9
(Mate 10.5-15; Marküh 6.7-13)
1 Booi Jeishüh noh akläk xalei nghngih jah khü lü kho yaai kshät naak jah am khyaih ei mdo naak bea hiit ah jah peet ma.
2 Kona Pangsiima upa pea mong kpyaü vai jah kkhyaange jah mya shak be kkhaia ah jah tüih hü.
3 Booi Jeishüh noh “Nah nih kdung seh naaka i phi käh seh ei laang ubä. Kshong khe jah ääi khi käh seh ei ubä. Buh käh suun ei ubä. Ngui phi käh seh ei ubä. Phyang mat däk jih ei ubä. Phyang nghngih seh ei vai am hlü.
4 Mat mata ima nah nih kaai üng asuna ngnama kkhyüh nah nih joon vei säpa nah nih kaai im sua ve ubä.
5 Am ning dou ei hlük ktiea ngnama ta nah nih joon be üng ah nih mkhyea ve sun shak shi vaia nah nih kho pha üng kop kti mput kkhok hüt ubä” tilü ah jah mtheh.
6 Asun üng akläke joong ulü pi ngnam naküta sit hü ulü thang kdo kkya kpyaü ulü am khyaih ei ktie ah nih jah mdo be u.
(Mate 14.1-12; Marküh 6.14-29)
7 Asun kba athoon ve lo abäng sun ah ngjaak lo üng shang phuhlang Herota mlung shük khyak lok kti. I lüni ti ta “Patiso Johaan thih naak üng thou be kti va ni khüng vai” ah nih ti u.
8 Akhäk noh ta “Shahma ngsiim Eilijah pou lok kti ni” ah nih ti u. Akhäk noh ta “Ahlaan nu üng ka shahma ngsiim mat mat thou lobe kti ni” tilü ah nih pyen u.
9 Shang phuhlang Herot noh “Johaana lu kah jah kkyüh shak. Tuh-a ahin kba ah thang kah ngjaaka kkhyaang ta u vai ni” ah ti. Asun üng Booi Jeishüh sun ah hmuh vaia mtun ei lok kti.
(Mate 14.13-21; Marküh 6.30-44; Johaan 6.1-14)
10 Ngshäe Booi Jeishüh-a veei lobe ulü ah nih poh mshah hü naküt Booi Jeishüh üng ah nih mtheh lo be u. Asun üng Booi Jeishüh noh ah nih nih-e jah khü lü kkhyaanga ngseek naak Pet Shai Ta mlüh-a ah jah seh püi.
11 Kkhyaang päe noh asun kshing lo-ulü jah läk hnga ktie. Booi Jeishüh noh asune jah dou daang lü Pangsiima upa pea mong jah msuuk mtheh lü am khyaih ei ktie phi ah jah mdo be.
12 Kho kyaak shoa ta akläke Booi Jeishüh-a veei lo-ulü “Khäk ma hnüh she. Kkhyaang päe hin nih pi pei mlüh-e jah ngnamea sit hü hnüh u-she. Ah nih im kaai vai jah ah nih ei ook vai hlü kkhai ni. Ahia ta kkhyaang phi nghi kti ni” ah nih ti u.
13 Booi Jeishüh noh ta “Nang nih-e noh jah mbei ua” tilü ah jah mtheh. Ah nih nih-e noh “Kah nih veeia ta kkhaai kpeh beei mhma jah nga thek nghngih sa däk ni ave. Asun kba am ani üng sit hü lü ahina kkhyaangea phäh ei ook vai kah nih kkhyäi vaai kkhaie mä” tilü ah nih kthäh u.
14 I lüni ti ta kkhyaang päe üng kpa mi kdäm thoong mhma bang vek kti. Booi Jeishüh noh akläke üng “Kkhyaange hin mhma kip siima apä päa jah ngshut shak ua” ah ti.
