1 Asuna mhlä kphya naak ave vaia aktung boka mtun ei ua. Mkhyangsiim noh ah jah peet khyaih naak khoh-e ave vaia hmaaü ei ua. Aktunga shahma ngsiim pyen nah nih pyen vaia tä sham ua. 2 I lüni ti ta aksea läk pyen kti noh kkhyaanga phäh pyen kti am ni. Pangsiim ngthuh ei püi kti. I lüni ti ta u noh phi ah nih sun am ngja-kya u. Mkhyangsiim üng ngthup kti sun ah nih noh pyen kti ni. 3 Shahma ngsiim pyen, pyen kti noh ta kkhyaangea phäh-a pyen kti. Ah nih jum ei naak jah ngkhääng shak kti, ktha jah pek kti, jah diim ye shak kti. 4 Aksea läk pyen kti noh ah pät noh ktha yah ei kti. Shahma ngsiim pyen, pyen kti noh ta shaang ngsiim üng ka abäng ktha jah pek kti. 5 Nang nih-e abäng noh aksea läk nah nih pyen thei vai u kah hlü ei kti. Lüphi shahma ngsiim pyen nah nih pyen u ta kah hlü ei bok ni. I lüni ti ta shahma ngsiim pyen, pyen kti hin aksea läk pyen ktia kthaka däm duh bok kti. Lüphi aksea läk sun Mkhyangsiim üng kkhyü lat khoh kti ave ta shaang ngsiim abäng noh ktha yah ulü do naaka thoon kti. 6 Kah be naeo, nah nih veeia kah lo üng aksea läk üng kah pyen ta nah nih do naaka thoon kkhaio. Pangsiima mdan am ani ta theem ngvaai naaka kkhyü, shahma pyen am ani ta msuh mtheh naak mat mat phi am angpüi ta i a phi am kyah. 7 Akkhyüng am nik kti leng la, am ani ta ki ta hin angtea am ah ng'yün ta i a ng'äi kthai ati sun u noh kshing khoh kkhai ni. 8 Kpuung hin angtea am ah ng'yün ta ngtuk kpoh kkhaia u ni ah ngpyaih xat kom. 9 Nang nih-e phi asun kba ni. Kkhyaange noh am ah nih ngjaak kkya-a aksea läk üng nah nih pyen u ta i nah nih ti sun i hok kba kshing khoh kkhaie ni. Nah mkha kha kya kkhai ni. 10 Kho mdek kkhaana läk sun kho hah pa velü mat jah mat am täng. Lüphi läk naküt üng shui bah alam lama vek kti. 11 Asun kba asuna läk shui bah sun am kah ngjaak kya ta asuna läk pyen ktia phäh kei hin amjü ksea thoon ngüshe ah nih phi keia phäh amjü ksea thoon kti. 12 Nang nih-e noh Mkhyangsiima peet khyaih naak khoh yah ei khoh vaia yü na-u kti lü shaang ngsiima jum ei naak adäm duh lo vaia phi mtun ei bok ua. 13 Asuna phäh aksea läk pyen kti noh Mkhyangsiim noh kkhyü lat naak be khyaih naak khoh phi ah peet vaia tä sham she. 14 Kei noh aksea läk üng kah tä sham üng kah k'uma kah ngmüi mkhya noh Mkhyangsiima kpüi kpak naak üng tä sham kti. Lüphi kah pum ngyam ta am ngpüi. 15 Asun kba ani ta i hok kba vai ni. Mkhyangsiima kpüi kpak naak üng ngmüi mkhya üng phi kah tä sham kkhai. Pum ngyam üng phi kah tä sham kkhai. Pangsiim mküüi mtou naak ng'äi phi mlung kko üng kah msuuk kkhai. Pum ngyam üng phi kah msuuk kkhai. 16 Mkhyangsiima pyen shak aksea läk üng Pangsiim nah mküüi mtou ta i hok kba kkhyaange noh “Amen” tilü pyen khoh kkhaie ni. Pangsiim nah je ei naak sun am ah nih ngjaak kya ua kyak kti. 17 Nang noh Pangsiim je ei kkhüt kyo kti lüphi kkhyaange noh ktha am yah ei u. 18 Nah nih bängea kthaka aksea läk üng kah tä shama phäh Pangsiim kah je ei kti. 19 Lüphi shaang ngsiima ngkhääm naaka kah ve üng ta aksea läk üng kkhyü nglung atoong kah pyena kthaka kah pum ngyam üng kkhyü nglung mhma sa kah pyen hlü bok kti. I lüni ti ta asun kkhyaange noh ngja-kya ulü kah jah msuh mtheh naaka thoon kti. 20 Kah be naeo, hnashena kba käh su ngngaai ua. Mkhye üng shääng ei ktia ta hnashen sa kpooka kba kah ning jah ve hlü shak kti. Nah nih su ngngaih mkhyah mtaang naak üng ta pa songa kba nah nih thoon vai kah hlü ei ni. 21 Sangsiim üng ng'yuk kti ta “Aksea läk pyen ktie jah kkhyaang mjü kse-ea mpyong üng ‘Kei noh Isare kkhyaange kah jah ngthuh ei püi kkhai. Lüphi am nah ksang na-u’ tilü Booi Pa noh ah pyen ni” tilü vek kti. 22 Asuna thoon lü aksea läk hin jum ei ktiea phäh ngshing ngte naak am ni. Am jum ei ktiea phäh-a ni ngshing ngte naaka athoon. Shahma pyen ta jum ei ktiea phäh ngshing ngte naaka thoon lü am jum ei ktiea phäh am ni. 23 Shaanga ngkhääm naaka abäng noh aksea läk pyen u kti lü kkhyaang kse am ani üng am jum ei kti nah nih kshuunga ah luh lo ta “Ng'yo ktie ni” tik kkhai. 24 Lüphi abäng nah nih shahma u ta am jum ei kti am ani üng kkhyaang kse ah luh lo ta ah mkhye mshoh kshing ei lolü ah ngjaaka kkhyü nglunga phäh ah mlung kko noh ah pät sun kbäü ei lok kkhai ni. 25 Ah mlung kko üng ngthup ktie sun pou lolü ngbok yop lü Pangsiim hjok khah kkhai ni. “Aksanga ta nah nih kshuunga Pangsiim vek kti” tilü pyen kkhai.

