24
(Mate 18.1-10; Marküh 16.1-8; Johaan 20.1-10)
1 Lüphi Pangsiim ngam püi mhnüüpa akho ngooi üng ngooi lam nu kho thai hlaana nghnu mie sun noh ah nih piit pyaan u ang'uui sun seh lü msüm hnün lung khuui sua sit ktie.
2 Lung khuui khaih naak lung pelep nu mkota kkhyüh ngheei-in kti sun ah nih hmuh u.
3 Lung khuuia k'uma lut kyo ktie. Yook sun am hmu-u.
4 I a joonga thoon kti ni atia ah nih ngngaih-in k'um u üng shui shak alik lik jaaü jaaüa shui shak kti kkhyaang nghngih sun pou lo nih lü ah nih hlonga ngdüüi kti xooi.
5 Nghnu mie ta kyüh ei tong ulü ngbok lü vek ktie. Asun üng kkhaan kho ngshä xooi noh asune üng “Nang nih-e hin noh i lü akkhyüng ta akthiea ve naaka ta nah nih shui lok ktie ni.
6 Ah nih ta ahia am ve. Thou be pääng kti ni. Ah nih Kalile hnea ah ve ham sän üng i hok kba ning jah mtheh kti ja. Ngngaai be ma ua.
7 Ah nih noh ‘Kei Kkhyaang Sa hin mkhye mshoh ktiea kut k'uma nah ap kkhaie. Baan lam ktung üng nah hnim kkhaie. Amhnüüp kthuma mhnüüp üng kah thou be kkhai’ tilü ah pyen ei ni” ah nih ti.
8 Asun üng Booi Jeishüh-a pyen hüt sun ah nih shüüm lo be u.
9 Asune sun msüm hnün lung khuuia kkhyüh ah nih pha lo be u üng akläk xalei mat jah ah nih püi po abäng üng ah nih hmuh ngjaak sun ah nih jah mtheh be u.
10 Marih Maka Talen, Jo Anna, Jakopa nu Marih jah ah nih nih üng ngpüi kti nghnu mie noh ahina thoon ve hin ngshäe üng ah nih jah mtheh be u.
11 Lüphi asunea pyen sun ngshäe noh i a am kyah kti kkhyüa ngngaai ulü am jum laang u.
12 Lüphi Peta ta ngdüüi lolü lung khuui msüm hnün da dong kti. Ngmüm lü lung khuuia k'uma bük lü Booi Jeishüh-a yook hloop naak jih däk ah hmuh. Ima sit be lü i a thoon pi pi kkhai mä ati sun ngngaai lü vek kti.
(Marküh 16.12-13)
13 Asuna mhnüüp kuung sun üng akläk xooi sun Emauh ngnama sit kti xooi. Asuna ngnam sun Jeirüh Shalem mlüh üng määng kkhyüh thuuk kti.
14 Asun xooi noh ah nih lam seh shoa thoon vek kti naküt abäng sun si jaang kti xooi.
15 Ah nih seh shoa ah nih ngthäh ngkhyah um üng Booi Jeishüh noh jah kpha vaai lü ah nih hlonga sit hnga kti.
16 Lüphi asun xooi noh ah nih sun Booi Jeishüh atia käh ah nih hmuh ngtu vaia Pangsiim noh ah thup ni.
17 Asun üng Booi Jeishüh noh asun xooi üng “Nah nih lam seh shoa nah nih pyen hin i a ngkhoa mong ja” tilü ah jah kthäh. Asun üng ngdüüi-in nih lü ah nih hmaai ngjaai-in lok kti.
18 Asun xooi üng ka mat Kelo Pa ngming nak kti noh “Jeirüh Shalem mlüh-a lok kti kkhine sän üng ka nah pät däk hin noh mü maam üng thoon vek kti sän am nah hmuh ngjaako” tilü ah kthäh.
