15
(Mate 27.1-2, 11-14; Lükah 23.1-5; Johaan 18.28-38)
1 Kho athaih lo yah ta khotu ngsiim kdäme, khong mange, Sangsiim ktheeme jah kong si üng ka abäng ngthäh ngkhyah ulü Jeishüh ah kut üng jah khit ulü seh püi ulü Pilat booi üng ah nih ap u.
2 Pilat booi noh “Nang Jeishüh, Jüdah-ea ning shang phuhlang mä” tilü ah kthäh. Jeishüh noh ta “Nah pyen sang beh kti” tilü ah mshak be.
3 Khotu ngsiim kdäme noh ta “Ahina kkhyaang noh akkhye kho hah poh kti” tilü Jeishüh ah nih kbäü ei u.
4 Pilat booi noh Jeishüh üng “Nah jah mshak naak be vai am ve bä. Ngngaaia, ahin kba pi pi ah nih ning kbäü ei u” tilü ah mtheh be tü.
5 Jeishüh noh i phi am pyen be lüta Pilat booi mün kti.
(Mate 27.15-26; Lükah 23.13-15; Johaan 18.39-19.16)
6 Pilat booi noh Phyong pooi tä lü ah nih tong u khup kkyum mat shi hlät khoi kti.
7 Khup k'uma booi kpet ktie akhäk vek ktie. Asuea kshuunga jah up ktie ah nih jah tuk u üng kkhyaang jah hnim khoi kti Pana Pa-a ah nih shui mat ngpüi kti.
8 Kkhyaang päe Pilat booia veei lo-ulü “Pilat booio, nah hläh khoia kba jah hläh peeta” ti-ulü ah nih tong u.
9-10 Khotu ngsiim kdäme noh Jeishüh kkeei ei ulü ah nih ap vai Pilat booi noh ah dang lo yah. “Jüdah-ea shang phuhlanga ah nih shui u kah hläh vai nah nih hlü ei ktie mä” tilü ah jah kthäh tuhan.
11 Khotu ngsiim kdäme noh ta “Pana Pa bä bä hläta” tilü kkhyaang päe noh ah nih tong vai ua ah nih jah ngtääng püi u.
12 Asun üng ta Pilat booi noh “Jüdah-ea shang phuhlanga nah nih shui u i a kah poh vai ni” tilü ah jah kthäh be tü.
13 “Baan lam ktung üng thih shaka” tilü ngpyaang ktie.
14 Pilat booi noh ta “I pi pi mkhye-in kti ni” tilü ah jah kthäh. “Baan lam ktung üng thih shaka, thih shaka” tilü ngpyaang lo kdäm kdäm ktie.
15 Pilat booi noh kkhyaang päe je vai hlü ei lü Pana Pa ah jah hlät peet. Booi Jeishüh sun ta yüüi ngkhep üng jah kpaai shak ma lü baan lam ktung üng ah nih hnim vaia ah jah ap-in.
(Mate 27.27-31; Johaan 19.2-3)
16 Romah ngtuk kpoh-e noh Pilat booia ima k'uma Jeishüh ah nih seh püi u. Asua ngtuk kpoh pä abäng jah khü ulü ngkhääm päih ktie.
17 Jih shen Jeishüh üng ah nih mshui mshak u. Nghling nghjuun ven lü kkä ulü ah nih kbün u.
18 “Jüdah-ea shang phuhlango, nah mya kti mä. Nah shak shaaü she” ah nih ti tuhan u.
19 Ah lu üng muui puum üng ah nih te u. Ah hmaai üng ah nih mshoh ei u. Ah ma-a ah nih mkhuuk lu üng ngdääng lü ah nih lei shong tuhan u.
20 Asun kba ah nih yaih ei kona ah nih mshui mshak jih shen sun ah nih kshe shuh naak be u. Ah shui shak kuung mshui mshak be ma ulü baan lam ktunga ah nih hnim vaia aksea ah nih seh püi u.
(Mate 27.32-44; Lükah 23.26-43; Johaan 19.17-27)
21 Ngbe ngna xooi Alek Santa jah Ruphua pa, Shimon ngming nak kti, Shüreneh teng pea ka Jeirüh Shalema vek kti. Laia kkhyüh ah lobe üng ngtuk kpoh-e jah Jeishüh mah mah ngkhyum ktie. Ngtuk kpoh-e noh Jeishüh-a baan lam ktung Shimon üng ah nih kkoh shak u.
22 Kolah Kotah msuunga ah nih shuia Jeishüh ah nih seh püi u. Kärih läka Kolah Kotah hin, nih nih läka ta lu kooi ni.
23 Mürah-a ah nih shui shei tui jah ngbom tui jah kso ulü Jeishüh üng ah nih tu kyo u. Jeishüh noh ta am o.
24 Baan lam ktung üng khop lü ah nih hneen. Jeishüh-a shui shak u noh i yah ei hlü kkhe atia sung keek ngjuuk ma ulü ah nih ng'yet ei u.
25 Kho pyaang kshääi lika Jeishüh baan lam ktunga ah nih hneen u.
26 I a phäh-a ah nih hnim ah nih kpyaü naaka “Jüdah-ea shang phuhlang” tilü sa yuk ulü baan lam ktung üng Jeishüh-a lu kkhaana ah nih kdap u.
