1 Kei noh Khritoa mlung kko ngnei shak kah hju tuih-a kba keia ngnei shak phi nah hju tuih ua.

2 Anghläia nah shüüm kyet u kti lü kah ning jah msuh mtheh-a thuume sun angtea nah nih jah läk ua phäh kah ning jah mküüi mkhyah ei u ni. 3 Nikyo lüphi kpa mi naküta lu ta Khrito ni, nghnu mia lu ta ah kpa mi atia ni, Khritoa lu ta Pangsiima thoon kti ati sun ta kah ning jah ngjaak hlü kya shak ktie. 4 Kpa mi mat noh lu khüm ngbüng lü ah tä sham ta shahma pyen ah pyen ta Khritoa hmaai sun msheet ktia thoon kti. 5 Nghnu mi ani üng ah lu käh khüm lü ah tä sham ta shahma pyen ah pyen ta ah kpa mia hmaai sun msheet ktia thoon kti. Asuna nghnu mi hin akkanga ah lu kteih ei kti üng atäng ni. 6 Nghnu mi mat noh ah lu am ah khüm hlü ta ah lu kteih ei she. Ah lu sun akkanga nishe ah kteih ei sun ngke ei na-phyak ktia thoon lü ah lu khüm she. 7 Kpa mi noh ta ah lu am khüm yah. I lüni ti ta Pangsiim noh kpa mi sun ah joong shaanga kba mhnün mseng lü kpa mi üng Pangsiima jou taai sun nih hmukhoh kti. Nghnu mi üng kpa mia jou taai nih hmukhoh kti. 8 Pangsiim noh kpa mi sun nghnu mi üng ah mhnün mseng am ni. Kpa mi üng ni nghnu mi ah mhnün mseng ta. 9 Pangsiim noh kpa mi sun nghnu mia phäh ah mhnün mseng am ni. Nghnu mi sun kpa mia phäh ah mhnün msenga thoon kti. 10 Kkhaan kho ngshäea jah hmuh-a nghnu mi noh ah kpa mia upa ah ve sun angshing ngte naaka ah lu khüm she. 11 Lüphi Khritjaan xün sheei naak üng ta nghnu mi jah kpa mi mat noh mat ah kpüi vai hlü kti. 12 I lüni ti ta Pangsiim noh nghnu mi sun kpa mia kkhyüh mhnün mseng kyo lüphi tuh ta nghnu mi noh kpa mi sun ah sa naak lo ni. Kpa mi jah nghnu mi abäng naküt hin Pangsiima mhnün mseng päih ni. 13 Nah nih pät noh ngngaai shüm ua. Nghnu mi mat hin noh ah lu käh khüm xa lü Pangsiima veei ah tä sham ta looi ngkäih kkhaio. 14 Kpa mi noh ah lu akshei nua ah taak ta am looi ngkäih kti ati sun am nah nih ngngaai ktie mä. 15 Nghnu mia phäh ta ah lu ashei hin ah jou taaia thoon kti. Pangsiim noh ah ngvaih ei vai nghnu mi üng ah lu sham ah peet ni. 16 Mat mat noh ahina mong üng angtek ngkhaih hlü ta kei nih-e jah Pangsiima shaang ngsiim abäng noh kah nih hjok khah naak ua ahin kba thuum vek kti ati sun kah pyen hlü ni.

17 Tuh kah pyen hlüa mong üng nang nih-e am ning jah mküüi ei khoh ngü. I lüni ti ta nah nih ngsun ngkhääm u hin do kya naak nah nih yah naaka käh thoon lü jum ei naak ktha angseek naak boka thoon kti ni. 18 Aktunga kah pyen hlü ta shaang ngsiim üng nah nih ngkhääm u üng ngkhoi ngkhya lü nah nih vek ktiea kah ngjaak ni. Asun hin sang to kkhaia phi kah ngngaih. 19 Jum ei sang kti be na ah pou lo vaia ngkhoi ngkhya naak ta veyah kkhai ni. 20 Nah nih ngsun ngkhääm u üng Booi Pa-a pooi ngsiim nah nih ei ktie am ni. 21 I lüni ti ta ei ook ah nih suun ei lo u sun mat siim mat siim noh ah nih pät noh ei ei lü thoon ktie. Asun üng akhäk ta käh ei yah ulü ei noh jah kkhyoot ei kti. Akhäk noh ta ju mpyüi ktie. 22 A i vai ja. Nah nih im vek kti, am ni bä. Asua nah nih ei ook vai u ta. Pangsiima shaang ngsiim sun i a am nah nih mshui ei ktieo. Mpyeen kshe-e nah nih jah ngke ei hlü shak ktie mä. Kei noh i ni kah ti kom. Ahina mong üng kah ning jah mküüi ei vai uo. Am ning jah mküüi ei laang ngü. 23-24 Booi Pa noh ah nah mhjuum sun kah ning jah msuh mtheh be ni. Asun i ni ti ta Booi Jeishüh sun ah nih ktuun ei vaia mthan üng kkhaai kpeh bilü Pangsiim je ei lü kkhaai kpeh kphyüt lü akläke üng ah jah peet ni. “Ahin hin nang nih-e üng kah ning jah peet kah puum sha ni. Kei nah nih nah shüüm naak ua ahin kba poh lä ubä” ah ti. 25 Asun kba phäih phi lou lü “Ahina phäih üng Pangsiim noh nang nih-e üng be khüt akthaai poh kti. Ahina be khüta ngte naak ta keia thi ni. Ahina phäih nah nih ook tä lü kei nah nih nah shüüm naaka o-ubä” ah ti. 26 Kkhaai kpeh nah nih ei tä lü phäih nah nih ook tä lü Booi Pa-a kyum lo be vei säpa ah thih naak sun nah nih kpyaü ktie ni. 27 Mat mat noh käh looi ngkäih ktia ning lam üng Booi Pa-a kkhaai kpeh jah Booi Pa-a phäih sun ah ei ook ta Booi Pa-a puum sha jah ah thi sun käh lei shong ktia thoon kti ni. 28 Kkhyaang naküt noh pät sun kshü kset ei ma lü kkhaai kpeh ei she, phäih o-she. 29 I lüni ti ta kkhyaang mat noh Khritoa puum sha ni tia käh su ngngaai xa lü käh looi ngkäih ktia kkhaai kpeh jah phäih sun ah ei ook ta Pangsiim noh mtaam pek kkhai ni. 30 Asuna phäh nang nih-e üng ktha ngseek ktie jah am shi khyaih ktie kho hah ve-ulü thik kti phi akhäk vek ktie ni. 31 Lüphi nih nih-e noh nih pät nih kshü kset ei u ta Pangsiim noh am jah si jaang. 32 Pangsiim noh jah si jaang lü ah jah him hin kho mdek kkhyaange mah mah käh nih sim pyak vaia phäh ni. 33 Asuna thoon lü kah be naeo, ei ook vaia nah nih ngsun ngkhääm üng mat jah mat nah nih püi mtät ua. 34 Mat mat noh ah kkhyoot ei ta ah ima ei vaai she. Am ani ta nah nih ngkhääm u käh looi ngkäih lü Pangsiim noh mtaam ning jah pek kkhai. Akse-e ta nah nih veeia kah pha lo üng kah ning jah mtheh mkhyah kkhaie.