1 Anti Ook mlüh shaang ngsiim üng shahma ngsiime jah Sangsiim jah msuuk mtheh thei kti akhäk vek ktie. Asuea ngming ta Pana Pa, kkhyaang lea ah nih shui Shimon, Khi Reneh pea ka Lushi, Herota hlonga ah nih msah ei Manaai jah Sholüh-e ni. 2 Ah nih nih-e noh Booi Pa hjok khah lü ei ah nih jeih k'um üng Mkhyangsiim noh “Kah jah poh hlü shak khuut poh kkhaia kah jah msoon pääng Pana Pa jah Sholüh tuh hi jah tüüi ua” tilü ah pyen. 3 Ei jeih ulü ah nih jah tä sham peet. Ah nih lu kkhaana ah nih kut mtaang ma ulü ah nih jah tüih u.

4 Mkhyangsiim noh Pana Pa jah Sholüh ah jah tüih kona mpang lai tui pei Selüki mlüh-a sit kti xooi. Asuna kkhyüh mhlüüi kdäm üng Khipyüh tui shong da mhläi vaai kti xooi. 5 Shala Mih mlüh ah nih pha üng Pangsiima kkhyü Jüdah Sangsiim ngthei naak kyonga jah mtheh mkhyah kti xooi. Johaan Marküh phi jah ku ei kkhaia ah nih hlonga ngkhyüi vaai kti. 6 Tui shong sun üng sit ulü Papoh mlüh-a phavaai ktie. Asua Shatan yaai pa-a ah phun kam ka nak kti Pa Jeishüh ngming nak kti mat ah nih hmuh u. Asun sun Jüdah kkhyaanga thoon lü shahma ngsiima hana ngsom kti. 7 Sheiküh Polüh-a ah nih shui sun noh tui shong up kti. Asuna kkhyaang pum ngyam mah kti. Pa Jeishüh-a looi püia phi thoon kti. Tui shong k'up noh Pana Pa jah Sholüh sun Pangsiima kkhyü ah ngjaak hlüa phäh ah jah khü shak. 8 Kärih läk üng Eilih Mah-a ah nih shui Pa Jeishüh noh ta Pana Pa jah Sholüh sun ah jah kpet. Tui shong k'up noh käh ah jum ei lo vaia mtun ei kkhüt kti. 9-10 Polüh-a ah nih shui be Sholüh noh Mkhyangsiim üng be bang lolü Shatan yaai pa-a ah phun kam ka nak kti sun bük-in lü “Nang hin Shatan yaai pa-a sa ni. Nang hin do kti jah ngpyuun ktia ning ye ni. Nang hin anghläia nah ngtuui ngten kti ni. Nang hin Pangsiima hlü eia mong lam hlei hlaka nah pyen kti ni. Ahin hin itüh-a nah khäk shak kkhai ni. 11 Tuh hi Booi Pa-a kut nanga kkhaana pha lolü mtaam ning pek kkhai ni. Akhäk vei nah mik mü lü kho kshou phi am hmu-yah kti” tilü Polüh noh ah pyen. Ahunata ah mik mü-in lolüta ah kut man lü khyüi sho kkhai jah shui hü kti. 12 Asuna athoon ve sun ah hmuh-a phäh-a tui shong k'up noh jum ei lok kti. Khritoa mong ah nih jah msuh mtheh sun mün sam tong ktie.

