1 Shang phuhlang Akyipa noh Polüh üng “Nah ng'yung ei naaka kkhyü nah pyen khoh kti ni” tilüta Polüh noh ah kut mdan ma lü ah ng'yung ei naak kkhyü pyen kti. 2 “Shang phuhlang Akyipao, Jüdah-e noh ah nih nah mshuum ei ua phäh kho tuh ngooi kah mkhyea ngsiim naaka mong nah nih ma-a kah pyen yah-a phäh Pangsiim kah je ei kti ni. 3 Aktung boka ta Jüdah-ea thuum seen jah Jüdah-ea be nah kshing boka phäh kah mkhüh hnip kti ni. Asuna thoon lü kah pyen hin nah mlung kkhyalü nah su ngngaih peet ma bä tilü kah ning nghui nak kti ni. 4 Kah diik sa-a kkhyüh lü i hok kba kah ve soh kti atia Jüdah kkhyaange noh abäng kshing ktie ni. Aksüka kkhyüh kah päta mjüa kshuunga ni, Jeirüh Shalema ni i hok kba kah vek kti atia phi hmat ktie ni. 5 Ashääia kkhyüh kei hin kah nih hjok khah naaka thuum sun mtun ei kkhüt kti amyah bok Pharishe pä üng kah ngpüi kti ati sun ah nih shak shi hlü ta ah nih kshing hjou hnüh kti ni. 6 Pangsiim noh kah pu pae üng ah jah peet vaia ah ng'aan ei sun aksanga üm nalü kah ääp ei ktia thoon lü tuh ngooi ahia kshü kset kah suun ei yah kti. 7 Kah nih Jüdah mjü xalei nghngih bäng noh yah vaia kah nih ääp eia kkhyü taama phäh ngngaai ei lü amhnüüp mthan nghläia Pangsiim kah nih hjok khah ktie. Akyipa shang phuhlango, asuna ääp eia phäh ni Jüdah-e noh ah nih nah kbäü ei ta. 8 Thipääng ktie hin Pangsiim noh jah xün shak be kkhai ati sun a ia nang nih-e noh am nah nih jum ei khoh u ni. 9 Nasaret mlüh pa Jeishüh hin kah khyaih khoh säpa kpet mjak sun do ktia kah ngngaih ni. 10 Jeirüh Shalema asun kba kah poh ni. Khotu ngsiim kdämea hiit jah mkhyah sa yah ngüshe Pangsiima ngsiim ngsaih ktia kkhyaange kho hah pa khup üng kah jah phep kti ni. Asue ah nih jah hnim vaia ah nih mkhyah üng kei noh phi kah ä kti ni. 11 Aläa Sangsiim ngthei naak kyong naküta jah mkhui mkha hü lü Booi Jeishüh ah nih thang msheet ei vaia kah mtun ei kti. Khyong pe ksea mlüh-ea phi ah nih jah mkhuh mhlih vai ua sit hü lü kah sha phi phyüt shek-in hlü täh lü kah mlung shou kti ni.

12 Asuna phäh üng khotu ngsiim kdämea aana jah ah nih mkhyah üng Tama Kuh mlüh-a kah sit kti. 13 Shang phuhlango, kah püie mah mah mhnüüpa kah nih seh shoa kho nghngia kthaka vaai kti kkhaan khoa kkhyüh akvaai sun kah nih ling lenga ahunata mlaih lok kti. 14 Asun üng kah nih bänga kah nih kyuton-in ktie. Kah veeia Hepye läk üng ‘Sholüh, Sholüh, i a thoon lü kei hin ahin kba onga nah nah mkhui mkha kti ni. Lung kpaai kti lü nah kut ning shang be kti ni’ tilü pyena kthai kah ngjaak. 15 Kei noh ‘Booi Pa, nang u ni’ tilü kah kthäh. ‘Kei hin nah mkhuh mhlih-a Jeishüh ni. 16 Lüphi thou loa, nang hin kah xüh shoh-a kah ning msoon vaia nah ma-a kah pou lok kti ni. Kona tuh ngooi nah hmuh jah hnua kah ning mdan vaie sun kkhyaangea veei nah shak shi hü yah kkhai ni. 17 Kei noh Jüdah kkhyaange jah kkhyaang mjü kse-ea veeia ning tüüi lü ah nih kuta kkhyüh kah ning yung kkhai ni. 18 Nang noh ah nih mik jah mdei shak lü anghmüpa kkhyüh akvaai da nah jah nglat shak kkhai ni. Kei nah jum ei ulü mkhye mhlät naak ah nih yah ei vaia Shatan yaai pa-a up naaka kkhyüh Pangsiim da nah jah nglat shak be kkhai ni. Asun üng ni Pangsiim noh ah ngsiim ngsaih shaka kkhyaangea kshuunga alooi ngkäih naak üng vek ktia ah nih thoon lo khoh kom’ tilü ah mtheh.

