27
Bawipa Jesuh cu Pilat ah Ma ah Hteh Püi ci Gui
(Makuh 15:1; Luka 23:1-2; Johan 18:28-32)
1 Kho ngawi hta sik ah taigüpa gui la ami ng'vai gui cu Bawipa Jesuh ngawn vai ah ng'ge ci gui.
2 Cun kawn ah Bawipa Jesuh cu khit netah, Roman bawi Pilat ah hteh püi ci gui.
Judas ah Sih ah Mawng
(Lamktu 1:18-19)
3 Cun kawn ah Bawipa Jesuh ga ah kut ung ap ciah Judas cu Bawipa Jesuh ami ngawn vai ah a mawng ng'za ne, ang htei ah ng'zu ba
netah, tangka thum-kip cu taigüpa gui la ami ng'vai gui ah ma ah
law püi ba ci.
4 Cun kawn ah ani naw, “Kei naw kat nak kä om ciah chang cu sih nak vai ah ap ne, kat nak bäih ka bik ci nei,” cik ci. Cun ung
phi nangmi naw, “Shin ah mawng ung keimi kä na nak phaa gui
vai, na mät ah bi ah kiak ci,” ci nak ci gui.
5 Cun kawn ah Judas cu Pum im kyong ah tangka thumkip cu ghawt shüt netah hteit ba ci.
Cun kawn ah ahei lam ah hteit netah gui
awn ng'awk ne sik ci.
6 Taigüpa naw cun ah tangka cu kaw netah, “shin cu sikplai ngui
ah kiak ci, mi thukhän awn hnung tuk ci kia sei, pum im
ngui m'küm ung käm dawn tu vai,”
cik ci.
7 Ngami cu ng'ge zawp u netah cun ah ngui awn am sheh ciah khomdek cu khleih ci gui. Cun ah dek cu chang pakhui hei gui ah ng'cim
hmun vai ah k'bäi ci gui.
8 Cun ah kia sei cun ah khomdek cu, “siplai hmun,” ah tuhgüt pyein ci gui.
9 Cun cu profet Jeremiah naw, “Israel chang gui naw ani ah phu nei ci ne ami k'bäi ah mäih ah tangka thum-kip cu la u netah,
10 Khanpughi naw kei a nam cäi ah mäih ah amsheh ciah khomdek cu khleih ci gui,” ciah thu cu aküm nak ah kiak ci.
Pilat naw Bawipa Jesuh K'Cet ne Ang Shi ah Mawng
(Makuh 15:2-5; Luka 23:3-5; Johan 18:33-38)
11 Bawipa Jesuh cu Roman bawi ah ma ah gawk law khätah, ani naw, “Nang cu Jew chang gui ah ghangpughang ah na kiak ci ma?,” ci
ne ng'shik ci.
12 Bawipa Jesuh naw, “Na pyein ah kiak ci nei,” ci nak ci. Cun ung phi taigüpa gui la ami ng'vai gui naw m'kat ne ami ng'shi nak
gui cu, a i ah phi kä m'hlan tuba gui phung ci.
13 Cun ah kia sei Pilat naw, “Chang gui naw shin hlawk ah ning m'kat ne ami ning huutaap cu kä na ng'zak ci ma?,” ci ne kiak
nak ci.
14 Cun ung phi Bawipa Jesuh cu m'kha ät ah phi käng thu tu ba ne om ci. Cun ah kia sei Pilat cu ang htei ah ngaih tüh khit ci.
Bawipa Jesuh cu Ngawn Vai ah k'Bäi ci Gui
(Makuh 15:6-15; Luka 23:13-25; Johan 18:39; 19:16)
15 Roman bawi naw passakha pawi päng ung, chang khli naw ak phiawn hlü a thawngkium tumat cu k'phiawn ci ci.
16 Cun zah ung Jesuh Barabbas ming nak ciah chang gui naw ami hmat ah thawngkium tumat om ci.
17 Cun ah kia sei chang gui akda gawk law u khätah Pilat naw, “Nangmi naw a u ang k'phiawn vai nami ng'zak hlü, Jesuh
Barabbas ang?, Messiah ami ciah Jesuh ang?” ci ne ng'shi gui ci.
18 Jew chang ng'vai gui naw ami thüi nak su ah, Bawipa Jesuh cu akut ung ami ap ah ani naw hmat ci.
19 Pilat cu m'khoicha nak zung ah a ngoh zah ung akchu naw chang tumat tüi law ne, “cun ah kat nak kä bik ciah chang cu, a i ah
phi kä na ci-en vai nei, zanmü kang mang ung ani ah phäh ah kam
lung kyong ang htei ah zaica ci nei,” ci ne pyein law sak ci.
20 Taigüpa gui la aming vai gui naw, “Barabbas cu k'phiawn ne Jesuh cu ngawn vä”, ci ne ami m'lau vai ah, chang gui cu m'cäi gui
ci gui.
21 Pilat naw, “shin ah chang sing goi ung kaa, a u ang k'phiawn vai nami ng'zak hlü?” ci ne ng'shi gui ci.Chang gui naw, “Barabbas
cu k'phiawn vai nei,” cik ci gui.
