12
(Mate 21.33-46; Lükah 20.9-19)
1 Booi Jeishüh noh ta pume üng msäp lü ah jah mtheh. “Kkhyaang mat noh ngbom dung nglin lü ah ngvoon kbüüp. Ngbom tui shuui naak vai mdek phi sou lü ah pyaan. Kyäng mat ah shak. Asun kona ngvoong sun jah khah lü pe ksea sit kti.
2 Ahmin lo ksüüna ta ngvoong mah noh ah xüh shoh ei mat ah khah-a veei tüih lü ngbom ktheih akhäk ah laak vaai shak.
3 Ah khah-e noh ta ah xüh shoh sun man ulü te ulü i phi käh pelü ah nih kshät be u.
4 Ah xüh shoh ei akse mat ah nih veeia ah tüih be tü. Ah lu lung üng khoong ulü ah nih yo mti shih u.
5 Ngvoong mah noh ah xüh ei akse mat ah tüih be tü. Asun ah nih hnim u. Asun kba ah xüh eie mat siim mat siim kho hah ah jah tüih. Akhäk ah nih jah te u, akhäk ah nih jah hnim u.
6 Ah mhlä naak ah sa mat däk veham kti. Akpäih naaka ah sa sun ah nih veeia ah tüih. ‘Kah sa ta lei shong kkhaie ni’ tilü ah ngngaih.
7 Ngvoong ngvat ktie noh ta ‘Ahin ngvoong ka nak kkhai khoh kshääng ni. Ngpyaih xat ua. Nih hnim vai u. Asun üng ah khoh nih yah ei kkhaie ni’ tilü mat jah mat ngthäh ngkhyah ktie.
8 Man lü ah nih hnim-in u.
9 Asun üng ngvoong mah noh i poh kkhai ni. Sit lü ngvoong ngvat ktie jah hnim päih kkhai ni. Kona ngvoong phi akse-e üng jah kkhah be kkhai.
10-11 Sangsiim üng nah nih hmuk ktie am ni bä. ‘Ut im kshae noh am hlü ei ulü ah nih hoih ma ua lung akpäih naaka ta im sun ngkhääng na-bok ktia lunga thoon lobe kti ni. Asun Pangsiima poh ni. Nih nih-ea hmuh-a ta mün sam kshe pi pia thoon kti ni’ tilü Sangsiim üng ng'yuk hüt kti” tilü Jeishüh noh ah pyen.
12 Booi Jeishüh noh ah nih-e üng suk kkhaia pum üng msäp lü ah pyen sun khotu ngsiim kdäme jah Sangsiim ktheeme jah khong mange noh shim ei ulü Jeishüh ah nih man vai ah nih ktha naak kyo u. Kkhyaange jah kyüh ulü Booi Jeishüh ta-hüt lü sit ktie.
(Mate 22.15-22; Lükah 20.20-26)
13 Jeishüh noh ah pyen lo mkhye velü säp shuui kkhaia Pharishe-e akhäk jah shang phuhlang Herota akläke akhäk Jeishüh-a veei ah nih jah tüih u.
14 Sit ulü ahin kba ah nih pyen tuhan u. “Angvaaio, anghläia aksang nah pyen kti atia kah nih kshing ktie ni. Kkhyaang am kyüh kti. Kkhyaanga hmaai büh naak am ve. Pangsiima thuuma kba aksang nah jah mthei kti ni. Kesha shang phuhlang üng khoon to ngui peet vai Pangsiima thuum üng ngkäk kti mä. Am ngkäk mä.
15 Kah nih jah peet vai mä, am kah nih jah peet vai mä” tilü ah nih kthäh tuhan u. Jeishüh noh ta ah nih lim ma sun jah kshing lü “I vai nah nih nah saam tuhan ktie ni. Kah büh vai ngui tangka mat lo püi ua” tilü ah pyen.
16 Ah nih lo püi u. Jeishüh noh ta “Ahin u a lup ni. U a ngming ni” tilü ah jah kthäh. “Kesha shang phuhlang ni” ah nih ti u.
17 Jeishüh noh “Kesha shang phuhlang üng shääng kti Kesha shang phuhlang üng pe ua” tilü ah jah mtheh. Jeishüh ah nih mün naak u.
(Mate 22.23-33; Lükah 20.27-40)
18 Asun üng thih kona xün be am ve tilü jum ei ktie Satüke-e Jeishüh-a veei lo-ulü ah nih kthäh kkhyah u.
19 “Angvaaio, ‘Sa na käh khyüi sho ham nih lü ah kpa mi noh ah thih taak nghnu mi mat vek kti. Ah be bea shuui käh dut kkhaia asuna hmeei, kpa mi suna na noh shääm be lü hnashene phi khyüi sho nih she’ tilü Moshei noh Sangsiim üng ah jah yuk hüt peet ni bä.
20 Ngbe ngna kkhyüh ve mjoh ktie. Ah nih be kdäm noh kkhyu na-ma lü sa na käh khyüi sho ham nih lü thi-be kti.
21 Anghngih naak noh ah bea kkhyu hmeei sun ah shääm be. Sa na am khyüi sho ham nih lü thi-be tü mjoh kti.
22 Ah nih kkhyüh bäng noh asuna nghnu mi üng hnashen am ta-hüt u. Hnua ta nghnu mi sun phi thik kti.
23 Thih kona xün be üng asuna nghnu mi u a kkhyua thoon kkhai ni. Kho mdeka ta ah khong pa kkhyüh vek kti ni” tituhan lü ah nih pyen u.
24 Jeishüh noh ta “Sangsiim phi am kshing u kti lü thih kona ah jah xün naak shak be Pangsiima hiit ave phi am kshing u kti. Asuna thoon lü nah nih ngngaih üng lam nah nih hmü u ni.
