2
1 Kah ning jah sa mhläea kah ngngaih-eo, käh nah nih mkhye mshoh vaia ahina sa kah yuk lo. Mat mat noh nih mkhye u üng phi Pangsiima veei jah pyen peet be kti jah kpüi kpak kti nih ta-ei ktie ni. Jah kpüi kpak kti ta angpyuun bok Jeishüh Khrito ni.
2 Nih mkhyea phäh-a Pangsiima veei Jeishüh noh ah jah ngloh peet. Nih nih-ea phäh däk am ni. Kho dek üng kkhyaang nakütea mkhye-ea phäh phi Pangsiima veei ah jah ngloh peet ni.
3 Pangsiima pyen ksang nalü nih läk u ta “Pangsiim kah kshing ni” tilü aksanga nih pyen khoh ktie.
4 “Pangsiim kah kshing ni” mat mat noh ah ti tuhan. Nikyo lüphi Pangsiima pyene am jah läk. Asuna kkhyaang hleei hlak kti ni. Aksang am pyen hlü.
5 Pangsiima pyene ksang nalü läk ktia kkhyaang noh Pangsiim mhlä kphya na-pi pi kti ni. Pangsiima sa-a nih thoon u sun ahin kba nih kshing khoh kti.
6 “Pangsiima nah sa ni” tik ktia kkhyaang sun Booi Jeishüh-a kba ve soh vai hlü kti ni.
7 Kah püieo, nah nih läk vai thuum akthaai nah nih veeia kah yuk lo am ni. Booi Jeishüh nah nih jum ei loa kkhyüh nah nih veeia vekhoi kti thuum kphyüm ni. Asuna thuum kphyüm nah nih ngjaak khoi ni.
8 Nikyo lüphi nah nih veeia kah yuk lo hin thuum akthaaia phi thoon kti ni. Asuna thuum ksang sun Booi Jeishüh-a ve soh üng phi ngshing ngte lü nang nih-ea ve soh üng phi ngshing ngte lok kti. Anghmüp khyük lophät phät lü akvaai ksang ngshü lohnüh kti ni.
9 “Pangsiima hlü eia akvaai üng kah vek kti ni” mat mat noh tituhan lü ah püi sok ei lü am ah hmuh hlü ngtu ta asuna kkhyaang tuh veia anghmüp üng ve-ei ham kti ni.
10 Ah püi mhlä kphya nak kti ta akvaai kking üng ve-ei lä kti. Ah nih-a phäh üng u noh phi am mkhye laang.
11 Ah püi sok ei lü am hmuh hlü ngtu kti mat hin anghmüp üng shääng ei kti ni. Anghmüpa kkea sit hü lü hoa ah seh hü phi am kshing. Anghmüp noh ah mik ah mü shak ni.
12 Kah sa mhläeo, nah nih veeia sa kah yuk lo ni. Pangsiim noh nah nih mkhye-e Booi Jeishüh-a hmaai üng ah ning jah hläh peet ni.
13 Akdämeo, nah nih veeia sa kah yuk lo ni. Kho mdeka som sah hlaana kkhyüh vek kti Booi Jeishüh nah nih kshing hmat u ni. Nang nih athoiea veei phi sa kah yuk lo ni. Nang nih-e noh Shatan yaai pa nah nih nääng ktie. Nang nih hnashene veei phi sa kah yuk lo ni. Nih Pa Pangsiim nah nih kshing hmat u ni.
14 Akdämeo, kho mdeka som sah hlaana kkhyüh vek kti Booi Jeishüh kshing u kti lü sa kah yuk lo ni. Nang nih athoiea veei phi sa kah yuk lo ni. Ktha mah mlok lü Pangsiima pyen kkinga velü Shatan yaai pa nah nih nääng pääng ktie ni.
