LÜKAH
Lükah-a yuk Thang Kdo Kkya
1
1 Angvaai Theo Philüh-o, nah veeia sa kah ning yuk lok kti. I lüni ti ta kei nih-e üng mün phyak ktia mong sun kkhyaang kho hah kuung noh mtun ei lü sa yuk hüt kyo ktie.
2 Booi Jeishüh noh khuut poh ah sut eia kkhyüh lü ah nih mik üng hmulü thang kdo kkya kpyaü hü ktie noh kei nih-e üng ah nih jah mtheh-a kba asune kah nih yuk u ni.
3 Asuna monge abäng sun ahlaana kkhyüh mseei lü kah hju msih lok ktia thoon lü kei noh phi asuna mün phyak ktia mong sun ashät shäta kah ning yuk lo peet ta do kkhaia kah ngngaih ni.
4 I lüni ti ta kkhyaangea ning mthei naak sun sang kti nah kshing lo bok vaia phäh ni.
5 Jüdah shang phuhlang Herota kha üng Shakarih ngming nak kti khotu ngsiim mat vek kti. Ah nih sun Apijah ngming nak kti khotu ngsiim pä üng ngpüi kti. Ah kkhyu ta Eilih Shapet ngming nak kti. Asun phi khotu ngsiim mjü üng ka-a kyak kti.
6 Ah nih nghngih sun Pangsiima hmuh-a pyuun kti xooi. Pangsiima thuum jah ning abäng sun läk nih lü kbäü ei naak vai phi am ve.
7 Lüphi Eilih Shapet sun sing lü ah sa na am ve. Ah nih nghngih ü lohnüh kti xooi.
8 Mhnüüp mat üng ta ah päa poh mta ah pha lo üng Shakarih sun hjok khah im nu su Pangsiima ma-a khotu ngsiim khuut poh vaai kti.
9 Khotu ngsiima thuum seena kba sung keek ngjuuk ulü ah nih khuut ma ngkhya ei ktie. Shakarih noh poh mta ah yah eia kba Booi Pa-a hjok khah im nua k'uma lut lü ang'uui sun mei üng shi vaai kti.
10 Ang'uui mei üng shi ksüün üng hjok khah im nua kho kpunga kkhyaang pä nu sun noh ngkhääm lü tä sham ktie.
11 Asun üng Pangsiima kkhaan kho ngshä sun Shakarih-a ma-a pou lolü ang'uui shi naak lung kooia kkheet lama ngdüüi kti.
12 Shakarih noh kkhaan kho ngshä ah hmuh lo üng kyüh ei tong kti.
13 Lüphi kkhaan kho ngshä noh ta “Shakarih-o, käh kyüh eia. Pangsiim noh nah tä sham ning ksang nak kti ni. Nah kkhyu Eilih Shapet noh kpa mi sa sa nak kkhai. Ah nih sun Johaana shui vai ni.
14 Nah je kyai xe xok na-tong kkhai ni. Ah nih-a hmi loa phäh kkhyaang kho hah phi je kyai kkhaie.
15 Ah nih sun Pangsiima hmaai ma-a kkhyaang shü kyüa thoon kkhai. Ju jah ngbom tui phi i am o-laang. Ah nua kkhon k'uma kkhyüh kuunga Mkhyangsiim üng be baang kkhai ni.
16 Isare kkhyaang kho hah pa sun ah nih Booi Pa Pangsiima veei jah mhlat be kkhai ni.
17 Ah nih sun shahma ngsiim Eilijah-a kba hiit mah lü Mkhyangsiim üng be baang kkhai. Booi Pa-a malama sit lü thang kpyaü kkhai. Ah nih noh nu pae jah hnashene jah ng'ye shak be kkhai. Pangsiima kkhyü kpet ktia kkhyaange sun pyuun kti kkhyaangea ve soh-a kba ah nih thoon hlok lo be vaia jah mhlat be kkhai. Pangsiima kkhyaange sun Booi Pa-a pha lo vaia phäh jah ngshääm ngdou shak kkhai ni” tilü Shakarih üng ah namtheh.