19 Booi Jeishüh noh “I a ngkhoe mjoh ni” tilü ah jah kthäh be. Asun xooi noh “Nasaret mlüh-a ka Jeishüh-a mong ni. Ah nih sun kkhyaang abäng noh shahma ngsiima ah nih ngngaih. Pangsiima hiit üng ngshing ngte naak poh lü pyen kshak kti.
20 Nih khotu ngsiim kdäme jah khong mange noh ah nih sun ah nih hnim vaia Romah booiea veei ah nih ap u. Ah nih sun baan lam ktung üng hneen lü ah nih jah hnim shak u.
21 Kei nih noh ta Isare kkhyaang mjü jah shuut phyam be kkhaia kah nih ääp ei kyo. Asun kba athoon ve sun mhnüüp kthum lobe hnüh kti.
22 Asun kba däk am ni. Kah nih pä üng ka nghnu mi akhäk tuh ngooi lama lung khuui msüm hnüna sit ngooi ulü ah nih pyen lo be üng kah nih mün sam tong kti.
23 I lüni ti ta asune noh yook am hmuvaai u. Kkhaan kho ngshäe phi mhnüh mdan üng ah nih jah hmuh. Kkhaan kho ngshäe noh Booi Jeishüh sun xüng lü vek kti tia phi ah nih jah mtheh mjoh. Nghnu mie noh lobe ulü asuna mong ah nih jah mtheh lo be u.
24 Kah nih pä üng ka akhäk phi lung khuui su sit ulü nghnu miea pyena kba vek kti sun ah nih hmuh vaai hnga u. Lüphi Jeishüh sun am hmuvaai u” tilü ah nih pyen be.
25 Booi Jeishüh noh asun xooi üng “Am ngja-kya thei ktieo, shahma ngsiimea pyen sän nah nih jum ei khoh vai i hok kba thoon lü ahin kba pi pia ta khak kkhai ni.
26 Khrito noh asuna khui kha kshe nu khaam ei ma lü ah jou taai shääng van na-be yah kkhai, am ni bä” tilü ah jah mtheh.
27 Kona Booi Jeishüh ah pät kuung noh Mosheia yuk Sangsiim üng sut ei lü shahma ngsiim naküta yuk sa ktoome abäng sun üng ah nih üng shääng ei kti sa ngkhäne sun ah nih ngjaak kya-a ah jah msuh mtheh.
28 Asun xooia seh naak hlü ngnam ah nih pha u üng Booi Jeishüh sun mhläi lü sit kkhaia mäia thoon kti.
29 Asun xooi noh ta “Angvaaio, kah nih ima kaai loa. Kho mhnüüp phi mü hnüh kti. Kho phi mthan lohnüh kti ni” tilü ah nih khü. Asun üng Booi Jeishüh sun ah nih ima kaai lü ah nih veeia kkhin kti.
30 Buh ei kkhaia ah nih ngshut u üng Booi Jeishüh noh kkhaai kpeh sun lou lü Pangsiim ah je ei. Kkhaai kpeh sun kphyüt lü ah jah peet.
31 Asun üng va asun xooia mik vaai lok ktia mäi lolü ah nih sun Booi Jeishüh atia ah nih kshing lo. Booi Jeishüh sun ah nih büh-in k'um üng vit hüt lü khyük be kti.
32 Asun xooi noh “Ah nih noh lama jah shi hlo püi lü Sangsiim ah jah msuh mtheh sän üng nih mlunga nih xe xok naak kkhüt ni bäi” tilü mat jah mat ngsi ngjaang kti xooi.
33 Asun üng ahunata ngdüüi lolü Jeirüh Shalem mlüh-a sit be kti xooi. Asua akläk xalei mat jah ah nih püi poe ngkhääm ktie ah nih jah hmuh vaai.
34 Ngkhääm ktie sun noh “Booi Pa hin aksanga thou be kti ni. Shimona veeia phi pou lok kti ni” tilü asun xooi üng ah nih jah mtheh u.
