12
Sapyit lo ah Ng'Hlawh Ci Gui awn Am Tumtäng Nak
(Matthe 21.33-46; Luka 20.9-19)
1 Cun kawn ah Bawipa Jesuh naw ngami-am m'tumtäng ne am thein gui cu, “Chang tumat naw sapyit lo cu bi ne, geit ne ng'vong ci. Sapyit m'theih m'seh nak vai ah khui phi shawk ne, tängkyäng phi co ci.
Cun kawn ah ani cu a sapyit lo khah gui ne bi sak gui netah, a
kho hei zung ah hteit ci.
2 sapyit bih nak vai ah a khin gawk lawk khätah, ak chang shäm tumat cu lo ng'vat ne bik ci gui ah tüi ne, k'phlam cu ng'zoih
sak ci.
3 Lo ng'vat ne bik ci gui naw cun ah ak chang tüih cu pha ne that u netah a i kä peit ah tüi ba ci gui.
4 Kho mah naw ak chang shäm tumat cu tüi ba mä ci. Lo ng'vat ci gui naw alu ung that pawk pawk ne ng'a khai ah cik ci gui.
5 Kho mah naw a hei ak chang shäm tumat tüi ba mä sei lo ng'vat ci gui naw cun ah chang shäm cu ngawn ci gui. A cun ah
mäih ah a hei ak chang shäm am shah gui cun phi am shah that ne,
am shah ngawn ci gui.
6 Kho mah ung ahta pami tumat om ci. Cun ah kia sei, ‘ka hta läi cu kyih aa khai gui’ ci ne ak hnu ah a hta pami cu tüi ci.
7 Cun ung phi ngami naw, “Shin cu kho mah ah pakhui m'düng ciah kiak ci, law vä, ani cu mi ngawn khai nei, cun ung vah ani ah khomdek mik mi naw mi
khäm khai” ci ne ng'ge u netah;
8 Ani cu pha ne ngawn u ne, ng'vong pung ah ghawt ci gui.
9 Cun ah a kiak ung kho mah naw a i cha ah bi bik khai ang? ani cu law ne lo ng'vat ci gui ngawn gui zawp netah, cun ah lo cu a
hei gui-am bi sak gui khai nei.
10 Cacim ung om ci cu nami phat man khai nei;
‘Lung im co ci gui naw, ami nawng düt ah lung cu,
Ak küikyang pibäih ah lungtung ah kia lawk ci nei.
11 Shin cu Khanpughi ah bi bi ah kiak ci, Mik mi ah ma ah cäicat aih vai kiak ci nei” ci ne kiak na gui
ci.
12 Bawipa Jesuh naw ngami a pyein nak gui ah am tumtäng cu Jew chang gui ah ami ng'vai gui naw hmat u netah, Bawipa Jesuh cu
phak khai gui ah k'tha nak ci gui.
Cun ung phi chang khli cu kyih u netah a hei lam ah hteit ba ci gui.
Phlam Soh ah Mawng Ami ng'shi nak
(Matthe 22.15-22; Luka 20.20-26)
13 Cun kawn ah pharisee am shah gui la Herod ah pati chang am shah gui cu Bawipa Jesuh ah tüi law u ne, phawtcam nak ah ng'shi
sak gui ci gui.
14 Cun ah chang gui cu Bawipa Jesuh ah law u netah, “Bawipa, nang naw ng'düng nak awn thu na pyein ci, chang ah
ngaih kä nam tung ci, chang ah hmai kä na teng ci, Khanpughi ah
ang zak hlü ah ng'düng ciah nam theithang nak cu kami hmat ci
nei. Cun ah kia sei Roman ghangpughang-am k'phlam peit vai ang,
kä peit vai ang, keimi naw mä kami pek khai ang kä kami pek khai
ang? ci ne phawtcam nak awn ng'shik ci gui.
15 Bawipa Jesuh naw ngami ah phawtcam nak cu hmat netah, “Nang mi naw a i ah kia sei kei ka shetkat vai ah nami ng'zak
hlü ang? Tangka tumat ka teng vai law püi vä” ci ne kiak na gui
ci.
