1 Ahlaan üng ta nah nih bäü hma mkhye mshoh-a phäh Pangsiim noh akthia ah ning jah ngngaih u ni. 2 Asun sun üng kho mdek thuum ning nah nih läk hüt khoi ktie. Lung kho tuui yaaiea khong Shatan yaai pa-a mkha kkea nah nih vek ktie. Ah nih noh Pangsiima pyen kpet kti naküt sun tuh veia jah up ei ham kti ni. 3 Ahlaan üng abäng kuung noh ah nih nih-ea kba vesoh lü nih puum sha-a kpaam ei nih läk ktie. Nih mlung ngnei jah nih puum sha-a hlü eia nih vekhoi ktie. Asuna thoon lü nih hmi loa kkhyüh kkhyaang sa naküta kba nih nih-ea kkhaana phi Pangsiima mlung shou lü mtaam ah jah peet kuung vaia thoon kti.

4 Lüphi Pangsiim noh nih nih-e jah mpyeen ei kkhüt lü jah kphya kkhyok nak kkhüt kti. 5 Asuna thoon lü nih mkhye ua phäh nih nih-e sun Pangsiima ngngaih-a akthia nih ve k'um üng ah nih noh Booi Jeishüh mah mah ayüma ah jah xün shak be ni. Pangsiima bä naak üng ni nang nih-e noh kuum kyan naak nah nih yah u. 6 Nih nih-e hin Booi Jeishüh üng nih nglooi ei ua phäh-a Pangsiim noh Booi Jeishüh üng ayüma jah thoh shak be lü Booi Jeishüh mah mah ah upa pea ah Booi ngoh naak üng jah ngshut shak kti. 7 Pangsiim noh Khrito üng ah jah mhnüh mtheh mhlä kphya naak jah bä naak sun nung lü mün shepi pi kti ni. Malama lok kkhai aksüün abäng üng Pangsiima mhlä kphya naak jah bä naak sun ngshing ngte shak lä kkhai ni. 8 Nah nih jum ei üng Pangsiima bä naaka phäh-a kuum kyan naak nah nih yah ktie. Kuum kyan naak yah vaia nah nih poh ei khoh ktie am ni. Pangsiima ning jah yet ni. 9 Päta mtun ktha ei üng kuum kyan naak am yah ei khoh-a phäh-a u noh phi am sam sah na-yah. 10 Nih nih-e hin Pangsiima jah piit pyaang ni. Nih nih-e noh do kti poh mshah lü nih ve soh vaia phäh Booi Jeishüh Khrito üng Pangsiim noh ah jah tüüi doon ni. Asun kba do ktia khuut sun nih poh vai ua ahlaana kkhyüh Pangsiim noh ah nüt yaan pääng ni.

11 Nang nih-e hin nah nih hmi loa kkhyüh Pangsiim am kshing ktia kkhyaang mjü ksea nah nih thoon ktie. Puum sha üng vun moih khaam ei kti Jüdah-e noh “Ah nih nih-e hin vun moih am khaam ei ulü am ngsiim saih ktia mjüe ni” tilü ning shui bah ktie. Asun käh mhnih ubä. 12 Asun sun üng nang nih-e Booi Jeishüh Khrito üng nah nih ngkya-ham ktie. Nang nih-e hin Pangsiima kkhyaange, Isare mjü üng am shääng ei u kti. Asuna thoon lü Pangsiim noh Isare kkhyaange üng ng'aan ei lü ah ngkhaam ei sun nang nih-ea phäh am ni. Nang nih-e hin Pangsiim käh hmat lü aääp ei kka-a kho mdeka nah nih vekhoi ktie. 13 Ahlaan üng Pangsiim üng akthuuk nua vekhoi kyo u kti lüphi tuh ta Khrito üng nglooi ei lolü ah thi mhlä üng Pangsiim üng nah nih säh lok ktie. 14 Ah pät Booi Jeishüh kuung hin nih nih-ea diim deih naak ni. Ah nih noh nih nih Jüdah kkhyaange jah kkhyaang mjü kse-ea kkeh-a ngkhoi ngkhya naak jah püi mlung kko naake sun ah phyeet ni. Kona nih nih-e sun kkhyaang mjü mata jah thoon shak kti. 15 Booi Jeishüh kkhyaanga puum sha-a hmi lolü thih ah khaam eia phäh üng Pangsiim noh Moshei üng ah peet thuume, mkhyah-e, ningea jah kphun naaka kkhyüh ah jah shuh be. Asun üng kei nih Jüdah mjü jah amjü kse-ea kkeh-a jah ng'ye shak be lü Booi Jeishüh üng nglooi ei naak üng kkhyaang mjü kthaai mata ah jah thoon shak ni. 16 Booi Jeishüh baan lam ktunga ah thih-a phäh üng kei nih Jüdah mjü jah amjü kse-e sun puum sha mata jah thoon shak lü Pangsiima veei jah khü be lü mat jah mat jah su ngi shak kti. Pangsiima dä nih kkeh-a phi jah ng'ye shak be kti ni. 17 Booi Jeishüh noh diim deih naak jah pek kti thang kdo kkya sun Pangsiim üng thuuk kti nang nih amjü kse-e jah Pangsiim üng säh kti kei nih Jüdah mjüe üng phi jah msuuk mtheh kti. 18 Booi Jeishüh üng kei nih Jüdah mjü jah amjü kse-e sun Mkhyangsiim mata kpüi kpak naak üng ni Pangsiima hmaai ma-a nih vaang vaai khoh u.

19 Asuna kyalü nang nih-e hin Pangsiima pe üng am shääng ei ktia kkhyaanga am thoon ti u kti. Nang nih-e hin ngsiim saih kti kkhyaange mah mah Pangsiima pea nah nih vaang ktie ni. Pangsiima kkyoong üng phi nah nih ngpüi ktie. 20 Khritoa ima nah nih thoon vaia nang nih-e hin ngshäe jah shahma ngsiimea pyaan kse im mthoh ktunga kkhaana ah ning jah shak u ni. Asuna im angkhääng vaia Khrito ah pät kuung sun aktung boka lunga thoon kti. 21 Asuna im puum abäng sun Booi Jeishüh üng ngphun ei päih kti. Asun sun Pangsiima ngsiim saih kti hjok khak im nua thoon lok kti. 22 Booi Jeishüh üng nglooi ei u kti lü nang nih-e phi Mkhyangsiim noh ning jah mshu mdoih lü nih nih-e abäng Pangsiima um naaka nih thoon ktie.