4
1 Kah püieo, “Kei ta Mkhyangsiima nah pyen shak ni” tik kti naküt käh jum ei u bä. Asue sun Pangsiim noh ah jah pyen shak mä, kho yaaie noh ah nih jah pyen shak mä, tilü jah mkhoi mkhya ei ua. Pangsiima jah tüih lo shahma ngsiima hana ngsom ktie sun kho mdek naküt üng sit hü ktie ni.
2 Pangsiima kkhyüh lok kti Mkhyangsiim üng pyen kti sun kshing naak khoh ta “Jeishüh hin kkhyaang sa-a thoon lok kti Pangsiima Sa Khrito ni” tik kti naküt ta Pangsiima Mkhyangsiim üng pyen kti ni.
3 “Pangsiima kkhyü kah pyen kti ni” tik ktia kkhyaang hin noh asun kba Booi Jeishüh Khritoa mong am ah pyen ta Pangsiima Mkhyangsiim ah nih üng am ve. Khritoa Ye kdäma kkhyü ni ah pyen. Khritoa Ye kdäm sun ah lo vai nah nih ngjaak khoia kba tuh ta kho mdeka vek kti ni.
4 Kah sa mhläeo, nang nih-e ta Pangsiim üng nah nih shääng ktie ni. Nang nih-e noh shahma ngsiim tuhane nah nih jah nääng pääng ni. I hok kba ni ti ta nah nih k'uma vek kti Mkhyangsiim hin kho mdek up kti Shatana thea däm bok kti ni.
5 Shahma ngsiim tuhane hin noh ngthiim kho däk üng shääng ei ktiea thoon lü Pangsiim am kshing ktiea kba ni ah nih ngsi ngjaang u. Pangsiim am kshing ktie noh phi ah nih jah su ngngaih u ni.
6 Kei nih-e ta Pangsiim üng kah nih shääng ei ktie. Pangsiim kshing naküt ktie noh kei nih-ea pyen jah ksang nak ktie ni. Pangsiim üng am shääng ei ktie noh ta kei nih-e am jah ksang na-u. Pangsiima kkhyü pyen kti kkhyaang, jah lam jah hmü shak kti kho yaaia kkhyü pyen kti kkhyaang asun kba nih jah mkhoi mkhya khoh ktie ni.
7 Kah püieo, nih püi mat jah mat nih mhlä kphya na-kyet tu vai u. A i ja ni ti ta Pangsiima kkhyüh ni mhlä kphya naak ah lo. Ah püi po mhlä kphya naküt kti ta Pangsiima sa-a thoon lü Pangsiim kshing kti ni.
8 Pangsiim hin mhlä kphya naaka thoon lü ah püi am mhlä kphya nak kti noh ta Pangsiim am kshing laang kuung.
9 I hok kba Pangsiim noh nih nih-e ah jah kphya naak sun ahin kba ah jah mhnüh pääng ni. Nih nih-e noh ah nih üng shak ngshääi nih yah naak vai ua ah Sa mat däk kho mdeka ah tüih lo ni.
10 Mhlä kphya naak ksang ta ahin kba ni. Nih nih-e noh aksüka Pangsiim nih kphya naak u am ni. Pangsiim noh jah kphya na-ma lü nih nih-ea mkhyea phäh jah ngloh peet be kkhaia ah Sa ah tüih lo.
11 Kah püieo, Pangsiim noh ahin hlooka jah kphya nak kti ta nih nih-e noh phi nih püi mat jah mat nih kphya na-be tu vai u.
12 Pangsiim ta u noh phi am hmukhoi kyo. Asuna thoon lüphi mat jah mat nih püi nih kphya naak u ta nih nih-e üng kkhyaange noh Pangsiima kphya naak hmuk kkhaie ni. Pangsiima jah peet mhlä kphya naak sun phi nih nih-e üng däm lobok kkhai ni.
13 Pangsiim noh ah Mkhyangsiim jah pelü ta Pangsiim nih nih-e üng ah nglooi ei jah nih nih-e Pangsiim üng nih nglooi ei u sun nih kshin u ni.
14 Kho mdek shuut phyam be kkhaia Pa Pangsiim noh ah Sa ah tüih lo sun hmupääng u ngüshe kkhyaange üng kah nih jah mtheh hü u ni.
15 “Jeishüh hin Pangsiima Sa ni” tilü jum ei lü pyen kti naküt ta Pangsiim noh nglooi ei püi kti. Ah nih phi Pangsiim üng nglooi ei kti ni.
16 Asun kba Pangsiima jah kphya naak sun nih kshing lo-ulü nih jum ei lo u ni. Pangsiim ta mhlä kphya naak ni. Ah püi kphya na-kyet ktia kkhyaang Pangsiim üng phi nglooi ei kti. Pangsiim noh phi asuna kkhyaang nglooi ei püi kti ni.
17 Pangsiim nih kphya na-lo däm däm ulü nih püi po phi nih kphya na-lo nak nak ktie ni. Asuna thoon lü Pangsiim noh kkhyaang kdo jah kkhyaang kshe ah jah mkhoi mkha-a mhnüüp üng nih kyüh ei vai u phi nih ngke ei vai u phi am hlüngtu. A i ja ni ti ta Booi Jeishüh üng mhlä kphya naak avea kba nih nih-e phi kho mdeka mhlä kphya naak üng nih ve hnga ktie ni.
18 Mhlä kphya naak jah kyüh ei naak ahnga xooi ni. Nih püi po nih jah kphya naak ksang ta, asun üng Pangsiim nih kyüh vai am hlüngtu. Tuh-a kkhyüh ah na kyüh ei seng seng kti noh ta ah püi po am mhlä kphya na-pyei ham. Kyüh ei kti hin noh Pangsiima mtaam peet vai ah kyüh ei ni.
19 Pangsiim noh jah kphya na-ma lü Pangsiim nih kphya na-be ktie hin noh nih püi mat jah mat phi nih kphya nak ktie.
20 Mat mat noh “Pangsiim kah kphya nak kti ni” tilü ah püi po ta ah sok ei. Asuna kkhyaang ta hleei kuung kti ni. Ah hmuh yah ah püi am kphya nak kti noh ta am ah hmuh yah Pangsiim am kphya na-khoh kuung.
21 Pangsiim kphya nak kti noh ta ah püi po phi kphya na she tilü Pangsiima pyen vek kti.