PETER
AH CAGUK AKHNIH NAK
The Second Letter from Peter
Peter ah Caguk Akhnih Nak cu zum law htük ci ah khritha gui-am peit ah ca ah kiak ci. Shin ah ca ah a mawng tung cu, thuvi ne m'theithang ci gui la ngahmi ah m'thethang nak awn gawk lawk ciah shetkat nak gui cu näng nak vai ah kiak ci. Khanpughi la Bawipa Jesuh Khrit ah m'shümthein nak ung khänhtek vai ah mawng, Cun ah m'shümthein nak cu Bawi Jesuh amät hmu tu ne, ng'thei tuk ciah chang gui ung gah vai ah mawng, Bawipa Jesuh kä kyum law ba khai ciah m'theithang nak cu hleei ah a kiak ah mawng, Bawipa Jesuh kä ah kyum law ba zät cu, Khanpughi naw chang ah hta adi maih vai ah kä ang zak hlü ah hmawk ah a kiak ah mawng, la chang ah hta avan cheishoh nak ung kaa ang hlah law ba vai ah mawng gui cu ca guk ci naw tän ne a guk ah kiak ci.
1
1 Simon Peter, Bawi Jesuh Khrit ah ak changshäm la ang düihpüi naw,
Mi Khanpughi la Hunbawipa Jesuh Khrit ah peit ah, mik mi ah mäih ah küikyang ciah zum nak om ciah chang gui-am ca ka guk law ci nei.
2 Khanpughi la Hunbawipa Jesuh Khrit cu hmuhmat cüivai nak awn, m'geinsei nak la dimdeeih nak cu na mi khan ah kümbe ne om sä.
Khanpughi ah Ng'khü nak La Ghü nak
3 Khanpughi naw akcang ah zum nak awn mi ghin vai ah, khankho hlüngtai nak awn mi ng'zak hlü phung cu, na pe gui ci, cun cu Bawipa hmuhmat Lulang nak awn, amät ah bämang nak la nikiom nak mi gah vai ah na khü gui ciah Bawipa ung a na peit gui ah kiak ci.
4 A cun ah ang htei ah hlüngtai ci la küikyang ciah m'shumphyuk shaitaak cu na pe gui ci. Cun ah m'shumphyuk nak awn nang mi cu, khomdek khan ah shetkat dimaih nak cu phiawn nah u ne, Khanpughi ung nami ng'zung tu ba ci.
5 Cun ah kia sei nami zum nak cu nikiom nak awn, nami nikiom nak cu Lulang nak awn,
6 nami Lulang nak cu htingling nak awn, htingling nak cu khüighaat nak awn, khüighaat nak cu Khanpughi ung bä nak awn,
7 Khanpughi ung bä nak cu ng'phäi nau nak awn, ng'phäinau nak cu zum hni nak awn akümbe vai ah nami tha nak pi bäih vai nei.
8 Cun ah hlü ci gui cu nangmi ung dämda ne a om ah a kiak ung, a cun gui naw Bawipa Jesuh Khrit nami hmuhmat Lulang nak ung ghing ne ning hnünthawh sak gui sei ak cang ah awngtang nak phi om khai.
9 Cun ung phi cun ah hlü nak gui kä om ciah chang cu, ak tawi ah ngai ne, a i kä hmuk ci. Ani cu azanä ashetkat nak ung kaa theingcim nak agah cu kä shüm ba ciah kiak ci.
10 Cun ah kia sei phäinau gui aw, nangmi Khanpughi naw khü ne ning ghü gui ciah, ang täi sei ngaih gep ne, nami tha law nak pi täi ah a kiak ung, a i sang ung phi nami zum nak cu kä nami ng'hlah ta hlawt khai nei.
11 Cun ah kia sei nangmi cu, Hunbawi Jesuh Khrit ah ng'täi ciah Uknak Kho ung luh nak vai ah ng'düng nak cu nami gah khai nei.
12 Cun ah kia sei nangmi cu shin ah a mawng gui hmuhmat ne, nami zum nak ah thu thuuk ung nami khäng htek pyi ciah a kiak pang ung phi, kei naw ang täi sei ka ning m'shümthein ba gui khai nei.
13 Kei ghing ne ka om zah ah chuih shin ah a mawng gui ka ning m'shümthein ba gui lä khai ah ka ngai ci nei.
14 Kei cu kä shou pha sei, shin ah sheka thei ciah pumsa cu ka nawng shüt lawk khai ah ka hmat ci nei, cun cu Bawipa Jesuh Khrit naw ang dang ah anam thein pyi ah kiak ci.
15 Kei ka sih kawn ah shin ah a mawng gui cu, nami shüm ba lä vai ah k'tha na pi bäih ne ka bik khai nei.
Bawi Khrit ah Bämang Nak Hmuk Ciah Saksi Gui
16 Bämang nak awn Bawipa Jesuh Khrit a kyum law ba vai ah mawng ning m'thein gui cu, kami mät ah ngaih tüh ah kami pyein ah pumah awi ah kä kiak ci. Keimi cu ani ah hlüngtai nak kami mik awn kami hmuk ciah chang ah kami kiak ci.
17 Pa Khanpughi naw m'tamkhah nak la bämang nak a peit zah ung keimi phi kami om ci, cun sang ung hlüngtai säih ciah bämang nak awn ng'shan lawk ciah thu k'aw cu, “Shin cu kei ah Htapa nei, ani awn kei ka zei ci nei,” ci ah kiak ci.
18 Cun zah ung keimi cu khomhtung theing ung Bawipa awn atäng ah om u ne, khan mawpi ah kaa cun ah k'aw cu kami ng'zak ci. Ref 1:17-18 Mat 17:1-5;Mak 9:2-7; Luk 9:28-35
19 Cun ah kia sei keimi naw profet gui ah shäu ah ng'thu cu kami zum law pi ci. Cun cu nami ngaih tüh kheng vai nei, a i ah kia sei ci ung cun cu hmüp khui ung mei m'däi ah mäih ah, kho a thaih law güt nami m'lung kyong ung khäng ciah thaihke aisi ah kiak ci.
20 Cun ung phi cacim cu a u chang naw phi amät ah ngaih ah kä k'phlan thei ci, ci cu nami shüm vai nei.
21 A i ah kia sei ci ung, a i thu thuuk phi chang ah ng'zak hlü düt ah dang lawk ciah kä kiak ci, Mumcha Theing ah lamshäm nak awn vah chang gui naw, Khanpughi ah thuthuuk cu ami pyein ah kiak ci.