LUKA
AH GUK NG'THU NI
The Gospel According to Luke
Luka ah Guk ah Ng'Thu Ni ung Bawipa Jesuh cu Israel Chang gui ah shaitaak ah Hunbawi la chang nüng ah Hunbawi nei, ciah guk ah kiak ci. Luka naw Bawipa Jesuh cu dukhaih ciah chang gui ah ma ah Ng'Thu Ni pyein khai ah Khanpughi ah Mumcha naw am düih ah kiak ci, ci ne guk ci. Shin ah Ng'thu Ni cu apäng avan ung khüikha ciah chang gui ah kümbe nak vai ah phi kiak ci. Luka naw atün nak ung Bawipa Jesuh m'dek khan ung a zu ng'tüi law nak ami ng'shäu ah mawng la a khüm nak ah Bawipa Jesuh khankho ah a kai ba ah mawng gui a guk nak ung zeikiai nak cu dang ci. Bawipa Jesuh khankho ah a kai ba kawn ah khrithabum ah bilawh ang shawng kau law nak cun phi a shin guk ci naw Lam k'Tu Ca uk ung a guk ah kiak ci.
Ak kaa ah guk ah a mawng ak tawi gui 2 la 6 ung Khankho chang gui ah ng'äi gui la Bawipa Jesuh ang tüi law zah ung htome k'shäm gui law ne ami taigü ah mawng, Bawipa Jesuh ak hmaw sang ung pum im ah a hteh ah mawng, chang m'gein thei ciah Samaritan chang la maih ciah htome awn m'tumtäng nak gui ah mawng gui cu, shin ah Luka ah guk ah Ng'Thu Ni bäng ung om ci. Shin ah ng'Thu Ni avan ung Taigü ah mawng, Mumcha Theing ah mawng, Bawipa Jesuh ah bi bi nak ung hnumi gui ah bilawh tu ah mawng la Khanpughi naw kat nak am gein nak ah mawng gui cu ak tung ah guk ci.
1
Teihpüi Theophilus aw:
1 Mik mi ah zum nak ung dang pyi ciah amawng tung gui cu chang akda naw akni pi ah gu ne piang pyi ci gui.
2 Cun ah ami guk cu akhtük ung hmuhmat ci gui la pyeinsak ci gui ah m'thein m'kan ba gui ah kiak ci.
3 Cun ah kia sei shin ah mawng gui cu, kei naw va tün ne teng kheng netah, na hmat thei vai ah guk ung nik khai ah ngai ne ka guk nei.
4 Shin cu nang naw na hmuh ng'zak man phung akcang ah küm khai ah na shüm hmat vai ah ka guk ah kiak ci nei.
Tuihnim Johan Ang Tüi Vai ah Mawng Shäu Nak
5 Judea kho ung Herod ghangpughang naw a uk sang ung Taigü kyong chang Zechariah ming nak ciah taigü om ci. Ak chu cun phi taigü kyong ung kaa Elizabeth ming nak ciah kiak ci.
6 Ngani cu Khanpughi ah ng'zak hlü ah om ni ne, Bawipa ah thukhän shaitaak cun phi läk ci goi.
7 Ngani cu ghi law pyi ci goi, Elizabeth kä hta sei ani hta kä om ci.
8 Hnüüp ät ung Zechariah cu Taigü im kyong ah taigü ah bi cu bi ba ci.
9 Taigü gui ah thung man ah mang kiang ung phyuh vawi khai ah ghü u sei, Bawipa ah Taigü im ah hteit ci.
10 Ani naw kyong ah vawihpeh vai m'khih ne ak phyuh theh zah ung chang gui akpung ah taigü ci gui.
11 M'khih ne vawihpeh nak mang kiang k'patlam ung Bawipa ah khankho chang dang law sei;
12 Zechariah naw hmu netah cäi ne kyik ci.
13 Cun ung phi khankho chang naw, “Zechariah aw, kä na kyih vai nei, Khanpughi naw na k'taigü cu ng'zak ci, na k'chu Elizabeth cu pamihta ah hta lawk khai, ang ming cu Johan ah na sui vai.
