7
(Mate 8.5-13)
1 Booi Jeishüh noh kkhyaang päe jah msuuk mtheh lopääng lü Kapanom mlüh-a sit be kti.
2 Asuna mlüh-a Romah ngtuk kpoh pä khong sun ah mhlä mseh naak ah xüh ei mat vek kti. Asuna xüh ei kshe hleen lü thi-lo hlühnüh kti.
3 Ngtuk kpoh pä khong sun noh Booi Jeishüh-a mong ah ngjaak üng Jüdah khong mang akhäk Jeishüh-a veei jah tüih lü ah xüh ei ah mdo lo be vaia ah jah nghui vaai shak.
4 Jüdah khong mange Jeishüh-a veei ah nih pha üng “Angvaaio, asuna Romah ngtuk kpoh pä khong nah ku ei vaia do kti ni.
5 Ah nih noh nih nih Jüdah kkhyaang mjü jah mhlä kphya nalü nih phäh ua Sangsiim ngthei naak kyong phi jah shak peet kti ni” tilü ah nih nghui naak vaai u.
6 Asun üng ta Booi Jeishüh noh ah jah läk. Ngtuk kpoh pä khonga im ah nih pha hlü hnüh üng ngtuk kpoh pä khong sun noh ah püi poe Booi Jeishüh-a veei jah tüih lolü ah jah pyen shak ta “Booi Pao, akkhak nah hmuh ei kkhai ni. Kah ima nah kaai lo vai kei am looi ngkäih ngü.
7 Asuna thoon lü kah pät kuung phi nah veeia ning bük lok kkhaia am ngkäih ngü. Lüphi kkhyü pyen kti lü kah xüh ei mdo be tua.
8 Keia kthaka aana vek kti khong akdäme vek ktie. Kah kut k'uma ngtuk kpoh-e phi vek ktie. Kei noh mat üng ‘Sita!’ kah ti üng sit kti. Mat be tü üng ‘Loa!’ kah ti ta lok kti. Kah mpya üng ‘Hin hin poh-a!’ tilü kah pyen üng ah nih noh ahin poh kti” tilü ni.
9 Booi Jeishüh noh asun kba ah ngjaak üng mün tong kti. Läk lok kti kkhyaang pä da mang lü “Kah ning jah mtheh ma kkhaie ni. Isare kkhyaange hngoh üng phi ahin kba däm duh ktia jum ei naak am hmukhoi ham ngü” tilü ah pyen be.
10 Ngtuk kpoh pä khonga jah tüih-a kkhyaange ima ah nih pha vaai be u üng asuna xüh ei mya be kti sun ah nih hmuh u ni.
11 Kona Booi Jeishüh sun Mnaai mlüh da sit lü akläke jah kkhyaang pä hli noh ah nih läk u.
12 Ah nih nih-e sun mlüh ngvoong mkota ah nih pha lo üng mlüh kho kpunga yook kkot lok kti kkhyaange ah nih jah hmuh u. Asuna kkhyaang kthi sun hmeei nua mat däk ah sa kpa-a kyak kti. Mlüh k'um üng ka kkhyaang kho hah pa sun hmeei nu mah mah yook mkhyüh kkhaia lok ktie.
13 Booi Pa noh ta asuna hmeei nu ah hmuh üng ah mpyeen ei lo pyei. “Käh kyap tia” tilü ah mtheh.
14 Booi Jeishüh sun yooka hlonga sit lü yook nglong ah hneh. Asun üng ta yook kkot ktie sun ngdüüi ktie. Booi Jeishüh noh “Kah püio, thou lobea, kah ning mtheh kti” tilü ah pyen.
15 Asun üng ta kkhyaang kthi sun ngshut lobe lü shi hlo lok kti. Booi Jeishüh noh ah nih sun ah nu üng ah mhjuum be.
16 Kkhyaang abäng kyüh ei lo-ulü Pangsiim mküüi mtou lü “Shahma ngsiim akdäm nih nih-ea veei pou lok kti ni. Pangsiim ah kkhyaange jah ku ei kkhaia phalok kti” tilü ah nih pyen u.
17 Booi Jeishüh-a mong asuna thang sun Jüdah hne abäng jah api pei naküta nglou ngthang hü päih kti.
(Mate 11.2-19)
18 Patiso Johaana akläke noh Patiso Johaan sun üng Booi Jeishüh-a mong ah nih mtheh mkhyah vaai u.
19 Patiso Johaan noh akläk nghngih ah veeia jah khü lü Booi Pa Jeishüh-a veei ah jah tüih. Asun xooi üng ahin kba ah jah kthäh vaai shak. “Nang hin, lok kkhaia thoon kti Khrito mä. Am ani ta kei nih-e noh akse mat mat kah nih mtät ham kkhaie mä” tilü ni.
