13
1 Phyong Pooi apha vai mhnüüp mat däk ni ahlü ti. Booi Jeishüh noh ahina kho mdeka kkhyüh joong lü ah Pa Pangsiima veei ah seh be vaia ksüün apha lo sun ah kshing ei. Kho mdeka vek kti ah nglooi ei püie aläa jah kphya nalü ah ve khoa päih veia jah mhlä kphya nak kti ni.
2 Booi Jeishüh jah akläke noh mü buh ei ktie. Shimona sa Jüdah Sakarot noh Booi Jeishüh ah ktuun ei vaia ah nih sun Shatan yaai pa noh ah hlo hleep pääng ni.
3 Booi Jeishüh noh ah nih üng ah Pa Pangsiim noh akve naküt ah ap sun ah hmat ei. Pangsiima kkhyüh lolü Pangsiima veei ah seh be vai phi ah kshing.
4 Ah nih sun noh buh pooia kkhyüh ngdüüi lolü jih ah shui shuut ei ma lü jih sa üng ah ksooi ah ksüüp.
5 Asun üng ta mjak üng tui vät vät lü akläkea kho ah jah mthih lo peet. Ah ngsüüp ei naak jih sa üng ah jah xuh peet be.
6 Ah nih sun Shimon Peta-a veei ah pha üng ta Peta noh “Booi Pao, kah kho nah nah mthih peet hlük ktio” tilü ah kthäh.
7 Booi Jeishüh noh ta “Kei noh tuh-a kah poh mshah hin am hmat kyo kti. Hnua ta nah kshing lok kkhai ni” ah ti.
8 Peta noh ta “Nang Booi Pa noh kah kho i hok kba phi am nah mthih peet yah shoom kti” tilü ah ngya kyet. Booi Jeishüh noh ta “Kei noh nah kho am kah ning mthih peet ta nang hin kei üng am shääng ei khoh kti” tilü ah pyen.
9 Shimon Peta noh “Booi Pao, asun kba ani ta kho däk käh nik ktia, kut phi nah mthih peet lü kah lu hmaai phi nah mthih mkaaü peeta” tilü ah pyen be tü.
10 Booi Jeishüh noh ta “Tui nghlok pän kti ngsiim ngsaih kti ni. Ah khoa thea mthih vai am hlü ti. Nang nih-e ngsiim ngsaih kyo u kti lüphi mat ta am ngsiim laang” ah ti.
11 Booi Jeishüh noh ta u noh ah nih ktuun ei kkhai atia hmat lü “Lüphi mat ta am ngsiim laang” tilü ah pyen ni.
12 Booi Jeishüh noh ah nih kho jah mthih mkaaü peet ma lü ah jih sun shui sha-ei be lü buh pooia ngshut be kti. Booi Jeishüh noh “Tuh-a kei noh kah ning jah poh mshah peet hin i a joong atia nah nih hmat ei ktie mä.
13 Nang nih-e noh kei üng ‘Angvaaio’ phi nah nih ti u. ‘Booi Pao’ tilü phi nah nih nah khü u. Asun kba va hnan kti. Asun kuunga kei kah thoon kti ni.
14 Kei hin nah nih Booi Pa, nah nih ngvaaia thoon ngüshe phi tuh-a nah nih kho kah ning jah mthih peet. Asun kba va nang nih-e noh phi mat jah mata kho nah nih mthih peet vai hlü kti ni.
15 Kei noh nang nih-e kah ning jah poh peeta kba nang nih-e noh phi nah nih jah poh mshah peet vaia phäh-a kah ning jah mhju naak ni.
16 Ngngaai ua, kei kah pyen ma kkhai ni. Xüh ei hin ah mah pa-a kthaka am däm duh khoh. Ngshä ngse hin tüüi lok ktia kthaka ktung bok kti am ni.
17 Asun bange hin hmat u kti lü asun kba nah nih ve soh u ta Pangsiim noh do kya naak ning pek kkhaie ni.
18 Nah nih bänga mong kah pyen am ni. Kah xü kse-e kah jah hmat kti. Lüphi Sangsiim üng ng'yuk kti ta ‘Kah hlonga ei ook kah ei yüm püi noh ah kho üng nah khat ve’ tilü vek kti. Asun kuunga thoon ve loyah kkhai.
19 Asun kba am athoon ve hama kkhyüh nang nih-e üng kei noh kah ning jah mtheh pääng u. I lüni ti ta kei hin Meishiah-a kah thoon sun nah nih jum vai ua phäh ni.
20 Ngngaai ua, kei kah pyen ma kkhai ni. Kei noh kah tüih lo dou daang kti ta kei phi nah dou daang kti ni. Asun kba ni kei nah kphaan kti noh nah tüih lok kti phi kphaan kti ni” tilü ah jah mtheh.