27 Jeishüh-a kkheet lama mpyuk ei mat, ah ksong lama mpyuk ei mat baan lam ktung mat shi üng ah nih jah hneen peh u.
28 “Kkhyaang kshe-ea dä ayüma ah nih taak u” tilü Sangsiima malam pyen thoon lo päih kti.
29-30 “Haih! Hjok khah im nu phye-ma lü mhnüüp kthum üng nah sha-hlü be kti sän ta, a i tü ni. Nah pät noh nah pät kuum ei ma-a. Baan lam ktung üng kyum lobea” tilü aksit soon hüe noh ngüp sap sap lü Jeishüh ah nih yaih ei hlü pah u.
31 Asun kba su khotu ngsiim kdäme jah Sangsiim ktheeme noh phi “Kkhyaang ta jah kuum ei kti. Ah pät noh ah pät am kuum ei khoh kba” tilü mat jah mat ngsi ngjaang ulü ah nih yaih ei u.
32 “‘Kei Khrito ni, Isare-ea nah shang phuhlang ni’ tilü nah pyen kti. Baan lam ktung üng kyum lobea. Asun ning hmu-ungüshe, kei nih-e noh phi kah nih ning jum ei kkhaie ni” tilü ah nih yaih ei u. Baan lam ktunga ah nih jah hneen peh kkhyaang klääng xooi noh phi ah nih yaih ei.
(Mate 27.45-56; Lükah 23.44-49; Johaan 19.28-30)
33 Mhnüüpa kkhyüh im kngam shoon ei ksüün säpa teng pe abäng üng kho nghmüp-in lok kti.
34 Im kngam shoon ei ksüüna ta Aramik läka “Eilih, Eilih lama sha ni ta” tilü akthai kdäma Jeishüh ngpyaang kti. Ah pyen hlü ta “Kah Pangsiimo, kah Pangsiimo, a i a nah nah hoih kti ni.”
35 Ah hlonga ngdüüi kti akhäke noh ta asun ngja-ulü “Ngngaai ua, shahma ngsiim khü kti” tilü ah nih pyen u.
36 Mat dong lolü sung keek mtonga tui mjon kti üng ngbom tui kthuui kkha nu ta-ma lü Jeishüh üng ah tu lo. Asun üng “Baan lam ktung üng ah kyum lobe vaia shahma ngsiim Eilijah noh ku ei lo hlü kkhe nih bük ma vai u” tilü ah pyen.
37 Jeishüh ngpyaang ngpyet-in lopyei ma lü ah shak päih kti.
38 Hjok khah im nua mkota ah nih kdap jih nu sun ah lua kkhyüh lü ah pyaai säpa mte nghngih-a ngkhyeh-in lok kti.
39 Jeishüh-a hmaaia danga ngdüüi kti ngtuk kpoh-ea pä khong noh Jeishüh-a shaka päih ah hmuh üng “Ahina kkhyaang ta Pangsiima sa ksang ni” tilü ah pyen.
40 Akthuuk nua kkhyüh nghnu mie akhäk noh Jeishüh sun tou-in ktie. Asue üng Marih Maka Talen mat, Jakop kdiik jah Josheia nu Marih mat, Salome mat ngpüi ktie.
41 Jeishüh Kalile hnea ah ve üng asuna nghnu mie noh läk lo-ulü Jeishüh ah nih mshü mseei u. Jeirüh Shalema Jeishüh läk lok ktie nghnu mie kho hah pae phi tou naak su ngpüi ktie.
(Mate 27.57-61; Lükah 23.50-56; Johaan 19.38-42)
42-43 Angooi üng ta Pangsiim ngam püi mhnüüp vai üng Phyong pooi poh naak vai ngtääng ngpaang ktie. Arih Matea mlüh-a ka Joshep mat vek kti. Ah nih lei shong u akdäme üng ka ni. Ahin kho mdeka Pangsiima up lo vai Joshep noh bük ngngaai lü yüng ei kti. Angooi üng ta Pangsiim ngam püi mhnüüpa thoon lü kho kyaak hnüh-a ta Joshep käh ngke ei lü Pilat booia veei sit lü Jeishüh-a yook ah tong vaai.
44 Pilat booi noh ta Jeishüh thipääng ksang kti mä tilü ah ngngaih. Ngtuk kpoh-ea pä khong ah veeia khü lü “Jeishüh thipääng ksang kti mä” tilü ah kthäh.
45 Ngtuk kpoh-ea khong noh “Jeishüh thipääng kti” tilü ah mtheh kona Joshep noh Jeishüh-a yook ah seh püi vai Pilat booi noh ah ä.
46 Joshep noh ngbu jih vai ah kkhyäih. Baan lam ktung üng shuut be lü ngbu jih üng Jeishüh-a yook sun ah hloop. Ah lung khuui msüm hnün su Jeishüh-a yook sun ah xon vaai. Khuui mkot sun phi lung nu üng ah khaih hüt.
47 Marih Maka Talen jah Josheia nu Marih noh Jeishüh-a yook sun hoa ta-vaai hlü kkhe tilü ah nih büh.