13 Polüh jah ah püie sun Papoh mlüh-a kkhyüh Pam Pileen hne Peka mlüh-a mhlüüi kdäm üng sit ktie. Asua kkhyüh Johaan Marküh ah püie üng ngkya lü Jeirüh Shalem mlüh-a sit be kti. 14 Polüh jah Pana Pa sun Peka mlüh-a kkhyüh sit be tü nih lü Pisita hnea hlong Anti Ook mlüh-a phavaai kti xooi. Pangsiim ngam püi mhnüüp üng Sangsiim ngthei naak kyonga lut vaai nih lü ngshut kti xooi. 15 Mosheia thuum Sangsiim phi, shahma ngsiima yuk Sangsiim phi kkheh ma ulü Sangsiim ngthei naak kyong k'upe noh Polüh jah Pana Pa-a veei kkhyaang ah nih jah tüih. “Kah be na xooio, ah nih jum eia ngkhääng naak vai nah nih jah msuh mtheh vai ave ta tuh hi pyen ma tu nia” ah nih ti u. 16 Asun üng Polüh ngdüüi lok kti. Ngim ngima ah nih ve vai ua ah kut üng jah him ma lü sut ei lü ah pyen lo. “Kah püi Isare-eo, Pangsiim hjok khah kti kkhyaang mjü kse kah püieo, nah su ngngaai ma ua. 17 Ahina Isare-ea Pangsiim noh nih pu pae sun ah jah naxü kse ni. Ekip teng pea kkhyaang mjü ksea ah nih ve k'um üng Pangsiim noh ah jah pung pyah shak ni. Däm duh kti ah hiit üng Ekip pea kkhyüh Pangsiim noh jah mhlät lü ah jah seh püi ni. 18 Kho kum kphyü kip jah non ei lü moa ah jah mbei mbook ni. 19 Khanaan teng pea ka kkhyaang mjü kkhyüh Pangsiim noh jah sim pyak shak lü Isare-e üng ah nih kho yam vaia Khanaan teng pe ah jah peet ni. 20 Ahin kba athoon ve hin kho kum phya kphyü jah mhma kip hjou lo hnüh kti ni. Asun kona ah si jaang khong mange üng shahma ngsiim Shamui Lah-a kha säpa ah jah up shak. 21 Isare kkhyaange noh Pangsiima veeia shang phuhlang tong ulü Sholüh ngming nak kti ah jah msoon peet ni. Sholüh sun Kih-a sa Ben Jaming mjü ni. Kho kum kphyü kip ah jah up. 22 Pangsiim noh Sholüh sun not lü Davit sun shang phuhlanga ah msoon be tü. ‘Jeishea sa Davit hin kah mlung üng ngkäk kti ni. Keia mlung hlü sun abäng poh mshah kkhai ni’ tilü Pangsiim noh Davita mong shak shi kti. 23 Pangsiim noh Davita mjüa kkhyüh kyum kyalok kti Jeishüh sun Isare-e jah kuum kyan kti Booi Pa-a ah msoon ni. Ahin kba velok kkhaia ahlaana kkhyü ah nataam ni. 24 Booi Jeishüh noh ah khuut ah sut ei hlaana Johaan noh Isare kkhyaange ah nih mkhye naak üng vuuk be ulü tui üng patiso khaam ei vaia mong kpyaü kti. 25 Johaan noh khuut ah pääng lo hnüh vai üng ‘Kei hin u atia nah nih nah ngngaai ktie ja. Nang nih-ea mtäh ei u hin kei am ni. Ah nih hin kah hnua ni ah lo kom. Ah nih-a kho dok shuut peet kkhaia phi kei hin am looi ngkäih ngü’ tilü ah pyen. 26 Apyahama kkhyüh kyum kyalok kti kah be naeo, Pangsiim hjok khah ei kti amjü kse kah püieo, ahina kuum kyan naaka kkhyü kthai sun nih nih-ea veeia ah ngpyaü lo shak ni. 27 Jeirüh Shalem üng kae jah ah nih khong mange noh phi Jeishüh hin jah thoong khyah kti tia am kshing u. Pangsiim ngam püi mhnüüp tä lü ah nih kkheh shahma ngsiimea pyen kshak phi am ngja-kya u. Asuna thoon lü ‘Jeishüh hin thi ngkäih kti ni’ tilü ah nih mkhyah-a phäh shahma ngsiimea malam pyen sun ah nih küm seei shak u ni. 28 Booi Jeishüh üng ah thih naak ngkäih vai ah mkhye am hmu-kyo ulüphi Pilat booi üng Jeishüh ah nih hnim shak u. 29 Sangsiim üng Jeishüh-a mong ana ng'yuka kba abäng poh mshah ma ulü ah yook sun baan lam ktunga kkhyüh kkhya be ulü lung khuui msüm hnüna ah nih mkhyüh vaai u. 30 Asuna kyalüphi Pangsiim noh thih naak üng ah thoh shak be ni. 31 Kho mhnüüp kho vei pou lolü Kalile hnea kkhyüh Jeirüh Shalem da ah hlonga sit ktie noh Booi Jeishüh ah nih hmuh u. Ah nih nih-e noh Booi Jeishüh-a mong Isare-e üng tuh hi shak shi ktie. 32-33 Kei nih-e hin nang nih-ea veeia thang kdo kkya kpyaü kkhaia kah nih lok ktie ni. Booi