18 Shakarih noh ta “Asun sun i hok kba kshing khoh vai ni. Kei ta pa kshe pa hnüh ni. Kah kkhyu phi nu kpüi hnüh kti va am nishü” tilü kkhaan kho ngshä ah mshak be.
19 Kkhaan kho ngshä noh “Kei hin Kapye Lah kah ngming nak kti. Pangsiima hmaai ma-a velü ah xüh eia kah thoon kti. Nang üng ngsi ngjaang lü do ktia thang kpyaü kkhaia Pangsiim kuung noh ah nah tüih lo ni.
20 Nah ngngaaia, nah sa-a mhnüüp vei säpa käh shi hlo thei lü anghmoa nah veyah kkhai. I lüni ti ta kah pyen am nah nah juma phäh ni. Asuuma mhnüüp üng kah kkhyü taama kba thoon velok kkhai” tilü ah mtheh.
21 Asun k'um üng kkhyaang pä noh Shakarih sun mtät-in ktie. Shakarih sun hjok khah im nua kho vei nu ah süa phäh mün tong ktie.
22 Ah luh lo be üng am jah shi hlo püi thei ti. Asuna thoon lü hjok khah im nu su Pangsiima mhnüh mdan hmuk kti atia kkhyaange noh ah nih dang lo yah u. Shakarih noh ah kut üng jah mdan lü am shi hlo lothei ti.
23 Pangsiima khuut ah poh-a mhnüüpe päih nalü ah ima sit be kti.
24 I vei nu am loham ah kkhyu Eilih Shapet sun mpyaai lolü khya mhma im k'uma vekyet kti.
25 Eilih Shapet noh ta “Pangsiim noh ahin kba kah ve lo vaia mün phyak kti poh khü. Tuh ta Pangsiim noh nah mpyeen ei lü kah hmaai kshe nah mkhyüh peet hnüh ve” tilü je kyai kti.
26 Eilih Shapeta mpyaai akhya kkhyuk üng ta Pangsiim noh kkhaan kho ngshä Kapye Lah sun Kalile hne Nasaret mlüh-a ah tüih.
27 Asua Marih ngming nak kti ngla vek kti. Ah nih sun Davita sa kshoon üng ka Joshep ngming nak kti kpa mi sa-a kkhyu vaia ah nih pyen ei pääng u ni.
28 Kkhaan kho ngshä sun Marih-a veei lolü “Marih-o, sheen paai she. Booi Pa noh ning mküüi mkhyah ei lü nah hlonga vek kti ni” ah ti.
29 Lüphi Marih noh asun kba ah ngjaak üng kyüh ei lolü sääi lokhüt kti. Kkhaan kho ngshä noh i a joong ah pyen ni atia ngngaai-in lü vek kti.
30 Kkhaan kho ngshä noh “Marih-o, käh kyüh eia. Pangsiim noh ning mküüi mkhyah ei kti ni.
31 Ngngaaia, nah puum mah lok kkhai. Sa kpa nah sa na-lok kkhai. Ah nih sun Jeishüh-a shui vai ni.
32 Ah nih sun däm duh bok kkhai. Hlüng taai bok kti Pangsiima sa-a shui kkhaie. Ah mah pook Davita booi ngoh naak sun Booi Pa Pangsiim noh ah nih üng pek kkhai.
33 Ah nih sun Jakopa sa na kshoonea shang phuhlanga thoon ei lä kkhai. Ah up naak sun am päih laang” tilü malam pyen ah mtheh.
34 Marih noh ta “Asun i hok kba thoon khoh kom. Kei hin kpa mi üng am vekhoi ham laang ngü” tilü kkhaan kho ngshä üng ah mtheh be.
35 Kkhaan kho ngshä noh “Mkhyangsiim nanga kkhaana kyum lok kkhai. Hlüng taai bok kti Pangsiima hiit noh ning khüm pha kkhai ni. Asuna thoon lü nah sa naaka hnashen sun ngsiim ngsaih lü Pangsiima sa-a ngshui kkhai ni.