22 Pilat naw, “Cun ah a kiak ung Messiah ami ci ah Jesuh cu a i ah ci vai ang,” ci ne ng'shi gui ci.
Chang ami van naw, “Kutlamtung ung tai ne ngawn vai nei,” cik
ci gui.
23 Pilat naw, “ani naw a i kat nak ang a bi?” ci ne ng'shi guici.
Cun ung phi chang gui naw, “kutlamtung ung tai ne ngawn
vai nei,” ci ne ami k'aw m'can ne m'lau ci gui.
24 Pilat naw, a pyein ba gäk gäk ung kä bä khai, thüngphyong m'lau pyang law pi khai gui ah hmu netah, tui cu la ne ami ma ah
“shin ah chang ah sih nak cu kei ah bi ah kä kiak ci, nangmi ah
bi ah kiak ci nei,” ci netah, akut cu m'si ci.
25 Chang gui naw, “Shin ah chang asih nak cu, keimi la keimi ah hta nau gui naw kamik chaw nak khai nei,” cik ci gui.
26 Cun kawn ah Pilat naw, Barabbas cu k'phiawn ne Bawipa Jesuh cu tuthat netah, kutlamtung ung tai ne ami ngawn vai ah ap gui ci.
Bawipa Jesuh cu Gakap gui naw Päipih ci Gui
(Mak 15:16-20; Jhn 19:2-3)
27 Pilat ah gakap gui naw, Bawipa Jesuh cu bawi ah mang im ah hteih püi ci gui. Gakap-mo mawng ät ami van naw Bawipa Jesuh cu k'bui
ci gui.
28 Gakap gui naw Bawipa Jesuh ah a suisak cu suh pe u netah, hlui sen ciah suinu cu m'sui ci gui.
29 Cun kawn ah ng'hling awn sak ah lukhu cu k'bün ci gui. Htung tawn tumat cu ak pat lam kut ung pek ci gui. Cun kawn ah ama ah
m'khuukdoong u netah, “Jew ghangpughang cu ghi ne ghing sä,” ci
ne päipih ci gui.
30 Ngami naw Bawipa Jesuh cu ami m'si awn m'thui ci gui. Htung tawn la u ne alupum ung that ci gui.
31 Cun ah päipih u netah hlui ne sen ciah suinu cu suh pe ba u ne, amät ah sui cu m'sui ba ci gui. Cun kawn ah kutlamtung ung tai
ne ngawn vai ah Bawipa Jesuh cu hteh püi ci gui.
Bawipa Jesuh cu Kutlam Tung ung Tai ne Ngawn Ci Gui
(Makuh 15:21-32; Luka 23:26-43, Johan 19:17-27)
32 Ngami naw ami hteh püi nak lam ah Kerene kho ah kaa, Simon ming nak ciah chang tumat cu hmu u netah, ani cu ang cet ah khü u ne,
Bawipa Jesuh ah kutlamtung cu kawh sak ci gui.
33 Lu k'am päng ah ming ciah Kolkotha ami ci nak ah gawk law u netah,
34 Seikha awn ami k'caw ah sapyit tui cu Bawipa Jesuh-am tu gui. Bawipa Jesuh naw, m'dep shüm netah kä awk ah nawng ci.
35 Ngami naw Bawipa Jesuh cu kutlamtung ung tai ne ngawn ci gui. A suisak cu m'shüih tawk ne ng'pai ci gui.
36 Cun kawn ah ngoh ne ngäng ci gui. Ani ami m'kat nak ah a mawng cu alu khan ah.
37 “Shin cu Jesuh, Jew Chang gui ah ghangpughang nei” ci ah ca gu ne tai ci gui.
38 Cun zah ung m'guk-ei hnih cun phi Bawipa Jesuh awn atäng ah tumat ak pat lam, tumat ak eng lam ah kutlamtung ung tai ne ngawn
ci gui.
39 A cun ah pei ah hteit ciah chang gui naw, ami lu tum ne Bawipa Jesuh cu k'shedam nak ci gui.
40 “Pum im gäi ne hnüüp thum ah kyong ung co ba khai ah chang, Khanpughi ah Htapa ah na kiak ung na mät naw namät k'phiawn ä,
kutlamtung ung kaa a tuhbäi kia law baä,” ci ne k'shedam nak
ci gui.
41 A cun ah mäih ah taigüpa gui, thukhän saza gui la ami ng'vai gui cun naw phi,
42 “Shin ah chang cu, chang hei lä k'phiawn hning ci, amät läi kä k'phiawn hning ne maw, ani cu Israel
ghangpughang ah kä kia ne ma, kutlamtung ung kaa a tuhbäi a
kyum law ba ung keimi naw kami zum khai nei.
43 Ani cu Khanpughi zum ciah Khanpughi ah Htapa ah pyein ci maw! cun ah kia sei Khanpughi naw am hni ah akiak ung a tuhbäi k'phiawn
sä,” ci ne shedam nak ci gui.