Jeishüh ah thoh shak be hin Pangsiim noh nih pu pae üng ah jah peet kkhyü taama kba ah nih nih-ea kkhyüh kyum kyalok kti nih nih-e üng ah mküm mseei shak ni. Shalaan ng'äi nghngih üng ng'yuk kti ta ‘Nang hin kah ning sa ni. Tuh ngooi nang hin kah ning sa naak ni’ tilü Pangsiim noh ah pyen. 34 Hnua käh thi-be ti kkhaia Pangsiim noh Jeishüh sun thih naak üng ah thoh shak be. ‘Davit üng kkhyü kah taama kba kei noh nang üng ngsiim ngsaih lü anghläia vek ktia do kya naak kah ning pek kkhai ni’ tilü Pangsiim noh Sangsiim üng ah yuk shak ni. 35 Shalaan ng'äi akse kkyaang mat üng ng'yuk be tü kti ta ‘Ngsiim ngsaih kti keia xüh shoh ei am uih mnam shak ngü’ tilü ah pyen. 36 Davit noh ta ah päta kha üng Pangsiima hlü ei poh mshah kti. Asun kona thilü ah pu paea msüm hnüna mkhyüh ulü uih mnam kti ni. 37 Pangsiim noh ah thoh shak be ta ah puum sha am uih mnam laang kuung. 38-39 Kah be na abängeo, tuh hi mkhye üng Booi Jeishüh-a phäh nih lät kti ati sun angtea kah nih ning kshing hlü shak ktie ni. Pangsiim noh Moshei üng ah peet thuuma kba nih ve kyo lüphi mkhye naak abäng üng am nih lät khoh. Booi Jeishüh jum ei naküt kti ta mkhye mshoh naküt üng nih lät päih kti ni. 40 Asuna thoon lü shahma ngsiima malam pyena kba nang nih-e üng käh ah thoon lo vaia mseei ei ubä. 41 ‘Ngngaai ua, yaih yün ktieo, mün sam tong u kti lü sim pyak ei ua. I a thoon lüni ti ta nang nih-ea kha üng kah poh mshah sun mat mat noh ning jah mhnüh mtheh lüphi am jum laang u kti’ ” tilü Polüh noh ah jah msuh mtheh. 42 Sangsiim ngthei naak kyonga kkhyüh ah nih ju kyum be u üng ngam püi mhnüüp apha üng ahina mong lam sha lü ah nih jah msuh mtheh be tü vaia Polüh jah Pana Pa ah nih jah nghui naak u. 43 Kkhyaang pä ah nih ngpyeen be kona Jüdah kkhyaange jah Pangsiim hjok khah lok kti kkhyaang mjü kse kho hah-e noh Polüh jah Pana Pa-a hnu ah nih jah läk u. Polüh jah Pana Pa noh jah ngsi ngjaang püi ma nih lü Pangsiima bä naak sun üm nalü ah nih ve kyet vai ua ktha ah nih jah peet. 44 Lobe tü kti ngam püi mhnüüp üng Pangsiima kkhyü su ngngaai kkhaia mlüh üng ka abäng ngkhääm lok ktie. 45 Jüdah-e noh ngkhääm lok kti kkhyaang päe sun jah hmu-ulüta ngkeei ngku lok ktie. Polüh-a pyen kshak naküt sun hai bak ktie. Ah thang msheet lü ah nih pyen ei u. 46 Polüh jah Pana Pa noh ta “Pangsiima kkhyü nang nih-ea veei aksüka pyen ma vai hlü kti ni. Nang nih-e noh ta ahina kkhyü kpet u kti lü shak ngshääi yah ei kkhaia am nah nih looi ngkäih ktiea nah nih ngngaih ei u ni. Asuna thoon lü nang nih-e sun ning jah ta-hüt lü amjü kse-ea veei da Pangsiima kkhyü pyen kkhaia kah nih mang hnüh kkhai. 47 Pangsiim noh kei nih-e ah jah mtheh hüt ta ‘Kkhyaang mjü kse-ea akvaaia thoon kkhaia phi mdek kphyut säpa kuum kyan naak tha hü kkhaia phi kei noh nang sun kah ning msoon ni’ tilü Pangsiim noh ah pyen” tilü Polüh noh ah jah mtheh. 48 Kkhyaang mjü kse-e noh asuna kthai ah nih ngjaak u üng je kyai ulü Pangsiima kkhyü sun ah nih mküüi mtou u. Shak ngshääi yah ei kkhai ah jah xü kse-e noh jum ei lok ktie. 49 Pangsiima kkhyü sun khyong abäng üng nglou ngthang lok kti. 50 Jüdah-e noh ta Jüdah Pangsiim hjok khah lok kti amjü ksea koon shaang kdo üng ka nghnu mie phi mlüh üng ka khong mang akdäme phi ah nih jah mhläk u. Asue noh Polüh jah Pana Pa sun jah mkhuh mhlih ulü asuna khyonga kkhyüh ah nih jah mshot u. 51 Ngshä xooi noh “Ah nih nih-e üng am ah nih shääng ei” ati sun angte naaka ah nih kho pha üng kop kti mput kkhui ah nih kkhok hüt. Ikho Ni hne da sit kti xooi. 52 Anti Ook mlüh-a vek kti akläke je kyai tong ulü Mkhyangsiim üng phi be baang ktie.