3
1 Akpäih naaka ta nah nih phäh kah nih pyang ma am suun ei khoh ti u ngüshe kah pät däk Athen mlüh-a kah ve hüt kkhaia kah mkhyah ni.
2 Kei nih-ea hlonga Pangsiima khuut poh lü Khritoa thang kdo kkya kpyaü hü kti kah nih na Timotih nah nih veeia kah nih tüih lo hnüh u ni. Ah nih sun ngjung ktha ning jah pe-lok kkhaia, jum ei naak üng ning jah ngkhääng lo shak kkhaia kah nih tüih lo ni.
3 I lüni ti ta nah nih khaam eia mkhuh mhlih naaka phäh üng u phi käh nah nih nglat be vaia ni. Asuna mkhuh mhlih naak sun Pangsiima mkhüh ni atia nah nih pät kuung noh nah nih kshing ei ktie.
4 Nah nih hlonga kah nih ve ham üng “Mkhuh mhlih naak nih khaam ei yah kkhaie ni” tilü kah nih ning mtheh pääng kuung ni. Kah pyen nah nih kshing ei kuunga kba thoon lok kti ni.
5 Asuna thoon lü jum ei naak üng nah nih ngkhääng ktie mä, nah nih nglat be ktie mä ati sun kah mlung up lat lüta am ve khoh ti ngü. Nah nih jum ei naak kshing vaia Timotih nah nih veeia tüih lo yah ni. Shatan yaai pa noh nah nih jum ei naak nah nih hoih vaia ning jah hlo hleep lü kah khuut poh alapa ah thoon vai kah pyang ma naak ni.
6 Tuh-a ta Timotih nah nih veeia kkhyüh pha lo be khü. Ah nih noh nah nih jum ei naak jah mhlä kphya naak thang ah mhlaü lo ni. Kei nih-e anghläia jah shüüm u kti lü nang nih-e kah ning jah hmuh hlüa kba kei nih-e phi nah nih jah hmuhlü hnga ktie ati sun Timotih noh jah mtheh lo be kti ni.
7 Asuna thoon lü kah be naeo, khui kha lü kah nih ktha sheet naak üng nah nih jum ei naaka phäh kah nih ktha phyak ktie ni.
8 Nang nih-e hin Booi Pa üng nglooi ei lü nah nih ngkhääng ngpaanga phäh üng kah nih hüi pi pi ktie.
9 Tuh-a ta nang nih-ea phäh üng Pangsiim kah nih je kyai nak kkhüt ktie. Pangsiima ma-a nang nih-ea phäh üng xe xok nak kkhüt lü Pangsiim kah nih mküüi mtou ktie ni.
10 Nih ngkhyum be ulü jum ei naak üng shääng kti am nah nih kshing naak ham üng ning jah küm seei mhnüh mtheh lok kkhaia amhnüüp mthan nghläia mtun ei kshi lü kah nih tä sham ktie ni.
11 Nih Pa Pangsiim kuung jah nih Booi Jeishüh noh nah nih veeia kah nih pha lo vaia lam jah mboon peet nih she.
12 Nang nih-e mat jah mat ni, kkhyaang abäng ni kphya naak üng nah nih küm seei be bang lo vaia Booi Pa noh ning jah kpüi she. Nang nih kah ning jah kphya naaka kba nah nih mhlä kphya naak däm duh loshe.
13 Asun kba Pangsiim noh ning jah ngkhääng ngpaang shak kkhai ni. Nih Booi Jeishüh ah kkhyaange mah mah ah kyum lo be üng nang nih-e hin nih nih-ea Pa Pangsiima hmaai ma-a küm seei lü nah nih ngsiim ngsaih kkhaie.