18
Hlüngtai Pibäih ci cu A u ang?
(Makuh 9:33-37; Luka 9:46-48)
1 Cun kawn ah ang düihpüi gui cu Bawipa Jesuh ah pei ah hteit u netah, “Khankho uk nak ung ak hlüngtai pibäih cu a u ang?” ci
ne ng'shik ci gui.
2 Bawipa Jesuh naw ak hmaw hta tumat cu khü ne ama ah m'düih netah,
3 “Kei naw akcang ka pyein cu, nangmi cu ak hmawhta ah mäih ah nami m'lung kä nami m'thawng ung, khankho uk nak ung kä nami
gawk khai.
4 Shin ah ak hmaw ah mäih ah am lung thawng ne neim sak ciah chang cu khankho uk nak ung ak hlüngtai pibäih ah kiak ci.
5 Kei ah ming awn shin ah mäih ah ak hmawhta dou ciah chang cu, kei na dou ciah kiak ci.
Cheishoh nak ah Tüihtok Nak
(Makuh 9:42-48; Luka 17:1-2)
6 “Kei na zum ciah ak hmaw tumat a zum nak maih khai ah bik ciah chang cu, a gawn ung gawtlung khit ne m'awi netah, tuili thuuk
ung shum ung ani ah phäh ah bä tuh ba khai.
7 Chang gui ah zum nak dimaih sak ciah amawng ama gui om sei, chang gui ung thüi sei nak om ci. Zum nak dimaih sak ci cu akcang ah
om khai, cun ung phi zum nak dimaih sak ciah chang cu ang htei ah
thüi sei nak om khai.
8 “Na kut naw phi bäi, na kho naw phi bäi na zum nak a dimaih sak ung, a cun ah kut kho cu m'chün ne na ghawh vai, kut kho
küm sei m'htei mei ung luh ak dam, kutkho kä küm sei khankho
ah kai cu nang ah hmawk ah bä pi ci.
9 Na mik ui naw na zum nak a dimaih sak ung cun ah mik cu kawih ne na ghawh vai, mik ui küm sei m'htei mei ung luh akdam, mik ui
vangtäng m'dauh sei khankho ah kai cu, nang ah hmawk ah bä pi
ci.
Maih ciah Htome awn Am tumtäng nak
(Luka 15:3-7)
10 “Nangmi naw a u ak hmaw hta phi kä nami zoshe nak vai. Kei naw ka ning m'thein gui cu, ngahmi ah khankho chang gui cu, khankho
kapa Khanpughi ah ma ah ang täi sei om ci gui.
11 (Chang ah Htapa cu maih ciah chang gui hun khai ah lawk ci).
12 “Nangmi naw a i cha ah ang nami ngaih: chang tumat naw htome phia a vuh ung kaa, tumat a maih ung ani naw ko-kip-lei-kaw cu
khongnawi khu li hmu ah nawng shüt netah, maih ciah htome cu
shui ba ci.
13 Maih ciah htome cu shui ne hmu ba netah, kä maih tuk ciah kokip lei-kaw ah mä, maih ciah tumat ah hmawk ah zeikiai pi ci nei, ci
cu akcang ah ka pyein ci.
14 A cun ah mäih ah khankho ah nami Pa naw phi ak hmaw hta tumat lam hma ne adimaih vai cu käng za hlük ci.
Katnak Bik ciah Phäinau
15 Na phäi nau naw a ning kat nak ung, kat nak am dang thei vai ah a om nak ah na hteh vai. Nani mät ng'hmu ni ne na ning lak mah
nak cu naning ge nak vai. Na thu ang ngaih ung naning gei ba
khai.
16 Cun ung phi ani naw nang ah thu kä ang ngaih ah a kiak ung, na thu pyein ang düng vai ah cacim ung om ciah mäih ah, saksi tuk
khai chang hnih thum na khü tu vai.
17 Ngami ah thu mä kä ang ngaih ah a kiak ung, amawng ama avan pyein ne pum im ung nami ap vai. Cun ung phi m'cäi kä ang ngaih
ah a kiak ung, ak hnu bäih ah Khanpughi kä zum ciah chang khawn
look ciah chang ah mäih ah namik bäi vai.
