22
Hta M'umnak awn m'Tumtäng nak
(Luka 14:15-24)
1 Bawipa Jesuh naw ahei tumat awn m'tumtäng ne am cäi ba gui cu,
2 “Khanpughi ah uk nak kho cu shin ah mäih ah kia ci. Hngü ät ung ghangpughang tumat cu, ahta ah chu la ne m'um khai ah pawng
hteim ci.
3 Ani naw ak chang shäm gui tüi gui ne, akhü tu ah chang gui cu khü sak gui ci. Cun ung phi a u kä law hlü khätah,
4 ghangpughang naw ak chang shäm gui tüi ba mä gui ne,’ mü ei ei vai kia lawk ci nei, sei gui phi ngawn pyi nei, ei awk ghet
vai kiak ci kia sei, hta m'um nak ah law tuh hlah vä,” ci ne
ng'khü sak gui ci.
5 Cun ung phi ami khü gui ah chang gui cu, khü lawk ciah chang gui a i ah kä tä ne, tumat cu lo ah hteit ci.
6 Ahei tumat cu sumlei khai ah hteit ci, am shah gui naw khü lawk ciah chang gui cu pha ne tuthat ci gui.
7 Ghangpughang cu ang htei ah m'lung she netah, gakap gui cu tüi gui ne, cun ah chang gui cu ngawn sak gui ne, ami pigaw phi mei
awn m'khih gui ci.
8 Cun awn ah ak chang shäm gui khü ba gui netah, ‘Hta m'um nak ei
awk vai cu küm pyi te ci, cun ung phi khü ah chang gui cu kä
khinkha ci gui ah kiak ci.
9 Cun ah kia sei lam tung ung hteit ne, nami hmuh ah chang phung nami khü law vai nei’ ci ne m'cäi gui ci.
10 Chang shäm gui cu lam tung ung hteit u ne, ami hmuh phung chang ni chang she avan khü lawk ci gui. Cun ah kia sei hta m'um nak
ah im ung khin gui be ci gui.
11 “Ghangpughang cu khin gui teng gui khai ah law netah, hta m'um nak ung sui vai ah sui kä sui tuk ciah chang tumat cu hmuk ci.
Ghangpughang naw, ‘Teihpüi aw, a i ah kia sei, htam um sui sui
ne kä ng'bilawh ah na law tu ang?’ ci ne ng'shik ci.
12 “Cun ah chang cu a i ah phi käng thu tu ba thei netah om düt ci.
13 Cun kawn ah ghangpughang naw, ak chang shäm gui-am, ‘shin ah chang cu akut kho pin ne khit netah, ak pung ah hmüp khui
ah m'shän vä, a cu ah ani cu kyap ne m'lau ne, aha htui ne om sä’
ci ne kiak na gui ci,” ci ne pyein ci.
14 Cun kawn ah Bawipa Jesuh naw, “Khü ah chang gui läi da ci gui te, ghü ah chang gui cu ken ci gui nei,” ci ne kiak na gui ci.
Khon Lohnak ah Mawng
(Makuh 12:13-17; Luka 20:20-26)
15 Cun kawn ah pharisee gui cu hteit ba u netah, ani cu a i i ah thuvi ne ng'shi vai ang’ ci ne ng'gepai ci gui.
16 Ngami naw a ming khah püi gui la Herod ah pati chang gui cu, tüi gui u netah, Bawipa, nang naw akcang pyein ne chang ah
hmawk ah Khanpughi ah ng'zak hlü cu nam theithang ci, chang gui
ah m'lung ngaih cu kä nam tung ci, chang ah hmai phi kä na teng
ci.
17 Cun ah kia sei nang naw a i ah na ngaih cu nam thein gui ä, ‘ghangpughang-am khon look ne peit vai ang, kä peit vai ang?”
ci ne ng'shik ci gui.
18 Cun ung phi Bawipa Jesuh naw ngami ah shekat ciah ami ngaihtüh cu hmat netah, “Thuvi chang gui, a i ah kia sei nangmi naw thuvi
ne nami nang shi ang?
19 Khon nami loh vai ah tangka tumat cä nam hnuh law vä,” cik ci. Cun ah kia sei ngami naw tangka tumat law püi u khätah,
20 Bawipa Jesuh naw, “Shin cu u ah müi, a u ah ming ang,” ci ne ng'shi gui ci.
21 Ngami naw, “Ghangpughang ah müi, ghangpughang ah ming nei,” cik ci gui.
Cun kawn ah Bawipa Jesuh naw, “Ghangpughang ah kaa cu
ghangpughang-am ap ba vä, Khanpughi ah kaa cu Khanpughi-am ap ba
vä,” ci ne kiak na gui ci.