16 Law püi u khätah Bawipa Jesuh naw,
“Shin ah gup, shin ah ming cu a u ah gup, a u ah ming ah ang a
kiak?” ci ne ng'shi gui ci. Ngami naw,
“Ghanpughang ah gup, ghangpughang ah ming ah kiak ci nei” ci ne
pyein ci gui.
17 Bawipa Jesuh naw, “Ghanpughang ah kaa cu ghangpughang-am ap ba vä, Khanpughi ah
kaa cu Khanpughi-am ap ba vä” ci ne kiak na gui khätah ang htei
ah cäicat ci gui.
Sihnak Kung kaa Thawh ba ah Mawng Ami ng'shi nak
(Matthe 22.25-33; Luka 20.27-40)
18 Sih nak ung kaa thawh ba nak kä om khai cik ci gui ah Sadducee am shah gui cu, Bawipa Jesuh ah law u netah;
19 “Bawipa, 'chang tumat cu kä hta phah ne a sih ah a kiak ung akchu cu a phäi nau naw akchu nak tu ba vai. Sik ciah pakhui cu
khäm tu ba ciah ahta anau naw m'düng khai’ ci ne Moses naw nam
thein gui shüt ci.
20 Hngü-ät ung ng'phäi nau gui chang sing chih om ci gui. Ami phäi ang vaipi cu chumah netah kä hta pha ne sik ci.
21 Akchu cu a nau ang vai tuba naw khäm tu ba netah, ani phi kä hta pha ne sik
ci. A cun ah mäih ah anau ba tumat cun phi a cun ah a
phäi ah chu khäm tu ba netah kä hta pha ne sih ba mä ci.
22 A cun ah mäih ah ang phäi nau gui chang sing chih cu ami van naw cun ah hnumi cu chu na u netah, ami van kä hta ne sih
zawp ci gui.
23 Ak hnu ah cun ah hnumi phi sik ci. Ang phäi nau gui chang sing chih ami van naw cun ah hnumi cu chu nak ci gui kia sei, sih
nak ung kaa thawh ba nak ah kho hnüüp ung, cun ah hnumi cu a u ah
chu ah kiak khai ang?” ci ne ng'shi ci gui.
24 Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak
phi kä nami hmat ci, cun ah kia ne nangmi cu lam nami hma ci.
25 Chang gui cu sih nak ung kaa ami thawh law ba hnüüp ung kä chu cei mah ba khai gui, khankho ah khan chang gui ah mäih
ah kiak khai gui.
26 Sih nak ung kaa thawh nak ba ah mawng Moses ah cacim cu kä nami phat man ne ma? Cun ah cacim, mei ah däi ciah cap-plum ah
amawng ung, Khanpughi naw,
“Kei cu Abraham ah nak Khanpughi, Isak ah nak Khanpughi, Jakop
ah nak Khanpughi nei” ci ne Moses ah ma ah thu pyein ci.
27 Ani cu sik ci gui ah Khanpughi ah kä kiak ci, ghing ci gui ah Khanpughi ah kiak ci, nangmi cu akcang ah cheishoh nak ung nami
hteit pyi ci nei” ci ne kiak na gui ci.
Ak Küikyang Pi ah Thukhän
(Matthe 22.34-40; Luka 10.25-40)
28 Cun ah Bawipa Jesuh la Sadducee gui ami ng'thu zah ung, ami pei ah thukhän saza tumat om tuk ci. Ani naw Sadducee gui-am
Bawipa Jesuh naw akni ah m'hlan ne am thein gui cu ng'za netah,
Bawipa Jesuh ah pei ah law ne, “Thukhän gui nüng ung ak küikyang
pi cu a i ang?” ci ne ng'shik ci.
29 Bawipa Jesuh naw, “Israel chang gui, ngai vä, mik mi ah Bawipa Khanpughi cu tumat
bäng nak ciah Khanpughi ah kiak ci.
30 Ak küikyang pibäih ah thukhän cu,‘Na Bawipa nak Khanpüghi cu, nam lung kyong avan, na hmuhmat nak avan, na ngaih tüh nak
avan la nak thagui avan awn nam hni vai’ ciah kiak ci.
31 Ak hnih nak ah ak küikyang pibäih ah thukhän cu, na mät ah paw chang cu na mät awn m'täng ne nam hni vai' ciah kiak ci. Shin
ah thukhän goi ah kawn ah ahei thukhän kä om ba ci” ci ne
m'thein gui ci.
