18
(Mate 26.47-56; Marküh 14.43-50; Lükah 22.47-53)
1 Booi Jeishüh asun kba tä sham ma lü akläke mah mah sit ulü Khiton long tui sa yea pek ktie. Asa yea vek kti ngvoonga Booi Jeishüh jah akläke lut vaai ktie.
2 Booi Jeishüh ktuun ei lok kti Jüdah noh asu kä sun ah hmat. I lüni ti ta Booi Jeishüh noh akläke sun asua aläa ah jah seh püi.
3 Jüdah Sakarot noh Romah ngtuk kpoh pä mat jah khotu ngsiim kdämea jah tüih lo hjok khah im nu mtät kti ngtuk kpoh akhäke sun jah mkhääm lü asuna ngvoonga ah jah seh püi. Ngtuk kpoh-e noh mei uum, mei kshooi jah ksim kshaaüe jah ksüng ei ulü lok ktie.
4 Booi Jeishüh noh ah shoon toh vai sun abänga hmat ei lüta va-hma lolü “Nang nih-e u nah nih shui hü ktie ja” tilü ah jah nakthäh.
5 Ah nih nih-e noh “Nasaret mlüh pa Jeishüh kah nih hjam hü ktie” tilü ah nih mtheh be u. Booi Jeishüh noh “Asun kei ni” ah ti. Ah nih ktuun ei kti Jüdah Sakarot phi ah nih hlonga ngdüüi kti.
6 Booi Jeishüh noh “Asun kei ni” ah ti üng ngtuk kpoh-e sun ah nih hnu da ngshäih ulü mdeka kyu ton-in ktie.
7 Booi Jeishüh noh “U nah nih shui hü ktie ni” tilü ah jah kthäh be tü üng “Nasaret mlüh pa Jeishüh” ah nih ti be u.
8 Booi Jeishüh noh “ ‘Asun kei ni’ tilü kah pyen pääng ni. Kah pät däk nah nih nah shui hü khom u ta kah püie hin sit ei be u-she” tilü ah pyen.
9 I lü asun kba ah pyen ni ti ta sük ta üng “Pa Pangsiimo, nah nah jah apa kkhyaange mat phi am kkhyük leih yah u” tilü ah tä sham hüta kba athoon ve lo vaia phäh ni.
10 Asun k'um üng Shimon Peta noh ah lo ei ksim kshaaü kshet lü khotu ngsiim kdäm boka xüh ei sun mdang lü ah kkheet nghnga kooi ah shah hlot-in. Asuna xüh eia ngming ta Malaküh ni.
11 Booi Jeishüh noh “Petao, nah ksim hin ksim im üng xon ei bea. Kah Pa Pangsiim noh ah nah mkhäh peeta khui kha kshe kah ngki ngheei tak kkhaia nah ngngaih-o” tilü ah him.
12 Asun üng ta Romah ngtuk kpoh-e jah ah nih khong jah hjok khah im nu mtät kti Jüdah ngtuk kpoh-e mah mah ngi lü Booi Jeishüh ah nih man u. Ah kut phi yüüi üng ah nih kkhik u.
13 Ah nih nih-e noh aksüka khotu ngsiim kdäm Anah-a veei ah nih seh püi. Anah sun asuna kuma phäh khotu ngsiim kdäm boka thoon kti Khaai Pa-a ah mah kho ni.
14 Khaai Pa ta “Asuna kkhyaang mat sun Jüdah kkhyaang luuma phäh-a ah thih ta do bok kkhai ni” tilü Jüdah khong mange jah mhlon ktia kkhyaang ni. Asun am hjou pyei ham.
(Mate 26.69-70; Marküh 14.66-68; Lükah 22.55-57)
15 Shimon Peta jah akläk mat sun noh Booi Jeishüh-a hnu hlong läk kti xooi. Asun akläk mat noh khotu ngsiim kdäm bok sun nghmat ei püi kti. Asuna thoon lü Booi Jeishüh-a hnua khotu ngsiim kdäm boka im ngvoonga lut vaai yah kti.
16 Peta ta ngvoong kpung mkota peia ve hüt kti. Asun üng ta akläk mat sun noh va nglat be lü ngvoong mkot mtät kti nghnu mi üng mtheh lü Peta sun ak'uma ah khü lo.
17 Mkot mtät kti nghnu mi nu noh Peta üng “Nang phi asana kkhyaanga akläk va am ni bä” ah ti. Peta noh “Am ni laang” tilü ngsiim kti.
18 Kho shik um ktia thoon lü xüh eie jah ngtuk kpoh-e noh mei phü ulü oom ei ktie. Peta noh phi ah nih hlonga mei oom vaai hnga kti.
(Mate 26.59-66; Marküh 14.55-64; Lükah 22.66-71)
19 Khotu ngsiim kdäm bok sun noh Booi Jeishüh üng akläkea mong ni, ah jah msuh mtheh hüa mong phi kshü kset lü ah kthäh kkhyah.
20 Booi Jeishüh noh ta “Kkhyaangea ma-a angshing ngte kuunga kah pyen kshak kti. Jüdah kkhyaangea ngkhääm naak lo khoi Sangsiim ngthei naak kyongea ni hjok khah im nua phi aläa kah jah msuuk mtheh kti. Ampyu kkhia i laang phi am si jaang ngü.
