TIMOTHI
AM PAUL AH CAGUK AKHNIHNAK
Paul's Second Letter to Timothy
Timothi am Paul ah Caguk Akhnih nak cu, akda pi ung Paul naw hunshawih ci la ak chang tung ah kiak ciah Timothi cu, am shüm thein nak gui ah kiak ci. A mawng ak tung cu khüighaat nak vai ah mawng ah kiak ci. Dukdeiu nak la shedam nak buiaut sang ung phi, Bawipa Jesuh Khrit ung bekhüt ne saksi vai ah mawng, düng ciah m'theithang nak ah Thu Ni la Cacim Pyim cu kutshum vai ah mawng, m'theithang ci la thushäu ciah kia ne, abilawh nak cu, teng ne abi vai ah mawng gui cu shümthein nak la k'thagui a peik nak ah kiak ci.
Chang gui kä nikiom sak gui ne shetkat sak gui ciah, hmühma ng'cuhvah nak gui cu, kyih vai ah a kyak ah mawng, Timothi cu ak tung ah am shümthein nak ah kiak ci.
Shin ah mawng avan ung ca guk ciah chang naw amät ah ghin nak la ang bü nak cu m'dang ne,--- azum nak, ahniimgein nak, am hni nak, akhüighaat nak, dukdeiu nak awn ageinvai nak gui cu, Timothi naw athei nak thei vai ah am cäi nak ah kiak ci.
1
1 Kei Paul, Khanpughi ah zak hlü ah Bawi Khrit Jesuh ah ang düihpüi ah kia ne, Bawi Khrit Jesuh ung kawng ät nak awn, mi gah vai ah shaitaak om ciah ghin nak ah mawng, ka shäu ci naw-
2 Kam hni ah ka hta Timothi am ca ka ning guk lawk ci nei: Pa Khanpughi la Hunbawi Khrit Jesuh ah m'gein nak, chihnaa nak la dimdeih nak cu nak khan ah om sä. Ref 1:2 Lamktu 16:1
M'Kümto Nak La Tha Peit Nak
3 Pupa gui ah mäih ah m'lung ngaih theing awn a khuut ka bi ah Khanpughi cu kam kümto ci nei. Amü angawi ka taigü nak ung nang cu ning shüm ne Khanpughi cu kam kümto ci nei.
4 Nang phlitui ali cu shüm ba ne ang htei ah ka ning hmu hlük ci nei. Nang ka ning hmuh ung kei cu zei nak awn ka be khai nei.
5 Na pighi Lois la na nu Eunice ah mäih ah ng'ciim ciah zum nak cu ka shüm ba ci nei. Ngahni ah mäih ah na zum ciah ka ngaih gep ci nei. Ref 1:5 Lamktu 16:1
6 Cun ah kia sei kei naw na khan ah kut taihnak ka ning peik zah ung Khanpughi naw a ning peit ah m'cümhnah nak cu ghing khai ah na shum vai ah ka ning m'shümthein ci nei.
7 Khanpughi ah nam shumphyuk gui ah Mumcha naw mik mi cu kä na ng'zawm sak gui ne; cun ah Mumcha naw hlüngtai nak, m'hni nak la htingling nak cu na pe gui ci.
8 Cun ah kia sei mi Bawipa mawng saksi vai ah kä na lü ng'aa vai. Bawi Khrit ah chaw ah thawng ka kium ciah kei phi kä na na ng'aa nak vai. Khanpughi ah ning peit ah k'thagui awn geinvai nak cu na dou tu vai nei.
9 Na hun gui ne amät ah chang ah anam hnüt gui cu, mi mät ah bilawh nikiom nak awn ah kä kiak ci, amät ah ng'bü nak la m'gein nak awn ah kiak ci nei. Khanpughi naw kho kä ang tün pha ge ung cun ah m'gein nak cu, Bawi Khrit Jesuh ung na pe gui ci.
10 Cun ung phi tuhchü, mi Hunbawi Khrit Jesuh a kyum law kawn ah, cun ah m'gein nak cu, mik mi ung dang lawk ci. Bawipa naw sih nak ah hlüngtai nak cu m'shiu netah, Thu Ni awn käng khuk hlat ciah ang täi ghin nak cu dang sak ci nei.
11 Khanpughi naw kei cu Thu Ni shäu ciah ang düihpüi la saza ah anam düih ah kiak ci. Ref 1:11 1Ti 2:7
12 A cun ah mawng ung kei cu geinvai nak ka gah ciah kiak ci. Cun ung phi kei ung lung üp nak akbe ah om lä ci. A i ah kia sei ci ung kei a u ung kang ap cu ka hmat ci, kei naw ka ap gui cu ak hnu bäih ah Hnüüp güt ung kut shum khai ci cun phi, kei naw akcang ah ka hmat ci.
13 Kei naw ka ning m'theithang ah thu düng cu, thei nak vai ah ak htek ah kutshum ne, Bawi Khrit Jesuh ung kawng ät nak awn mi gah ah zum nak la m'hni nak cu na läk vai nei.
14 Nang am ning ap ah ak nikiom gui cu, mik mi ung om ciah Mumcha Theing ah hlüngtai nak awn na kutshum vai nei.
15 Na hmat pyi ah mäih ah Asia khopäng, Phigelus la Hermogenes gawnu gui ung chang gui naw kei cu na hnu na pyi ci gui nei.
16 Onesiphorus ni ah kyongkhui ung Bawipa ah chimgein nak om sä, ani naw akda vei kei ah lung cu na hüizang sak ci nei. Kei cu thawng 'kium ah ka kiak ung phi, ani naw kei cu kä na ng'aa nak ci nei,
17 Ani cu Rom gawnu ung a gawk law vai am, kä a na hmuh pha ah chuih kei cu na shui ci nei.
18 Ephasus gawnu ah ani naw kei a i hlawk ah anam htei cu nang naw na hmat ci nei. Cun ah Hnüüp ung ani ah khan ah Bawipa ah chimgein nak om sä.