15
Pupa Gui ah Thungzo Gui Man
(Makuh 7:1-13)
1 Cun kawn ah Jerusalem ah kaa pharisee gui la thukhän saza gui cu Bawipa Jesuh ah law u netah,
2 “A i ah kia sei nang düihpüi gui naw pupa gui ah thungzo man cu kä ami läk ang? ngahmi cu thungzo man ah kut käm si ah ei
ei ci gui nei,” ci ne pyein ci gui.
3 Bawipa Jesuh naw, “Nangmi a i ah kia sei Khanpughi ah thukhän nawng-en ne, nami mät ah thungzo man düt nami läk ang?
4 Khanpughi naw, ‘Nanu la napa cu nak chang m'sui vai, anu pa züi gen ciah chang cu sih nak gah sä,” ci ne thu khän ci.
5 Cun ung phi nangmi naw, chang tumat ung anu pa-am a peit vai khawh cham a om ung, cun cu Khanpughi-am peit pyi ah kiak ci, anu
pa-am a peit vai kä hlü khai, ci ne nami theithang ci.
6 A cu cha ah nangmi cu Khanpughi ah thukhän nawng-en u ne, nami mät ah thungzo cu nami läk ci.
7 Thuvi chang gui, nangmi ah mawng Isaiah naw a pyein cu, akcang ah bä ci nei, cun ah thu cu;
8 Khanpughi naw, ‘shin ah chang gui naw, ami shai awn
Kei cu nam hlüngtai ci gui,
Cun ung phi ami m'lung cu kei awn ng'shawng aih ci.
9 Ngahmi naw kei ami na khawihnah cu akholä ah kiak ci,
A i ah kia sei ci ung, ngahmi naw chang ah pyan ah thukhän
gui cu, Khanpughi ah thukhän ah mäih ah, m'theithang ci gui!,”
ci ne kiak na gui ci.
Chang Shetkat Sak ciah Amawng Gui
(Makuh 7:14-23)
10 Bawipa Jesuh naw chang gui cu a pei ah khü gui netah, “Ka thu cu ngai netah hmat vä,
11 Chang shetkat sak ci cu m'gawnglei ung zulut vük ciah kä kiakci, m'gawnglei ung kaa lut lawk ciah kia ci,” ci ne kiak na gui
ci.
12 Ang düihpüi gui naw a pei ah law u netah, “Nang Bawipa naw thu na pyein ah phäh ah pharisee gui m'lungkshe ci gui nei, na hmat
ci ang?,” ci ne pyein lawk ci gui.
13 Bawipa Jesuh naw, “Khankho Kapa ah geit ah kä kiak ciah a ging phung cu mawi ne ghawh vai nei.
14 Cun ah kia sei ngahmi ah hmawk ah kä nami ng'ä vai, ngahmi cu amik käm dei ci lam shüm tuk ciah amik m'dauh gui ah kiak ci
gui. Amik m'dauh naw amik m'dauh cu lam am shüm ah a kiak ung,
ani nik hnih cu m'ghawng ah lut khai goi nei,” ci ne m'cäi gui
ci.
15 Peter naw,“Shin ah tumtäng nak cu phlan ne nam thein gui ä,” ci ne ng'zoi khätah;
16 Bawipa Jesuh naw, “Nangmi phi tuhgüt chang hei gui ah mäih ah a i kä nami hmat phak ci ma?
17 M'gawnglei ung zulut vük ci phung avan cu, chikhawn ung zu gawk netah, cun kawn ah ak pung ah aluh law ba cu kä nami hmat ci ma?
18 Cun ung phi m'gawnglei ung lut lawk ci cu m'lung kyong ung kaa lawk ciah kia ne, a cun naw chang cu shetkat sak ci nei.
19 Chang ngawn nak, chang ah chu hta kat püi nak, chang she awn ih om nak, m'guk-ei hleei pyein nak, la chang m'thüi khang nak gui
ah kä nik ciah ngaih tüh gui phung cu, m'lung kyong ung kaa lut
lawk ciah kiak ci.
20 Cun gui naw chang cu shetkat sak ci gui. Kut käm si ah ei ei naw chang cu kä shetkat sak ci nei,” ci ne m'thein gui ci.
