Matthe 25 (CNT)

Lamihta Gha awn Am Tumtäng nak

1 “Cun ah akhin ung Khanpughi ah uk nak kho cu shin ah mäih ah kiak khai. Hnü ät ung lamihta singhga cu chumah khai ah pamihta dou khai gui ah mei im kawt sek sek ne hteit ci gui. 2 Cun gui ung kaa sing hma cu lunglang ci gui, sing hma cu kä lunglang ci gui. 3 Kä lunglang ci gui cu mei im law püi pang u ne phi zinan akdäm kä kei ci gui. 4 Lunglang ci gui cu ami mei im ung be khai ah zinan kei ne, law püi ci gui. 5 Chumah khai ah pamihta cu kä law zä sei, ngahmi cu ami van ngam ne ip zawp ci gui.

6 Kho cawih ding law khätah, “Chumah khai ah pamihta gawk law ci nei, law ne dou law vä,’ ciah ng'khü k'aw cu ng'zak ci gui. 7 Lamihta sing gha cu tho law ba u ne, ami mei im piang ne pawng m'hteim ci gui. 8 Kä lunglang ci gui cun naw, kä lunglang ci gui-am ‘Kami mei si lawk khai kiak ci, zanan api na pe tu gui vä,’ ci ne ng'zoi tuk ci gui. Kä lunglang ciah lamihta gui naw, 9 ‘Nangmi ah phäh la keimi ah phäh ah zinan kä ng'büh khai, cun ah kia sei ami zoih nak ah vak hleih ba cang vä,’ cik ci gui. 10 Kä lunglang ci gui cu zinan hleih khai gui ah ami hteh zah ung chumah khai ah pamihta cu gawk lawk ci. Ana ngäng ge ciah lamihta gui cu ani awn atäng ah hta m'um pawi kyong ah lut u netah shoh cu ak khai shüt ci gui.

11 Hmuhmat nak kä om ciah ng'lamihta gui cun phi gawk law ba u ne, ‘saza, saza, shoh nak hmawn tu gui vä,’ ci ne ng'khü ci gui.

12 Cun ung phi chumah ciah pamihta naw, ‘Nangmi a u gui ang, shoh kä ka ning ak hmawn gui khai nei,’ ci ne kiak na gui ci.

13 “Cun ah kia sei nangmi cun phi cun ah hnüüp, cun ah khin cu kä nami hmat ci kia sei, ngaih na ne nami ngäng vai nei!’

Chang shäm Thum awn Amtumtäng nak

(Luka 19:11-27)

14 “Cun ah khin ung khankho uk nak cu shin ah mäih ah kiak khai. Hnüp ät ung chang tumat cu lam hteit khai ah pawng m'hteim ci, ani naw ak chang shäm gui khü gui netah, a khawh cu ap gui ci. 15 Cun ah khawh cu ami mät ah näh ci vai ah k'pai ne, tumat-am ghui pit hma-kip, tumat-am pit m'ku, tumat-am pit gha, ciah ap gui ci. 16 Cun kawn ah ani cu akho hei ah hteit ci. Ghui pit hma-kip gah ciah chang cu a cun vai-am sumlei ne, ghui pit hma-kip ah khan ah pit hma-kip ak pawih khai ah gah ci. 17 A cun ah mäih ah pit m'ku gah ciah chang cun phi pit m'ku ah khan ah pit m'ku ak pawih khai ah gah ci. 18 Cun ung phi pit gha gah ciah chang cu ang thuh nak ung m'dek co netah a bawi ah ghui cu m'dek ung phuh ci.

19 “Shou hta khätah ami bawi cu law ba ne ak chang shäm gui cu k'tä gui ci. 20 Ghui pit hma-kip gah ciah chang cu ghui pit hma-kip ak pawih ci cu law püi ne, ‘Bawi aw, nang naw ghui pit hma-kip na na ap shüt cu tuhbäi pit hma-kip ak pawih khai ah ka bik ci nei,’ ci ne pyein ci. 21 A bawi naw, ‘Na bä ci, nang cu düng ciah chang ni ah na kiak ci. Bi api ung nang düng ciah kia sei, bi ak däm cu ka ning ap khai, kei ah law ne kei awn atäng ah zeikiai ne na om khai nei,’ ci ne kiak nak ci.

22 “Ghui pit m'ku gah ciah chang cun phi law ne, ‘bawi aw, nang naw ghui pit m'ku na na ap shüt ci, tuhbäi pit m'ku ak pawih khai ah ka bik ci nei,’ ci ne pyein ci. 23 A bawi naw ‘na bä ci nang cu düng ciah chang ni ah na kiak ci. Bi api ung nang düng ci kia sei bi akdäm cu ka ning ap khai, kei ah law ne kei awn atäng ah zeikiai ne na om khai nei,’ ci ne kiak nak ci.