21 Asun üng i vai kei ta nah nih nah kshü kset ktie ni. Kah msuh mtheh hmu-ngjak ktie üng jah kthäh ua. Kah pyen ah nih nih-e noh kshing kkhaie” tilü ah jah mtheh.
22 Booi Jeishüh noh asun kba ah pyen üng ah hlonga ngdüüi kti ngtuk kpoh noh ah nih sun ah hmaai üng kbei kpyaai-in lü “Khotu ngsiim kdäm bok ahin kba shuk beet ngkäih laang vai mä” tilü ah kshe naak.
23 Booi Jeishüh noh ta “Kah pyen akkhye ta kah mkhye naak sun shuna. Aksang kah pyen ta i vai nah nah kbeih ni” tilü ah pyen.
24 Asun kona ta khotu ngsiim Anah noh Booi Jeishüh sun ngkhik ei kti su khotu ngsiim kdäm bok Khaai Pa-a veei ah jah tha vaai shak.
(Mate 26.71-75; Marküh 14.69-72; Lükah 22.58-62)
25 Shimon Peta noh mei oom ham kti. Ah nih nih-e noh “Nang hin phi ah nih-a akläke üng ka va, am ni bä” tilü ah nih kthäh u. Peta sun noh “Am ni shoom ngü” tilü ngsiim be tü kti.
26 Khotu ngsiim kdäm boka xüh ei mat sun Peta noh ngvoong k'uma ah nghnga ah shah hlot-in peeta ah püia thoon kti. Asun noh ta “Kah pät kuung noh ngvoong k'uma Jeishüh-a hlonga vek kti lü kah ning hmuh va am ni shü” ah ti.
27 Peta noh “Am ni shoom ngü” tilü ah ngsiim be tü üng ta aai khoong lok kti.
(Mate 27.1-2, 11-14; Marküh 15.1-5; Lükah 23.1-5)
28 Ngooi lam kuunga khotu ngsiim kdäm bok Khaih Pa-a ima kkhyüh Romah aso-yah booia booi ima Booi Jeishüh ah nih seh püi u. Ah nih pät Jüdah khong mange ta asuna booi ima am lut dat u. I lüni ti ta Jüdah mjü am nik ktia kkhyaanga im k'uma lut kti ta ah nih Jüdah thuuma mtuih mleh lolü Phyong Pooia am vaang vaai khoh.
29 Asuna thoon lü Pilat Booi noh kho kpunga lut lolü “Ahina kkhyaang i mkhye lü nah nih kbäü ei u ja” tilü jah va kthäh lok kti.
30 Ah nih nih-e noh “Asana kkhyaang mkhye ktia am ah thoon ta kah nih ning ap laang kom u nah tio” ah nih ti be u.
31 Pilat Booi noh “Asun kba ani ta khü u kti lü nah nih thuuma nah nih päte noh si jaang ei kom u kti” tilü ah pyen. Jüdah-e noh ta “Kei nih-e noh u phi thih naak mkäih am mkhyah peet khoh u ngü” ah nih ti be u.
32 Booi Jeishüh noh ahlaan üng i hok kba ah thih vai malam ah napyen eia kba aküm seei lo vaia phäh-a ni.
33 Pilat Booi sun ah booi ima lut be lü Booi Jeishüh sun khü lü “Nang hin Jüdah kkhyaangea shang phuhlang ksang mä” tilü ah kthäh.
34 Booi Jeishüh noh ta “Pilat booio, nah päta ngngaih-a nah nah kthäh mä. Am ani üng kkhyaange noh kah mong asun kba ah nih ning mtheh uo” tilü ah kthäh.
35 Pilat Booi noh “Kei Jüdah mjü mjoh mä. Nah khonge jah khotu ngsiim kdäme noh va kah kut üng ning ap lo kbah u. I nah mkhye mshoh kti ja” tilü ah kthäh kkhyah lo.
36 Booi Jeishüh noh “Kah upa pe ta hina kho mdek üng am shääng ei. Avai shüa kah upa pe hina kho mdek üng ah shääng ei ta Jüdah khong mange noh käh ah nih nah man vai ua kah kläke noh ba shung khaam vai u shü. Lüphi kah upa pe hina kho mdek üng am shääng ei laang ktia thoon lü ni” tilü ah mtheh.
37 Pilat Booi noh “Asun kba ani ta nang hin shang phuhlang mjoh mä” tilü ah kthäh üng Booi Jeishüh noh “Nah pyena kba kei shang phuhlang ni. Kei hin aksanga mong kpyaü kkhaia hmi lo ngüshe hina kho mdeka kah lok kti. Aksang sun hlü ei naküt kti noh kah kkhyü nah su ngngaai kti” tilü ah pyen.
(Mate 27.15-31; Marküh 15.6-20; Lükah 23.13-25)
38 Pilat Booi noh ta “Aksang sun i mjoh ni” tilü ah kthäh. Kona kho kpunga va-lut lü “Ah mkhye naak am hmulaang ngü.
39 Lüphi Phyong Pooi üng khup kkyum mat siim kah ning jah hläh peet vai thuum vek kti. Asuna thoon lü ahina Jüdah shang phuhlang pa mjoh sun kah hläh vai nah nih tääng ktie mä” tilü Jüdah khong mange üng ah jah kthäh vaai.
40 Asun üng Jüdah kkhyaange noh “Asuna kkhyaang am ni. Pana Pa bä bä hläta” tilü ngpyaang ktie. (Pana Pa ta booi kpet kti kkhyaang klääng ni.)