15 Akläke noh abänga asun kba ah nih jah ngshut shak.
16 Booi Jeishüh noh kkhaai kpeh beei mhma jah nga thek nghngih sun jah dou ma lü kkhaan kho da mang lü Pangsiim ah je ei. Kkhaai kpeh kphyüt lü nga phi keek lü kkhyaange üng ah nih jah yet vaia akläke üng ah jah peet.
17 Abäng noh ei ulü phü ktie. Ak'hleei lo ngphyüt ngshek kti kkhaai kpeh jah nga jah hooi be ulü sä xalei nghngih lok kti.
(Mate 16.13-19; Marküh 8.27-29)
18 Mhnüüp mat üng Booi Jeishüh ah pät noh ah tä sham üng ta ah hlonga akläke phi vek ktie. Booi Jeishüh noh akläke üng “Kkhyaange noh kei u atia i hok kba pyen ktie ja” tilü ah jah kthäh.
19 Akläke noh ta “Akhäk noh ‘Patiso Johaan’, akhäk noh ta ‘Shahma ngsiim Eilijah ni’, akhäk noh ‘Ahlaan üng ka shahma ngsiim mat mat thou lobe kti ni’ tilü pyen ktie ni” ah nih ti be u.
20 Booi Jeishüh noh “Nang nih-e noh ta kei ua nah nih nah hmuh u ja” tilü ah jah kthäh. Peta noh “Nang hin Pangsiima ning tüih lo Khrito ni” tilü ah pyen be.
21 Booi Jeishüh noh “Ahin bang keia mong hin u üng phi käh mtheh bing bing ubä” tilü ah jah ngya kyet.
(Mate 16.20-28; Marküh 8.30-9.1)
22 Booi Jeishüh noh “Kei Kkhyaang Sa noh khui kha kshe nu mjü kküm kah khaam ei yah kkhai. Akdäme, khotu ngsiim kdäme jah Sangsiim ktheeme noh nah kpet mjak kkhaie ni. Nah hnim kkhaie ni. Amhnüüp kthum üng Pangsiim noh nah mthou be kkhai” tilü ah jah mtheh.
23 Asun üng Booi Jeishüh noh kkhyaang abäng üng “Mat mat noh kei ah nah läk hlü ta ah mlunga ti ti käh läk lü keia khui kha-a kba ah khui kha hnga vai jah keia thih-a kba ah thih hnga vai hngoh-a phi amhnüüp tä ngshääm lü nah läk she.
24 Ah päta shak yung ei hlük kti noh ah shak shum nak kkhai ni. Keia phäh ah shak shum nak kti noh ta aksanga ah shak yung ei kti ni.
25 Kkhyaang mat hin noh kho mdek üng ka abäng ka na-kyo lüphi shak ngshääi ah shum naak ta i a kyah kkhai ni.
26 Mat mat noh kkhyaangea ma-a keia phäh jah kah msuh mtheh-a phäh ah ngke ei naak ta kei Kkhyaang Sa hin Pangsiima jou taai sun jou taai nalü kkhaan kho ngshäe noh nah ksung ngvoong ktiea kah lo be üng asuna kkhyaang kah ngke ei na-be kkhai ni.
27 Ngngaai ua, kei kah pyen ma kkhai. Ahin üng vek kti kkhyaang akhäke hin Pangsiima upa pe ah nih hmuh veia xüng ham kkhaie ni” tilü ah pyen.
(Mate 17.1-8; Marküh 9.2-8)
28 Asun kba ah pyen kona amhnüüp kkhyet bang üng Booi Jeishüh sun tä sham kkhaia msuunga kaai kti. Peta, Johaan jah Jakop phi ah jah ngkhah püi.
