KALATIH-E
Polüh noh Kalatih mlüh shaang üng ah kbia sa
1
1 Kei Polüh hin kkhyaanga nah msoona ngshä am ni. Kkhyaangea tüih loa ngshä phi am ni ngü. Booi Jeishüh Khrito jah ah nih sun thih naak üng thoh shak be kti Pa Pangsiim noh kei hin ngshäa ah nih nah msoon ni.
2 Kei jah ahia vek kti be nae noh Kalatih hnea vek kti shaange abänga kah nih ning shüüm ktie ni.
3 Nih nih-ea Pa Pangsiim jah Booi Jeishüh Khrito noh bä naak jah diim deih naak ning pe-ushe.
4 Booi Jeishüh noh nih mkhyea phäh Pa Pangsiima hlü eia ah shak ton kti. Asun ta ahin kba shexu mtuih mleh ktia ksüün üng kho mdek kkhyaangea mkhye mshoh naak üng käh nih ngpüi vai ua phäh ni.
5 Aksüün vaai tä lü Pangsiim mküüi mtou lä u-she. Amen.
6 Nang nih-e hin kah ning jah mün naak pyei ni. Booi Jeishüh-a bä naak üng Pangsiima ning jah khü i vei phi am loham nah nih nglat be hnaam ktie. Thang kdo kkya kse nah nih dou daang pääng tuhan ktie.
7 Aksanga ta thang kdo kkya kse hin am vekyo. Lüphi kkhyaang akhäke noh Khritoa mong thang kdo kkya sun hlai vaia mtun ei lü nah nih mlung ning jah up lat shak ktie ni.
8 Lüphi aksüka kei nih-e noh kah ning jah kpyaü ma u thang kdo kkya üng hnga kti thang kdo kkya kse sun kah nih päte kuung noh kah nih ning msuh mtheh u üng phi nishe kkhaan kho ngshä noh ning msuh mtheh ulü phi nishe Pangsiima yün she khaam ei yah vai ni.
9 Kah pyen be tü ma kkhai ni. Nang nih-ea dou daan thang kdo kkya üng hnga kti thang kdo kkya kse sun mat mat noh ah ning jah msuh mtheh ta asuna kkhyaang noh Pangsiima yün she khaam ei yah kkhai ni.
10 Kkhyaangea nah mküüi ei vai kah mtun ei ktio. Am ni. Pangsiima nah mküüi ei vai ni kah hlü ei. Kkhyaangea nah ä naak vai kah mtun ei ktio. Kei noh asun kba kah mtun ei ham ta Khritoa xüh shoh eia am thoon ngtu ngü.
11 Kah püieo, kah kpyaüa thang kdo kkya hin kkhyaangea tüüi pyaan am ni atia angshing ngkyaaia kah pyen ma kkhai ni.
12 Asuna thang kdo kkya sun kkhyaang üng kah yah am ni. Kkhyaanga nah mthei phi am ni. Ah pät Booi Jeishüh Khrito kuung noh asuna thang kdo kkya sun mhnüh mdan üng ah nah kshing hmat shak ni.
13 Jüdah thuum seen i hlooka mtun ei ksang lü kah läk lam kti ati sun kah ning jah mtheh pääng ni. Kei noh Pangsiima shaang ngsiim sun käh mpyeen msheei ei laang lü mkhuh mhlih lü asim phyak vai kah mtun ei khoi phi nah nih hmat ktie.
14 Jüdah thuum seen läk lam naak üng kah mjü üng ka kah ngteh püie kah jah mhleih kti. Kah nih pu paea thuum seena phäh akse-ea kthaka kah mtun ei bok kti.
15 Lüphi Pangsiim noh ah bä naak üng am kah hmi hama kkhyüh ah xüh shoh vaia nah msoon lü ah nah khü ei pääng ni.
16 Pangsiim noh ah mkhüh ktüüma kba kkhyaang mjü kse-ea veei thang kdo kkya kah kpyaü vaia ah Sa kpa ah nah mhnüh mdan. Asun üng u üng phi am ngthäh ngkhyah ngü.
17 Ngshäa kah thoon hlaan sän üng ngshäa thoon ktie jah bük vaai kkhaia Jeirüh Shalem mlüh-a phi am sit ngü. Lüphi Arap hnea angshenga sit ngüshe kona Tama Kuh mlüh-a kah sit be kti.
18 Kum kthum nghjook lü Peta bük vaai kkhaia Jeirüh Shalem mlüh da kah kaai kti. Peta-a hlonga mhnüüp xalei mhma däk ni kah om vaai.
19 Asun üng va nih Booi Pa-a na Jakop phi kah hmuh. Ngshä akse u phi am hmu-ngü.
20 Tuh-a kah ning jah yuk lo u hin sang kti. Am kah hleei kti atia Pangsiim noh kshing kti.
21 Kona Shürih jah Shili Shi hnea kah sit kti.
22 Asun sun üng Jüdah hnea Khrito jum ei kti shaang üng kae noh am nah hmuham u.
23 “Ahlaan üng nih nih-e jah mkhuh mhlih kti sän noh ah sim pyak hlü shak khoi jum ei naak tuh ta kpyaü hü kti ni” atia ngjak ktie.
24 Asun üng kah phäh-a Pangsiim mküüi mtou ktie.