5
1 Booi ei kti kkhyaangeo, nah ngngaai ua. Khui kha mpyeen sheet nah nih hmuh ei lo vaia phäh kyap yün pyei ua.
2 Nah nih khoh hat hin thu kyo päih khü. Nah nih shui shak kdo kkyae phi si kooke noh jah ei o päih ve u.
3 Nah nih ngui xüie phi mhnam eek kaai päih khü. Nah nih ngui xüi hin Pangsiima hlü eia am nah nih shum ei ua phäh ahin kba ngshing lok kti. Nah nih puum sha phi meia uih-a mäi asun kba sim pyak lok kkhai ni. I lüni ti ta akpäih naaka ksüün üng nah nih khoh hat ngui xüi sun nah nih süm ei ktie.
4 Nah nih im loua khüüi khoom kti nah nih jah xüh shoh eie üng ktha kheen am jah kkhyeng u kti. Asuna phäh ngpyaang hü ktie sun jah ngngaai ua. Nah saang aat ktia kyah kthai sun kkhaan kho ngshä ngtuk pä khonga thoon kti Pangsiima nghnga khuuia vaang vaai kti ni.
5 Ahina kho mdek kkhaana nah nih hlü ei mjü kküm üng je je kyai kyaia nah nih vek ktie. Nang nih-e noh yoh ei lo vai kkhyüng kshei sun ei ook nah nih mbei tet teta kba Pangsiima jah si jaang lo vaia mhnüüpa phäh nah nih päta mlung hlü mjü kküm sun nah nih na mhlüih kbe ei ktie ni.
6 Am mkhye kti kkhyaange jah si jaang u kti lü nah nih jah hnim u ni. Ah nih nih-e noh phi am shung khaam ei khoh u.
7 Kah be naeo, Booi Pa-a kyum lo be vai sun mlung kshaaü lü mtät ei ua. Bük ua, lou lou nak ktia kkhyaang noh phi phu mah kti aktheih paai lo vai sun mlung mshaaü lü mtät ei yah kti ni. Ah nih noh kho k'a sun yüng ei lü ah hmin ksüün vai sun mtät ei yah kti.
8 Ahina tänga nang nih-e noh phi mlung mshaaü ua. Ääp ei lü ve ua. I lüni ti ta Booi Pa-a kyum lo be vai säh lok kti.
9 Kah be naeo, nah nih püia mong am do ktia käh mship mhjop na-ua. Asun kba am ani ta Pangsiim noh ning si jaang kkhaie ni. Ning jah si jaang kkhaia Booi Pa mkot peia phalo pääng kti.
10 Kah be naeo, Pangsiima ksah-a kkhyü pyen kti shahma ngsiime jah shüüm ua. Khui kha ah nih khaam ei üng mlung ah nih mshaaü sun jah hju ua.
11 Ah nih mlung kkyoong ngkhääng ngpaang ktia kkhyaang naküt üng Pangsiim noh do kya naak jah pek kkhai ati sun nah nih kshing ktie ni. Jo Pa-a mlung mshaaü nah nih ngja-khoi ktie am ni bä. Pangsiim noh akpäih naaka Jo Pa-a phäh akdo bok poh peet kti atia phi nah nih kshing pääng u ni. Pangsiim sun bä naak jah mpyeen msheei naak üng be bang kti.
12 Kah be naeo, aktung boka ta nah nih ng'aan ei üng ng'yün ngshe käh pyen ua. Kkhyü mhnam khü lü käh ng'yün ua. Kkhom kkei üng käh ng'yün ngshe ua. “Ä” ti naak vai üng “Ä” ti ua. “Am ni” ti naak vai üng “Am ni” ti ua. Asun üng ni Pangsiim noh am ah ning jah si jaang kom.
13 Nang nih-e hin üng khui kha kti vek kti mä. Tä sham ei she. Je kyai kti vek kti mä. Mküüi mtou naak ng'äi msuuk she.
14 Am shi khyaih kti ave üng shaang ngsiim sange jah khü she. Ah nih nih-e noh Booi Jeishüh-a ngming üng kshi tui hlu lü tä sham peet kkhaie.
15 Asun kba jum ei naak üng ah nih tä sham u ta am shi khyaih kti sun mya lobe kkhai ni. Booi Pa noh ah nih sun ngtüüi thou shak be kkhai ni. Ah nih sun ah mkhye mshoh ave üng phi Pangsiim noh mhlät kkhai.
16 Asuna thoon lü nah nih mkhye mshoh sun nah nih püia ma-a phyeh be ua. Nah nih püia phäh-a tä sham peet ua. Asun üng nah nih mya lobe kkhaie ni. Ngpyuun ktia kkhyaanga tä sham sun hiit mah kti ni. Amdanga am thoon.
17 Shahma ngsiim Eilijah phi nih ng'yüi ni. Kho käh ah aak vaia ah mlung ksang üng mtun ei lü tä sham kti. Asuna thoon lü kum kthum jah khya kkhyuk kho am a-laang.
18 Asun kona tä sham be lü kho akshe hleena a-be lü aktheih vui paai naküte do kya ngthei paai lobe ktie.
19 Kah be naeo, nang nih-e hin üng mat mat noh jum ei naak lam ah hmüa athoon üng ah nih sun ah nglat lo be vaia ktha nalü ku ei ua.
20 Ngngaai ua, mat mat noh asun kba mkhye mshoh kti kkhyaang sun ah mkhye naak lama kkhyüh ah nglat lo be shak ta ah sim pyak naak vai üng ah kuum kyan be ni. Asun kba mkhye mshoh ktia kkhyaanga mkhye naküt sun Pangsiim noh ah mhlät vaia ah nih noh ah kpüi kpak ni.