26 Kah be naeo, asun kba ani ta i hok kba ni nih pyen kom u. Pangsiim nah nih hjok khah u üng mat noh mküüi mtou naak ng'äi msuuk hlülü mat noh jah msuuk mtheh hlük kti. Pangsiima mhnüh mdan mat noh pyen hlük kti. Mat noh aksea läk üng pyen hlük kti. Mat be tü noh aksea läk üng pyen sun kkhyü lat hlübe kti. Ahine abäng hin jum ei ktiea jum ei naak ngkhääng naak loa thoon she. 27 Mkhyangsiima pyen shak aksea läk üng pyen hlük ktie ah nih ve ta mat kona mat noh pyen ktia nghngih däk noh pyen nishe. Aknung kkhüta kthum noh pyen u-she. Mat noh kkhyü lat be she. 28 Kkhyü lat naak be khyaih naak khoh yah kti am ah ve ta shaang ngsiim üng aksea läk üng käh pyen she. Ah päta ve naaka aksea läk üng Pangsiima veei tä sham u-she. 29 Shahma ngsiim pyen nghngih, kthum noh pyen u-she. Aksanga Mkhyangsiima pyen shak mä tilü jum ei ktie noh jah si jaang u-she. 30 Ngshut lü ngngaai kti üng Pangsiim noh Mkhyangsiim üng shahma pyen ah pyen shak to ta ngdüüi lü pyen mtuui kti sun i käh pyen ti lü ngshut-in she. 31 Pangsiim noh ah ning jah pyen shaka kba mat kona mat abäng nah nih shahma khoh ktie ni. Asun kba abäng noh Pangsiima mong kshing lobok u kti lü abäng noh ktha nah nih yah ei lok kkhaie. 32 Shahma pyen khyaih naak khoh yah ei kti noh khän talü pyen she. 33 I lüni ti ta Pangsiim hin nghliin nghlook lu sing naaka Pangsiim am ni. Diim deih naaka Pangsiim ni. Pangsiima kkhyaangea shaang ngsiim naküt üng ahin kba ni thuum ave. 34 Shaang ngsiima ngkhääm naak üng nghnu mie hin akdiima veyah kkhaie. Am ngthu ei yah u. Ah nih kpa mia upa ve u-she. Pangsiima thuum üng phi ahin kba ni ang'yuk. 35 Ah nih kshing hmat hlü ave ta ima ah nih kpa mi kthäh u-she. Shaang ngsiim üng hjok khah naaka nghnu mi noh kkhyü ah pyen hin am looi ngkäih kti ni. 36 A i vai ja. Pangsiima kkhyü hin nah nih veeia pou lok ktio. Aksea ve naaka kkhyüh nah nih veeia phalok ktio. 37 Mat mat noh “Kei hin shahma ngsiim ni”, am ani üng “Mkhyangsiima peet khyaih naak khoh kah yah ei kti ni” tia ngngaai kti noh ta tuh-a kei noh kah yuk lo hin Pangsiima mkhyah ni tia kshing kkhai ni. 38 Lüphi mat mat noh kah pyen am ah su ngngaih hlü ta nang nih-e noh phi ah nih-a ti pyen sun käh su ngngaai be ua. 39 Asuna thoon lü kah be naeo, shahma ngsiim pyen nah nih pyen khoh vai ua aksanga tä sham ei ua. Aksea läk pyen phi käh jah mkhyoh ua. 40 Lüphi abäng naküt hin looi ngkäih ktia ning lam üng thoon veshe.