6
Kyin Hnüüp ah Mawng
(Matthe 12:1-8; Makuh 2:23-28)
1 Kyin hnüüp ung Bawipa Jesuh htang loma sun pah ne a hteh zah ung, ang düihpüi gui naw kiung htang cu m'ghawt ne m'hnoi ne ei
ci gui.
2 Cun cu pharisee gui naw hmu u netah, “Thukhän ung kyin hnüüp ung a i kä bi vai om ci maw, a i ah kia sei bi nami bi ang?” ci
ne ng'shi gui ci gui.
3 Bawipa Jesuh naw, “David la ak chang gui naw ei ah cawi u netah ami bilawh gui cu kä nami phat tu man ne ma?
4 Ani cu Khanpughi ah pum im kyong ah lut ne, Khanpughi-am ami vawih cu ei ci, ak chang gui phi m'bei gui ci. Cun cu taigü
bäng naw a ei vai’ ciah thukhän om te ci maw” ci ne kiak
na gui ci.
5 Cun kawn ah Bawipa Jesuh naw, “Chang ah Htapa cu Kyin Hnüüp ah Bawipa ah kiak ci” ci ne kiak na gui ci.
Akut Vangtäng Shum Ciah Chang
(Matthe 12:9-14; Makuh 3:1-6)
6 Kyin ba hnüüp ung Bawipa Jesuh cu pum im ah hteit ne m'theithang gui ci. A cu ah ak patlam akut shum ciah chang
tumat om ci.
7 Pharisee gui la thukhän saza gui cu, Bawipa Jesuh ami m'kat nak vai amawng shui hlü u netah, kyin hnüüp ung cun ah akut shum
gai sak hman khai ci ne teng ci gui.
8 Bawipa Jesuh naw cun ah ami ngaih hmat netah, akut shum-am, “Ng'düi law ne ma lam ah lawä” ci khätah, cun ah chang cu
tho law ne ama lam ah law ne ng'düi ci.
9 Cun kawn ah Bawipa Jesuh naw, “Ming'thukhän ung, kyin hnüüp ung ak'ni bi vai ang, akshe bi vai ang, a om? Chang phiawn sak
vai ang? chang ngawn vai ang?, ka ning shi gui ci nei” ci na gui
ci.
10 Bawipa Jesuh naw, cun ah chang gui avan teng gui netah, akut shum ci-am, “Na kut k'phiäih ä” ci nak ci. Cun ah chang naw a kut
cu k'phiäih khätah, akut cu akni ah kia ba ci.
11 Pharisee gui cu ang htei ah thüi ne m'lungshe u netah Bawipa Jesuh ah khan ah a i hawk cha ah bi bi vai ciah ng'ge ci gui.
Bawipa Jesuh naw Ang Düihpüi Gha-lei-goi Ghü Ci
(Matthe 10:1-4; Makuh 3:13-19)
12 Cun kawn ah Bawipa Jesuh cu m'htung ah kai ne, Khanpughi ah mü lüng ne k'taigü ci.
13 Khaw thai law khätah ak chang gui ami van khü gui netah, ami van ung kaa gha-lei-goi ghü gui ne, ang düihpüi gui ah, ami
ming cu sui gui ci.
14 Cun ah gha-lei-goi gui cu; (Peter ah a sui ah (Simon, anau Andrew, James la Johan, Philip la Batholome;
15 Matthe la Thomas, Alphaeus ah hta James, la apakhui m'hni pi ciah Simon,
16 James ah hta Judas la a ngawi ah Bawipa ga-am ap khai ah Judas Iskariot gui ah kia ci.
Bawipa Jesuh ah Am Theithang Gui la A Gaisak Gui ah Mawng
(Matthe 4:23-25)
17 Bawipa cu ang düihpüi gui awn khomhtung ah kaa kyum law ba u ne ak chang khli gui awn ng'düi gi cui. Cun kawn ah Judea khaw ah
kaa, Jerusalem ah kaa, la Tai-ar la Sidon pigaw gui ung kaa chang
akchün om ci gui.