(Mate 26.20-25; Marküh 14.17-21; Lükah 22.21-23)
21 Booi Jeishüh noh asun kba ah pyen kona ah mlunga ngja-ei lopyei lü ktha shelo tong kti. “Ngngaai ua, kei kah pyen ma kkhai ni. Nang nih-e üng mat noh kei nah ktuun ei kkhai ni” tilü angtea ah jah mtheh.
22 Akläke noh mat jah mat ngbük ei ulü Booi Jeishüh noh u ah pyen atia am ngngaai hmulaang u.
23 Akläke üng ka Booi Jeishüh-a mhlä kphya naak bok mat sun aksea kthaka ah hlonga säh bok ktia ngshut kti.
24 Shimon Peta noh asuna akläk sun üng “Ahääm, Booi Jeishüh noh u ah pyen hlü atia kthäh-a” tilü ah mtheh.
25 Asun üng ta asuna akläk noh Booi Jeishüh da ngshing vaai lü “Booi Pao, ning ktuun ei kkhai u ja” tilü ampyua ah kthäh.
26 Booi Jeishüh noh “Kei noh kkhaai kpeh bou ngüshe anbooi üng ktuun lü kah mbeia kkhyaang ni” tilü ah mshi mkhyaai lo. Kona kkhaai kpeh sun bou lü anbooi üng ktuun lü Shimona sa Jüdah Sakarot üng ah hei peet.
27 Ah nih noh kkhaai kpeh sun ah dou ei jah ta Shatan yaai pa noh ah vaan naak lo. Booi Jeishüh noh “Nah poh mshah hlü akjaanga poh hnüh-a” tilü ah mtheh.
28 Booi Jeishüh noh i ati hlü sun buh pooia ngshut kti akläke noh am dang yah u.
29 Jüdah Sakarot noh ah nih ngui u sun shääm ktia thoon lü Booi Jeishüh noh Phyong Pooia hlü ktia ngkho kkhyäih vaai shak ktia akhäk noh ah nih ngngaih u. Akhäk noh ta Booi Jeishüh noh Jüdah üng ampyeen kshe-e üng ngui jah peet mshoot shak ktia ah nih shui u.
30 Jüdah Sakarot noh kkhaai kpeh sun dou ei lü kho kpung da shot yü kti. Asun üng khoa mthan pääng kti.
31 Jüdah Sakarot ah seh kona Booi Jeishüh noh “Tuh-a kkhyaang sa-a jou taai nglou ngthang lohnüh kti ni. Pangsiima bung ngming ah nih üng ngshing ngte love.
32 Pangsiima jou taai ah nih üng anglou ngthang lo ta ah pät Pangsiim noh Kkhyaang Sa-a jou taai ngshing ngte shak kkhai. Pangsiim noh tuh kuunga asun kba poh kkhai ni.
33 Kah nglooi püieo, kei hin nah nih hlonga noong vei ni kah ve yah ti kom. Hnua ta nang nih-e noh nah nih nah shui hü kkhaie. Lüphi Jüdah khong mange üng kah jah mtheh-a kba nang nih-e phi kah ning jah mtheh be tü kkhai. ‘Kei kah seh naaka nang nih-e noh am nah läk lokhoh u kti.’
34 Kei noh kah ning jah peet hlü thuum kthaai ta ‘Nang nih-e noh mat jah mat nah nih püi mhlä kphya na-ua.’ Kei noh kah ning jah mhlä kphya naaka kba nang nih-e noh phi mat noh mat nah nih mhlä kphya naak hnga vai hlü kti ni.
35 Nang nih-e noh nah nih püi nah nih mhlä kphya naak u ta nang nih-e hin keia akläka nah nih thoon u sun kkhyaang naküt noh kshing lok kkhaie.”
(Mate 26.31-35; Marküh 14.27-31; Lükah 22.31-34)
36 Shimon Peta noh “Booi Pao, hoa nah sit kkhai ja” tilü ah kthäh. Booi Jeishüh noh “Kah seh naaka tuh ta am nah läk lokhoh u kti. Hnua ni nah nah läk lo kom” tilü ah mtheh.
37 Peta noh “Booi Pao, i lü tuh-a am kah ning läk lokhoh mjoh u ja. Nang Booi Pa-a phäh-a thih khaam ei kkhaia kah ngpong pääng kti ni” tilü ah ng'aan ei.
38 Booi Jeishüh noh ta “Nang hin kah phäh-a thih khaam ei kkhaia nah ngpong ksang kti mä. Ngngaai ua, kei kah pyen ma kkhai ni. Aai am khoong ham lü ‘Ah nih am hmat laang ngü’ tilü kthum vei kuung nah ngsiim kkhai ni” tilü ah namtheh.