24 “Cun ung phi pit gha gah ciah chang cu law ne, ‘Bawi aw, kei cu nang bawi ah mawng ka hmat ci, nang cu na nget-ngawng ci kia ne kä na geit phi na khäm ba man ci, kä na phu geit phi nam sep ba man ci. 25 Kei naw ning kyih netah na ghui cu m'dek co ne kak phuh ci nei, teng ä, shin ung na ghui om ci nei’ cik ci!

26 “A bawi naw, ‘shekak ciah changdam, kei naw kä ka geit phikhäm ne, kä ka phu phi kam sep man ciah na hmat ung, 27 Kei ah ghui cu pan ah na ap vai sü. Cun ung vah kei ka law ba ung ak pawih mah ah na gah hning khai süte,’ cik ci. 28 Cun kawn ah ‘ani ah ghui pit gha cu la ba ne¬ ghui pit phiaa om ci-am pe vä. 29 Bühmang ci cu peit ba mä ung bühmang law pi täi khai, cun ung phi ghawi-pyam ciah kaa cu, ak om hta phi lak peit zawp vai. 30 A i ah kä mawng ciah shin ah chang shäm cu, ak pung ah hmüp khui ung hteh püi vä, a cu ah kyap ne m'lau ne aha htui ne om sä’, ci ne kiak na gui ci.

Ak Hnubäih ah M'Khoichaa nak

31 “Chang ah Htapa cu khankho chang gui naw kiung u sei ghangpughang ah kia ne a kyum law ba ung näng nak mangkiang ung ngok khai. 32 Cun zah ung kho nüng ah kaa chang pakhui avan cu ama ah ng'cut lawk khai gui. Htoshäm naw hto la me khoichaa ah mäih ah chang ah Htapa naw phi chang gui cu k'pai ne m'khoichaa gui khai. 33 Düng ciah chang ni gui cu ak pat lam ah k'bum gui ne, changshe gui cu ak eng lam bum gui khai. 34 Cun kawn ah ghangpughang naw akpat lam ah om ciah chang gui-am, ‘law vä, Kapa ah phyutheh nak nami gah ciah chang gui, khomdek a tüi pian ung tün ne nangmi ah hmawk ah a pian ah uk nak kho ung om vä. 35 Nangmi cu kei ei ka cawi zah ung ei nami nam bei ci, tui ka gha zah ung tui nami na tu ci, kei cu khin ah ka kiak zah ung nami na khin nak ci. 36 Kei ka sui vai kä ah om zah ung sui nami nam sui ci. Ka gawpai ung nami htei ci, thawng ung ka kium zah ung nami na teng m'kein lawk ci’ ci ne pyein ci.

37 “Cun ci khätah changdüng gui naw, ‘Bawipa, nang ei na cawi cu ning hmu ne, a i zah ung ei kami ning m'bei, nang tui na gha cu ning hmu ne a i zah ung ang tui kami ning tui, 38 khin ah na kiak a i ah ung ang ning hmu ne, kami ning khin nak, sui kä na sui a i ah ung ang ning hmu ne sui kami ning m'sui. 39 Na gawipai, thawng ung na kium a i zah ung ang ning hmu ne kami ning m'hteihtang’ ci ne pyein ci gui. 40 Ghangpughang naw, ‘kei naw akcang ka pyein cu, shin ah ka nau gui ung kaa, zoken pi ciah chang, nam hteihtang tu phung avan cu kei na nam hteihtang ah kiak ci nei’ ci ne kiak nak khai.

41 “Cun kawn ah ghangpughang naw ak eng lam ah om ciah chang gui-am, ‘thüi sei nak om ciah chang gui, shin ung kaa düi law ne, hteit vä, khoshe gui la ami khah püi gui ah hmawk ah pian ah m'hteimei lam ung zu kia vä. 42 Kei ei ka cawi zah ung ei kä na mi nam bei ci, tui ka gha zah ung tui kä nami tu ci, 43 kei khin ah ka kiak zah ung kä nami na khin nak ci, kei ka sui vai kä a om zah ung kä nami nam sui ci, kei ka gawpai zah ung, thawng ung ka kium zah ung kä nami nam hteihtang ci,’ ci ne kiak na gui ci.

44 “Cun ah chang gui naw, ‘Bawipa, nang ei na cawi, tui na gha khin ah na kiak, sui ah nak kheei, na gawpai, thawng ung na kium cu ning hmu lang ne. a i zah ung ang kä ning tu m'bei, kä ning m'hteihtang ah kami om’ ci ne pyein tu ba khai gui. 45 Cun kawn ung ghangpughang naw, ‘kei naw akcang ka pyein cu shin ah chang gui ung kaa ak zoken pi ah chang käm hteihtang ne nami om phung cu, kei kä nam hteihtang ne nami om ah kiak ci’ ci ne kiak na gui khai. 46 Cun na kia sei ngami cu ang täi ah shetkat nak gah khai gui. Düng ciah chang ni gui läi cu ang täi ghin nak kho ah gawk khai gui.