18 Ngami cu Bawipa Jesuh ah ng'thu ngaih tu vai la gai nak gah tu vai ah lawk ci gui ah kiak ci. Khawshe ah kai gui phi law u ne,
gai ne hteit ba ci gui.
19 Bawipa Jesuh ung kaa hlüngtai nak naw chang khli gai sak khätah, chang gui naw Bawipa Jesuh ami tawn tu hning vai ah
k'tha nak ci gui.
Zeikiai nak La Thüisei nak
(Matthe 5:1-12)
20 Bawipa Jesuh naw ang düihpüi gui tän ne teng gui netah,
“Pyam tham ciah chang gui zeikiai vä, Khanpughi ah Uknak khaw
cu nangmi ah khaw ah kia ci.
21 “Cawigha ciah chang gui zeikiai vä, Nangmi cu nami
Phü m'ghüm khai nei.
“Ang phli li ciah chang gui zeikiai vä, nami zeigaih nak
gawk lawk khai nei.
22 “Chang ah Htapa ah hmawk ah chang gui naw, ami ning hnu ng'tuk püi gui ung, ami ning nawng gui ung, chang she ah ami ning pyein
gui ung, nami zeikiai vai,
23 Cun ah mäih nami bui awt law ung nami zeikiai vai, zeikiai ne nami ng'lam vai;khankho ah nangmi ah gah vai cu däm aih ci.
Ngami ah pughi gui naw profet gui ah khan ah phi acun ah bi
man ci gui.
24 “Cun ung phi, ng'bühmang ciah chang gui ding gei sei nami om ci,
Nangmi ung thüi sei nak om ci nei!
25 “Tuhbäi nami plumshau ci gui thüi sei nak om ci.
Nangmi, ung cawi gha nak gawk lawk khai nei.
“Tuhbäi nami zei gaih ci gui thüi sei nak om ci, ng'phli li sei
Nami thüisei nak gawk lawk khai nei.
26 “Chang ah ning m'hlüngtai gui cu thüi sei vai kia ci,
Ngami ah pupa gui naw, hleeihlak ciah profet gui phi acun ah
M'hlüngtai man ci gui.
Gaa M'Hni Vai ah Mawng
(Matthe 5:38-48; 7:12a)
27 Cun ung phi ka ng'thu ngai ciah chang gui aw, nami gaa cu m'hni vä, ning thüi na gui ciah khan ah akni bi vä,
28 Ning züi-gen gui ci-am, ng'thu k'ni m'khäh vä, ning hleip taap gui ci-am k'taigü pe vä.
29 Nang being vangtäng ami ning k'beeih ung, vangtäng phi na cuun ba vai, na suinu ami ning guh peit ung, na sui hta phi na peit
gui vai.
30 Nang ah ng'zoi lawk ci phung-am na peit vai, na khawhchaam ning lak pek ciah kä na shan-en ba vai.
31 Chang naw na khan ah abi vai na ng'zak hlü ah mäih ah, chang ah khan ah na bi vai.
32 “Ning m'hni gui ci bäng nami m'hni tu ba ung, a i hawkcha ah Khanpughi ah hrilham nami gah khai ang? Katnak bik ci gui naw phi
m'hni gui ci cu m'hni tu ba ci gui nei.
33 Nami khan ah akni bik ciah chang ah khan bäng ah akni nami bi tu ba ung a i hawkchaa ah Khanpughi ah hrilham nami gah khai ang?
Kat nak bik ci gui phi acun ah mäih ah bik ci gui nei.
34 Ning thung ba gui hlawt khai ah nami ngaih ah chang bäng-am nami k'pu m'hnih ah a kiak ung a i hawk chaa ah Khanpughi ah hrilham
nami gah khai ang? Kat nak bik ciah gui ah chang gui phi, Na thung
law ba khai ciah ngaih u nak awn chang-am k'pu tuk ci gui nei.
