1 Jüdah hnea vek kti Pangsiima kkhyaange jah ku ei vaia aksanga ta kah ning jah yuk lo vai am hlü kyo. 2 Nah nih jah ku ei hlük ktie ati sun kah kshing ni. Make Tonih hnea vek kti jum ei ktiea ma-a kah ning jah mküüi mkhyah ei ni. “Nih hnu kuma kkhyüh lü Kärih hnea jum ei ktie noh ta jah ku ei kkhaiea ngshääm kyet ktie ni” tilü kah pyen pääng ni. Nang nih-ea mtun ktha eia phäh Make Tonih hnea jum ei ktie phi nah nih jah mthü mhlet ktie ni. 3 Kah ning jah mküüi mkhyah ei naak amdanga käh thoon lü kah pyena kba aksanga nah nih ngshääm kyet vai ua be nae hin tuh hi kah jah tüih lo ni. 4 Kah ning jah mküüi mkhyah eia kba am nah nih ngshääm kyet u ta nah nih veeia kah lo üng Make Tonih hnea jum ei ktie ah nih ngpüi lo u ta kah hmaai shek kkhai ni. Nang nih-e phi nah nih hmaai shek kkhai. 5 Asuna thoon lü nah nih veeia kah lo hlaana be nae nah nih veeia ah nih lo ma vai ua kah jah mtheh üng do kkhaia kah ngngaih. Nah nih kkhyü taama kba yet sun nah nih küm seei shak vai ua ning jah ku ei lok kkhaie. Asun üng nah nih peet ua do naak üng käh ei she u kti lü nah nih booi maang vai ua phäh ni.

6 Nang nih-e kah ning jah shüüm hlü shak ta msi alääm sho kti noh aktheih paai phi alääm ni ah aah ei be. Msi kho hah sho kti noh kho hah aat ei be yah kti. 7 Mat siim noh nah nih mkhüh ngngaih ei päänga kba pe ua. Kpaam ei naaka mlung üng athuum khoia käh pe ua. I lüni ti ta je kyai naak üng pek kti kkhyaang ni Pangsiim noh ah kphya naak. 8 Do kya naak mjü kküm üng nah nih booi maang vai ua Pangsiim noh ning jah piit pyaang peet khoh kti. Asun üng nah nih päte üng phi küm kooi ktia velü nah nih püi nah nih ku ei naak vai phi veham kkhai. 9 Sangsiim üng ng'yuk kti ta “Mpyeen kshe sun hleei hlook ei ktia ku ei kti ta ah nih-a bä naak sun anghläia shüüm kyet kkhaie ni” tilü vek kti. 10 Pangsiim noh msi sho kti üng msi pek kti. Nang üng ei ook phi ning pek kkhai. Nanga külak khoh theem naküt sun pung pyah shak kkhai. Nah püi nah ku ei khoh däm däm vaia phi Pangsiim noh ning piit pyaang peet kkhai. 11 Nah püi anghläia nah peet mshoot khoh vaia Pangsiim noh anghläia hleei hlook ktia ning pek kkhai. Asuna thoon lü kei nih-e noh kah nih dou nang nih-ea yeta phäh kkhyaang kho hah noh Pangsiim je ei kkhaie ni. 12 Ahin kba nah nih poh mshah hin mpyeen kshe kti Pangsiima kkhyaangea hlü ko naak üng nah nih jah ku ei däk am ni. Kkhyaange noh Pangsiim ah nih je naak nah nih jah däm duh shak ktie ni. 13 Ahin kba khuut nah nih poh ua phäh kkhyaang kho hah noh Pangsiim mküüi mtou kkhaie. I lüni ti ta nang nih-ea khoh hat jah yet mshema phäh nah nih kpyaü hü Khritoa thang kdo kkya sun nah nih ksang nak ktie atia angte naak ni. 14 Pangsiim noh mhnga lü hleei hlook ei ktia bä naak ah ning jah peeta phäh ah nih-e noh mlung kko ksang üng ning jah tä sham peet kkhaie ni. 15 Pyen lü käh päih ktia Pangsiima jah yeta phäh Pangsiim nih mküüi mtou vai u.