1 Jüdah hnea kkhyüh Anti Ook mlüh-a lok kti akhäk noh “Mosheia thuuma kba vun moih am poh kti ta kuum kyan naak yah khoh kkhaie am ni” tilü be nae ah nih jah msuh mtheh u. 2 Polüh jah Pana Pa sun asune mah mah akshe hleena ngthäh ngkhyah nghai ngbak ei ktie. Asuna thoon lü “Polüh jah Pana Pa sun Anti Ook shaang ngsiim üng ka akhäk jah seh püi lü Jeirüh Shalema vek kti ngshäe jah asange mah mah ngthäh ngkhyah vaai kkhaie ni” tilü ah nih si jaang u. 3 Shaang ngsiim noh jah tüüi ulüta Pho Nishia hne jah Shalarih hne da sit lü jum ei ktiea veeia kkhyaang mjü kse-ea ngthu nghlai loa mong ah nih jah mtheh u. Be nae noh ngja-ulüta je kyai tong ktie. 4 Jeirüh Shalem ah nih pha üng jum ei ktie, ngshäe jah shaang ngsiim sange noh ah nih jah dou daan u. Ah nih nih üng Pangsiim noh ah poh mshah naküt ah nih jah mtheh be u. 5 Lüphi Pharishe-ea pä üng ka jum ei lok kti akhäk ngdüüi lo-ulü “Jum ei lok kti kkhyaang mjü kse-e vun moih jah poh shak vai ni. Mosheia thuum phi ah nih läk vaia jah msuh mtheh vai hlü kti” ah nih ti u. 6 Ngshäe jah asange asuna mong su ngngaai kkhaia ngkhääm lok ktie. 7 Kho vei ah nih ngthäh ngkhyah nghai ngbak kona Peta noh ngdüüi lolü “Kah be naeo, aksüka nah nih kshuunga Pangsiim noh nah xü lü kkhyaang mjü kse-e noh ngja-ulü ah nih jum ei lo vaia thang kdo kkya ah nah kpyaü shak ati sun nah nih kshing u ni. 8 Kkhyaanga mlung kkyoong hmat kti Pangsiim noh nih nih-ea kba ah nih nih-e üng phi Mkhyangsiim ah jah peet hnga-a thoon lü ah nih nih da phi ngpüi kti ati sun shak shi kti. 9 Ah nih jum ei naak üng phi ah nih mlung kkyoong jah ngsiim ngsaih shak kti. Nih nih-e üng am jah yü khya. 10 Nih nih-e jah nih pu pae noh phi am nih nääng ei ua phüih nu sun akläkea lu kkhaana mtaang u kti lü Pangsiim nah nih saam hlü ktie ni. 11 Booi Jeishüh-a bä naak üng kuum kyan naak yah ni atia nih jum ei ktie ni. Asun kba ni ah nih nih-e noh phi kuum kyan naak ah nih yah u” tilü Peta noh ah pyen. 12 Ngkhäam ktie bit hüt lü ve-ulü Pangsiim noh Pana Pa jah Polüh jah shum ei lü kkhyaang mjü kse-ea veeia mün sam kshe jah ngshing ngte naak ah poh mshah ah nih pyen sun ngngaai ktie. 13 Ah nih pyen lo pääng jah ta Jakop noh “Kah be naeo, nah ngngaai ma ua. 14 Pangsiim noh aksüka ah jah mseh naaka mong kkhyaang mjü kse-e üng jah mhnüh lü ah jou taai ngshing ngte naak vaia amjü kse-ea k'uma ka ah jah xü ma sun Shimon Peta noh ta tuh-a pyen lo pääng kti ni. 15 Asuna mong sun shahma ngsiimea pyen üng phi ngpüi kti ni. 16 ‘Kona kah nglat lobe kkhai ni. Kyuk ktia Davita sü im kah mthou be kkhai ni. Sim pyak ktia sü im kah piit pyaang be kkhai ni. Kei noh kah sha-be kkhai ni. 17 Asun üng yeli khashang naküt noh Booi Pa shui kkhaie ni. Kah phäh-a kah jah khü kkhyaang mjü kse-e noh nah shui hjam kkhaie ni.’ 18 Asun kba su Pangsiim noh ah namkhüh nalü ahlaan nua kkhyüh ah jah nakshing shak pääng kuung ni tilü shahma ngsiime noh Sangsiim üng ah nih nayuk. 19 Asuna thoon lü keia ngngaih-a ta Pangsiim da nglat lobe kti kkhyaang mjü kse-e hin käh jah mkhuh mhlih ta do kkhai ni. 20 Ah nih veeia sa yuk lü mhnama lup hjok khah naaka meh käh ah nih ei vai, ngla shuia ngkho, ah nghngü kbüh lü hnima sha käh ah nih ei vai, meh thi phi käh ah nih ei ook vai jah sük vaia kah mkhüh naak ni. 21 I lüni ti ta ahlaana kkhyüh Pangsiim ngam püi mhnüüp tä lü Sangsiim ngthei naak kyong naküta Mosheia thuum kkheh ktie. Mlüh naküta Mosheia pyen kshak kpyaü hü ktie ni” tilü Jakop noh ah pyen.