20 Booi Jeishüh-a veei phalo nih lü asun xooi noh “Patiso Johaan noh nah veeia jah tüih lolü ahin kba ah jah kthäh lo shak ni. ‘Nang hin lok kkhaia thoon kti Khrito mä. Am ani ta kei nih-e noh akse mat mat kah nih mtät ham kkhai mä’ ah ti ni.”
21 Ah nih pha lo üng Booi Jeishüh noh am khyaih kti kkhyaang kho hah ah jah namdo be. Kho yaaie phi ah jah kshät. Ah mik mü kho hah ah jah vaai shak be.
22 Booi Jeishüh noh Patiso Johaana akläk xooi üng “Nang nih noh tuh-a nah nih hmuh ngjaak naküt hin Johaan üng mtheh vaai nih-a. Ah mik müea mik vaai be kti. Ah kho kthie sit hü be thei ktie. Mneh kshe mneh kti do be ktie. Ah nghnga kpangea nghnga nglang be kti. Thipääng ktie phi thou be ktie. Ampyeen kshe-e noh thang kdo kkya ngja-hü hnüh ktie ni.
23 Äh lah naak mlung käh vek ktia nah jum ei ktia phäh do kya naak vek kti ni” tilü ah jah mtheh.
24 Johaana tüih lo xooi ah nih seh be kona Booi Jeishüh noh kkhyaang päe üng Johaana mong ah jah mtheh. Booi Jeishüh noh “Nang nih-e mkyaanga nah nih seh u sän üng i nah nih hmuh hlü ua phäh ja. Khoa khi üng ngshüün kti kyaai si dung nah nih büh hlü ua phäh mä.
25 Asun kba am ani ta i nah nih bük vaai hlük ktie ja. Shui shak k'hnip akkyäpa shui shak ktia kkhyaang nah nih bük vaai hlük ktie mä. Ngngaai ua, akkyäpa shui shak shui shalü angbüh-a vek ktia kkhyaange ta shang phuhlanga sü ima ni nih jah hmuh kom.
26 Asun kba am ani ta i nah nih bük vaai hlük ktie ja. Shahma ngsiim mat nah nih bük vaai ktie mä. Kei noh kah ning jah mtheh kkhai ni. Johaan sän shahma ngsiimea kthaka däm duh kti ni.
27 Sangsiim üng ahin kba ng'yuk kti hin Johaana mong ni. Asun üng ‘Bük ngngaaia, nah seh naak vai lam pyaang kkhaia keia ngshä kah tüih lo’ tilü vek kti.
28 Kei kah pyen ma kkhai. Nghnu miea sa na naküt üng Johaana kba däm duh ktia kkhyaang am velaang. Lüphi Pangsiima upa pe üng shääng ei kti üng akdiik boka kkhyaang ta Johaana kthaka däm duh kti ni” tilü ah pyen.
29 Kkhyaang abäng jah khoon to hlook ktie noh Booi Jeishüh-a pyen ah nih ngjaak üng “Pangsiim sang kti” atia ah nih ä u. I lüni ti ta ah nih nih-e noh Patiso Johaana veei patiso khaam ei khoi pääng ktie.
30 Lüphi Pharishe-e jah Sangsiim ktheeme noh ta ah nih nih-ea phäh Pangsiima mkhüh ktüüm not ulü Johaana veei patiso am khaam ei u.
31 Booi Jeishüh noh “Tuh-a kha üng ka kkhyaange hin i üng jah msäp mshuui vai ni. I üng täng ktie ni.
32 Ah nih nih-e hin ngnam kshuunga lü ei kti hnashene üng täng kti. Asune noh mat jah mat üng ‘Leng la tum mah mah u ngüshe kboh phyung kboop lü am nah nih jah nglaam püi ktie. Kei nih-e noh ta kyah ng'äi msuuk u ngüshe phi am jah kyah lopüi u kti’ tilü ah nih pyen u.
33 I lüni ti ta Patiso Johaan ah lo üng ei jeih lü ngbom tui phi am o-laang. Nang nih-e noh ta ‘Ah nih hin kho yaaia vaan naak ni’ tilü nah nih pyen ei u.
