1 Kei kkhyaang lät am ni bä. Ngshäa kah thoon kti, am ni bä. Nih Booi Pa Khrito kah hmuk kti, am ni bä. Kei noh Booi Pa-a khuut poh ngüshe nah nih jum ei lok ktie am ni bä. 2 Shaang kse-e noh ngshäa am nah ngngaai ulüphi nang nih-e noh ta kei hin ngshäa nah nih nah ngngaai hnga läk kkhaie ni. Nang nih-ea xün naak kthaai hin kei hin ngshä ni ati sun Booi Pa-a mshing mte naak ni. 3 Kkhyaange noh ah nih nah pyen ei üng hin kba kah jah mshak be ni. 4 Kei nih-e noh ta am kah nih ei o ngkäih ktieo. 5 Ngshä kse-ea kba Booi Pa-a nae jah Peta-a kba kei nih-e noh phi nghnu mi lou ei lü kah nih jah seh soon hü püi khoh ktie am ni bä. 6 Asun kba am ani ta kei jah Pana Pa däk noh kah nih kut üng anghläia poh bä bä lü kah nih ei o-yah kkhaio. 7 Ngtuk kpoh mat hin ah päta ei ook ei olü ngtuk kpoh khoi ktio. Ngbom khang poh kti noh ngbom ktheih käh ei lü vek kkhaio. To kshääm noh ah toa sih tui am olü vek kkhaio. 8 Kah päta su ngngaih kah pyen am ni. Pangsiima thuum üng ahin kba kuunga ni ang'yuk. 9 Mosheia ah yuka thuuma k'uma phi “Saang leh kti she sän ei ah ei khoh vaia ah mpyong käh yai yah vai” tilü vek kti. Pangsiim noh she-e bä sun ah jah su ngngaih peeto. 10 Am ani ta Pangsiim noh ahin kba ah pyen hin nih nih-ea phäh ah pyen naak hlüo. Aksanga ta ahina mong hin nih nih-ea phäh-a ah jah yuk shak ni. I lüni ti ta lai kthon kti jah saang leh kti xooi hin ah nih yah ei vaia ah nih yah ngkäih-a saang sun ääp ei nih lü khuut poh yah kkhai xooi ni. 11 Nang nih-ea veeia Mkhyangsiima jah peeta msi ui kah nih sho nglin ktie ni. Asuna thoon lü nang nih-ea veeia shui shak ei ook sun aktheih-a kba kah nih yah ei be ua looi ngkäih kti kyo. 12 Ning jah msuuk mtheh kti akse-e sun jah peet mshoot vai looi ngkäih ktia ngngaai u kti lü nah nih jah ku ei ktie ni. Asun kba ani ta kei nih-e ta nah nih jah ku ei ua sha lü am ngkäih kti mä. Lüphi kei nih-e noh kah nih yah ngkäih sun am shum ei u-ngü. Khritoa thang kdo kkya-a phäh ma kham ktia käh athoon vaia khui kha mpyeen sheet amjü mjü kah nih khaam ei ktie. 13 Hjok khah im nua Pangsiima khuut poh ktie noh hjok khah im nu üng ka ei o-yah ktie atia am nah nih kshing ktie mä. Khah naak lung päma Pangsiima khuut poh ktie noh khah naak kkhyüng üng ka ei o-yah ktie. 14 “Asuna ng'yüia thang kdo kkya kpyaü ktie noh phi thang kdo kkya ah nih pyena phäh üng shui sha ei o-yah kkhai” tilü Booi Pa noh ah mkhyah ni. 15 Lüphi kei noh asuna yah ei ngkäih sun am shum ei ngü. Tuh hia phi nah nih nah büh ten vai ua kah yuk lo am ni. I lüni ti ta “Pangsiima jou taaia angshing ngte vaia phäh däka ni Khritoa thang kdo kkya kah pyen” tilü kah sam sah khoh kti. Kah sam sah hin amdanga athoon vai shüa kthaka kah thih ei ta do bok kkhai. 16 Thang kdo kkya kah pyena phäh-a ta kah sam sah naak vai am ve. Ahin Pangsiim noh ah nah xüh-a khuut ni. Thang kdo kkya am kah pyen ta Pangsiim ah thüi she vai kah kyüh vai hlü kti. 17 Mlung hlü nalü kah poh ta Pangsiim noh kheen nah pek kkhai. Thang kdo kkya am kpyaü hlü ngüshe phi Pangsiim noh ah nah mtaat ni. 18 Asun kba ta keia kheen ta hon ni. Thang kdo kkya kah kpyaü naak üng i phi am dou ei be ngü. Thang kdo kkya kpyaüa phäh üng shui shak ei ook yah vaia ngkäih kti sun am shum ei ngü. Ahin kah kheen ni. 19 Kei hin ua vana phi käh velü kkhyaang läta kyakyo ngüshe phi kkhyaang naküta mpya-a kah thoon kti. Kkhyaang abänga mpya-a kah thoon hin Khrito sun kkhyaang kho hah noh ah nih jum ei lo bok vaia phäh ni. 20 Jüdah-e noh Khrito ah nih jum ei lo vai ua phäh Jüdah-ea kba kah ve soh kti. Thuum noh ah nah up vai am hlü kyo lüphi thuuma jah upe noh Khrito ah nih jum ei lo vai ua phäh ah nih nih-ea kba thuum kah läk kti. 21 Pangsiima thuum am kshing ktie noh Khrito ah nih jum ei lo vai ua phäh thuum am kshing ktia kba kah vek kti. Lüphi Pangsiima thuum am kah ksang nak kti ta am ni. 22 Jum ei naak ktha ngseek ktie noh Khrito ah nih üm naak lo bok vai ua jum ei naak ktha ngseek ktiea kba kah vek kti. Lam amjü mjü üng Khritoa veei kkhyaang akhäk kah jah kpha vaia phäh kkhyaang abänga ng'yüia kah ve soh kti ni. 23 Thang kdo kkya-a phäh jah thang kdo kkya-a do kya naak üng kah ngpüi yah vaia ahin kba kah poh mshah ni. 24 Don ngsaam ei naak üng abäng dong kyo ulü phi mat däk noh ni kheen ah yah ati sun am nah nih kshing ktie mä. Kheen nah nih yah khoh vaia dong ua. 25 Nglün nglok ktha saam naak üng ngpüi ktia kkhyaang naküt hin a i üng phi mkhiin mkhäk lü veyah ktie. Sim pyak be kkhai lu ngbün hngoh sun ah nih yah vaia mtun ei ktie. Nih nih-e noh ta käh sim pyak laang kkhaia lu ngbün sun nih yah vai ua nih mtun ei ktie ni. 26 Nüüm naak pha vaia mtun ei kshi lü kah dong kti. Ngthäk kah poh naak üng amdanga kho liva kah thäk kti am ni. 27 Kah mti sha üng mkhiin mkhäk lü mlung mbüüp lü kah vek kti. Asun kba am ani ta kkhyaange jah msuuk mtheh ngüshe kah pät noh shuh am kah yah vai kah sääi naak ni.