19 Asuna thoon lü shang phuhlang Akyipao, kkhaan khoa mhnüh mdan sun kei noh kah ksang naak ni. 20 Tama Kuh-a kkhyüh sut ei lü Jeirüh Shalem jah Jüdah-ea ve naak abäng, kona Pangsiim am kshing kti kkhyaang mjü kse nakütea veeia kah shak shi kti ni. Ah nih mkhye naaka kkhyüh vuuk lü Pangsiim da mang be lü ah nih ngthu nghlai sun ngshing ngte kkhaia ah nih ve vai kei noh kah kpyaü hü kti ni. 21 Asuna phäh üng hjok khah im nua kah ve k'um üng Jüdah-e noh nah man ulü ah nih nah hnim vaia mtun ei ktie. 22 Lüphi tuh ngooi säpa Pangsiim noh nah kuum ei lü ahin üng ngdüüi ngüshe akdiik akdäm nah nih bänga ma-a kah shak shi kti ni. Keia msuh mtheh hin shahma ngsiime jah Mosheia malam pyen üng alang lang ni. 23 Asun ta Khrito hin Jüdah-e jah kkhyaang mjü kse-e kuum kyan naak akvaai jah kpyaü lok kkhaia khui kha deih deih ma lü thih naaka kkhyüh thou be ktiea kshuunga aksüka thoon kkhai ni” tilü ah pyen. 24 Polüh noh asun kba mkhye ng'yung ei naaka kkhyü sun ah pyen shoa Fetüh booi noh “Polüh nah ng'yo kti ni. Nah theem ngvaai naak noh ah ning kphyo ni” tilü ngpyaang kti. 25 Polüh noh ta “Jou taai mah kti Fetüh booio, kei hin am ng'yo ngü. Kei hin ngthiim ngüshe kah pyen hin phi sang kti ni. 26 Shang phuhlang Akyipao, nah ma-a angkyaaia kah pyen dat kti ni. Nang hin ahina mong nah kshing päih kti ni. Ahie hin angthup naaka thoon lok kti am ni u. Am kshing kti lü i am ve shoom kti. 27 Shang phuhlang Akyipao, shahma ngsiimea yuk Sangsiim nah jum ei kti am ni bä. Nah jum ei kti atia kah kshing kti ni” tilü ah pyen. 28 Shang phuhlang Akyipa noh “Polüh-o, akjä sa-a Khritjaan kah thoon lo vaia nah nah hlo hleep khoh kkhaia nah ngngaih-o” tilü ah kthäh. 29 Polüh noh ta “Akjä sa-a phi nishe, akkhak nua phi nishe, nah pät üng sut ei lü tuh ngooi nah ngngaai kti abäng keia kba nah nih thoon päih lo vai ua Pangsiima veei kah tä sham kti ni. Lüphi nang nih-e hin khup üng kah ning jah ngphep hlü shak kti ta am ni” tilü ah pyen. 30 Kona shang phuhlang Akyipa ni, Fetüh booi ni, Penih ni, akse abänge ni ngdüüi lok ktie. 31 Kho kpunga ah nih luh lo üng “Ahina kkhyaang hin thih naak ngkäih jah khup üng ah ngpheh naak ngkäih i phi am poh” tilü mat jah mat ngsi ngjaang ktie. 32 Shang phuhlang Akyipa noh ta “Ahina kkhyaang hin noh ‘Kesha shang phuhlanga si jaang ngoh naak ma-a kah phak kkhai ni’ am ah tia ta hlät phya be kyo khü” tilü Fetüh-a veei ah pyen.