25 Kkhyaange ah nih thih kona ah nih xün be üng am ngkhyu ngla ti u. Kkhaan kho ngshäea kba ni ah nih ve hnüh u.
26 Thih kona xün bea mong nah nih kshin hlü ksang ta Sangsiim mseei lü bük ua. Moshei noh nghling kpyüüma Pangsiim ah hmuh-a mong Sangsiim nah nih bük khoi ktie am nih mä. Asun üng Pangsiim noh ‘Kei hin Apyahama nah Pangsiim ni. Isaka nah Pangsiim ni. Jakopa nah Pangsiim ni’ tilü Moshei üng ah mtheh.
27 Pangsiim hin akthiea Pangsiim am ni. Akkhyüngea Pangsiim ni. Asuna thoon lü nang nih-e nah nih ngngaih üng lam nah nih hmü u ni” tilü ah jah mtheh.
(Mate 22.34-40; Lükah 10.25-28)
28 Sangsiim ktheem mat noh ah nih veeia lolü ah nih ngthäh ngkhyah u sun ah jah ngjaak. Jeishüh noh akdo kkinga ah jah mshak be sun ngja-lüta “Pangsiima thuum naküt üng aktung bok ta i ni” tilü ah kthäh.
29 Jeishüh noh “Aktung bok ta ‘Ä! Isare-eo, ngngaai ua, Pangsiim hin nih Booi Pa ah pät däk ni.
30 Nah Booi Pa nah mlung kko üng, nah ngnei shak üng nah su ngngaih naküt üng, nah ngjung ktha naküt üng kphya na-a’
31 Aktung bok anghngih naak ta ‘Nah pät noh nah pät nah kphya naaka kba nah püi po phi kphya na-a.’ Ahi xooia thea ta Pangsiima thuum aktung bok am ve ti” tilü ah jah mshak be.
32 Sangsiim ktheem noh ta “Angvaaio, nang nah sang kti ni. ‘Pangsiim ah pät mat däk ni ah ve. Pangsiim akse am ve ti’ tilü nah pyen hin sang kti.
33 Mlung kko üng Pangsiim kphya naak vai hlü kti. Su ngngaih naküt üng, ngjung ktha naküt üng Pangsiim kphya naak vai hlü kti. Pät noh pät kphya naaka kba püi kphya naak vai hlü kti. Ahie hin Pangsiima phäh kkhyüng kshei mei üng mkhyon lü poh jah khah naak abänga kthaka do bok kti ni” tilü ah pyen.
34 Mseei khyeng khyeng lü akdo kuunga ah pyen be sun Jeishüh noh hmulo lüta “Nang hin Pangsiima pe üng am thuuk pyei kti” tilü ah pyen. Asun kona u noh phi Jeishüh am kthäh dat ti u.
(Mate 22.41-46; Lükah 20.41-44)
35 Hjok khah im nua Jeishüh noh ah jah mthei üng “‘Phalok kkhai Khrito hin shang phuhlang Davita tu kpa ni’ tilü i hok kba ah nih jah mthei khoh vai u ni.
36 ‘“Nah kho pha kkea nah ye-e kah jah taak säpa kah kkheet lam da ngshut ei ma-a” tilü Pangsiim Booi Pa noh kah Booi Pa üng ah mtheh ni’ tilü shang phuhlang Davit noh phi Mkhyangsiim üng ah pyen ni.
37 Davit noh phi ‘Kah Booi Pa’ tilü Khrito ah pyen ni. Asun kba ta i hok kba ah tu kpa-a thoon khoh kkhai ja” tilü Jeishüh noh ah pyen. Kkhyaang la lae noh ta Jeishüh ah nih ngngaih ei hlü pyei u.
(Mate 23.1-36; Lükah 20.45-47)
38 Jeishüh noh ah jah mthei üng “Sangsiim ktheeme jah bük ei ua. Akkyu nua shui shalü sit hü hlü ktie ni. Kkhyaang päea kshuunga kkhyaange noh ah nih jah mün naak vai hlü ei ktie ni.
39 Sangsiim ngthei naak kyonga akdo bok ngshut naak üng ngshut hlü ktie ni. Pooi ima booi ei naak üng ei hlü ktie ni.
40 Hmeei nu mpyeen kshe-ea ka abäng jah mhleei mhlak lü ah nih jah loh ei peet. Käh apou vaia ah nih msih naaka kho vei pa tä sham tuhan ktie. Asune sun Pangsiim noh kshe hleen bok ktia mtaam jah pek kkhai ni.”
41 Hjok khah im nua ngui bunga peia Jeishüh ngshut lü ngui bung üng ngui xon lok ktie kkhyaang päe sun ah jah büh-in. Booi ei ktie noh ta kho hah pa siim ah nih xon lo u.
42 Hmeei nu mpyeen kshe mat noh ta mpyüm thek mata phu tangka ngui kpe sa nghngih ah xon lo, Jeishüh noh ah hmuh.
43 Jeishüh noh akläke ah veeia jah khü lü “Ngngaai ua, kei kah pyen ma kkhai ni. Tuh-a lok kti hmeei nu hin mseei lü bük ua. Tuh-a ngui xon lok ktiea k'um hin üng hmeei nua xon lo hin Pangsiima hmuh-a aphu küüi bok kti ni.
44 Booie noh ta ah nih taak ei khoh hah pa üng ka ah nih xon lo sa u ni. Hmeei nu mpyeen kshe noh ta mpyeen she mah mah lü ah ei hlü mhlä ah taak ei naküt ah xon lo päih ni” tilü ah jah mtheh.