36 Ngngaaia, nah si si Eilih Shapet sän nu kpüi hnüh kyo lüphi puum mah lü khya kkhyuk lohnüh kti ni. Kkhyaange noh ah nih sun sing kti nghnu mia ah nih shui khoi kyo u.
37 Pangsiim noh am ah khyaih khoh i phi am ve” tilü ah mtheh.
38 Marih noh “Ääia, kei hin Booi Pa-a nghnu mi mpya ni. Nah pyena kba thoon she” tilü kkhaan kho ngshä üng ah mtheh be. Kkhaan kho ngshä khyük be kti.
39 I vei am lo Marih sun ngkhäh ngsih lü Jüdah hne msuung kho da angshenga kaai lü Eilih Shapeta ve naak mlüh-a sit kti.
40 Marih sun Shakarih-a ima lut vaai lü ah si Eilih Shapet üng “Nah mya kti bä” ah ti.
41 Eilih Shapet noh Marih-a pyen ah ngjaak üng ah kkhon k'uma vek kti hnashen sun ngtoop lopyei kti. Eilih Shapet sun Mkhyangsiim üng be baang lok kti.
42 Asun üng ta Eilih Shapet noh “Nghnu mi naküt üng Pangsiim noh do kya naak ah ning peet bok ni. Nah khyüi na hin üng Pangsiim noh do kya naak pek kti.
43 Kah Booi Pa-a ning nu, kah veeia nah lo hin mün sam phyak kti ni.
44 Nah ngngaaia, tuh-a nah pyen kthai kah ngjaak jah kah kkhon k'uma ka hnashen je kyai lotong lü ngtoop kti.
45 Booi Pa noh ah ning peet kkhyü taama kba thoon vek kkhai atia nah jum eia phäh nang üng do kya naak vek kti ni” tilü akthai kdäma ah pyen.
46 Marih noh “Kei noh Booi Pa kah mküüi mtou ei kkhüt kti ni.
47 Jah kuum kyan kti Pangsiima phäh kah mlung je pi pi kti ni.
48 I lüni ti ta ampyeen kshe ah nah mpya sun Pangsiim noh nah shüüm lü nah bük teng khü. Tuh-a kkhyüh lü akshoon tä lü kkhyaang naküt noh ‘Ah nih üng Pangsiim noh do kya naak ah peet ni’ tilü kah mong pyen kkhaie.
49 I lüni ti ta hiit mah kti Pangsiim noh kah phäh-a mün shek kti nah poh peet khü. Ah ngming ngsiim ngsaih kti ni.
50 Ah nih kyüh xün kti kkhyaang naküt sun akshoon tä lü Pangsiim noh mpyeen ei kkhai.
51 Ah kut kkyang shäng lü nu kkhyap pa kkhyap ktie jah ah nih mkhüh ktüüm sun ah jah kpyeen ktaai-in ni.
52 Shang phuhlange ah nih booi ngoh naak üng jah mshot lü ampyeen kshe mpya kkhyue jah mhlüng mtaai khü.
53 Jah kkhyoot ei tong ktie ah nih phü nua jah mbei mbook kti. Booi beei ktie ta ayünga ah jah tüih be.
54-55 Pangsiim noh nih pu pae ni, Apyaham jah ah sa kshoone üng kkhyü taam ah taak. Asun kkhyü taam sun shüüm kyet lü ah xüh shoh ei Isare sun mpyeen ei lolü ah ku ei lä ni” tilü Pangsiim ah mküüi mtou.
56 Marih sun Eilih Shapeta veei khya kthum velü ah ima sit be kti.
57 Asun üng Eilih Shapet noh khya asuum lo üng sa kpa sun sa na-lok kti.
58 Eilih Shapet sun asun kba onga Pangsiim noh ah mpyeen msheei ei sun ah im senge jah ah mjü mjoonge noh ah nih ngjaak ua phäh je kyai hnga ktie.
59 Amhnüüp kkhyet üng ta ah sa kpa-a vun moih poh naak su ah püi poe lohü ktie. Ah pa-a ngming kuunga kba Shakarih-a ah nih shui hlü kyo u.
