PHILIPPIAN
CHANG GUI AM PAUL AH CAGUK
Paul's Letter to The Philippians
Philippian chang gui am Paul ah caguk cu, Paul naw European kho ung ak süm law htük ah Philippi gawnu ah Khrithbum am, Paul cu thawng ung a kyum zah ung a guk gui ah ca ah kyak ci. Philippi cu Roman mang ah uk nak Macedonia kho ung om ci. Shin ah ca a guk nak ah mawng cu, a hei khritha bi bik ci gui naw Paul ami hnu ng'tuk püi nak la Philippi Khrithabum ung cheishoh khai ah ami m'theithang nak gui ah phäh ah kyak ci. Cun ung phi shin ah ca naw Paul ah zeikyai nak la ngaihgep nak ah m'lung cu ghin sak ci. Cun cu Paul amät bäng ung dang ciah Bawi Jesuh Khrit ung thuuk aih ciah a zum nak ah kyak ci.
Shin ah ca a guk nak vai ah dang lawk ciah a mawng cu, ani ung ang ceet zah ung, Philippian khritha gui naw ngui m'khäh ne, ami m'hteihtang nak cu azei nak gui ah phäh ah kyak ci. Amät la Philippian khritha bum gui cu zaica nak ung ami gawk pang ung phi thamah ne ami khüighaat vai thagui pe gui ci. M'Lung m'däm nak la chang ah ng'shei nak kä om men sei, Bawipa Jesuh ah mäih ah m'lung neim nak awn ami om vai ah phi m'cäi gui ci. Ngahmi naw Bawi Khrit ung ami ghin nak cu ami zum nak awn ami gah ah Khanpughi ah chimgein nak ah kyak ci, Jew chang gui ah thukhän ami läk nak awn ah kä kyak ci, ami shüm ba vai ah guk gui ci. Bawipa Jesuh Khrit ung ghing ciah chang gui am, Khanpughi naw zeikyai nak la dimdeeih nak a peit ah mawng cun phi guk ci.
Khritha gui ah zum nak la ghin nak ung, zeikyai nak, m'lung üp nak, kawng ät nak, la khüighaat nak a om vai ah mawng cu ak tung ah guk ci. Paul naw Philippian khrithbum ang htei ah am hni nak cu shin ah ca naw dang sak ci nei.
1
1 Bawi Khrit Jesuh ah chang shäm ah kyak ciah Paul la Timohti naw
Philippi gawnu ung Khrihtabum uk ci gui la bi püi gui ci gui ni, Bawi Khrit Jesuh ung kawng ät ci gui ah Khanpughi ah chang gui ni am, ca guk law ci goi nei.Ref 1:1 Lamktu 16:12
2 Mi Pa Khanpughi la Bawipa Zesuh Khrit naw m'geinsei nak la dimdeeih nak cu ning pe gui sä.
Ca Apeit Gui ah Chang Gui ah Hmawk ah Paul ah Taigü Nak
3 Nangmi ah mawng ka ngaih tüh päng ung Khanpughi cu kam hlüngtai ci:
4 ang täi sei nami van ah hmawk ah ka taigü ci.
5 A htük ung tün ne tuh bäi ung khüt khai ah Thu Ni shäu ne bilawh nak ung atäng ah nami na bilawh püi ah hmawk ah ka taigü päng ung ka zeikyai ci nei.
6 Cun ah kya sei nang mi ung bi ak ni tün ne bik ciah Khanpughi naw Bawi Khrit Jesuh ah kyum law nak vai ah hnüüp kä a gawk phaa ung, cun ah bi cu ng'pyi khai ah bik khai ah ka zum ci nei.
7 Kei naw cun ah nangmi ah mawng ka ngaihtüh cu ng'düng ci, a i ah kya sei ci ung, nangmi naw kei cu nami m'lung awn nami na k'pan na phäh ah kyak ci. Tuk bäi thawng ung ka kyum zah ung la Thu Ni cu a kho k'ding ah pyeinsa ne,ka k'süm pian zah ung nangmi cu, Khanpughi naw ana peit ah akhin k'ni ung, nami bilawh tu ah hmawk ah phi kyak ci.
8 Bawi Khrit Jesuh ah m'gein nak awn, nangmi ang htei ah ka ning khaih nak gui ah mawng pyein ung, Khanpughi cu saksi ah kyak ci.
9 Kümbe ciah m'khoichaa nak la ng'düng ciah hmuhmat nak awn atäng ah nami zumhni nak cu ang ghotai law pi pi vai ah kei ka taigü ci nei.
10 cun ah kya sei nangmi naw ak ni pi cu nami ghü hning khai nei. Cun ung vah nangmi cu Bawi Khrit a law ba hnüüp ung, m'kat nak kä om ciah kä theingthap nak cu nami phiawn nak khai.
11 Khanpughi ah bämang nak la m'hlüngtai nak vai ah hmawk ah Bawi Jesuh Khrit ung lawk ciah düng ciah ni kiom naknaw, nami ghin nak cu ning kümbe sak gui khai nei.
