1 Api kah nghmoong naak üng nah nih nah non ei u ta do kkhai shü. Nah non ei ma ua. 2 Pangsiim noh ah ning jah kkeei ei ua kba kei noh phi kah ning jah kkeei ei kti. Nang nih-e hin kpa mi mata kkhyu vai ah nih pyen ei pääng ngla mi sa üng nah nih täng ktie ni. Asuna kpa mi ta Khrito ni. 3 Nah nih su ngngaih naak lam ning jah hmü shak päih ulü nah nih mlung kko ksang üng Khritoa phäh am nah nih ng'ap ei ti vai u sun kah sääi naak ni. Ahin kba ngtuui ngten kti kphyu kphyaai noh Eva phi ah mhleei mhlak. 4 I lüni ti ta kkhyaang mat mat lolü kei nih-e noh kah nih kpyaü Khrito üng hnga ktia akse Khritoa mong ah nih pyen lo u ta ngngaih k'hnipa nah nih dou daang kkhaie ni. Nah nih yah eia Mkhyangsiim üng hnga ktia ngmüi mkhya phi nah nih dou daang kkhaie. Aksüka nah nih dou daana thang kdo kkya üng hnga kti thang kdo kkya phi nah nih dou dang kkhaie ni. 5 Theem kkhüt kti nang nih-ea ngshäea kba kei üng phi hiit am ve atia ta am ngngaai ngü. 6 Kei hin am kkhyü thei kyo ngüshe phi Pangsiim noh kshing hmat naak nah pek kti ni. Asun sun amjü kküm üng anghläi kuunga ning jah kshing shak lü kah ning jah mhnüh mtheh ni.

7 Pangsiima mong thang kdo kkya nah nih veeia kah kpyaü üng i a kheen phi am lou ei ngü. Nang nih-ea sääng naak vai kah mlung kah mhneem hin kah mkhye ktio. 8 Nang nih-e kah ning jah msuh mtheh k'um üng shaang kse-e noh ah nih nah kbi lo ku ei naak kah dou kti. Nang nih-e kah ning jah ku ei hlüa phäh ah nih nih-e kah jah huh ei üng ah täng ni. 9 Nah nih hlonga kah ve k'um üng kah hlü ko naak üng am ning jah pyang ma shak ngü. Make Tonih hnea kkhyüh lok kti be nae noh kei üng hlü ko naküt kti nah kbi lok ktie. Ahlaan üng phi ngooia phi kah ning jah pyang ma shak kkhai am ni. 10 Khrito üng aksang kuung kah pyen ni. “Kärih hne shaang abäng üng ku ei naak am dou laang ngü” tilü kah hmaai mah ei lä kkhai. 11 I lü ahin kba kah pyen ni ti ta am kah ning jah kphya naaka phäh-o. Kah ning jah kphya nak kti ati sun Pangsiim noh kshing kti.

12 Ahin kba ni kah thoon lä kom. I lüni ti ta nang nih-ea veei vek kti akse ngshäe noh “Polüh-a kba Pangsiima khuut kah nih poh ktie ni” tilü ah nih hmaai mah naak vaia mkot käh ave vaia phäh ni. 13 Ahina kkhyaange hin ngshä ksange am ni. Khritoa ngshäa hana som ktie. Ah nih khuuta mong ah nih pyen u üng hleei hlak ktie. 14 Ahin mün sam naak vai am ni. Shatan yaai pa phi akvaai khoa ka kkhaan kho ngshäa hana som kti. 15 Asuna thoon lü ah nih-a xüh shoh-e hin ngpyuun naaka xüh shoh-a hana ah nih som u hin mün sam naak vai am ni. Ah nih nih-ea khüt naak ta ah nih nih-ea khuut üng looi ngkäih kkhai ni.