22 Asun üng ta ngshäe, asange jah shaang ngsiim üng ka naküt noh ah nih kshuunga ka akhäk jah xü ulü Polüh jah Pana Pa mah mah Anti Ook mlüh-a jah tüih vaia ah nih mkhyah u. Ah nih jah xü ta Pasha Pa-a ah nih shui be Jüdah jah Shilah ni. 23 Ahin kba sa ah nih yuk u. “Nah nih be naea phi thoon kti kei nih ngshäe jah asange noh Anti Ook mlüh, Shüh Rih hne jah Shili Shi hnea vek kti kkhyaang mjü kse Khritjaan be nae sun kah ning jah üm hlaam ktie. 24 Kah nih kshuung üng ka akhäk noh nah nih veeia lo-ulü ah nih pyen kshak üng ning jah mkhuh mhlih ktie atia kah nih ngjaak u ni. Asun kba ah nih pyen kshak vaia kei nih-e noh am jah sük lo laang kuung u ngü. 25 Asuna thoon lü kei nih-e ngkhääm lü ngthäh u ngüshe akhäk jah xü lü kah nih jah kphya naak Polüh jah Pana Pa mah mah kah nih jah tüih lo u ni. 26 Polüh jah Pana Pa noh ta nih Booi Jeishüh Khritoa phäh ah nih shak phi käh mseh nalü ngpong kti xooi. 27 Ah nih pät kuung noh asun kba ning jah kpyaü lok kkhaia Jüdah jah Shilah kah nih jah tüih lo ni. 28 Tuh kah nih yuk lo hlü kti thuuma kthaka yüh ktia phüih nu nah nih lu kkhaana käh mtaan vaia Mkhyangsiim jah kei nih-e noh ta kah nih hlü ei u ni. 29 Mhnama lup hjok khah naaka meh käh nah nih ei vai, meh thi phi käh nah nih ei ook vai, anghngü üng kbüh lü ah nih hnima sha käh nah nih ei vai, ngla shuia ngkho käh nah nih poh vai u. Aan hin nah nih phäh-a phi do kkhai ni. Phyong tääm mya shat lü ve-ubä” tilü ah nih yuk u. 30 Ah nih jah tüih Anti Ook mlüh-a phavaai ulüta jum ei ktie naküt jah ngkhääm shak lü sa sun ah nih jah peet u. 31 Sa sun bük ulü ah nih ktha phya ulü je kyai kkhüt ktie. 32 Jüdah jah Shilah ta shahma ngsiim xooia thoon nih lü ah nih jum eia ngkhääng lo däm däm vaia be nae üng kho hah pa jah msuh mtheh lü ktha jah pek kti xooi. 33 Akhäk vei ah nih om kona Anti Ook mlüh-a vek kti be nae noh diim deih naak üng ah nih seh be vaia ah nih jah tüih be. Kona Jüdah ta jah tüüi lok kti Jeirüh Shalema be naea veei sit be kti. 34 Shilah noh ta ve ei hüt vaia ah mkhyah. 35 Polüh jah Pana Pa phi akhäk vei Anti Ook mlüh-a vek kti xooi. Akse be nae kho hah mah mah thang kdo kkya kpyaü nih lü Pangsiima kkhyü jah msuuk mtheh kti xooi.

36 Kho vei nghjook lolüta Polüh noh Pana Pa üng “Nih sit hü be tü vai. Pangsiima kkhyü nih kpyaü naak pääng phi ngnam mlüh-ea nih be naea veei nih soon ei hü lü i a ah nih ve soh u nih jah bük hü be vai” tilü ah pyen. 37 Pana Pa noh Johaan Marküh ah nih hlonga seh püi vaia ah mkhüh naak. 38 Johaan Marküh ta Pam Philih hnea ah nih hlonga apäih vei säpa käh velü jah hoih hüt lü sit be kti. Asuna thoon lü Polüh noh seh hü püi be tü vaia am ngkäih tilü ah ngya. 39 Asuna thoon lü nghai ngbak kkhüt ma nih lü ngkyak kti xooi. Pana Pa noh ta Marküh khü lü Khipyüh tui shong da mhlüüi kdäm üng sit kti. 40 Polüh noh ta Shilah xü lü sit kti. Ah nih nih sun be nae noh Pangsiim noh ah bä naak ah jah mhnüh mtheh vaia ah nih jah tä sham peet u. 41 Ah nih xooi sun Shürih jah Shili Shia hne da sit nih lü Polüh noh shaang ngsiime sun ah nih jum ei naak jah ngkhääng ngpaang shak kti.