29 Ah tä sham k'um üng ah mik hmaaia joong pan nghlai lok kti. Booi Jeishüh-a shui shak sun abook lik nua velok kti.
30 Kkhyaang nghngih noh ahunata Booi Jeishüh shi hlo lo püi kti xooi. Asun xooi ta Moshei jah Eilijah ni.
31 Ah nih nih xooi sun jou taai mah ktia pou lo nih lü Booi Jeishüh mah mah su i vei käh hjou ktia Jeirüh Shalem mlüh-a Booi Jeishüh thih ah khaam ei vaia mong pyen püi kti xooi.
32 Peta jah ah püi xooi ta ip hlülü ku pyei ktie. Ah nih ngshüüm lo be u üng Booi Jeishüh-a jou taai jah ah hlonga ngdüüi kti kkhyaang xooi phi ah nih jah hei hmuh u.
33 Asuna kkhyaang xooi sun Booi Jeishüh-a kkhyüh ah nih joon be üng ta Peta noh Booi Jeishüh üng “Angvaaio, ahia ve ei na-phyak kti ni. Nanga ve naak vai mat, Mosheia ve naak vai mat, Eilijah-a ve naak vai mat hjaam kthum kah nih pha kkhaie shü” tilü ah pyen. Peta noh ah lu sing lü asun kba ah pyen ni.
34 Asun kba ah pyen k'um üng kho ngmei noh ah jah khüm-in lo. Asun üng ta akläke kyüh ei lok ktie.
35 Kho ngmeia kkhyüh lü Pangsiima kthai ta “Ahin kah xü kse ei kah sa kpa ni. Ah nih-a pyen ksang na-ua” tilü lok kti.
36 Asuna kthai ah nih ngjaak kona Booi Jeishüh ah pät ni ah nih hmuh ti u. Akläke kthum noh ah nih hmuh ngjaak naküt sun asun k'um üng u üng phi käh mtheh lü akdinga vek ktie.
(Mate 17.14-18; Marküh 9.14-27)
37 Angooi üng Booi Jeishüh jah akläke kthum sun msuunga kkhyüh ah nih kyaak lo be üng kkhyaang pä nu noh jah dou lok ktie.
38 Kkhyaang päe üng ka mat noh ta “Angvaaio, kah sa nah mpyeen ei peeta. Kah ning nghui nak kti ni. Ah pät sa däk kah sa ni.
39 Nah ngngaaia, kho yaai noh ah pin man tä lü ngpyaang pyei lü ngthüng ngak ngak shak lü hit saai ei lolü ah msi mpoon phi noot pyei kti. Kho yaai noh ah nih sun mkhuh mhlih ei lä lü ah msim kpyak hlü ni.
40 Asuna kho yaai kshät kkhaia nanga akläke kah jah nghui naak kyo. Am khyaih khoh u” tilü ngpyaang pyei lü ah pyen lo.
41 Booi Jeishüh noh ta “Nang nih kkhyaange hin nah nih shexu pi pi ktie ni. Pangsiim am nah nih üm naak u ni. Nah nih hlonga velü i vei pi pi kah nih ning suun ei vai ni. Hnashen kah veeia lo püi ua” tilü ah jah xüh.
42 Hnashen kpa mi sa ah lo k'um üng kho yaai sun noh pin man lolü kthüng ngak ngak shak lü hit saai ei lok kti. Booi Jeishüh noh kho yaai sun hnashena kkhyüh ah shot vaia mkhyah lü hnashen ah mdo be. Kona ah pa üng ah ap be.
43 Kkhyaang naküt noh “Pangsiima hiit i hlooka däm duh kti ni” tilü mün sam tong ktie. Kkhyaang abäng noh Booi Jeishüh-a poh mshah sun ah nih mün naak k'um u üng Booi Jeishüh noh akläke üng ahin kba ah jah mtheh.
(Mate 17.22-23; Marküh 9.30-32)
44 Booi Jeishüh noh “Kah ning jah mtheh kkhai. Käh mhnih ubä. Kei Kkhyaang Sa hin kkhyaangea kut k'uma nah ap kkhaie” tilü ah pyen.
