1 Jüdah hnea vek kti Pangsiima kkhyaange ngui üng nah nih jah ku vai ua mong kah ning jah mtheh be tü ma kkhaie ni. Kalatih hnea vek kti shaange üng kah jah mtheh-a kba nang nih-e noh phi nah nih poh yah kkhaie. 2 Ngui nah nih yah eia kba nah nih bäng noh Pangsiim ngam püi mhnüüp tä lü akhäk pa lü msun u bä. Asun kba kei kah pha lo üng ngui nah nih mkhääm vai am hlü ti. 3 Kei kah pha lo kona nah nih k'üp ei u looi ngkäih ktia kkhyaange üng sa yuk ngüshe Jeirüh Shalem mlüh-a shaang üng yet jah kbi vaia kah jah tüih vai ni. 4 Seh vai do ktia kah ngngaih ta kah pät kuung noh kah jah seh püi kkhai ni. 5 Make Tonih hnea pha-ma ngüshe nah nih veeia kah lok kkhai. I lüni ti ta Make Tonih hnea lopha ma ngüshe nah nih veeia lo vaia kah mkhüh nak kti ni. 6 Nah nih veeia kho vei sa kah veto kkhaia, kah ngngaih. Kho kshik khya abänga kah veto kkhai ni. Kona nah nih veeia kkhyüh ahoa sit ngüshe phi kah seh naaka phäh nah nih nah ku ei khoh ktie. 7 Make Tonih hne da kah seh sho hi nah nih veeia lolü ning jah büh lo vai ta am ngngaai ham ngü. I lüni ti ta Pangsiim noh mkot ah nah mboon peet ta nang nih-e mah mah kho vei ve vaia kah ääp ei kti ni. 8 Lüphi Pentekot pooi säpa Ephet mlüh hi kah vema kkhai. 9 Pangsiim noh mkot nah mboon peet lü sääng taai kti Pangsiima khuut kah poh kti. Lüphi nah kpet mjak kti phi nung ktie. 10 Timotih nah nih veeia ah lo üng akdoa dou daang lü kkhin na-ubä. I lüni ti ta ah nih hin keia kba Pangsiima khuut poh kti ni. 11 U noh phi käh mdih mshuui u-she. Kah veeia akdoa ah pha lobe khoh vaia ah lam seh naak vai hlü kti üng ku ei ua. I lüni ti ta kei jah Khritjaan be nae noh ah nih-a pha lo be vai kah nih hmaaü ei ktie. 12 Nih nih-ea be na Apolüh hin akse be nae adä nang nih-ea veei ah ngläü ei lo vaia kah msuh mkih kyo. Lüphi tuh k'um hin üng nah nih veeia am lohlü ham. Ngooia Pangsiima lam mshüüm üng lok kkhai ni.

13 Ngthiim ng'yääi lü ve ua. Jum ei naak ngkhääng lü käh kyüh kyook ei lü ve ua. Akpyeenga ve ua. 14 Nah nih bi loh poh mshah naküt mhlä kphya naak üng poh ua. 15 Kah be naeo, Satei Phana kkyoong long hin Kärih hnea jum lo ma ksük ktiea thoon ulü Pangsiima kkhyaange jah ku ei kkhaia ah nih pät ng'ap ei ktie ati sun phi nah nih kshing ktie ni. 16 Nang nih-e noh asun kba kkhyaang mjüe jah khuut poh püi naküte ni, Pangsiima khuut poh kti nakütea ti pyen sun nah nih jah ksang naak vaia kah ning jah mtheh hlük kti ni. 17 Satei Phan, Photuh Natuh jah Akajüh-e ah nih lo ua phäh kah je kyai kti. Nang nih-e kah ning jah hmuh hlüa ksah-a ah nih-e mah mah kah nih nglooi ei yah-a phäh kah xe nak kti. 18 Ah nih nih-e noh ktha ah nih nah peet ua kba nang nih-e phi ktha ning pe-be kkhaie ni. Asun kba kkhyaang mjü sun lei shong ua.

19 Asha hnea vek kti shaang abäng noh nang nih ning jah shüüm ve u. Aküüi Lah jah Phyiki Lah jah ah nih ima ngkhääm kti shaang noh Khrito üng nang nih-e aksanga ning shüüm ve u. 20 Be nae abäng noh ning shüüm päih ve u. Mat jah mat ngsiim ngsaih ktia uut mhnam naak üng nah nih püi dou daang ua. 21 Kei Polüh noh ahina shüüm naak kkhyü nglung hin kah päta kut üng kah yuk ni. 22 Mat mat noh Booi Pa am ah kphya naak ta Pangsiima thüi shei naak khaam ei she. O, Booi Pao, lo bea. 23 Booi Jeishüh-a bä naak nang nih-e üng veshe. 24 Booi Jeishüh Khrito jum ei kti nang nih-e abäng kah ning jah kphya nak ktie ni. Amen.