1 “Kkhyaang mjü kse-e noh phi Pangsiima kkhyü dou daang ktie ni” tilü Jüdah hne abäng üng ka ngshäe jah jum ei kti be nae noh ah nih ngjaak u. 2 Peta sun Jeirüh Shalem mlüh-a ah kaai lo üng vun moih aktung boka ngngaai kti akläke noh ah nih kbäü ei u. 3 “Nang hin vun moih am poh ktie kkhyaang mjü kse-ea ima nah kaai vaai kti ni. Asun däk am ni, ayüma nah ei o ktoih kti” tilü hai bak lü ah nih pyen u. 4 Asun üng ta Peta noh phi athoon hlok ve soh lo sun aksüka kkhyüh akpäih säpa ah jah mtheh mkhyah. 5 “Kei hin Jopa mlüh-a kah hjok khah k'um üng Pangsiima mhnüh mdan kah hmuh ni. Jih nua mäi kkhaan khoa kkhyüh kyalok kti kah hmuh ni. Jih nu sun ngdoong lü akkit üng mana mäi kah ma-a kya-in lok kti. 6 Angtea bük ngüshe ta kkhyüng shei mjü kküm, kkhi sha, ngjooi hü ktie jah kkha naküte asuna k'uma kah jah hmuh ni. 7 ‘Petao, ngpyaih xat lü jah hnim eia’ tilü nah pyen püi ktia kthai kah ngjaak. 8 Kei noh ta ‘Ka, asun kba am ni, Booi Pao. Mtuih mleh kti jah am ngsiim ngsaih kti sun am ei khoi ngtu ngü’ tilü kah pyen be. 9 Asun kona kkhaan khoa kkhyüh kthai lo be tü lü ‘Pangsiim noh ah ngsiim ngsaih shak sun mtuih mleh kti tilü käh ngngaaia’ ah ti be tü. 10 Asun kba kthum vei thoon lolü asuna jih nu sun kkhaan kho da ah jäh-in be ni. 11 Asun k'um üng Kesha Reh mlüh-a kkhyüh kah veeia ah jah tüih lo kkhyaang kthum kah kaai naaka phalok ktie ni. 12 Mkhyangsiim noh ‘Käh up lata’ tilü ah pyen. Ah nih hlonga kah jah läk vaia ah nah mtheh. Jopa mlüh-a ka jum ei kti hina kkhyaang kkhyuke nih be nae hin noh phi nah läk lok ktie ni. Kah nih bänge sun Khonei Lüh-a ima kah nih kaai vaai ktie ni. 13 Khonei Lüh noh ‘Kkhaan kho ngshä im k'uma ngdüüi lü kah hmuh ni. Kkhaan kho ngshä noh “Jopa mlüh-a vek kti Peta ngming na-be kti Shimon la-vaai kkhaia kkhyaang jah tüüia. 14 Ah nih-a pyen ksaak üng nah pät phi, nah im kkyoonga ve naküt kti mah mah kuum kyan naak nah nih yah kkhaie ni”’ tilü ah pyen sun Khonei Lüh noh kei nih-e üng ah jah mtheh be ni. 15 Sut ei ngüshe kah pyen kshak lo jah ta Pentekot mhnüüp üng nih nih-ea mlung k'uma Mkhyangsiim ah vaan loa kba ah nih nih-ea mlung k'uma phi vaang lo hnga kti ni. 16 Booi Jeishüh noh ‘Patiso Johaan noh tui üng ni patiso ah nih ning peet u. Nang nih-e ta Mkhyangsiim üng patiso nih khaam ei kkhaie ni’ tilü ah pyen khoi sun kah shüüm lo. 17 Nih nih-e noh Booi Jeishüh Khrito nih jum ei lo-u üng Pangsiim noh Mkhyangsiim ah jah yeta kba kkhyaang mjü kse-e üng phi ah jah yet hnga ati sun ngshing ngte lok kti ni. Asuna kyalü kei hin Pangsiim sun ngya khoh kkhaia kah däm duh kkhe ve bä” tilü Peta noh ah pyen. 18 Asun kba athoon ve sun ah nih ngjaak üng käh kbäü ei khoh ti ulü “Aksanga Pangsiim noh amjü kse-e üng phi ah nih mkhye naak üng vuuk be lü shak ngshääi ah nih yah vaia ah jah peet va nik kba” tilü Pangsiim mküüi mtou ktie.

19 Satei Phan ah nih hnim kona mkhuh mhlih kshe nua phäh jum ei ktie ngpyeeng hü päih ktie. Akhäke Pho Nishi, Khipyüh, Anti Ook mlüh säpa sit ulü Jüdah kkhyaange däk üng thang kdo kkya jah mtheh hü ktie. 20 Khipyüh jah Shüreneh mlüh-a ka jum ei kti akhäk noh ta Anti Ook mlüh säpa sit lü kkhyaang mjü kse-e üng phi Booi Jeishüh-a mong thang kdo kkya jah mtheh mkhyah ktie. 21 Pangsiima hiit ah nih nih-ea dä vek kti. Kkhyaang kho hah noh jum ei lo-ulü Booi Jeishüh da nglat lok ktie. 22 Asuna thang Jeirüh Shalem mlüh-a vek kti shaang ngsiima veeia pha kti. Asuna thoon lü Pana Pa sun Anti Ook mlüh-a ah nih tüih u. 23 Phavaai lü Pangsiim noh do kya naak ah jah peet sun hmuvaai lüta je kyai kkhüt kti. Jum ei naak üng ah nih ngkhääng ngpaang vai ua phi Booi Jeishüh sun ah nih mlung kset üng anghläia ah nih ksang naak vai ua phi jah msuh mtheh kti. 24 Pana Pa sun kkhyaang kdoa thoon lü Mkhyangsiim üng phi be kti. Jum ei naak phi ngkhääng kti. Kkhyaang kho hah-e noh Booi Pa sun üm na lok ktie. 25 Asun kona Pana Pa sun Tashüh mlüh-a sit lü Sholüh ah shui hü. 26 Nghmuh ei nih lü Anti Ook mlüh-a ah lo püi. Akum mata ah nih nghngih asua shaang ngsiim üng nglooi ei kti xooi. Kkhyaang päe jah mkhääm lü Pangsiima kkhyü jah msuuk mtheh kti xooi. Asuna Anti Ook mlüh-a akläke sun aksük dä dä ‘Khritjaana’ ah nih jah shui lo u ni. 27 Asun um üng shahma ngsiime akhäk Jeirüh Shalem mlüh-a kkhyüh Anti Ook mlüh-a sit ktie. 28 Asuea kshuunga Aka Pu ngming nak kti ngdüüi lolü Mkhyangsiima hiit üng kho mdek kkhaan abäng üng kho k'jo ei vat kshe nu velok kkhai tilü malam ah pyen. Kho k'jo ei vat kshe nu sun shang phuhlang kdäm Klaau Tiuh noh Romah teng pe ah up k'um üng thoon lok kti. 29 Asun üng ta akläke abäng ah nih khyaih khoh-a kba Jüdah hnea vek kti Khritjaan be nae ah nih jah ku ei naak vai ngui ah nih jah kbi vaia ah nih taam u. 30 Asun kba mkhääm ulü Pana Pa jah Sholüh üng shaang ngsiim sange üng ah nih jah kbi u.