16
1 Asun üng Booi Jeishüh noh akläke üng “Booi ei kti im mah pa mata veeia kkyoong long kbük xüh shoh mat vek kti. Xüh shoh noh ah mah pa-a khoh hat amdanga ah shum mang ei päih sun kkhyaange noh ah mah pa üng ah nih kkhyaak u.
2 Asun üng ah mah pa noh xüh shoh sun ah veeia khü lü ‘Kkhyaange noh am do ktia amjü mjüa ah nih ning pyen ei u kah ngjaak ta i hok kba vai ja. Ngui jah külak salaang nah ap lobea. Kah kkyoong long kbüka am ning ta-ti ngü’ tilü ah kshe naak.
3 Kkyoong long bük kti xüh shoh noh ta ah pät noh ah pät üng ‘Kah mah pa noh kkyoong long kbüka kkhyüh ah nah khyot ta i a kah thoon kkhai ni. Kho lou poh vai phi kah ktha am vek kba. Kkhyaangea veei tong ei hü vai phi ngke ei kbak ngü.
4 Häh, tuh ta kah kshing lo hnüh ni. Kah khuut poh naaka kkhyüh ah nih nah mshot üng ta kkhyaange noh ah nih ima ah nih nah dou daan ei hü vaia i hok kba kah thoon kkhai atia kah ngngaih ei lo yah hnüh ni’ ah ti mjoh.
5 Asun üng ah mah pa-a veei pu ei vek kti kkhyaange sun mat siim üng ah jah khü. Ak'hma lo üng ‘Kah mah pa üng pu ei nah thung be vai i kän vek kti ja’ tilü ah kthäh mjoh.
6 Asuna kkhyaang noh ‘Kshi tui akhina thoong mku kah thung be vai vek kti ni’ ah ti. Asun üng ta kkyoong long kbük sun noh ‘Nah sa khyup hin lou eia. Akhina thoong xa-a angshenga pyaang bea’ tilü ah mtheh mjoh.
7 Kona mat be tü üng ‘Kah mah pa üng pu ei nah thung be vai i kän vek kti ja’ tilü ah kthäh be tü. Asuna kkhyaang noh ‘Saang shüüi tüng üng thoong mat kah thung be vai vek kti ni’ ah ti. Kkyoong long kbük noh ‘Nah sa khyup hin lou eia. Tüng üng phya kkhyeta pyaang bea’ tilü ah mtheh mjoh.
8 Ngtuui ngten thei kti kkyoong long kbük sun ah pum ngyam mah-a phäh-a ah mah pa noh ah mküüi mkhyah ei. I a thoon lüni ti ta kho mdek kho üng shääng ei kti kkhyaange ah nih püie mah mah ah nih ngpüi ngpo üng Pangsiima kkhyaangea kthaka ngyam mah bok ktie ni.
9 Kei kah ning jah mtheh ma kkhai. Hina kho mdek üng shääng ei kti ngui xüi üng kkhyaang nah nih nglooi ei püi vaia mtun ei ua. Asun üng va ngui xüia päih lo üng ah nih nih-e noh angshääia ve naak ima ning dou daang kkhaie.
10 Ah poh mta alääm sa üng üm naak vaia thoong ktia kkhyaang ta ah poh mta aknung peet üng phi üm naak vai ni. Ah poh mta alääm sa üng am üm naaka kkhyaang ta ah poh mta aknung peet üng phi üm naak vaia am kya.
11 Nang nih-e hin hina kho mdek üng shääng kti xüi ngui üng üm naaka am nah nih thoon u ta Pangsiim noh ah pe üng shääng ei kti khoh kkhyam ksang am ning ap khoh u.
12 Nang nih-e hin akse-ea khoh hat nah nih bi loh üng üm naaka am nah nih thoon ta Pangsiim noh nah nih ka vaia i ning pe-khoh laang kkhaie ni.
13 Xüh shoh mat noh ah mah pa nghngih-a pyen am ksang na-khoh. Ah mah pa mat sok ei lü mat mhlä kphya nak kkhai ni. Am ani üng mat sun lei shong lü mat ta käh suh lih ei lü vek kkhai. Nang nih-e hin Pangsiima pyen nah nih ksang naak shoa ngui xüi külaka xüh shoh-a am thoon khoh u kti” tilü ah pyen.
(Mate 11.12-13, 5.31-32; Marküh 10.11-12)
14 Pharishe-e noh ta ngui xüi sun kpaam ktah ei tong ktie. Booi Jeishüh-a pyen ngja-ulü ah nih yaih ei u.
15 Booi Jeishüh noh ta “Nang nih-e hin kkhyaangea ma-a akpyuun boka nah nih ngsom tuhan ktie. Lüphi nah nih mlung ngnei Pangsiim noh hmat kti ni. Kkhyaange noh ah nih msoon mtaai u hin Pangsiima ma-a ta mtuih mleh kti ni.
