4
1 Asuna kyalü kei hin Khritoa phäh khup kkyuma thoon ngüshe kah ning jah nghui na-hlük kti ni. Pangsiim noh ah pea vaang kkhaia ning jah khü kti. Asuna khü naak üng looi ngkäih kkhaia vesoh poh mshah ua.
2 Nah nih mlung mhneem ua. Hnip hnooi ua. Mlung mshaaü lü mhlä kphya naak üng mat jah mat nah nih püi non ei ubä.
3 Diim deih naak üng mat jah mat ngman ei u kti lü Mkhyangsiima ning jah peet nglooi ei naak sun shääm bän vaia mtun ei ksang ubä.
4 Nih nih-e abäng Khritoa puum sha mat üng nih ngpüi ktie. Mkhyangsiim mat nih yah ei ktie. Nih nih-e abänga ääp ei naak phi mat däk ni ave. Pangsiim noh ah nih ning khü üng asuna ääp ei naak sun nah nih bänga phäh ni.
5 Booi Pa mat ni, jum ei naak mat ni, patiso mat ni ah ve.
6 Nih nih kkhyaang sa naküta Pa Pangsiim mat däk ni ah ve. Ah nih noh akve naküt jah up kti. Akve naküt sun jah shum mang ei kti. Ah kkhyaang abänga mlung kkyoonga phi um kti.
7 Khrito noh mat siim mat siim üng jah pa-ma lü bä naak ah jah peeta kba khyaih naak khoh nih yah ktie.
8 Sangsiim üng ng'yuk kti ta “Booi Jeishüh thou lobe lü kkhaan khoa ah kaai üng Shatan yaai pa noh ah jah mana kkhyaange ah jah mhlät. Kona kkhyaange üng khyaih naak khoh ah jah peet” tilü vek kti.
9 Booi Jeishüh kkhaan khoa ah kaai ah nih pyen hin i ti hlü ni. Booi Jeishüh sun kho mdeka kho k'uma ah kyum lo ma sun pyen hlü ni.
10 Kyum lok kti sun kkhaan kho phi hleih ktia ngjäk be kti. Akve naküt sun küm seei be baang shak kti ni.
11 Booi Jeishüh noh khyaih naak khoh ashü kyü sun shaang üng ah jah yet. Asun hin i ni ti ta shaang ngsiima phäh-a akhäk sun ngshäea ni, akhäk shahma ngsiimea ni, thang kdo kkya kpyaü hü ktiea ni, akhäk shaang ngsiim sangea jah Sangsiim jah mthei ktiea Khrito noh ah jah msoon.
12 I lü ahin kba ah poh ni ti ta Pangsiima kkhyaange abäng hin Khritoa xüh shoh eia thoon lü ah khuut poh kkhaia ah jah piit pyaang ni. Khritoa puum sha-a thoon kti shaang sun asääng taai lo vaia phäh ni.
13 Asun üng ta nih bänga jum ei mat lolü Pangsiima Sa kpa sun aksanga nih kshing hmat lok kkhaie. Asun üng shaang ngsiim sun Mkhyangsiim üng shääng kti shak üng kkhyaang teh lolü aksinga thoon lok kkhai. Khritoa be baang naaka yü phi kpha kti.
14 Asun üng ta nih nih-e hin hnashena kba am nih veti. Nih jum ei naak hmü shak lü jah mhleei mhlak tuui ten hlük kti kkhyaangea msuh mtheh naak kho khi ngphyüi noh tui ngkhup ah ngnoot shaka kba am jah thoon shak ti.
15 Nih nih-e ta mhlä kphya naak üng Pangsiima kkhyü sun ksang ktia pyen lü shaang ngsiima lua thoon kti Booi Jeishüh-a kba amjü kküm üng nih däm yah kkhaie.