34 Kei, Kkhyaang Sa kah lo üng ta aeia phi kah ei kti. Aooka phi kah ok kti. Nang nih-e noh ta ‘Hina kkhyaang hin bük ma ua. Ei kolaih kti. Ktaai ktum ni. Khoon to k'hlooke jah mkhye mshoh ktie üng ngpüi ngpo kti ni’ tilü nah nih nah pyen ei u.
35 Lüphi Pangsiima theem naak dou daang naküt ktie üng asuna theem naak sang kti tia ngshing ngte lok kti.”
36 Pharishe mat noh Booi Jeishüh buh ah khü ei. Booi Jeishüh phi Pharishea ima sit lü buh ei kkhaia ngshut kti.
37 Asuna mlüh-a boh bah ktia nghnu mia ah nih shui mat vek kti. Asuna nghnu mi noh Booi Jeishüh sun Pharishea ima ah ngkhin vaai ngjalo lüta aphu kküüi lung mang uum book üng aphu kküüi pi pi tui ng'uui ah lo püi.
38 Ah nih sun Booi Jeishüh-a kho kuunga ngdüüi lü kyap lüta ah mik tui sun Booi Jeishüh-a khoa kkhaana kyalü ah soih. Ah lu sham üng Booi Jeishüh-a kho sun xut lü uut ma lü tui ng'uui üng ah buih.
39 Booi Jeishüh khü ei kti Pharishe sun noh asun ah hmuh üng “Ahina kkhyaang hin shahma ngsiim ksanga ah thoon ta ah kho hne ktia nghnu mi hin u ni, i a mäi ni atia kshing ei kkhai. I lüni ti ta ah nih hin boh bah ktia nghnu mi ni” tilü ah suum saak.
40 Asun üng ta Booi Jeishüh noh “Shimono, kah ning mtheh hlü vek kti ni” tilü ah pyen. Shimon noh “Angvaaio, pyen tua” tilü ah mshak be.
41 Booi Jeishüh noh “Ngui jah kpu ei kti mata veei ngui pu ei kti nghngih vek kti xooi. Kkhyaang mat sun she ngjuung mhma phu ah lei vek kti. Mat ta vok nu phu ah lei vek kti.
42 Asun xooi noh ah nih lei sun am khih khoh nih lüta jah kpu kti sun noh ah nih lei sun käh ah nih thung be xa vaia ah pyen. Ngui jah kpu kti sun she ngjuung mhma phu lei nak kti noh mhlä kphya na-bok kkhai mä. Vok nu phu lei nak kti noh mhlä kphya na-bok kkhai mä” tilü ah jah kthäh.
43 Shimon noh “Pu ei ngui aknung bok ah hläh peet noh ngui kpu kti sun mhlä kphya na-bok kkhaia kah ngngaih ni” tilü ah mshak be. Booi Jeishüh noh “Nah nih su ngngaih sang kti ni” tilü ah pyen.
44 Asun üng nghnu mi da mang lü Shimon üng “Hina nghnu mi hin büka. Kei nah im k'uma kah luh lo üng kho mthih tui am nah mshääm peet kti. Ahina nghnu mi noh ta ah mik tui üng kah kho nah msooi lü ah lu sham üng ah nah xuh peet ni.
45 Kah pha lo üng nah nah dou naaka am nah uut kti. Ah nih noh ta kei hin kah ngshut loa kkhyüh ngshääi ei ktia kah kho nah uut khü.
46 Nang noh kah lu kshi tui üng am nah kthuh peet kti. Ah nih noh ta tui ng'uui üng kah kho nah buih peet ve.
47 Asuna thoon lü kei noh nang üng kah ning mtheh kkhai. Mkhye mshoh kho hah üng lät naak ah yah-a phäh ah nih üng phi mhlä kphya naak vek kkhüt kti. Mkhye mshoh alääm sa däk lät naak yah kti ta ah mhlä kphya naak be phi ngseek kti ni” tilü ah mtheh.
48 Kona Booi Jeishüh noh nghnu mi üng “Nah mkhye kah ning mhlät ni” tilü ah pyen.
49 Booi Jeishüh üng ayüma buh ei ktie noh “Ahina kkhyaang ta u ni. Ah nih noh i hok kba mkhye mshoh-e jah mhlät khoh laang kkhai ni” tilü mat jah mat mship mhjop lok ktie.
50 Booi Jeishüh noh nghnu mi sun üng “Nah jum eia phäh kuum kyan naak nah yah pääng kti ni. Amlung diima sit be hnüh-a” tilü ah mtheh mkhyah.