15 Ngthiim kho jah ngthiim kho üng ka käh kpaam ei ua. Ngthiim kho kpaam ei kti noh ta Pa Pangsiim am mhlä kphya na.
16 Ngthiim kho üng shääng ei kti ta poh yah daaü ngü, ei yah daaü ngü tilü am do ktia ngngaih, mik üng hmulü am do ktia kpaam ei, sam sah lü däm hlü - asun naküte sun Pangsiim üng am shääng ei laang ngtu ulü ngthiim kho üng ni ah nih shääng ei u.
17 Ngthiim kho jah ngthiim kho üng shääng ei ktie am do ktia kpaam ei naküte hin khyük lohnüh kkhaie ni. Pangsiima hlü eia vek kti ta anghläia xüng vaai shet kkhai ni.
18 Kah saeo, tuh hin akpäih naaka ksüün hnüh ni. Khritoa ye kdäma ah lo vai nah nih ngja-khoi ktie am ni bä. Asun kba tuh-a Khritoa ye-e kho hah pou lok ktie ni. Asuna thoon lü tuh hin akpäih naaka ksüüna aksanga nih kshin u ni.
19 Khritoa ye-e hin nih nih-ea shaang üng ngkyak ktie ni. Ah nih mlung set üng nih nih-ea shaang üng am ngpüi u. Ah nih mlung set üng nih nih-ea shaang üng ah nih ngpüi u ta nih nih-ea hlong veshet kkhaie shükyo ni. Ah nih ngkya u a phäh üng nih nih-ea da mat phi am ah nih ngpüi sun ngshing ngte lok kti ni.
20 Khrito noh nang nih-ea kkhaana Mkhyangsiim buui lü ah nih ning peet pääng ni. Asuna thoon lü nang nih-e noh ta aksang abäng nah nih kshing u ni.
21 Pangsiima hlü ei ksang am kshing u kti lü nah nih veeia kah yuk lo am ni. Nang nih-e noh ta Pangsiima hlü ei ksang nah nih kshing u ni. Hleei jah aksang hin am ah nih shääng ei phi nah nih kshing u ni.
22 “Jeishüh hin Pangsiima tüih lo Khrito am ni” tilü pyen ktia kkhyaang ta ak'hleei kuung ni. Pa Pangsiim jah ah Sa Jeishüh jah kpet kti asuna kkhyaang ta Khritoa Ye kdäm ni.
23 “Jeishüh hin Pangsiima Sa am ni” tilü kpet ktia kkhyaang mat hin Pangsiima looi püi am ni. “Jeishüh hin Pangsiima Sa ni” tilü jum ei ktia kkhyaang ta Pangsiima looi püi ni.
24 Nah nih jum ei loa kkhyüh Booi Jeishüh-a mong nah nih ngjaak khoia kba nah nih mlunga shääm kyet ua. Nah nih jum ei loa kkhyüh nah nih ngjaak nah nih mlunga ave ta Pangsiima Sa Jeishüh jah Pa Pangsiim üng nah nih nglooi ei lä kkhaie ni.
25 “Asun üng shak ngshääi kah nih ning pek kkhaie” tilü Booi Jeishüh noh ah ng'aan ei ni.
26 Lam ning jah hmü hlü shak lü ning jah mhleei mhlak ktiea mong kah yuk lo ni.
27 Booi Jeishüh noh buui lü ah ning jah peet Mkhyangsiim nang nih üng veshet kti ni. U a kkhyaang noh phi ah nih ning mthei vai am hlü. Mkhyangsiim noh ta abäng ning mthei vaai lä ktie ni. Ah nih ning mthei u hin Pangsiima hlü ei ksang ni. Ahleei am ni. Mkhyangsiima ning jah mtheh läk lü Booi Jeishüh üng nglooi ei lä ua.
28 Asun kba ni, kah saeo, Booi Jeishüh-a lo be üng käh kyüh ei vaia ah ma-a käh ngke ei vaia Booi Jeishüh üng nglooi ei kyet ua.
29 Booi Jeishüh ngpyuun kti tia nah nih kshing ktie, am ni bä. Asuna thoon lü ngpyuun lü akdo poh naküt kti Pangsiima sa-a thoon kti ni tia phi nah nih kshing u ni.