsiima sa Jeishüh-o, kah ning püi am ni. Kah veeia i nah ti lok kti ni. Nih mshou ei ktia am ning poh ngü tilü kkei ng'yüna” tilü ngpyaang ngpyet-in lü ah mkhuuk üng ngdääng lü Jeishüh ah nghui naak.
8 I a thoon lüni ti ta Jeishüh noh “Nang kho yaai ahina kkhyaang üng shota” tilü ah pyen pääng ni.
9 Jeishüh noh “Nah ngming u ni” tilü ah kthäh. Kho yaai noh “Kah ngming pä kho hah-e ni. Ah nih vaan nak kti kei nih pä kho hah-e ni” tilü ah pyen be.
10 “Ahina khyonga kkhyüh käh nah mshota” tilü ah nghui naak, ah nghui naak.
11 Asu su vok pä nue msuung kpema ngshui ei ktie.
12 “Vokea veei jah tha-a, vokea k'uma kah nih vaan vaia jah mkhyah-a” tilü ah nghui naak.
13 Asun üng ta Jeishüh noh ah jah mkhyah. Kho yaaie ta kkhyaang üng shot ulü vok pä üng vaang ktie. Vok pä ta thoong nghngih bang lok ktie. Kdang nu üng voke dong ulü tui lia kya-ulü ngsum ktie.
14 Asuna kkhyüh vok kshääme sen u lü mlüh k'uma phi mlüh pi peia phi athoon ve sun ah nih pyen hü u. Asun bük kkhaia kkhyaange lok ktie.
15 Kkhyaange Jeishüh-a veei ah nih lo üng kho yaai pä kho hah-e noh ah nih vaan naak khoi kkhyaang ngthiim be lü shui shak shui shak lü ngshut ei kti ah nih hmuh vaai u. Asuna kyalü kkhyaange sun kyüh ei lopyei ktie.
16 Kho yaaia vaan naak khoi kkhyaang jah voke i hok kba ah nih thoon ve hmuk ktie noh kkhyaange üng ah nih jah mtheh u.
17 Asun üng ta ah nih khyonga khyüh Jeishüh ah shot vaia ah nih nghui naak.
18 Booi Jeishüh mhlüüia kkhaana ah kaai k'um üng kho yaai kho hah pa-a vaan naak khoi noh “Nah hlonga kah ve-ei kkhai” tilü Jeishüh ah nghui naak.
19 Jeishüh noh ta am ä. “Nah püi poea veei, nah ima sit be lü Pangsiim noh i kän ning poh peet kti, Pangsiim noh i hok kba ning mpyeen ei kti ati sun jah mtheh vaaia” tilü ah mtheh.
20 Kho yaaia vaan naak khoi kkhyaang sun Jeishüh üng ngkyalü sit lü Jeishüh noh i kän ah poh peet sun Teka Polih hnea ah kpyaü hü. Asun üng kkhyaange naküt mün sam tong ktie.
(Mate 9.18-26; Lükah 8.40-56)
21 Booi Jeishüh ta mhlüüi üng Kalile tui li kkaan lü Kalile saye da sit be tü kti. Kalile tui li kkonga ah ve üng kkhyaang pä nue ah veeia ngkhääm lok ktie.
22-23 Asun k'um üng Sangsiim ngthei naak kyong up kti Jaih Rüh ngming nak kti Jeishüh-a veei lok kti. Ah hmuh jah Jeishüh-a kho ma-a ngshut lü hjok khah lü “Kah sa nghnu mi sa thi-lo hlü hnüh kti ni. Loa, mya be kkhaia nah kut kah sa-a kkhaana mtaanga” tilü Jeishüh ah nghui naak.
24 Asun üng ta Jeishüh Jaih Rüh-a hlonga sit kti. Kkhyaang pä nue noh phi Jeishüh läk ulü Jeishüh ah nih booi-in u.
25 Pä k'um sun üng am khyaih kti nghnu mi mat ngpüi kti. Asuna nghnu mi sun kum xalei nghngih athi siim siima ah puum üng ka ngshooi-in kti.