45 Lüphi akläke noh ta Booi Jeishüh-a pyen sun am ngja-kya u. Ah nih lu käh anglang vaia ti hlü sun Pangsiim noh ah thup ni. Lüphi u noh phi am kthäh dat u.
(Mate 18.1-5; Marküh 9.33-37)
46 Asun üng akläke noh “Nih nih-e üng akdäm bok u ni” tilü ngthäh ngkhyah lok ktie.
47 Booi Jeishüh noh ah nih mlung ngnei sun ah kshing lo üng hnashen mat ah veeia ah khü.
48 Booi Jeishüh noh “Keia hmaaia phäh üng mat mat noh ahin bang hnashen hin ah dou daan ta kei ah nah dou daan üng täng kti ni. Kei nah dou daang kti noh nah tüih lok kti phi dou daang kti. Nang nih-e üng akdiik boka thoong kti ta akdäm bok ni” tilü ah jah mtheh.
(Marküh 9.38-40)
49 Johaan noh “Angvaaio, nah ngming shum ei lü kho yaaie jah kshät kti mat kah nih hmuh u. Nih nih-e üng am ngpüi ei ktia thoon lü kah nih ngya u ni” tilü Booi Jeishüh üng ah mtheh.
50 Booi Jeishüh noh ta “Asuna kkhyaang käh ngya ua. Nih nih-e am jah kpet kti ta nih nih-e da ngtung kti ni” ah ti be.
51 Booi Jeishüh sun kkhaan kho pea ah ngjäh be vai asäh lo üng ta Jeirüh Shalem mlüh-a seh vai kuunga ah mkhyah.
52 Booi Jeishüh noh ah seh naak vai su ah ngshäe ah jah tüih. Asune sun sit ulü Shama Rih ngnam mata vaang lü Booi Jeishüh-a im kaai naak vai piit pyaang hlük ktie.
53 Lüphi Booi Jeishüh sun Jeirüh Shalem mlüh-a sit hlük ktia thoon lü Shama Rih-e noh am vaan shak u.
54 Akläk xooi Jakop jah Johaan noh asun ah nih hmuh üng Booi Jeishüh üng “Booi Pao, kkhaan khoa kkhyüh ngmei nu kyalo lü ahina ngnam sim pyak kkhaia kah nih tä sham kkhaieo” tilü ah nih kthäh.
55 Booi Jeishüh noh ah nih nih da nglat lü ah jah him.
56 Asun üng ngnam aksea sit ktie.
(Mate 8.19-22)
57 Ah nih kdung seh shoa kkhyaang mat Booi Jeishüh-a veei lolü “Angvaaio, nah seh naak naküta kah ning läk kkhai ni” tilü ah pyen.
58 Booi Jeishüh noh ta “Sha ui ah khuui vek kti. Kkha ah ngbu vek kti. Kei, Kkhyaang Sa ta kah nghngään naak vai phi am ve” tilü ah mtheh.
59 Booi Jeishüh noh kkhyaang mat üng ta “Nah läka” ah ti. Asuna kkhyaang noh ta “Booi Pao, sit lü kah pa yook nalü mkhyüh vaai ma vang ngü” tilü ah mtheh be.
60 Lüphi Booi Jeishüh noh ta “Kkhyaang kthie noh ah nih püi yook nalü mkhyüh ei u-she. Nang noh ta sit lü Pangsiima upa pea mong kpyaü hüa” tilü ah mtheh.
61 Mat be tü noh “Booi Pao, kah ning läk hlük kti ni. Lüphi ima sit be ma lü ngkya naaka kah püie aai jah yoh ei vaai püi ma vang ngü” ah ti.
62 Booi Jeishüh noh ah nih üng “Kkhyaang mat noh lai kthon naak kthon ngbaan bilü ah hnu da va mdei be kti ta Pangsiima pe üng am looi ngkäih” tilü ah mtheh be.