2
(Mate 9.1-8; Lükah 5.17-26)
1 Kho mhnüüp i vei käh nghjook ktia Kapanom mlüh-a ah lo be tü üng ima vek kti ati sun kkhyaange noh ah nih ngjaak u.
2 Im kkyoong phi hleei lü mkota phi ksha-a phi be ktia kkhyaange ngkhääm lok ktie. Asue Jeishüh noh Pangsiima kkhyü ah jah msuh mtheh.
3 Asun k'um üng kkhyaang kphyü noh ah kho kthi mat kkot lo-ulü Jeishüh-a veei lok ktie.
4 Lüphi kkhyaange be kolaih ulüta Jeishüh-a veei säpa am kpha khoh u. Jeishüh-a dang bä bäa amkhyuung kka-a ah nih shak im ktih kkhyeh ulü ah kho kthi sun kyääp mah mah yüüi kkhyoh üng ah nih kkhyaak vaai u.
5 Jeishüh noh ah nih üm naak u sun jah hmulüta ah kho kthi üng “Kah püio, nah mkhye kah ning mhlät hnüh ni” tilü ah pyen.
6-7 Asun üng im k'um sua Sangsiim ktheeme akhäk ngshut ei ktie. Asue noh “Ahina kkhyaang amtham hmuh-a ta ngthu ei kti ni. Pangsiim thang msheet kti ni. U noh ni mkhye am hlät khoh kom. Pangsiim däk am ni bä” tilü ah nih mlung kkyoonga ah nih su ngngaih u.
8-9 Ah nih mlung kkyoonga ah nih su ngngaih sun Jeishüh noh ah kshing lo jah ta “Nah nih mlunga ahin kba a i a nah nih su ngngaai ktie ni. Ah kho kthi üng ‘Nah mkhye lät hnüh vek kti’ tilü mpyong thak üng pyen vai mä alooi. ‘Nah kyääp kkot lü ngdüüi lolü sit hnüh-a’ tilü pyen vai mä alooi.
10 Kei, Kkhyaang Sa noh ngthiim khoa phi mkhye mshoh-e kah hläh naak kah hiit ave tuh kah nih ning mhnüh kkhaie ni” tilü ah pyen.
11 Asun üng Jeishüh noh ah kho kthi üng “Nang üng phi kah ning mtheh. Ngdüüia, nah kyääp kkot lü nah ima sit bea” tilü ah pyen.
12 Asun üng ta ah kut kho kthi sun ngdüüi lolü ah kyääp kkot lü kkhyaang abänga hmuh-a sit be kti. Asun hmuk ktie naküt mün sam tong ktie. Pangsiim ah nih mküüi mtou u. “Ahin bang ta ahun phi am hmuk khoi ham ngü” tilü shiit hoot ktie.
13 Jeishüh mlik tuia peia sit be tü kti. Kkhyaange naküt ah veeia ngkhääm lok ktie. Asue üng Jeishüh noh ah jah msuh mtheh.
(Mate 9.9-13; Lükah 5.27-32)
14 Jeishüh ah seh shoa khoon to hlook naak luuma ngshut kti Aphea sa Levih ah hmuh. Levih üng “Nah läka” tilü ah pyen. Levih noh thou lolü Jeishüh ah läk.
15 Khoon to k'hlooke jah Pangsiima thuum am läk ktie kho hah pa noh akläke jah Jeishüh mah mah Levih-a ima ngshut yüm ulü buh ei ktie. Khoon to hlook ktie üng kae jah Pangsiima thum am läk ktie kho hah pa noh Jeishüh ah nih läk u.
16 Pangsiima thuum am läk ktie jah khoon to k'hlooke mah mah Jeishüh-a buh ah sun Sangsiim ktheeme jah Pharishe-e noh hmu-ulüta Jeishüh-a akläke üng “Jeishüh noh khoon to k'hlooke jah Pangsiima thuum am läk ktie mah mah a i a buh ei kti ni” tilü ah nih jah kthäh.
17 Jeishüh noh asun ngja-lüta asue üng “Khyaih ktie noh shei shala am hlü ei. Am khyaih ktie noh shei shala hlü ei ktie ni. Ah nih pät noh ta do bok ktia ngngaai ei ktie jah khü kkhaia kah lok kti am ni. Ah nih pät noh phi ah nih mkhye shim ei ktie jah khü kkhai kah lok kti ni” tilü ah jah mtheh.
(Mate 9.14-17; Lükah 5.33-39)
18 Johaan läk ktie jah Pharishe-e noh ei jeih ktie. Kkhyaange Jeishüh-a veei lo-ulü “Patiso Johaan läk ktie jah Pharishe-e jah läk ktie noh ta ei jeih ktie ni. Nang ning läk ktie noh ta a ia ei am jeih ktie ja” tilü ah nih kthäh u.
19-20 Booi Jeishüh noh ah pyen “Akläke noh ayüma kah nih ve k'um üng ei am jeih thei u. Kei sa kla üng täng lü akläke ta sa laak pooia lok kti kkhine üng täng ktie ni. Ayüma kah nih ve k'um üng pooi poh lü kah nih ei kkhaie ni. Akläke üng ngkya lo kona akläke noh ei jeih hnga kkhaie ni.
21 Shui shak kpyoon kteek sun shui shak kthaaia mte üng u noh phi am bu khoi. Asun kba ta shui shak kthaai khou hlou lolü shui shak kpyoon teek lobok bok lü shelo bok kti.
22 Meh vun üng pyaan uum kphyüm üng ngbom tui shü u noh phi am thaan khoi. Asun kba thaan ta ngbom tui shü phu lolü uum sun ak kkhai ni. Ngbom tui phi ngxän päih lü uum sun phi pyak kti. Ngbom tui shü ta meh vun üng pyaan uum kthaai üng taak yah ni.”
(Mate 12.1-8; Lükah 6.1-5)
23 Pangsiim ngam püi mhnüüp üng Jeishüh jah akläke kyung saang khoe kkaan lü sit ktie. Ah nih seh shoa lama akläke noh kyung saang vui ah nih dü ei pah u.
24 Pharishe-e noh Jeishüh üng “Jah büka Pangsiim ngam püi mhnüüp üng Pangsiima thuum lüüm kkaan lü a i a ahin kba poh ktie ni” tilü ah nih pyen u.
25 Jeishüh noh ta “Ahlaan üng shang phuhlang Davit jah ah püie noh akkhak hmu-ulü ei noh ah jah kkhyoot ei üng Davit noh i poh kti ati sun Sangsiim üng nah nih bük khoi ktie am ni bä.
26 Apyata khotu ngsiim kdäm boka ah ve k'um üng Davit noh Pangsiima jih shung müüpa k'uma lut lü Pangsiima kkhaai kpeh ah ei. Asuna kkhaai kpeh khotu ngsiime däk noh ah nih ei vaia ni Pangsiima thuum ave kyo. Davit noh ta ah püie üng phi ah jah mbei ni.
27 Aksüka Pangsiim noh kkhyaange ah jah mhnün ma kona kkhyaangea ngam naak vaia Pangsiim ngam püi mhnüüp ah jah miin peet be tü. Pangsiim ngam püi mhnüüp aksüka mhnün ma am ni. Kkhyaange phi Pangsiim ngam püi mhnüüpa thuum läk kkhai ah jah mhnün am ni.
28 Pangsiim ngam püi mhnüüp üng i hok kba ve vai ati phi kei, Kkhyaang Sa noh kah pyen khoh kti ni” tilü ah jah msuh mtheh.