1 Kah be naeo, kei noh Pangsiima kkhyü ksang kpyaü kkhaia nah nih veeia kah lo üng kkhyaange noh am ah nih ngjaak kya khoh-a kkhyü jah kho mdek theem ngvaai naak sun am shum ei ngü. 2 I lüni ti ta nah nih veia kah ve k'um üng baan lam ktung üng thik kti Booi Jeishüh Khrito däk kshing lü akse naküt kah mhnih-in vaia kah mkhyah ni. 3 Asuna thoon lü nah nih veeia kah ve k'um üng kah ktha ngseek lü kyüh kyook sääi let lü kah vek kti. 4 Kah msuh mtheh jah kah kpyaü naak üng kkhyaang ktheema kkhyü üng am pyen ngü. Lüphi Pangsiima Mkhyangsiima hiit üng kei noh kah pyen kti. 5 I lüni ti ta nang nih-ea jum ei naak hin kkhyaanga theem naak üng ngphun ei ktia käh nik ktia Pangsiima hiit üng angphun ei vaia phäh ni. 6 Lüphi jum ei naak üng ngkhääng ktie ta theem naak üng ni kah jah ngthuh ei püi. Ahina theem naak hin ta kho mdek üng am shääng ei. Ahina kho mdek up kti booi kdämea theem naak phi am ni. Ahina booi kdämea ah nih jah up naaka hiit hin sim pyakbe hnüh kti ni. 7 Kei nih-ea jah msuh mtheh-a theem naak hin ta Pangsiima thup pum ngyam ni. Ahina theem naak hin aksük shääia kkhyüh nih jou taai naak vai ua Pangsiim noh ah jah taak theem naak ni. 8 Ahina kho mdek up kti booi kdäme mat noh phi ahina theem naak am ah nakshing u. Ah nih nih-e noh Pangsiima theem naak sun ah nih nakshing ua ta jou taai mah kti Booi Pa sun baan lam ktung üng am ah nih hnim vai u shü. 9 Lüphi Sangsiim üng ng'yuk kti ta “U noh phi ah nih mik üng am ah nih hmuh khoi, ah nih nghnga üng am ah nih ngjaak khoi, ‘Ahin kba thoon kkhai ni’ tilü käh su ngngaih khoi sun Pangsiim noh ah nih kphya nak ktiea phäh-a ah jah piit pyaang peet ni” tilü vek kti. 10 Lüphi nih nih-e üng ta Pangsiim noh Mkhyangsiim üng ahina monge sun ah jah kshing shak ni. I lüni ti ta Mkhyangsiim noh akve naküt ni, Pangsiima ngthup ktia ah su ngngaih hngoh phi ah kshing vaia shui hjap kti ni. 11 Kkhyaang mata suum saak su ngngaih naküt sun u noh kshing khoh kkhai ni. Ah päta mlung kkyoong noh ni ah kshing khoh kom. Asuna ng'yüia Pangsiima Mkhyangsiim noh ni Pangsiima su ngngaih abäng sun ah kshing khoh kom. 12 Pangsiim noh kho mdek üng shääng ei kti ngmüi mkhya jah pek kti am ni. Ah veeia kkhyüh lok kti Mkhyangsiim ni ah jah peet. I lüni ti ta Pangsiim noh ah jah yeta bä naak abäng sun Mkhyangsiim üng nih kshing khoh vaia phäh ni. 13 Ahina monge sun kkhyaanga theem naak üng ah nih jah mtheia kkhyü üng kah nih jah msuuk mtheh ktie am ni. Mkhyangsiim noh ah jah msuh mtheh-a kba ni kah nih pyen kshak be u. Mkhyangsiim yah ei ktie sun Mkhyangsiim üng shääng ei kti kkhyü ksang ni ngshi ngkyaai ktia kah nih jah mtheh mkhyah u. 14 Mkhyangsiim am yah kti noh ta Pangsiima Mkhyangsiim noh ah jah yeta bä naake am jah dou daang ei khoh. I lüni ti ta Mkhyangsiim üng shääng ei ktie sun am ngja-kya khoh. Ah nih-a phäh-a asun hin anghmoong naak ni. 15 Mkhyangsiim yah ei kti noh ta a i naküt phi kshing hmat li khya thei kti. Ah pät sun ta u noh phi am si jaang li khya thei u. 16 Sangsiim üng ng'yuk kti ta “Booi Pa-a mlung kko sun u noh kshing khoh kkhai ni. U noh ah nih sun lu mhlang kkhai ni” tilü vek kti. Kei nih-e noh ta Khritoa mlung kko ngnei shak kah nih yah ei ktie ni.