35 Nangmi cu nami gaa nami m'hni vai, chang ah khan ah akni nami bi vai. Gah ba vai ciah kä ngaih u en ah nami ng'pu tu vai. Cun ah
nami bi ung nangmi cu hlüngtai ciah m'tamkhah nak gah ne, hlüng
pik'bäih ciah Khanpughi ah hta ah nami kiak khai. Cun ah
Khanpughi cu m'gein nak kä hmat ci gui la changshe gui ah khan
ah akni bik ci.
36 Nami Pa Khanpughi naw a ning m'gein gui ah mäih ah nami ng'gein tu vai.
Chang M'Khoichaa ah Mawng
(Matthe 7:1-5)
37 Chang ah kat nak kä na pyein peit vai, cun ung Khangpughi naw na kat nak kä ning pyein Pek khai. Chang kä nami m'shuk chaak vai,
cun ung Khanpughi naw kä ning m'shukcha gui khai. Chang ah kat
nak nami m'gein vai, cun ung Khanpughi naw nami kat nak ning
m'gein gui khai.
38 Chang-am nami peit vai, cun ung Khanpughi naw ning pe ba gui khai. Det ne, khuk ne, m'htung chah ne nami peit ung, a cun ah nami gah
ba khai. Nän ne chang-am nami peit nak ung, Khanpughi naw
nän ne ning pe ba gui khai” ci ne m'cäi gui ci.
39 Bawipa Jesuh naw am tumtäng nak cu, a mik m'dauh ci naw, amik m'dauh cu lam kä m'shüm hlawt khai, lam am shüm ung ani nik
hnih ghem ah lut khai goi.
40 Ng'thei tuk ci cu m'thei tuk ciah kä ng'vai pi ci, Cun ung phi ang thei tu zawp kawn ah a saza cu k'phaa hning ci.
41 Na mät ah mik ek kä hmuh ah na paw ah mik mu ung ng'väi hta cu kä na teng peit vai.
42 Na mät ah mik ek kä ghu ah a i cha ah na paw-am na mik ek ning ghu pe vang ci ne, na pyein thei khai zaw? Limmaa ciah chang gui
ngai vä, na mät ah mik ek na ghu kawn ah vah na paw ah mik ek
hmu ne a ghu vai ah nam thein thei khai ah kiak ci.
Aghing La Aktheih
(Matthe 7:16-20; 12:33-35)
43 Aghing nik ci cu shek ci ah kä m'theih ci. Aghing akshe cu akni ah kä m'theih ci.
44 Sing am theih awn aghing cu hmat vai kiak ci. Ng'hling sing ung k'thei m'theih sei kä chan man, ng'hlo ma ah sapyit up kä k'bih
man.
45 Am lung ngaih nik ci cu akni ah ng'thu ng'htau ci, am lung ngaih shek ci cu akshe ah ng'thu ng'htau ci. A i ah kia sei ci ung,
chang naw am lung ung om ci vah, a shai awn pyein ci.
Im Co Ciah Chang Pahnih
(Matthe 7:24-27)
46 “Ka ng'thu kä ngai lang ne a i ah kia sei Bawipa, Bawipa ci ne nami na khü ang?
47 Kei ah law ne ka ng'thu theing ng'za ne läk ciah chang cu lung ung khui shawk ne, k'tung ling ne, im co ci awn täng ci.
48 Kho khi ne aa sei tuinu ang güüt law ung phi cun ah im cu khäng khai ah cawh ah kia ne, kä ng'gäi hlawt ci.
49 Kei ah pyein ah ng'thu theing cu ng'za lang ne, kä läk ciah chang cu bigin ung khui shawk ne im co ci awn täng ci. Ani cu
kho khi ne aa ne tuinu ang güüt law ung ng'gäi ne maih zawp
khai” ci ne m'cäi gui ci.