16 Patiso Johaana pou lo veia Pangsiim noh Moshei üng ah peeta thuume jah shahma ngsiimea sa ktoome sun ah kkhyaange üng aktung boka ah jah ngngaih shak. Tuh ta Pangsiima pea mong thang kdo kkya ngpyaü hü pyei hnüh kti. Kkhyaang naküt noh Pangsiima pea vaan vai mtun ei pyei ktie.
17 Lüphi kkhaan kho jah kho mdek sim pyak nih lüphi Pangsiima jah peet thuum üng ka sa nglung mat sa hngoh phi amdanga am thoon laang.
18 Mat mat noh ah kkhyu hoih lü nghnu mi kse ah kkhyu naak ta bäü hma kti ni. Mat mat noh ah khong pa-a ah hoih nghnu mi ah kkhyu naak be üng phi bäü hma kti ni” tilü Booi Jeishüh noh ah pyen.
19 Booi Jeishüh noh “Booi maang kti mat vek kti. Angtou bok jih sun shui ei lü vek kti. Amhnüüp tä lü pooi pyang üng ka-a kba ng'ei ng'o-lä mjoh kti.
20 Ah im kshoh hlonga Lasarüh ngming nak kti ngya kyah mpyeen kshe sun ngjaih-in kti. Ah puum sha luum üng ngkheei ngkho lü mneh kti.
21 Booi maang kti suna ei ook üng ka angnooi ngnek ei kkhaia yüng ei lü vek kti. Uie noh phi lo-ulü ah mneh sun ah nih mleh u.
22 Hnua ta ngya kyah mpyeen kshe Lasarüh sun thilü kkhaan kho ngshäe noh Apyahama veei seh püi lü Apyaham noh ah kpom ei. Booi maang ei kti sun phi thilü ah nih mkhyüh u.
23 Ah nih sun Mo Pi khoa lai lü khui kha tong kti. Jäng mang lüta Lasarüh kpom kti Apyaham sun akthuuk nua ah hei hmuh.
24 Booi maang khoi kti sun noh ‘Kah pa Apyahamo, nah mpyeen eia. Lasarüh sän tüih lok kti lü ah kut mde üng tui shun sa lü kah mlei nah msooi loma she. Hina mäi mei kdääia kshuunga khui kha kshe kah hmuk kti ni’ tilü ngpyaang lü nghui ngpha kti.
25 Apyaham noh ta ‘Kah sao, nah xün ham sän üng kho mdeka ngbüh ngmang naak naküt üng nah ve-ei pääng kti atia ngngaai bea. Lasarüh ta kho mdeka khui kha naak naküt khaam ei pääng kti ni. Ah nih ta tuh-a ahia kah mhloh msah be ni. Nang ta tuh-a khui kha kshe nah shoong ei yah kti ni.
26 Asun kba däk am ni. Nang jah keia kkeh-a mlooi kkhyook nu vek kti ni. Kei nih-a kkhyüh nah nih veeia u phi am pek lokhoh. Nang nih-a kkhyüh phi kah nih veeia u phi am pek lokhoh’ tilü ah pyen be mjoh.
27 Booi maang khoi kti sun noh ‘Kah pa Apyahamo, Lasarüh sän kah pa-a ima nah tüih vaia kah ning nghui nak kti ni.
28 I a thoon lüni ti ta kah be na mhma veham ktie ni. Ah nih nih-e phi ahin kba khui kha naaka käh ah nih pha lo vaia jah msääi vaai she’ tilü ah pyen mjoh.
29 Apyaham noh ta ‘Nah be naea phäh-a Mosheia thuum jah shahma ngsiimea sa ktoom vek kti ni. Asun bang su ngngaai lü läk lam ei u-she’ tilü ah mshak be.
30 Lüphi Booi maang khoi kti noh ta ‘Am ni. Kah pa Apyahamo, kkhyaang mat hin thih naak üng xüng lobe lü ah nih veeia ah lai be ta aksanga vuuk be kkhaie ni’ tilü ah pyen mjoh.
31 Apyaham noh ta ‘Asune noh Moshei jah shahma ngsiimea pyen am ah nih jah ksang naak ta mat mat hin thih naaka kkhyüh xüng lobe lü ah nih nih-e üng jah mtheh vaai lüphi i am jum laang u’ tilü ah pyen be mjoh” tilü Booi Jeishüh noh ah pyen.