14 Ani ang tüi law ung a i hlawk ah na zeikiai khai ang?, na püipaw gui mä a i hlawk ah zeikiai tuk khai gui ang?
15 Ani cu Khanpughi lam ah chang m'gäi ah kia ci. Awktat man phung kä ei awk khai, anu puk ge ung Mumcha Theing awn kümbe khai.
16 Ani naw Israel chang van cu ami Bawipa Khanpughi ah law püi ba gui khai.
17 Ani cu Bawipa ah lam ung lam ma ciah kia ne, profet Elijah ah mäih ah khüighaat ne hlüngtai khai. Ani naw pa la hta atäng ah om ba sak goi khai; ani naw ng'thu kä ngai ciah chang gui düng ciah lu ng'lang nak ung ng'hlah law ba sak gui khai; Khanpughi ah hmawk ah ng'düi ge khai gui ah Bawipa ah chang gui cu ana m'cäi gui khai,” ci ne pyein ci.
18 Zechariah naw khankho chang-am, “Cun ah a kiak vai cu a i hawk cha ka hmat khai ang? Kei phi ka ghi lawk ci, ani phi ghi lawk ci” ci ne pyein ci.
19 Khankho chang naw, “Kei cu Khanpughi ah ma ah ng'düi ciah Kabriel nei; shin ah ng'Thu Ni nang-am ka ning m'thein khai ah Khanpughi naw ana tüih law nei.
20 Cun ung phi akhin a küm law ung bä khai ah ng'thu kei ah pyein cu nang naw kä na zum ci. Cun kä na zum ah hmawk ah nang cu na aang khai, kei ah ng'thu bä ne kä ang dang pha güt käng thu phung ah na om khai” ci ne kiak nak ci.
21 Cun ah khin pum ung Zechariah cu chang gui naw ging law zai u netah, a i haw ne shin güt leng leng pum im kyong ah a ding ang? ci ne cäicat ci gui.
22 Ani cu a luh law ba ung kä ng'thu ba thei ci. Cun ah kia sei ngami naw Taigü im kyong ah mikhmuk ciah ah hmat ci gui. Kä ng'thu ba thei netah akut awn nüt püi gui ci.
23 Taigü im kyong ah taigü nak a khin ng'pyi sei, Zechariah cu a im ah hteit ba ci.
24 Cun kawn ah shou hta khätah Elizabeth cu m'gai law ne cha hma ung kä luh law ah om ci.
25 Elizabeth naw, “Khanpughi naw kei cu nam gein pyi ci, Chang ah ma ah lü ng'aa nak ung kaa nak phiawn pyi ci” cik ci.
Bawipa Jesuh Ang Tüi Law Vai ah Mawng Ami Shäu Nak
26 Elizabeth am gai nak ak cha chuk nak ung, Khanpughi naw khankho chang Gabriel cu Kalile kho Nazareth gawnu ah tüi lawk ci.
27 Khankho chang naw David ghangpughang ah ng'shon Josef ah k'chu vai ami beit ah Mari-am ng'thu m'thein lawk ci.
28 Khankho chang naw Mari ah ma ah, “Na khan ah ding gei nak om sä, Bawipa naw atäng ah ning om püi ne, küikyang ciah hrilham ning k'be sä.”, ci nak ci.
29 Mari cu khankho chang ah ng'thu ng'za ne cäicat netah, “a i a pyein ni mä” ci ne ngai ci.
30 Khankho chang naw, “Mari awi, kä kyikyawk ä, Khanpughi naw ning m'hlüngtai pyi ci nei.
31 Nang cu m'gai ne pami hta ah na hta lawk khai.
32 Ang ming cu Jesuh ah na sui vai. Ani cu hlüngtai ne hlüngtai pi ciah Khanpughi ah hta ah kiak ci. Ani cu David ghangpughang ah ang shon ah kia sei, Khanpughi naw ghangpughang ah ngoh sak ba khai.