26 Shei shalae noh ah nih mtuui msheng k'um üng phi ah khaam ei yah pi pi. Ah külak naküt phi shei phua phyooi kti. Käh do ei lo laang lü kshe hleen lobok bok kti.
27-28 Nghnu mi sun noh Jeishüh-a mong sun ngjalü “Jeishüh-a shui shak hngoh kah hneh-a ta kah do be kkhai shü” tilü ah ngngaih. Asun üng kkhyaang pä nuea kshuunga Jeishüh-a hnu da lolü Jeishüh-a ngshui jih ah hneh.
29 Jeishüh-a ngshui jih ah hneh jah ta ah thi ngshooi hüp be kti. Ah do be sun ah puum sha üng ah shim.
30 Ah veeia kkhyüh ah hiita luh lo sun Jeishüh noh kshing lolü kkhyaang pä da ahunata mang lü “U noh kah shui shak nah hne kti ni” tilü ah jah kthäh.
31 Akläke noh ta Jeishüh üng “Kkhyaang pä nue noh ah nih ning booi-in u am nah hmuk kti bä. ‘U noh nah hne kti ni’ tilü nah pyen ham ta” tilü ah nih pyen u.
32 Jeishüh noh ta hne kti sun hmu-onga mang hü lü ah shui.
33 Nghnu mi noh ta ah nih üng i hok kba athoon ve sun shim lüta ngthüng ngak ngak üng kyüh ei lü Jeishüh-a veei sit lü Jeishüh-a ma-a ngshut lü ah hjok khah. Athoon ve naküt sun Jeishüh üng ah mtheh be.
34 Booi Jeishüh noh “Kah sa nghnuo, nah nah jum eia phäh üng nah do be kti ni. Itüh-a phi am pok be ti. Amlung diima sit be hnüh-a” tilü ah pyen.
35 Jeishüh ah shi hlo k'um üng Sangsiim ngthei naak kyong up ktia ima ka kkhyaang akhäk lo-ulü “Nah sa nghnu mi sa thipääng kti ni. Shala i vai nah pyang ma shak kti ni” tilü kyong up üng ah nih mtheh u.
36 Jeishüh noh ta asuna kkhyaangea pyen sun am jah nah suh lih ei. Jeishüh noh kyong up üng “Käh puk shea, aksanga kei nah üm na-a” tilü ah pyen.
37 Jeishüh noh Peta, ngbe ngna xooi Jakop jah Johaan ah jah seh püi. Asuea thea u phi Jeishüh noh am jah seh püi.
38 Kyong upa im ah nih pha u üng ngkhääm lü song seng ktie, kyap ktie, pyen pyen lü kyap ktie kkhyaange Jeishüh noh ah jah hmuh vaai.
39 Jeishüh noh im k'uma lut ma lü “A i a ngpyaang lü nah nih kyap ktie ni. Hnashen thik kti am ni. Ip kti ni” tilü Jeishüh noh kkhyaange üng ah jah mtheh.
40 Kkhyaange noh ta Jeishüh ah nih yaih ei u. Jeishüh noh ta kkhyaange naküt kho kpunga jah shot ma lü hnashena nu pa, Peta, ngbe ngna xooi Jakop jah Johaan, Jeishüh noh jah seh püi lü hnashena ve naaka sit kti.
41 Nghnu mi sa-a kut Jeishüh noh man lü Aramik läka “Talih ta khumi” tilü ah pyen. Ah pyen hlü ta “Nghnu mi sao, thou loa” ah ti.
42 Jeishüh noh ah pyen jah ta nghnu mi sa thou lolü sit kti. Asun üng ta kkhyaange noh “E!” ti-ulü mün sam tong pi pi ktie ni. (Asuna nghnu mi sa-a shak kum xalei nghngih lok kti.)
43 Jeishüh noh “Ahina mong u üng käh mtheh bing bing u bä” tilü ah jah mtheh. “Nghnu mi sa üng ah ei vai pe-ua” tilü phi ah jah mtheh.