44 Bawipa Jesuh awn atäng ah kutlamtung ung ami ngawn ah m'guk-ei goi naw phi a cun ah mäih ah päipih tuk ci goi.
Bawipa Jesuh ah Hnun Apit Nak
(Makuh 15:33-41; Luka 23:44-49; Johan 19:28-30)
45 Kho hnüüp lung ung tün ne nazi thum lüng khai ah kho ah khan avan cu mü ne hmüp zawp ci.
46 Kho k'awi nu nazi thum akhin ung Bawipa Jesuh cu, “Eli.Eli, Lama sabachthani,” ci ne ng'shan sei m'lau ci. A cun cu “Ka
Khanpughi a i ah kia sei kei na na nawng ang” ci ne a pyein ah
kiak ci.
47 A pei ah ng'düi ciah chang gui naw cun a ci cu ng'za u netah, “Eliah cu khü ci nei,” cik ci gui.
48 Nga mi ung kaa chang tumat naw dawng ne m'zak awn sapyit tui aktai cu va sok netah, ng'lawi ung m'sawi ne Bawipa Jesuh-am han
pek ci.
49 Cun ung phi tumat naw, “Om-ei sä, Eliah naw law ne ahun la kä ahun ah mi teng cang kaw,” cik ci.
50 Bawipa Jesuh cu ng'shan khai ah m'lau netah si lawk ci.
51 Cun zah ung pum im kyong ah ami m'cha nak ah khingzih cu khan mawng ah kaa naw ka mawng ah khüt khai ah hnih ah ng'bou ne teek
ci.Shihpi thüng ci, lung song gui piawn ne kia lawk ci gui.
52 Ng'cim hmun gui ng'hmawng sei Khanpughi ah chang gui akda tho law ba ci gui.
53 Bawipa Jesuh sih nak ung kaa a thawh ba kawn ah cun ah chang gui cu, ng'cim hmun ung kaa lut law u ne, theingthap ciah mang gaw
ung lut tu u sei, chang akda naw hmuk ci gui.
54 Bawipa Jesuh ngäng ci gui ah gabawi la gakap gui naw, shihpi a thüng la ahmün cäicat vai gui cu hmu law u ne, ang htei ah
kyikyawk u netah, “Shin ah chang cu akcang ah Khanpughi ah
Htapa ah kiak ci nei,” cik ci gui.
55 A cun zah ung shawng ne dan ci gui ah hnumi gui phi om ci gui. Ngami cu Kalile ah tün ne Bawipa Jesuh cu läk u ne, m'htei
htang ci gui ah kiak ci gui.
56 Cun gui cu Mari Magdalene, James la Josef ah anu Mari la Zebedee ah chu ni gui ah kiak ci.
Bawipa Jesuh Ami m'cim ah Mawng
(Makuh 15:42-47; Luka 23:50-56; Johan 19:38-42)
57 Kho mühun law khätah Arimathea gawnu ah kaa Josef ming nak ciah bühmang ciah chang cu gawk lawk ci. Ani cu Bawipa Jesuh ah ang
khah püi tumat ah kiak ci.
58 Ani cu Pilat ah hteit netah, Bawipa Jesuh ah a gook cu lak khai ah, va pyein ci. Pilat naw, Bawipa Jesuh ah a gook cu Josef-am
peit vai ah zum ci.
59 Josef naw a gook cu la netah zih bawk awn k'tom ci.
60 Cun kawn ah kä shou phak ciah lung kheng ami shawk ah amät ah ng'cim hmun khui ung chum ne phuh netah, khui m'kawt cu lungnu
tumat k'täng ne khai shüt netah hteit ba ci.
61 Ng'cim hmun pei ah Mari Magdalene la a hei Mari ni cun phi ngo ne om ci gui.
Ng'cim Hmun Ami Ngäng Sak Gui
62 A cun ah ngawi ung kyin hnüüp ah kia sei taigüpa gui la Pharisee gui cu Pilat ah hteit u netah,
63 “bawi aw, cän ah hleei ciah chang a ghin zah ung ‘Kei ak hnüüp thum hnüüp sih nak ung kaa ka tho ba khai,’ a ci cu
kami shüm ba ci nei.
64 Cun ah kia sei a hnüüp thum ung khüt khai ah ng'cim hmun cu akni ah khai ne, ami ngäng vai ah k'bäi gui ä, Kä cun ung ak
chang gui naw a gook cu m'gu u netah, sih nak ung kaa tho ba ci
nei ci ne, chang gui-am m'thein khai gui nei. Cun ung ak hnu ah
hleeihlak nak cu ak htük ah tah shekha law pi khai nei,” ci ne
vah pyein ci.
65 Pilat naw, “Gamo mawng ät khü ne ng'cim hmun cu akni ah ngäng sak gui vä,” cik ci.
66 Cun ah kia sei nagmi cu ng'cim hmun ah hteit u netah, Khai nak ah lung cu, ca gei ne m'hnüt ne, phuh hmun m'kawt cu khäng htek
khai ah khai ci gui. Cu kawn ah gakap gui-am ngäng sak ci gui.