Kanan Hnuminu ah Zumnak
(Mak 7:24-30)
21 Bawipa Jesuh cu cun ung kaa hteit ba ne Taia la Sidon kho ah gawk ci.
22 A cu ah om ciah Kanan Hnuminu tumat cu law netah, “David ah Htapa, kei cu nam gein ä, kei ah hta hnumi cu khoshe naw kai
sei, geinvai ne ng'zän ci nei,” ci ne ng'pa ne zoi ci.
23 Cun ung phi Bawipa Jesuh naw a i ah phi käm shang ci. Ang düihpüi gui cu a pei ah law u netah, “Shin ah hnumi cu mi hnu
ah na läk law gui ne, pamcai ci nei, züi ne gawt ba ä,”
ci ne pyein ci gui.
24 Bawipa Jesuh naw, “Kei cu maih ciah htome bum ah kiak ciah Israel chang gui ah hmawk bäng ah ka lawk ci nei,” ci ne m'shang gui
ci.
25 Cun ci khätah cun ah hnuminu naw akho pei ah khuukdong netah, “Bawipa, kei cu nam gein ä,” ci ne ng'zoi ba ci.
26 Bawipa Jesuh naw, “Hta hmaw gui ah ei vai cu la ne, ui gui-am kä vuh vai nei,” ci ne pyein ba ci.
27 Cun ah hnuminu naw, “hman ci nei Bawipa aw, cun ung phi ui gui cun naw, ami mah ah ei nak ung ng'theh ciah ei-book cu ei tu man
ci gui nei,” ci ne pyein ba mä ci.
28 Cun ci ba khätah, Bawipa Jesuh naw, “Nang hnumi, nang cu na zum nak däm aih ci nei,nang zak hlü ah mäih ah kia sä,” ci
ne kiak nak ci. A cun zah lung ung cun ah hnuminu ah hta cu gai
ba ci,
Bawipa Jesuh Naw Chang Akda Gai Sak ci
29 Bawipa Jesuh cu cun ung kaa pawng ba ne, Kalile tuilinu kem zung ah hteit ba ci, Cun kawn ah m'htung ah hang kai ne ngok ci.
30 Chang gui naw akho khem, amik m'dauh, ak shum, ak ang gui la gawpai ci gui akda a pei ah law u sei, gai ba sak gui ci.
31 Ak ang gui thu thei ci gui,apumsa kä küm ci gui küm ba ci gui, akho khem gui hteit thei ci gui, amik m'dauh gui m'dei lawk ci
gui, a cun gui cu chang gui naw hmu u netah, ang htei ah cäicat
u neh Israel gui ah Khanpughi cu m'hlüngtai ci gui.
Chang Phia phli-kip Am bei ah Mawng
(Makuh 8:1-10)
32 Bawi Jesuh naw ang düihpüi gui cu khü gui netah, “Shin ah chang gui kei awn atäng ah ami om tu cu hnüüp thum lüng lawk
ci nei, Ngahmi ung ei vai kä om ci, kam gein gui ci nei. A i kä
tumbei gui ung ami hteh ba ung lamah ami thagui maih khai nei,”
ci ne kiak na gui ci.
33 Ang düihpüi gui naw, “Shin ah bung hmu k'pyama ah, chang shi chü ah ei vai, a hawé shui ne gah vai ang?,” cik ci gui.
34 Bawipa Jesuh naw, “Nangmi ung m'htut a i chü ang a om,” ci ne ng'shi gui sei,
“M'htut pum chih la nga api om ci nei,” ci ne m'thein ba ci
gui.
35 Cun kawn ah Bawipa Jesuh naw chang gui cu m'dek ung ngoh sak gui ci.
36 M'htut pum chih la nga api cu la ne, Khanpughi ah taigü netah, m'htut la nga cu bou ne ang düihpüi gui-am pe gui sei ang
düihpüi gui naw chang gui-am tei gui ci gui.
37 Chang gui naw ami phü ah ami ei kawn ah ami ei ah ak pawih cu them dawn ung ak chih ah kaw ba ci gui.
38 M'htut ei ci gui cu ak hmaw la hnumi kä khei tu ung phia phli-kip lawk ci gui.
39 Cun kawn ah chang gui cu Bawipa Jesuh naw tüi ba gui netah, amät cu Makadon kho lam ah hteit ci.