16 Kah pyen be tü ma kkhai. U üng phi kah nghmoong kti tia am ngngaih hlü shak ngü. Lüphi asun kba nah nih nah mkhyah u üng phi nah dou daang ua. Asun kba ani üng ah pi sa kah hmaai mah khoh kkhai. 17 Tuh kah pyen hlü hin Pangsiim noh ah nah pyen shak am ni. Kkhyaang nghmoonga kba kah hmaai mah ma kkhai. 18 Kkhyaange noh ah nih jah mün naak vai hmaai mah kti ngshä kho hah vek ktie ni. Asunea kba kah hmaai mah hnga ma kkhai. 19 Nang nih aktheeme noh ta ah nghmoong sun nah nih non ei kuung ktie ni. 20 Kkhyaang mat noh xüh shoh-a ah ning poh ei ni, ah ning joih tuk ei ni, ah ning jah hnep ei ni, ah ning jah mdih mshuui ni, nah nih hmaai ah ning jah kbeih üng phi nah nih non ei ktie am ni bä. 21 Ahin kba kah ning jah pyen vai ngke ei kyo ngüshe phi kei ta ktha ngseek ngüshe ah nih-e kba am poh dat ngü. Lüphi mat jah mat ah nih hmaai mah dat ta kei phi kah hmaai mah hnga kkhai tilü kkhyaang nghmoonga kba kah pyen ni. 22 Ah nih nih-e hin Hepye mjüeo. Kei phi Hepye mjüa kah thoon kti. Ah nih nih-e hin Isare kkhyaangeo. Kei phi Isare kkhyaang ni. Apyahama kkhyüh kyum kya lok ktieo. Kei phi asun kba ni. 23 Khritoa xüh shoh-a thoon ktieo. Kkhyaang nghmoonga kba kah pyen kkhai. Ah nih nih-ea kthaka xüh shoh akdo boka kah thoon kti. Sha lü mtun ei lü khuut kah poh kti. Ah nih nih-ea thaka khup üng phi kho vei kah kyum kti. Te kpaai phi kah khaam ei bok kti. Ah nih nih-ea thaka thi-khyäü täh kah khaam naak phi kho vei ni. 24 Jüdah-e noh yüüi mdong mhliin üng akphyü kih kko siima mhma vei ah nih nah te u ni. 25 Kthum vei thing mtup üng ah nih nah kpaai u. Ahun lung üng khong kah khaam yah kti. Kdunga kah seh üng kthum vei mhlüüi kdäma pyak kah shoong kti. Mhnüüp mat jah mthan mat mpang lai tuia kkhaana kah ngphoong yah kti. 26 Kho veei kdunga kah sit kti. Mlik tui kah peh shoa kyüh kshe nu kah shoong kti. Mpyuk ei shü khüe kah jah shoong toh kti. Kah mjü Jüdah-ea seng kyam kah khaam ei yah kti. Amjü kse-ea seng kyam phi kah khaam ei yah kti. Mlüh k'uma sääi naak, moa sääi naak, mpang lai tuia sääi naak, be naea hana som ktie jah kyüh ei vai kah khaam ei yah kti. 27 Ngnoi ngsai pyang ma lü khuut kah poh kti. Mthana am kah ih yah phi kho vei ni. Ei sooi hleep hleep üng ei nghmüh ook khyeh-a kah veyah kti. Ei phyüt ook vata anghläia kah veyah kti. Shui kpum shak kkoa kho kshik kah khaam ei yah kti. 28 Shaang abänga phäh amhnüüp tä lü kah sääi siing lä kti. 29 Kkhyaang mat ktha angseek üng ah nih-a dä kah ktha ngseek kti. Mat mat ngshuk ngvän shak ulü mkhye ah poh yot üng kei ni kah puk sheet yah.

30 Kah sam sah üng i hok kba kah ktha ngseek kti atia angshing ngte vaia ni kah hmaai mah. 31 Booi Jeishüh-a Pa Pangsiim anghläia mküüi mtou u-she. Am kah hleei kti ati sun ah kshing ni. 32 Tama Kuh mlüh-a kah ve k'um üng shang phuhlang Aretah noh jah up kkhaia ah msoona booi noh kei nah man kkhaia mlüh daai kyong abäng üng ngtuk kpoh-e ah jah mtäh shak ni. 33 Lüphi Khritjaan be nae noh sä üng nah xon u lü daai kyong mlüh the da yüüi üng ah nih nah kkhyaak u ni. Asun üng kah lät lok kti.