TITUS
AM PAUL AH CAGUK
Paul's Letter to Titus
Titus cu Karik pakhui chang, khritha zum nak ung ng'hlat lawk ciah kia ne, Paul ah khuut bi nak ung, bilawh püi ci la hunshawih ciah kia lawk ci. Titus am Paul ah caguk cu Crete tui ah koi ng'lei ung Khrithabum teng khai ah, Paul naw am düih shüt ah ak hmaw chang Titus am Paul naw ca a guk ah kiak ci. Cun ah ca ung a mawng tung thum lawk ci;
(1) Cretan chang gui ah ami om ih a shetkat ah mawng la Khritha k'tahnga gui ah om ih vai ah mawng gui pyein ne Titus cu am cäi nak. (2) Khrithabum ung pami ng'vai gui, hnumi ng'vai gui (Hnumi hmaw gui ami m'theithang tu ba gui vai), pami hmaw gui la changshäm gui, am theithang gui vai, am cäi nak. (3) Khritha gui ah om ih vai ah mawng Titus am thei nak, la ak tung pi ah khritha gui cu dimdeeih nak la khawtsheng nak awn om u ne, thüigen nak, ng'cuhcan nak, khrithabum ung ng'phyeekpai nak gui cu, ami hlawi vai ah am cäi nak gui ah kiak ci.
1
1 Kei Paul, Khanpughi ah changshäm la Jesuh Khrit ah ng'düihpüi naw ca ka gu lawk ci nei.
Khanpughi naw a ghü ah chang gui ah zum nak shawihkhem gui vai la mi zum nak ah düng ciah m'theithang nak lam shüm gui vai ah kei cu ghü ne ana tüih ah kiak ci.
2 Cun ah zum nak cu ang täi ghin nak ah mawng ngaih u nak ung phung ci. Kä hleeihlak ciah Khanpughi naw cau akhin kä a ng'tüi pha ge ung, ang täi ghin nak cu na pe gui khai ah shai a taak nak om ci.
3 Akhin küm law khätah, cun ah ang täi ghin nak cu, ang thu awn dang law sak ci. Cun ah Thu Ni cu kei am ana ap ah kia sei, mi Hunbawi Khanpughi ah k'bäi nak awn kei naw ka shäu ci nei.
4 Kei awn zum nak täng ne ka hta akcang ah kiak ciah Titus am ca ka guk lawk ci nei.
Pa Khanpughi la mi Hunbawi Khrit Jesuh naw geinsei nak la dimdeeih nak cu ning pe sä. Ref 1. 4 Kor 8:23; Kal 2:3; 2Ti 4:10
Crete ah Titus ah Bilawh
5 Kei naw Crete ung ka ning nawng shüt cu, bi vai om ba ci gui avan ang khän khai ah na bi vai la api gaw päng ung khritha k'tahnga gui nam düih vai ah hmawk ah kiak ci. Tuhbäi ka ning m'shüm thein gui cu na shüm vai nei:
6 Khritha k'tahnga cu m'kat vai ah kä om ciah chang ah kiak khai, tumat bäng chu nak khai, ahta gui cu zum ciah chang gui ah kiak khai, Om she m'gäi m'cik ci gui, beit kä ng'zak ci gui ah kä kiäen khai.
7 Khritha k'tahnga cu Khanpughi ah khuut kutshum ne bik ciah kia sei m'kat vai kä om-en ciah chang ah kiak khai. Ani cu m'ghämce ci, m'lungshe ci, awktat ci, ng'tuk ghüh ci, ngui ng'za hlü aih ciah kä kia-en khai.
8 Ani cu khin m'htei ci, ak ni m'hni ciah chang ah kiak khai. Ani cu htingling ci, düng ci, theingcim ci, pyein ah om ci--ah chang ah kiak khai.
9 Ani cu bä ciah thu, zum nak awn ät ci cu, khäng khai ah kutshum ciah chang ah kiak khai. Cun ung vah ani naw düng ciah m'thei thang nak awn chang hei gui cu m'hläm gui hlawt khai, hnu ng'tuk püi ci gui ah cheishoh nak phi tawk pe hlawt khai. Ref 1.9 Ti 3:2-7
10 A i kä ami hmat su ah cun ah thu cu hnu ng'tuk püi ne, chang gui k'fikfaih ciah chang ak da om ci nei, ak tung pi ah Judah zum nak ung ka ng'lat lawk ci gui ung da pi ci.
11 Ngahmi cu thu kä ami pyein ba vai ah khin lawk ci nei, a i ah kia sei ci ung ngahmi cu kä m'theithang khin vai m'theithang u ne, kyongkhui gui cu shetkat sak ci gui, lü ng'aa nak vai kiak ciah ngui ng'zak nak hlü awn ami bi ah kiak ci.
12-13 Cretan chang ami mät ah profet tumat naw, “Cretan chang gui cu ang täi sei hleeihlak ci gui, ngetngawng m'ghämce ci gui, damduh ci gui,” nei ci ne pyein ci. Cun ah kia sei ak ghaat ah nami m'cäi gui vai, cun ung ami zum nak khänghtek lawk khai.
14 Cun kawn ah Jew chang gui ah puma la düng nak hnu ng'tuk püi ciah chang gui ah thukhän cu kä ami kutshum men ba vai nei.
15 Amät ah m'lung kyong theingcim ciah chang ah hmawk ah a i phi avan theingcim ci;cun ung phi amät kä theingcim ne a zum nak kä om ciah chang ah hmawk ah a i phi kä theingcim ci. A i ah kia sei ci ung ngahmi ah lung kyong la ami ngaih tüh nak cu kä ah theingcim nak awn ah kiak ci.
16 Ngahmi naw Khanpughi kami hmat ci nei ami ci ung phi ami hnün thawh naw maa na gui ci. Ngahmi cu thüi nak vai kia u ne, thu kä ngai u ne, akni phung api phi, kä bi tu hning ciah chang gui ah kiak ci.