33 Ani cu Jakop ah hta ng'shon ung ngawi zä ghangpughang ah kiak khai, a uk nak cu kä düt hlawt khai” ci ne pyein ci.
34 Mari naw khankho chang-am, “Kei cu ng'lamihta nei shin ah na pyein gui cu a i hawk cha ah kia thei khai ang?” ci ne ng'shik ci.
35 Khankho chang naw Mumcha Theing nak khan ah gawk lawk khai, Khanpughi ah hlüngtai nak phi nakkhan ah gawk lawk khai. Cun na kia sei theingthap ciah ak hmaw cu Khanpughi ah Htapa ah ming khai.
36 Na paw Elizabeth ah mawng cu ngai shüm ä, ng'züü ciah ami pyein, ghi law pyi ciah chang ani cu, tuhbäi cha chuk m'gai pyi ci nei.
37 Khanpughi ah kä m'khüt a i kä om ci nei” ci ne pyein ci.
38 Mari naw, “Kei cu Khanpughi ah changshäm ah ka kiak ci, na pyein ah mäih ah kia sä” ci khätah, khankho chang cu maih ba ci.
Mari cu Elizabeth ah Hteit ci.
39 Cun kawn ah Mari cu pawng m'hteim ne, Judea kho, khosiip lam gawnu tumat ah hteit ci.
40 Mari cu Zechariah ah im ah hteit ne Elizabeth cu zavaih nak ci.
41 Elizabeth naw Mari ah zavaih nak ang zak sang ung a puk kyong ah ak hmawhta cu hnün ci. Elizabeth cu Mumcha Theing awn be netah,
42 “Nang cu hnumi gui nüng ung hlüngtai nak om pi bäih ci, na hta law nak vai ah ak hmaw cun phi hlüngtai nak om ci!
43 A i ah kia ne, kei ah khan ah shin ah hlüngtai nak gui a gawk law ang?
44 Ka Bawipa ah anu cu kei ah gawk lawk ci nei. Nang ah zavaih nak kang zak vai-am kei ah puk kyong ah ak hmaw cu zeikiai ne hnün ci nei.
45 Khanpughi ah ng'thu akcang ah bä lawk khai ci ne, na zum ah hmawk ah nak khan ah zeikiai nak om ci nei” ci ne m'lau ne pyein ci.
Mari ah M'Hlüngtai nak Ng'"Ai
46 Mari naw,
Ka m'lung naw Bawipa m'hlüngtai ci;
47 Khanpughi Hunbawi hmawk ah ka mumcha zeikiai ci,
48 Ani naw zoken ciah akchang shäm cu na shüm ci nei,
Tuhbäi tün ne chang van naw zeikiai chang ah na khü
Khai gui nei,
49 A i ah kia sei ci ung hlüngtai säih ciah Khanpughi
naw kei ah hmawk ah aküikyang cu bi pyi ci nei.
Ani ah Ming cu theingcim ci;
50 Ani m'tamkhah ci gui ah khan ah ang shon päng ung
am gein nak cu dang sak ci.
51 Am gäi nak ah akut awn am lung m'däm ci gui cu,
m'taai gui zawp ci.
52 M'gäi ciah ghangpughang gui mang kiang ung kaa
zuk chah gui ne, zoken ciah chang gui han chaang
gui ci.
53 Cawigha ci gui-am tuihlim ci tumbei gui ne, bämang ci
gui cu ami züng ah hteh sak gui ci.
54 Pupa gui ah ma ah a shaitaak cu kümbe sak ne, ak chang
shäm Israel chang gui cu m'htei gui khai ah law
pyi ci nei.
55 Ani naw Abraham-am am dang ah am gein nak cu, hta ng'shon
ung dang lä ci nei” ci ne ng'äi ci.