16 Ah puum sha-a thoon kti shaang sun ah nih üng ngshu ngsong lolü ta yuh ngkhyü naküt noh puum sha sun ah pin man lo ni. Puum sha-a thing yo naküt sun ah nih phäh phäh-a ah nih thoon ve u üng puum yo abänga däm duh lolü mhlä kphya naak üng sääng taai lok kti.
17 Asuna thoon lü Booi Pa-a ksah-a ashih deena ning jah him lü kah ning jah msing u ni. Nang nih-e hin am jum ei kti kkhyaang mjü kse-ea ve soh-a kba am veyah ti u kti. I lüni ti ta ah nih mlung kko ngnei shak üng i a am kyah ktia ngkho ni ah ve.
18 Ah nih ngngaih kya naak thei sun nghmüp lok kti. Ah nih mlung ngsang lü ngngaih kka ulü Pangsiim noh kkhyaang naküt üng ah peet hlüa shak üng am shääng ei säh dou laang u.
19 Khye kti jah am khye kti sun käh li khya su ngngaai thei ti ulü am do kti kpaam ei jah mtuih mleh kti naküt üng ngsum leei ei ktie. Mtuih mleh kti amjü kküm sun üng ashili shan taka thoon vehlü ham ktie.
20 Nah nih ngjaak u Khritoa mong msuh mtheh ta asun üng am täng.
21 Khritoa thang ngja-u kti lü nah nih ksang nak ktie. Khrito mah mah nglooi ei üng lam ksang ah ning jah msuh mtheh ni.
22 Asuna thoon lü Booi Jeishüh am kshing ham üng nah nih ve soh khoi kphyüm nah nih hoih yah vai. Am do kti kpaam ei läk lü mtuih mleh kti ngnei shak kphyüm üng phi nah nih ngshuut yah kkhaie ni.
23 Nah nih mlung kkyoong jah ngnei shak abäng kuunga Mkhyangsiim üng akthaaia nah nih thoon yah kkhaie.
24 Pangsiima joong shaanga kba pyuun naak jah ngsiim ngsaih naak üng piit pyaanga ngnei shak kthaai sun dou daang ua.
25 Asuna thoon lü käh hleei hlak ti vai. Abäng noh nih püi üng sang ktia pyen hlo püi vai. I lüni ti ta nih bänge hin Khritoa puum sha mata thing yoa nih thoon ktiea kyalü mat jah mat nih shääng ei ktie ni.
26 Nah nih mlunga shou lo üng mkhye käh poh ua. Khoa kyaak hlaana nah nih mlunga shou ngim shak be ua.
27 Mlunga shou naak üng Shatan yaai pa-a vaan naak vai mkot käh mboon peet ubä.
28 Mpyu ei khoi kti phi käh mpyu ei yah ti kkhaie. Käh ngtuui ngten lü mtun ei ksang lü ahman sa-a ah mjung üng khüüi khoom she. Asun üng va ampyeen kshe-e üng phi jah pe-khoh ham kkhai.
29 Mtuih mleh kti kkhyü käh shum ei bing bing vai. Kkhyaangea phäh-a sääng taai naak jah hnip hnooi naaka thoon ktia kkhyü pyen ua. Nah nih pyen kshak üng kkhyaange noh Pangsiima bä naaka kshing u-she.
30 Pangsiima Mkhyangsiima mlung mneh naak vaia käh poh ubä. I a thoon lüni ti ta Pangsiim noh ah jah shuh phyam naaka mhnüüp shüp vei säpa Mkhyangsiim hin Pangsiima ning ka naak ua mshing naak ni.
31 Asuna thoon lü püi mlung naak, thüi shei, mlung shou abäng sun jah hoih ua. Nghou ei, kkhyaang thang msheet, kkhyaang ngnei naak käh veyah ti kkhai.
32 Nah nih püi üng ngkhot ua. Mpyeen ei ua. Pangsiim noh Khritoa thih naak üng nah nih mkhye ah ning jah mhläta kba mat jah mat nah nih püia mkhye hlät ua.