35 Kona asun xooi noh Emauh ngnama ah nih seh shoa i hok kba thoon vek kti atia ni, Booi Jeishüh noh kkhaai kpeh ah kphyüh lo üng Booi Jeishüh atia ah nih kshing lo sun ah nih jah mtheh be.
(Mate 28.16-20; Marküh 16.14-18; Johaan 20.19-23; Ngshäe 1.6-8)
36 Asun bange sun akläk xooi noh ah nih jah mtheh k'um üng Booi Jeishüh sun ah nih hlonga ahunata pou lolü “Nang nih-e üng diim deih naak veshe” tilü ah pyen.
37 Asune noh ta mkhya-a ngkho hmuk ktiea shui ulü kyüh ei tong ktie.
38 Booi Jeishüh noh ta “I lü nah nih kyüh ei ktie ni. Nah nih mlunga i lü nah nih äh lah ktie ni.
39 Kah kut jah kah kho nghmae hin jah bük ua. Kah pät kuung hin ni. Nah hne shüm ua. Kah yuh mti sha mah kti atia nah nih nah hmukhoh ktie ni. Mkhya ta asun bang am ve” tilü ah jah mtheh.
40 Asun kba ah pyen kona ah kut khoe sun ah jah mhnüh.
41 Akläke ta je kyai tong lü amüna phi mün sam pyei ulü ta am jum ei khoh ham u. Asun üng Booi Jeishüh noh asune üng “Ahia ei ook vaia ngkho vek kti mä” tilü ah jah kthäh.
42 Asun üng asune noh nga nghngyaih ngkhän mat ah nih peet u.
43 Booi Jeishüh noh nga sun dou ei lü ah nih ma su ah ei.
44 Kona Booi Jeishüh noh asune üng “Nah nih hlonga kah ve ham sän üng hin kba kah ning jah mtheh khoi kti. Mosheia yuk thuum sa up üng ni shahma ngsiimea yuk sa ktoome jah shalaan ng'äie üng ni keia mong malam pyen vek kti naküta kba thoon velok kkhai ni” tilü ah jah mtheh.
45 Kona akläke noh Sangsiim ah nih ngjaak kya thei vaia ah nih lu nglang kkhaia ah jah ku ei.
46 Booi Jeishüh noh “Sangsiim üng ng'yuk kti ta Khrito noh khui kha kshe nu khaam ei yah kkhai. Amhnüüp kthuma mhnüüp üng thih naaka kkhyüh thou be kkhai.
47 Kkhyaange sun ah nih vuuk naak be üng Pangsiim noh ah nih mkhye ah jah mhlät vaia thang sun Khritoa hmaaia phäh kpyaü hü kkhaie. Jeirüh Shalem mlüh-a kkhyüh teng pe naküta ngpyaü hü yah kkhai.
48 Asun kba thoon velok ktiea phäh nang nih hin shak shie ni.
49 Ngngaai ua, kah Pa Pangsiim noh ah ng'aan ei vek ktia kba kei noh nah nih veeia Mkhyangsiim kah tüih lok kkhai ni. Lüphi kkhaan kho pe üng shääng kti hiit nah nih yah ei säpa hina Jeirüh Shalem mlüh-a vekyet ubä” tilü ah jah mtheh.
(Marküh 16.19-20; Ngshäe 1.9-11)
50 Kona Booi Jeishüh noh akläke sun Pet Tanih ngnama ah jah seh püi. Asua ah kut shäng lü Pangsiim noh ah nih nih-e do kya naak ah jah peet vaia ah jah tä sham peet.
51 Asun kba ah tä sham k'um üng asunea kkhyüh phe phea thuuk-in lolü kkhaan kho da ngjäk-in vaai kti.
52 Akläke noh Booi Jeishüh sun hjok khah lü je kyai xe xok na-tong lü Jeirüh Shalem mlüh-a sit be ktie.
53 Aläa hjok khah im nua velü Pangsiim mküüi mtou lü vek ktie.