60 Lüphi ah nu noh ta “Am ni, Johaana nih shui vai u ni” ah ti lo.
61 Ah püi poe sun noh “Nah nih kshoon kbang üng Johaan ngming nak kti u phi am ve” tilü Eilih Shapet üng ah nih mtheh be u.
62 Asun üng Shakarih üng hnashen sun ua shui vai ni tia kthäh naaka ah nih kut üng ah nih mdan u.
63 Shakarih noh jah mdan lü ngthei kbe ah jah tong. “Ah ngming Johaan ni” tilü ah yuk. Asun üng ta ah nih nih-e sun mün sam lotong ktie.
64 Asun üng Shakarih ahunata ngsi ngjaang lobe thei kti. Aksük ksüka Pangsiim mküüi mtou naak pyen lü ngthu ei lobe ma kti.
65 Ah nih püi poe abänga kyüh ei lü mün tong ktie. Asuna thang sun Jüdah hne msuung kho naküta ngpyaü hü päih kti.
66 Ngja-naküt ktiea mlunga velo kyet kti. Kkhyaange noh “Asuna hnashen i a thoon velo tu kom mä ani khü” tilü ngthäh ngkhyah ktie. I lüni ti ta Pangsiima hiit asuna hnashen üng vekyet kti ati sun ngshing ngte kti ni.
67 Johaana pa Shakarih noh Mkhyangsiim üng be baang lü malam kkhyü pyen kti.
68 Asun ta “Isare-ea Booi Pa Pangsiiim sun kkhyaang naküt noh mküüi mtou she. Pangsiim kyum lolü ah kkhyaange jah bük lobe kti. Ah kkhyaange jah shuut phyam be kti ni.
69 Pangsiima xüh ei Davita sa kshoone üng hiit mah kti thoong khyah Booi pou lo shak kti ni.
70 Asun sun ahlaan nu hlaan pa üng ah shahma ngsiime üng Pangsiim noh kkhyü taam ah jah nah peet ei kuung ni.
71 Pangsiim noh thoong khyah Booi üng nih ye jah am jah hmuhlük ktiea kuta kkhyüh jah kuum kyan kkhai ni.
72 Pangsiim noh nih pu pae üng ah jah mpyeen ei vaia ah ng'aan ei hüta kba poh kkhai. Ngsiim ngsaih kti be khüt sun shüüm ei kkhai.
73-74 Nih nih-e sun Pangsiim noh nih yea kut üng jah yung lü käh jah kyüh ei hü lü ah nih sun nih hjok khah ei khoh vai a nih mah pook Apyaham üng kkhyü ah taam ni.
75 Asun sun üng kho mdeka nih vea kho shak naküt üng Pangsiima hmaai ma-a nih ngsiim ngsaih lü nih pyuun khoh kti.
76 Kah sao, ak'hlüng ngtaai bok Pangsiima shahma ngsiima ning shui kkhaie ni. I lüni ti ta nang hin Booi Pa-a malama sit lü thang nah kpyaü kkhai. Ah lo naak vaia lam nah pyaang kkhai ni.
77 Nang hin Pangsiim noh ah kkhyaangea mkhye mshoh jah mhlät lü jah kuum kyan kti ati sun nah jah msuuk mtheh hü kkhai ni.
78 Nih nih-ea Pa Pangsiim ta jah mpyeen ei lü hnip hnooi kti. Ngooi lam kthaai üng kho nghngia luh loa kba Pangsiima thoong khyah naak sun nih nih-ea phäh-a vaai kkhai.
79 Asun sun üng anghmüpa vek ktie jah thih naak kyüh kti kkhyaangea kkhaana Pangsiima akvaai vaai kkhai. Asuna akvaai noh diim deih naaka lam jah mshüüm kti” tilü Shakarih noh ah pyen.
80 Shakarih-a sa ta däm lolääi lääi lü Pangsiim kshing lobok kti. Ah nih sun Isare kkhyaangea ma-a kkhyü ah pyen lo vei säpa mkyaanga vek kti.