Khihpawn Nak La Chah Nak
18 “Kei naw akcang ka pyein cu khomdek khan ung nami khihpawn cu khankho ah khihpawn nak om khai, khomdek khan ung nami chah cu
Khankho ah chah nak om khai.
19 “Kei naw akcang ka pyein cu khomdek khan ung chang hnih hta naw phi zum ne, atäng ah nami taigü ung khankho ah om ciah Kapa naw
nami ng'zoih phung cu ning pe gui khai.
20 A i ah kia sei ci ung chang hnih thum hta phi kei ah ming awn ami bum ah a kiak ung ngahmi awn atäng ah kei cu ka om ci,” ci ne
m'cäi gui ci.
M'geinnak Kä Om ciah Changshäm awn m'Tumtängnak
21 Cun kawn ah Peter naw a pei ah law netah, “Bawipa, ka phäi nau naw ana kat nak ung a i chü vei kam gein vai ang?, chih vei
m'gein vai ang!” ci ne ng'shik ci.
22 Bawipa Jesuh naw, “Chih vei bäng m'gein vai ah kä kiak ci, chih-kip chih vei m'gein vai ah kiak ci.
23 A i ah kia sei ci ung khankho uk nak cu shin awn täng ci; Kho hnüüp ät ung ghangpughang tumat cu ak chang shäm gui täih
kiang gui khai k'bäi ci.
24 Ani naw tün ne k'tä gui netah ngui tämkäp phiaa khak a pu om ciah chang cu khü sak gui ci.
25 Ani naw a pu cu kä thung hlawt khätah, amät la ak chu a hta ni, a khawh cham ni avan cu zoi ne a thung vai ah ghangpughang
naw k'bäi ci.
26 Cun ah kia khätah cun ah chang cu ghangpughang ah ma ah m'khukdong ne kawp netah, ‘Kei ah khan ah na ngaih peä, ka pu cu
avan ka thung hlawt vai ah ka tha nak khai nei,’ ci ne ng'hui paa
nak ci.
27 Ghangpughang naw ani cu m'gein netah, a pu avan nawng pe ne amät phi phiawn ci.
28 “Cun ung phi ani cu phiawng ne a hteh ba kawn ah, lam ah ngui api ak pu tu ah ak changshäm paw cu hmu ne, a gawn ung pha ne
k'pang netah, ‘Ka ngui na pu tu cu a tuhbäi na thung law ba ä,’
ci ne k'ceet ci.
29 Cun ah chang cu m'khuukdong netah, ‘Kei ah khan ah na ngaih peä,’ ka pu avan ka ning thung khai nei,” ci ne ng'hui paa nak
ci.
30 Cun ung phi ani naw kä ngaih pe ne, a pu avan kä a thung pha ah chuih a kium vai ah thawng ung chum ci.
31 Cun gui cu ami changshäm a paw gui naw hmu ng'za u netah, ang htei ah m'lung she ci gui. Cun ah kia sei ghangpughang ah hteit u ne a
mawng avan cu m'thein ba ci gui.
32 Cun kawn ah ghangpughang naw cun ah changshäm cu khü netah,’ nang chang shekha, nang naw kei nang paa nak ci sei, na na thung
vai om ciah na pu avan cu ning nawng pe ne, ka ning k'phiawn ci.
33 Kei naw nang ka ning m'gein ah mäih ah na chang paw kä nam gein tu ba ci ma? ci ne,
34 ghangpughang cu m'lung she netah, cun ah chang cu a pu kä a thung zawp pha ah chuih kium khai ah thawng ung chum ci.
35 Cun ah kia sei nangmi cu phäi nau gui nami mät, tumat ah kat nak cu tumat naw, akcang ah kä nam m'gein tu ah a kiak ung,
khankho ah kapa naw nami kat nak cu kä ning m'gein gui khai
nei,” ci ne m'cäi gui ci.