22 Ngami cu cun ah a pyein ng'za u netah, ang htei ah cäcat ci gui. Cun kawn ah a hei lam ah hteit ba ci gui.
Sihnak Ung Kaa Thawh ba ah Mawng
(Makuh 12:18-27; Luka 20:27-40)
23 A cu hnüüp ung Sadducee gui cu Bawipa Jesuh ah gawk lawk ci gui. Ngami cu ‘Sihnak ung kaa thawh banak kä om ci,’ ciah zum ci
gui ah kiak ci.
24 Ngami naw, “Bawipa, chang tumat cu kä hta pha ne asih ah a kiak ung, ani ah chu hmei cu anau naw khäm tu ba sä, ani hta law ung
cun ah akhmaw naw, a phäi ah kyong khui cu m'htei khai,’ ci ne
Moses naw pyein ci.
25 Keimi ung phäi nau gui singchih om ci gui. Ami phäi ang vaipi cu chumah thai ne sik ci. Kä hta phak ci kia sei akchu cu anau
naw khäm tu ba ci.
26 Ak pahnih nak anau, ak thum nak anau la anau gui ami van cu, a cun ah hnumi chu na tuba bäng bäng u netah, a u phi kä hta ne
si zawp ci gui.
27 Ak hnu ah cun ah hnumi phi sik ci.
28 Cun ah kia sei sih nak ung kaa thawh ba nak kho hnüüp ung, cun ah hnumi cu a phäi nau gui chih ung kaa a u ah chu ah kiak khai
ang?’ ci ne ng'shik ci gui.
29 Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kia sei
nami m'lung ngaih cu ng'lat ci.
30 Chang gui cu sih nak ung kaa ami thawh law ba ung chungla nak kä om ba khai. Ngami cu khankho chang gui ah mäih ah kiak khai gui.
31 Sih nak ung kaa thawh nak ba vai ah mawng Khanpughi ah thu cu kä nami phat man ne maa?
32 Khanpughi naw, ‘Kei cu Abraham ah Khanpughi, Issak ah Khanpughi, Jakop ah Khanpughi ah ka kiak ci nei. Ani cu aksi gui ah
Khanpughi ah kä kiak ci, ghing ci gui ah Khanpughi ah kiak ci,”
ci ne m'thein gui ci.
33 Cun ah am theithang cu chang gui naw ng'za u netah, ang htei ah cäicat ci gui.
Ak Hlüngtai Pi ah Thukhän
(Makuh 12:34-38; Luka 10:25-28)
34 Sadducee gui naw kä ami m'hlan tuba hlawt vai ah Bawipa Jesuh ah thu pyein cu, pharisee gui naw ng'za u netah, a pei ah ng'bum
lawk ci gui.
35 Ngami ung kaa thukhän saza tumat naw, thuvi ne ngaihtüh netah;
36 Bawipa ah thukhän gui ung, a i thukhän ang a hlüngtai pi,’ ci ne ng'shik ci.
37 Bawipa Jesuh naw, “Na Bawipa Nak Khanpughi cu, nam lung kiong avan, na ngaihtüh avan La na hmuhmat nak avan nawn nam hni vai.
38 Shin cu ak hlüngtai pibäih la ak küikyang pibäih ah thukhän ah kiak ci.
39 Ak hnih nak ah ak hlüngtai pibäih la ak küikyang pi bäih ah thukhän cu, ‘Nak chang paw cu na mät awn m'täng ne nam hni
vai,’ ciah thukhän ah kiak ci.
40 Shin ah thukhän goi cu Moses ah thukhän avan la profet gui ah m'theithang nak avan khäm ciah kiak ci.
Messiah ah Mawng Ami ng'shi nak
(Makuh 12:35-37; Luka 20:41-44)
41-42 Pharisee gui ng'htawi law u khätah Bawipa Jesuh naw, “Messiah ah mawng cu a i ah ang nami ngaih? ani cu a u ah ng'shon ung kaa
ah kiak khai ang?” ci ne ng'shi gui ci.
Ngami naw, “David ah ng'shon ah kiak khai nei,” ci u khätah,
43 Bawipa Jesuh naw, “Cun ah a kiak ung a i ah kia sei mumcha Theing ah thawh let nak awn David naw, ‘Messiah Bawipa’ ci ne
akhü ang?
44 Bawipa naw ka Bawipa-am,
Na ga gui na kho kaa ah kä ka gawk sak pha ah chuih,
Na ngoh vai,’ ciah David Ghangpughang naw pyein ci.
45 David naw Messiah-am Bawipa ci ne a khü ah a kiak ung Messiah cu a i cha ah David ah ng'shon ah kiak khai ang?” ci ne ng'shi gui
ci.
46 Cun ung phi Bawipa Jesuh cu a u naw käm hlan ba ci. Cu hnüüp ung tün ne Bawipa Jesuh cu, a u naw phi käng shi law ba ci.