56 Mari cu Elizabeth ni ah cha thum om tu netah, a im ah
hteit ba ci.
Tuihnim Johan ah Ng'Tüi Nak
57 Elizabeth cu akcha küm law sei pami hta ah hta lawk ci.
58 A im ng'phei la a mät zah gui naw, ani ah khan ah Khanpughi naw cäicat vai abi cu hmu u netah, ani awn atäng ah zeikiai tuk ci gui.
59 Ak hmawhta hnüüp chih lüng sei, vun-ah pawi ami bi nak ung law tuk ciah chang gui naw, apa ah ming, Zechariah bä ah sui ba vai ah ng'za hlük ci gui.
60 Cun ung phi anu naw “Johan ah sui vai nei” cik ci.
61 Ngami naw “nangmi ung cun ah ming kä om man ci” cik ci gui.
62 Cun kawn ah apa naw a i ah a sui hlü ah nüt ne ng'shik ci gui.
63 Zechariah naw guk nak vai k'thäh gui netah, “Aming cu Johan nei” ci ne gu khätah, chang gui cu cäicat ci gui.
64 A cun vai-am Zechariah cu ng'thu law ba thei netah, Khanpughi cu m'hlüngtai ci.
65 Ami im ng'phei gui cu ami van kyikyawk ci gui.
66 Cun ah a mawng gui cu Judea kho, khosiip lam avan ung thang zawp ci. Cun ah mawng ng'za tuk ciah chang gui naw, “Cun ah ak hmaw cu a i ah mäih chang ah kia lawk khai ang?” cik ci gui. Cun ah ang htei kawn ah Bawipa ah hlüngtai nak cu ani ah khan ah om ci.
Zechariah ah Ng'Cä Nak
67 Johan ah pa Zechariah naw Mumcha Theing awn be netah,
Khanpughi ah ng'thu a pyein cu:
68 “Israel gui ah Khanpughi Bawipa cu m'hlüngtai tu vä,
Ani cu akchang gui m'htei gui khai ah law ne,
phiawn sak gui pyi ci nei.
69 Ak changshäm David ah hta ng'shon ung, hlüngtai ciah
Hunbawi cu dang sak pyi ci nei.
70 Cau theingthap ciah profet gui-am shaitaak nak a peit
gui ah mäih ah,
71 Ani naw ga ah kut kyong ung kaa la, na thüi na gui ciah
kut kyong ung kaa na hun gui pyi ci nei.
72 Ani naw mi pupa gui am gein nak gui cu pyein ne,
ang thu khän theing cun phi shüm ci nei.
73-74 Mik mi cu ga ah kut ung nak phiawn gui ne, kä kyikyawk
ne abi mi bi vai ah mipa Abraham ah ma ah
shaitaak nak pe pyi ci.
75 Cun ah kia sei mik mi cu theingcim nak la düng nak awn
Khanpughi ah ma ah mi ghin nak chuih mi om khai.
76 “Nang, kei ah chang hmaw, ahlüngtai säih Khanpughi ah
profet ah ning khü vai nei.
Nang cu Bawipa ah ma ung law ne, ani ah hmawk ah
lam na piang khai.
77 Bawipa ah ak chang gui-am, ami kat nak m'gein gui sei,
hun nak ami gah vai ah mawng m'thein gui khai nei.
78 Mik mi ah Khanpughi cu m'gein nak la k'dük nak awn
be ci.
Ani naw a hun nak ah akdei cu mi khan ah ng'shü law
sak ne,
79 Sihnak ah ang hnim ka ah om ci gui ah khan ah
khankho ah akdei cu khang lawk khai,
mik mi-am phi ding gei nak lam nam shüm gui khai” ciah kiak ci.
80 Ak hmaw cu däm ng'vai law ne pumsa, mumcha avan ung kümbe lawk ci. Ani cu Israel chang gui ah ng'lung ah dang khai ah bi kä abi pha güt ung kho ng'gau kho ah om cang ci.