16
Paul ah Zavaih Nak Thu Gui
1 Kei naw mi be Phoebe ah mawng cu küikyan ne ka pyein hlük ci. Ani cu Cenchreae gawnu, khritha bum ung bi bik ci.
2 Khanpughi ah chang gui ah mi kyak ci kya sei ani cu Bawipa ah ming awn nami dou vai nei. Nami m'hteihtang tu vai a hlü ah a
kyak ung nami m'hteihtang tu vai nei. Ani cu chang akda
m'hteihtang tuk ciah teihpüi k'ni ah kyak ci, kei phi nam
hteihtang tuk ci.
3 Bawi Khrit Jesuh ah khuut bi nak kami bi ät ciah Pricilla la Aquila cu ka zavaih na goi ci nei.Ref 16:3.
Lamktu 18:2
4 Ngah ni cu kei ah hmawk ah ani hnun gui pe ne bi bik ci goi nei. Ngah ni cu kei bäng ah kä kyak ciah khui hei chang khritha bum
avan naw zei na goi ci gui nei.
5 Ami mät ah im ah ng'bum ne pum ci gui ah khritha bum gui cun phi ka zavaih na gui ci nei.
Asia kho ung Bawi Khrit zum law maa ciah ka teihpüi k'ni
Epaenetus cun phi khaih na ne, ka zavaih nak ci nei.
6 Nang mi ah hmawk ah k'tha nah ne bi bik ciah Mari cun phi zavaih nak nei.
7 Andronikas la Juniasr cun phi ka zavaih na goi ci nei. Ngah ni cu kei awn atäng ah thawng kyum ci goi ah Jew chang goi ah kyak ci:
ngah ni cu ang düihpüi gui ah ng'lung ah chang khli naw hmat
goi sei, kei ah kä zum tu pha ung Khritha ah kya pyi ci goi ah
kyak ci.
8 Bawipa ung kawng ät ne ka teihpüi k'ni ah kyak ciah Ampliatus phi ka zavaih nak ci nei.
9 Bawi Khrit ah khuut atäng ah mi bik ciah Urbanus la ka teihpüi Stachis phi ka zavaih na goi ci nei.
10 Bawi Khrit ung khäng ciah Apelles la Aristobulus ni kyong cun phi ka zavaih na gui ci nei.
11 Jew chang ah kyak ciah Herodion la Narcissus ni kyong, Khritha phäi nau gui cun phi ka zavaih na gui ci nei.
12 Bawipa ah khuut bik ci goi ah Tryphaena la Tryphosa la, Bawipa ah hmawk ah akda bik ciah ka teihpüi Persis gui cun phi ka zavaih na gui ci nei.
13 M'hlüngtai vai ah Bawipa ah khuut bik ciah Rufus la ahta ah mäih ah ang täi sei nam hteihtang ciah anu ah khan ah ang htei
ah ka zavaih ci nei.Ref 16:13.
Mak 15:21
14 Asinchritus, Phlekon, Hermes, Patrobas, Hermas, la ngah mi awn om ci gui ah khritha phäi nau gui avan cu ka zavaih na gui ci nei.
15 Philolokus la Julia, Nereus la abe, Olympas la ngahmi awn om ci gui ah Khanpughi ah chang gui avan cu ka zavaih na gui ci nei.
16 Phäi la nau ah ng'ui ng'hnam ne, tumat la tumat ng'zavaih na tu vä. Bawi Khrit ah Khritha bum avan naw nang mi cu ning zavaih
gui ci nei.
Ah Hnu Bäih ah Am Theimkan Nak
17 Phäi nau gui aw, nang mi naw nami gah ah m'theithang nak gui cu hnu ng'tuk püi ne, chang gui ah m'lung ngaih ng'pai sak ne,
chang gui ah zum nak lam hma sak ciah chang gui cu, nami geing
nak gui vai nei, ngahmi cu nami hlawi gui vai nei!
18 Cun gui cu mi Bawipa Jesuh Khrit ah khuut bik ci gui ah kä kyak ci, a i ei ei ung bä khai ciah ngaih tüh ne bik ci gui ah kyak
ci. Ngahmi naw tuihlim ciah ng'thu la m'hlüngtai ah k'chiu awn
ng'düng ciah chang gui cu m'hleeihlak ci gui nei.
19 Nang mi naw Thu Ni cu a i hlawk ah nami m'lung ung nami khän htek sak cu chang avan naw hmat ci nei. Cun ah kya sei nang mi ah
hmawk ah ang htei ah ka zei ci. Nang mi cu ni kiom nak hmat ne
lunglang ciah chang ah kya u ne, shetkat nak phiawn nak ciah nami
kyak vai ah ka ng'za hlük ci.
20 Mi dinggei nak ah ng'zung ah kyak ciah Khanpughi naw Satan cu ang ghit ah m'hnoi ne nami khophaa 'ka ah gawk sak khai nei.
Mi Bawipa Jesuh ah m'geinsei nak cu nang mi ah khan ah om sä.
(Aí shah naw shin ah ca kyawng cu nawng shüt ci).
21 Kei awn atäng ah kani bik ciah Timothi la kei ah mäih ah Jew chang ah kyak ciah Lucius, Jason la Sosipater gui naw phi Khritha
zavaih na gui ci gui nei.Ref 16:21.
Lamktu 16:1
22 Kei, Tertius, naw shin ah ca cu läk ne ka guk nei, kei naw phi Khritha zaviah nak cu ka ning m'khäh law gui ci nei.
23 Kei na khinchah nak ci, khritha gui naw ami pum nak im nak ciah Kaius naw phi ning zavaih na gui ci nei. Gawmang ah nguimküm, Erastus la mi phäi nau Kuartus naw phi ning zavaih na gui ci goi
nei.Ref 16:23.
Lamktu 19:29; 1Kor 1:14; 2Ti 4:20
24 (Mi Bawipa Jesuh Khrit ah m'geinsei nak cu nami van ah khan ah om sä® Amen.
M'Hlüngtai Ne Taigü Nak awn A Khüm Nak
25 Khanpughi ah bämang nak cu mi m'hlüngtai khai nei! Ani naw nang mi ah zum nak cu ning khänhtek sak gui ci nei. Kei naw Bawi
Jesuh Khrit ah mawng Thu Ni ka shäu nak ung shin ah ka pyein ci,
cau puipui tüi ne ng'thup ne om ciah ng'zih ciah ng'düng nak
naw phi a cun na m'dang ci.
26 Cun ung phi tuh bäi chü, cun ah ng'zih ciah ng'düng nak cu profet gui ah guk ah cacim ung dang zawp pyi ci nei. Ang täi ah
ghing ciah Khanpughi ah thukhän awn, kho avan ung chang avan
naw hmat ne, zum ne, ami läk vai ah cun ah ng'düng nak cu shäu
ne pyein pyi nei.
27 Tumat bäng nak ciah Khanpughi nah ne, apäng avan lunglang hmuhmat ciah Khanpughi cu, Bawipa Jesuh Khrit awn ang täi sei
bämang ne om sä! Amen.