32 Cun ah thukhän saza naw, “Bawipa, nang ah thu pyein cu ang htei ah bä aih ci nei,
Khanpughi cu tumat bäng om ci, Khanpughi ah kawn ah a hei kä om ba
ci nei.
33 Khanpughi cu m'lung kyong avan, hmuhmat nak avan la k'tha gui avan nawn m'hni vai, mät ah paw chang cu mät awn m'täng ne
m'hni vai' ciah thukhän hnih läk cu Khanpughi-am ak ghing ngawn
ne m'khih ne khawihnah nak la Khanpughi-am a hei gui peit nak
nüng ah tah bä pi ci nei” ci ne pyein tu ba ci.
34 Ani naw cun ah hmuhmat nak awn a pyein cu Bawipa Jesuh naw hmat netah, “Nang cu Khanpughi ah kho awn kä nani ng'shawng ba ci nei”
ci ne kiak nak ci.
Cun kawn ah a u naw phi Bawipa Jesuh cu kä ng'shi ba zäi ci gui.
Messiah ah Mawng Ami ng'Shi nak
(Matthe 22.41-46; Luka 20.41-44)
35 Bawipa Jesuh naw pum im ah am theithang gui zah ung, ani naw ang shi gui cu, ‘Messiah cu David ah hta ng'shong ung kaa ah kiak khai’
ci ne, a i hawk cha ah thukhän saza gui naw ami pyein hning ang?
36 Mumcha Theing naw David ang thu m'sak cu;
‘Khanpughi naw ka Bawipa-am,
Nang ah na ga gui cu, na kho pha kaa ah,
Kä ka gawk sak pha ah chuih,
Kei ah kak pat lam ah na ngoh vai nei’ ci ne kiak nak ci” ciah
kiak ci.
37 Shin ung David amät naw Messiah-am Bawipa ci ne khü ciah kia sei, a i cha ah Messiah cu David ah hta ng'shon ah kia hning
khai ang?” ci ne m'theithang gui sei chang gui naw zeikiai ne
ngai zak ci gui.
Thukhän Saza Gui Hnu ng'Tuk Püi gui ne Ang Cäi nak
(Matthe 23.1-36; Luka 20.45-47)
38 Cun ah am theithang gui zah ung Bawipa Jesuh naw, “Thukhän saza gui cu nami geing nak gui vai, ngami cu suinu sui
ne, chang ah ng'shei ne hteithton hlük ci gui. Sumlei hmun ung
phi chang naw ak chang m'sui gui vai ng'za hlük ci gui.
39 Pum im kyong ah phi ng'khoikhei hlük ci gui, ng'bum law nak ung phi ani nak pibäih ung ngo hlük ci gui,
40 Hmeinu gui ah khawh cham gui gut u netah, chang naw ang ngaih ung ani vai düt ah akshonu taigü ci gui. Cun ah kia sei
ngami ah khan ah Khanpughi naw am kat nak gui cu khak pibäih
khai” ci ne kiak na gui ci.
Hmeinu ah Peit nak
(Luka 21.1-4)
41 Bawipa Jesuh cu pum im kyong ah khawh ami peit nak ah m'küm pei ah ngoh netah, cun ah m'küm ung chang gui naw ami peit
ah ngui ami ghawn law cu teng gui ci. Bühmang ciah chang gui naw
ngui akda ghawn ne pek ci gui.
42 Ghawi-pyam ciah hmeinu tumat cun phi law tu ne,pia-gha phu nak khai ah ngui pia goi cu zuk ghawn tuk ci.
43 Cun kawn ah Bawipa Jesuh naw, ang düihpüi gui khü gui netah,
“Shin ah pyamtham ciah hmeinu naw, pum im ah peit nak ah m'küm
ung ghawn ne pek ci gui nüng ah da pi sei pek ci nei’ ciah akcang
ah ka ning m'thein gui ci nei.
44 Chang hei gui cu ami ei-mang ah k'pawih ami ngui pek ci gui, cun ung phi shin ah hmeinu naw, am hu awi ne bi ne a gah,
avan pek ci nei” ci ne m'thein gui ci.