Ghin Nak Cu Bawi Khrit ah Kyak Ci
12 Phäi nau gui aw, kei naw ka buitang law gui naw, Thu Ni ka shäu nak ung ak cang ah, a na zu chaan ah mawng cu ka ning hmat sak gui hlük ci nei.
13 Bawi Khrit ah changshäm ah ka kyak ah hmawk ah thawng ung ka kyum ah mawng cu, mang im ngäng ciah gaakap gui ami van la chang akda naw hmat ci gui nei. Ref 1:13 Lamktu 28:30
14 Kei cun ah thawng ung ka kyum ah hmawk ah phäi nau gui akda pi naw, Bawipa ami zum nak cu khängtek law pi ci. Cun ah kya sei ng'thu, am shah ung Khanpughi ah ng'thu ami pyein nak ung ngahmi cu kä kyikyawk ne k'thamah law pi ci gui.
15 Chang am shah gui naw m'thüikhang nak ah m'lung ng'tukvook nak hlü ah m'lung awn Bawi Khrit ah mawng cu pyeinsak ci gui, cun ung phi chang am shah naw m'lung ngaih k'ni awn pyeinsak ci gui.
16 Cun ah chang gui cu, Thu Ni küikyan ne ka pyeinsak khai ah Khanpughi naw anam düih ah mawng cu,hmat u netah, zumhni nak awn pyeinsak ciah chang gui ah kyak ci.
17 Chang am shah gui naw Bawi Khrit ah mawng cu m'lung ngaih k'ni awn ah kä kyak ciah ami mät ami m'hlüngtai nak hlü awn pyeinsak ci gui. Ngahmi naw thawng ka kyum ci ah kei cu ka zaica nak pi vai ah ami bi ah kyak ci.
18 Thu pyein cu kä küikyang hnga ci,m'lung ngaih k'ni awn pyein ung phi,m'lung ngaih she awn pyein ung phi, Bawi Khrit ah mawng pyein ah kya sei, ka zeikyai ci, m'täi ne ka zeikyai lä khai.
19 Nang mi ah taigü nak la Bawi Jesuh Khrit ah Mumcha ah nam hteihtang nak awn cun cu kei ah phyawn law nak vai ah kyak ci.
20 Kei naw ak tung ah ka ng'zak hlü la ka ngaih u nak cu, kei naw a i zah ung phi ka bi mawng cu kä ka nawng khai, a i khin ung phi, a tuh bäi chü phi, kei cu khüighaat nak awn be ne, ka sih ung phi, ka ghin ung phi, ka ghin nak avan awn Bawi Khrit kam taamkhah khai, ciah kyak ci.
21 Ghin nak ci cu a i ang! Kei ah hmawk ah, ka ghin nak cu Bawi Khrit ah kyak ci, ka sih nak cu ka bä nak pi ah kyak ci.
22 Cun ung phi kei cu ka ghin lä ung bi ak däm pi ka bi ba khai a kyak ung, sih nak la ghin nak ung kaa a i ka ghü khai ang!
23 Kei naw hnih ah ka ngaih nak om ci, kei cu shih ah ghin nak nawng shüt ne Bawi Khrit ung ang htei ah ka om hlük ci, cun cu kei ah hmawk ah bä pi ci.
24 Cun ung phi nang mi ah hmawk ah kei ghing ne ka om vai cu ak küikyang pi ah kyak ci.
25 Cun ah a mawng cu ka hmat ci kya ne, kei cu nang mi awn atäng ah ka om khai nei. Nami bühmang nak vai la zum nak ung nami zeikyai vai ah hmawk ah kei cu namg mi awn atäng ah ka om khai nei.
26 Cun ah kya sei nami om nak ah ka gawk law ba hnüüp ung, Bawi Khrit Jesuh ung nami ghin nak awn, kei ah hmawk ah nami khäghah nak pi vai kyai khai nei.
27 Tuk bäi ak küikyang pi cu Bawi Khrit ah Thu Ni awn ng'müi khai ah nami ghin om vai ah kyak ci. Cun ah kya sei kei ka law ba hlawt ung phi, kä ka law ba hlawt ung phi, Thu Ni zum nak ung, tumat ah khäng khai ah m'lung ngai u ne, ng'bü nak ung tumat ah htek khai ah ng'düi u ne, khüighaat ne nami kyak ah mawng cu ka ng'za hlük ci nei.
28 Nami gaa gui cu kä nami kyih en vai;ang täi sei nami lingtha vai, Cun cu nami gaa gui ah dawng nak vai la nang mi ah näng nak vai ah mawng m'dang nak ah kyak ci, a i ah kya sei ci ung nangmi am näng nak ning pe gui ci cu Khanpughi ah kyak ci.
29 Nang mi cu ani nami zum nak bäng awn ah kä kyak ciah ani ah hmawk ah zaica nak nami gah nak awn Bawi Khrit ah khuut bi nak vai ah a khin k'ni cu nami gah ci.
30 Tuh bäi nang mi cu kei awn atäng ah ng'tuk nami bi hning pyi ci nei. Azan pui tüi ne kei naw ng'tuk ka bi cu nang mi naw nami hmuk ci. Tuh bäi phi nami ng'zak ah mäih ah kei cu ng'tuk ka bi gäkgäk ci nei.